Read Bakoko Elōg-Kɔlínto 1 6 Bible Online

Elōg-Kɔlínto 1 6 - Bakoko bible

Elōg-Kɔlínto 1 6

¹Á élōgyāŋ, eceg miní byɛ́ɛ̄ mípɔ̄t á póla yaná, nɛ̄-láá miní ŋga ɓáá m̀mím lí yíg lí ndog-Ɔlolómɛ̄ á lí kɛ á yóg ɓot bí ŋgá yí ɓé Ɔ́lolómɛ̄ nɛ ɓɔ́ nɛ́ bí kááhɛ́ ɓɛ́nɛ é?

²Ɓaá miní ŋgá yí ɓé nɛ ndog-Ɔlolómɛ̄ nɛ ɛ ŋga kɛ́ lí kááhɛ lí ŋkɔŋ-á-sí é? Kíyáɓɛ́ hɔ́ nɛ ɓɛ́nɛ nɛ́ miní ŋga kɛ́ li kááhɛ lí ŋkɔŋ-á-sí, nɛ̄-láá hɔ́ miní kɔ́ɔ́ ɓé lí kááhɛ lí pūh mam ná é?

³Ɓaá, miní ŋgá yí ɓé nɛ ɓɛ́hɛ biíg kɛ li kááhɛ lí áŋgɛl é? Kí ɓa kááhɛ́ hɔ́ áŋgɛl, ɛbuu-la-ŋgele yáŋvéé la mam mí yé eniŋ é?

⁴Ányúū yéé hɔ́ eceg miní byɛ́ɛ̄ yíŋ nyaa mípɔ̄t, miní ŋgá nyɔ̄ŋ ɓé ɓot Éɓasɛ ɛ́ ŋgá ditɛ kaa ɓakááhɛ é?

⁵Náŋ a lɛ ɓɛ́nɛ láas a mbɔɔla. Miníg dígānɛ nɛ́ á póla yaná, manáh ɛ́n ɓé mut tɔ wa nyɔ́ a byɛ́ɛ̄ lísɔŋtánɛ, nyɔ́ a kɔɔ́ lí kááhɛ lí mípɔ̄t máná mí línyaŋ é?

⁶Nɛ̄-láá linyaŋ lí éɓasɛ lí ŋga lá li sɔ́mhan é?, Á véé ki, á yóg ɓot bí ŋgá yéɓe ɓé la Ɔlolómɛ̄!

⁷Á mbálɛ, eceg mipɔ́t mí lɛ́ á póla yaná, náŋ ag étɛ nɛ́ maná kū. Ányúū yéé miní ŋgá yéɓyag ɓé nɛ bí ɓɔŋ ɓɛ́nɛ mam míh tɛ́ɛ́ ɓé é? Ányúū yéé miní ŋgá mwahkɛgɛ ɓé nɛ́ bí nyɔŋlé ɓɛ́nɛ yoóm ɛ́ lɛ́ ɛ́yānā é?

⁸Á mveŋghanɛ́, ɓɛ́nɛ nɛ́ miní ŋga ɓɔ̄ŋ mam míh tɛ́ɛ́ ɓé, ndí miníg nyɔŋle ki ɓáŋá yoóm bí byɛ́ɛ̄. Á bíŋ bísɛ elōgnyɔ̄ŋ yáná ki nɛ́ miní ŋga ɓɔ̄ŋle náŋ!

⁹Ɓaá, miní ŋgá yí ɓé nɛ ɓot bíh tɛ́ɛ́ ɓé sim bí ŋgá kɛ ɓé lí koto lí Ékombo Ɔ́lolómɛ̄ é? Miníh yɛ́ɛ́kɛ́gɛ́ ɓé ɓɛ́nɛ-mɛ̄n! Ɛ́ ɓɛ́ ɓot bí éniŋ ɛ́ mpuŋgú, ɛ́ ɓɛ́ ɓaɓégɛ-bisát, ɛ́ ɓɛ́ ɓot bí ndeŋg, ɛ́ ɓɛ́ páam ɛ́ ŋga ɓɔ̄ŋ mam kaa ɓondígá, ɛ́ ɓɛ́ páam ɛ́ ŋga nānte la yíŋí páam etám,

¹⁰ɛ́ ɓɛ́ ɓot bí wíī, ɛ́ ɓɛ́ ɓakágtánɛ-mam mí ɓot ɓatám, ɛ́ ɓɛ́ ɓapéé-mílɔg, ɛ́ ɓɛ́ ɓaɓeeyɛ-ɓot-mam, ndí tɔ mitɔnɓa, ɓáŋ bísɛ bí ŋgá kɛ ɓé lí koto lí Ékombo yé Ɔ́lolómɛ̄.

