Read Bakoko Elōg-Lóma 16 Bible Online

Elōg-Lóma 16 - Bakoko bible

Elōg-Lóma 16

¹Á élōgyāŋ, mag byeehɛ ɓɛ́nɛ Fébɛ, mɔɔ́lyāŋ wahá a mindígá nyɔ́ a ŋga sál kaa ɛmbón écɛ̄ŋ á Éɓasɛ ɛ́ lɛ́ á tísɔn nyí Senkeléas.

²Miní lɛ́glé nyɛ́ á nyaa ɛ kɔɔ́ ákaa ndog-Ɔlolómɛ̄ ɛ ŋga ɓɔ̄ŋ. Miní óŋgānɛ́ nyɛ́ á jóō nɛ́ jam eceg sig a ŋga ɓɛ́la kóó yāná, átɔm nɛ́, a táthán la ŋgandag ɛ́ ɓot, la mā-mɛ̄n ki á élɔŋ.

³Miní tamlege ma Pilíska la Akílas, ɓasál élɔŋ la ma á nsɔ́n á Yésus Kilístus.

⁴Ányúū lí suŋ lí ma, bí ɓɛ́ɛ́ bú jáŋɛ́ éniŋ yáɓá. Ah mā-ntámɛ́ ɓé nɛ mi ŋga tíi ɓɔ́ mítamlan, ndí Biɓasɛ bísɛ bí bí sē ɓé á lílōm lí Élōg-Yúda byɔ́g bíg tíi ɓɔ́ mítamlan.

⁵Miní tamlege ki ma ɓot bí Éɓasɛ bí ŋga kɔ́tan á mílɛ̄ɛ̄ māɓá. Miní tamlege ma taŋ yama liwándá Epenétɛ, nyɔ́ a lɛ mut ɔsú a yéɓe la Nyɔ́-a-Pɔ́hlɛ á épah-ékombo yé Ásia.

⁶Miní tamlege ma Malía nyɔ́ a sál ŋgándag ányúū yāná.

⁷Miní tamlege ma Andoloníkus la Yúnias, ɓot ɓáma bí m̀biya, ɓá bí ɓɛ́ élɔŋ la ma á m̀ɓog. Bí lɛ́ mbíi ɓáōmɓɛ, bú dúgú ki li ɓɛ́ lí ɓá bí Nyɔ́-a-Pɔ́hlɛ la ma.

⁸Miní tamlege ma Ampiliátus, taŋ yama liwándá á ŋ̀atanɛ́ la Nyɔ́ŋ-Ɛsáŋɛ́.

⁹Miní tamlege ma Úlbɛn, liwándá jáhá lí nsɔ́n, á nsɔ́n á Nyɔ́-a-Pɔ́hlɛ, miní tamlege ki ma taŋ yama liwándá Stákis.

¹⁰Miní tamlege ma Apélɛs, nyɔ́ a étɛ́ nɛ a yéɓé la Nyɔ́-a-Pɔ́hlɛ, miní tamlege ma ɓot bí ndáá nyí Alistobúlɛ.

¹¹Miní tamlege ma Helódion, mut a lilóm jáma. Miní tamlege ma ɓot bí ndáá nyí Nalsísɛ ɓá bí ŋga yéɓe la Nyɔ́ŋ-Ɛsáŋɛ́.

¹²Miní tamlege ma Tilífɛn la Tilifósɛ, ɓá ɓá sál ŋgándag ányúū Nyɔ́ŋ-Ɛsáŋɛ́. Miní tamlege ki ma mɔɔ́lyāŋ a mindígá nyɔ́-a-ediŋ Pɛ́lsis, nyɛ́g a sál ŋgándag ányúū Nyɔ́ŋ-Ɛsáŋɛ́.

¹³Miní tamlege ma Lúfus, nyɔ́ Nyɔ́ŋ-Ɛsáŋɛ́ a pɔ́hɔ, miní tamlege ki mā nyáŋɛ̄ nyɔ́ nyɛ́g a lɛ yɛ́ɛ.

¹⁴Miní tamlege ma Asiŋkilítɛ, Felégɔn, Hɛ́lmɛs, Patolóbas, Hɛ́lmas, la élōgyāŋ yé ɛ́ lɛ́ élɔŋ la ɓɔ́.

¹⁵Miní tamlege ma Filológɛ la Yúlia, Neléa la mɔɔ́nyāŋ a mindígá, Olímpas la ndog-Ɔlolómɛ̄ ɛsɛ̄ ɛ lɛ̄ élɔŋ la ɓɔ́.

¹⁶Miní tamlán ɓɛ́nɛ la ɓɛ́nɛ, miní óóɓán átē a ekɔ́ɔ́ línyaŋ. Biɓasɛ bísɛ bí Nyɔ́-a-Pɔ́hlɛ bíg tama ɓɛ́nɛ.