¹¹Náŋ nɛ́ apuh á ɓot á póla yaná á ɓɛ́ɛ́. Ndí á jóō lí Nyɔ́ŋ-Ɛsáŋɛ́ Yésus Kilístus, li kele ki la M̀búl á Ɔ́lolómɛ̄ Lōó jáhá, Ɔlolómɛ̄ a sō ɓɛ́nɛ, ɔ yáanɛ́ ɓɛ́nɛ ɓápūán, ɔ tɛ́ɛ́ ɓɛ́nɛ sim.

¹²Mam mísɛ mí lɛ́ mā kundɛ, ndí mɔ́ mísɛ mí sē ɓé nsɛ́ŋ. Mam mísɛ mí lɛ́ mā kundɛ, ndí mi ŋgá kɛ ɓé mā lí yaan lí ŋyɔ́ŋ á jam tɔ já.

¹³Yé ɛ́ ŋga díéɓɛ ɛ́ lɛ́ ányúū libum, libum ki lú ɓɛ́ ányúū yé ɛ́ ŋga díéɓɛ, Ɔlolómɛ̄ nyɛ́ ag kɛ li manɛ lí yé ɛ́ ŋga díéɓɛ, a mánɛ́ ki libum. Ndí, nyuú ɛ sē ɓé ányúū mpuŋgú á ndeŋg, ɛ lɛ ányúū Nyɔ́ŋ-Ɛsáŋɛ́, Nyɔ́ŋ-Ɛsáŋɛ́ ki ɔ ɓɛ́ ányúū nyuú.

¹⁴Ɔlolómɛ̄ nyɔ́ a pāhyɛ́ Nyɔ́ŋ-Ɛsáŋɛ́, nyɛ́g ag kɛ ɓɛ́hɛ li pahyɛ la ŋguu yɛɛ́.

¹⁵Ɓaá, miní ŋgá yí ɓé nɛ nyuú yáná ɛ́ lɛ́ bíjo bí nyúū nyí Nyɔ́-a-Pɔ́hlɛ é? Ɓaá, mag nyɔŋ hɔ́ bíjo bí nyúū nyí Nyɔ́-a-Pɔ́hlɛ á lí yaanɛ lí byɔ bijo bí nyúū bí míndīgá-akwala é? Á mbálɛ kɛ́m!

¹⁶Ɓaá, miní ŋgá yí ɓé nɛ tɔ nzáá a ŋga āt la mindígá-akwala ag yaan nyuú yā la nyɛ́ é? Átɔm nɛ́ Licii-Lipúán líg laga nɛ́: «Ɓɔ́ bíɓáa bíg kɛ li yaan lí mut wa.»

¹⁷Ndí nyɔ́ la nyɔ́ a ŋga āt la Nyɔ́ŋ-Ɛsáŋɛ́, ɓɔ́ bíɓáa bíg yaan mut wa á M̀búl.

¹⁸Miní nɛ́ŋɛ̄ la mpuŋgú á ndeŋg! Amáh wɔ́, aɓé ntám mut a ŋga ɓɔ̄ŋ á ŋga níŋgi nyɛ á nyúū á sē ɓé. Ndí, mut-a-ndeŋg, aɓé a ŋga ɓɔ̄ŋ á lɛ́ ányúū nyúū yɛ́ɛ̄ yɔ-mɛ̄n.

¹⁹Ɓaá, miní ŋgá yí ɓé tɔ ki nɛ̄ nyuú yāná ɛ lɛ ndáá-ecɛ́ŋ nyí M̀búl Mpúán, nyɔ́ a ŋga sɔ́le la Ɔlolómɛ̄ ndí ɔ tɔ́ɔ átē wāná é? Ɓaá, miní ŋgá yí ɓé nɛ miní sē ɓé ɓɛ̄ɛ́n bí ɓɛ́nɛ-mɛ̄n é?

²⁰Mut wa a lɛ nyɔ́ a sálá díyɛ ŋgandag á lí kɔpɔ lí ɓɛ́nɛ. Ɓéghánɛ hɔ́ Ɔ́lolómɛ̄ la nyuú yāná!