¹⁷Á élōgyāŋ, mag sɔ́hye ɓɛ́nɛ nɛ́ miní nyɔŋ litát la ɓá bísɛ bí ŋga sɔ́la mbáglán la lisandá, eceg bí ŋga jáŋɛ ɓayéɓe la bíŋ biɓaŋgá byáɓá bí bí ŋga tɛ́ŋgánɛ yé ɓá yéglɛ́ ɓɛ́nɛ. Miní nɛ́ŋɛ̄ la ɓáŋ ɓot.

¹⁸Ányúū nɛ́, ɓot kaa ɓɔ́ bí ŋgá sále ɓé Nyɔ́-a-Pɔ́hlɛ Ɛtáŋɛ wahá, ndí bíg sál ja ányúū mibum máɓá, la ki nɛ́ bíg yɛ́ɛ ɓot bí sē ɓé pɛɛ la bilɔ́ŋgɔ bí bíɓaŋgá, ndí la lɛɛ́-lɛ̄ɛ́ yáɓá mikwɛl mí mínaa.

¹⁹Ndí ɓɛ́nɛ, ɓot bísɛ bíg yí nɛ́ miníg ógle Nyɔ́ŋ-Ɛsáŋɛ́. Mi lɛ́ hɔ́ mívag ŋgandag la ɓɛ́nɛ. Ndí mag somo nɛ́ miní ɓɛ́la eyí nɛ miní ɓɔ̄ŋ já m̀ɓɛɛŋ la m̀ɓɛɛŋ, miní ɓɛ́ ki pɛ́ɛ á lí pún lí áɓē.

²⁰Puh eceg, Ɔlolómɛ̄ a ŋga tíi nsaŋ ag kɛ li kɔgte lí Sátan nyɔ́ a lɛ ɓɛ́nɛ á sí míkoo. Ndómbo nyí Ɛtáŋɛ wahá Yésus Kilístus ɛ ɓɛ́ la ɓɛ́nɛ.

²¹Timotéo mut wama a elɔŋ ɛ́ nsɔ́n ag tama ɓɛ́nɛ, ɓot bí lílōm jáma, Lúsius, Yásɔn la Sosipatélos ɓɔ́g bíg tama ɓɛ́nɛ.

²²Mā Tɛ́ltíus, nyɔ́ a Póol a tí nɛ mi cíílé nyɛ́ nyí káati, mag tama ɓɛ́nɛ á ŋ̀atanɛ́ wāhá la Nyɔ́ŋ-Ɛsáŋɛ́.

²³Gáyus, mut a lɛ́glé ma á yóg yɛ́ɛ̄, nyɔ́ a lɛ́glé ki ɓot bísɛ bí Eɓasɛ ag tama ɓɛ́nɛ. Elástɛ, ǹnaŋɛ-ŋkuh a tísɔn ag tama ɓɛ́nɛ, nlemlem ki la mɔɔ́lyāŋ wāhá Káltus. [

²⁴Ndómbo nyí Nyɔ́ŋ-Ɛsáŋɛ́ Yésus Kilístus ɛ ɓɛ́ la ɓɛ́nɛ bísɛ. Ɛ́ ɓɛ́ náŋ.]

²⁵Bi ɓégɛ́ Ɔlolómɛ̄ nyɔ́ a byɛ́ɛ̄ ŋguu li ólɓɛ lí ŋyéɓé wáná, kaa ɛ́ ŋga lāglɛ á Pɔ́l M̀ɓɛɛŋ nyí mi ŋga camanɛ, nyí ɛ ŋga yíhɛ ɓɛ́nɛ nzáá a lɛ Yésus Kilístus. Nyíŋ Pɔ́l M̀ɓɛɛŋ ya yɛ́lɛ́ mbaŋ nyí Ɔlolómɛ̄ nyí ɛ ɓɛ́ɛ́ ɛ́ sɔ́lɛ ɓɛɛvéé.

²⁶Ndí nyí lɛn, Ɔlolómɛ̄ a pámɛ́ yɔ, ɔ yíhɛ́ yɔ milóm mí mí sē ɓé mí Élōg-Yúda á bíciilé bí ɓápɔ́tle-ɓɛ́ɛ́, li oŋle la mitɛ́ɛ́yɛ́gɛ mɛ́ɛ́ nyɛ́ Ɔ́lolómɛ̄ nyɔ́ a ŋga nīŋ á éɓem la éɓem, á li ɓɔŋ nɛ́ míŋ milóm mísɛ mí yéɓé la nyɛ́, mí óglé ki nyɛ́.

²⁷Bi ɓégɛ́ Ɔlolómɛ̄, Ɓátúpēgɛ. Lípēm lí ɓɛ́ la nyɛ́ li kele la Yésus Kilístus á éɓem la á éɓem! Ɛ́ ɓɛ́ náŋ!