Read Bakoko Elōg-Kɔlínto 1 7 Bible Online

Elōg-Kɔlínto 1 7 - Bakoko bible

Elōg-Kɔlínto 1 7

¹Bi tímán sig á yé maná ciilé ma. Ɛ́ lɛ́ nsɛ́ŋ nɛ́ páam ɛ mwáhɛ jam lí ɓondígá.

²Ndí, á lí pún li biyógló, páam sig ɛ ɓɛ́la e wɛ́ɛ̄ ŋ̀gáá, mindígá sig ki a ɓɛ́la e wɛ́ɛ̄ nlóm.

³Páam sig ɛ ɓɔ́ŋlé ŋ̀gáá wɛ́ɛ̄ yé a nyɛ́ɛ nyɛ́ lí ɓɔŋle, mindígá ki a ɓɔ́ŋlé nlóm wɛ́ɛ̄ nlemlem.

⁴Ah mindígá ɓé nɛ a ŋga kanʼyɛ nyúū yɛ́ɛ̄, ndí nlóm wɛ́ɛ̄. Nlemlem ki, ah páam ɓé nɛ ɛ ŋga kanʼyɛ nyúū yɛ́ɛ̄, ndí ŋ̀gáá wɛ́ɛ̄.

⁵Nyɔ́ wa ah ɓenég ɓé nyɔ́ŋɔ́, amáh nɛ́ maná ámblán á lí tɔɔ náŋ ányúū puh eceg, á li ɓɔŋ nɛ́ miní vá ɓɛ́nɛ-mɛ̄n á mikánɛ. Ámbúh náŋ miní tímān káa miní mɓɛ́, á ŋkɔnwoŋɛ́ nɛ, ŋgí lí la lí lí byee lí nyúū yáná ɛ tí ǹsɔhɔ póla nɛ́ a céglɛ̄ ɓɛ́nɛ.

⁶Kí mag pɔ́t náŋ, mi ŋgá kanʼyɛ ɓé ma ɓɛ́nɛ, ndí náŋ ag yígle la ɓɛ́nɛ-mɛ̄n.

⁷Kóó yáma ɛ lɛ nɛ́ páam ɛ́sɛ ɛ́ ɓɛ́ káa ma. Ndí mut sig ag kuh ɛ́jɛ̄ɛ̄ líkaale lí tóɓó-tóɓó Ɔ́lolómɛ̄ a tí nyɛ́. Nyɔ́ wa jé, nyɔ́ŋɔ́ ntám jéŋé.

⁸Mag laga hɔ́ míkɔl la mikúh mí ɓóndīgá nɛ́ ɛ́ lɛ́ m̀ɓɛɛŋ nɛ́ bí tɔ́ɔ káa ma.

⁹Ndí, kíyáɓɛ́nɛ bí ŋgá la ɓé lí byee lí nyúū yáɓá, bí lɔ́mɓán, átɔm nɛ́ ɛ́ lɛ́ nsɛ́ŋ lí lɔ́mɓan li loo nɛ mut ag wú evéhé.

¹⁰Ah ma ɓé nɛ mi ŋga pɔ́t, ndí Nyɔ́ŋ-Ɛsáŋɛ́ nɛ a ŋga tíi ɓot ɓá lɔ́mɓan nyí ndag nɛ́: «Mindígá ah ɓáglágán ɓé la nlóm wɛ́ɛ̄.

¹¹Ndí kíyáɓɛ́nɛ a ɓáglán la nlóm wɛ́ɛ̄, ah lɔ́mɓágán ɓé pɛ, tɔ nɛ́ a kóm nsaŋ la nlóm wɛ́ɛ̄, la ki nɛ́, páam ɛh duhlág ɓé ŋ̀gáá wɛ́ɛ̄.»

¹²Vá mā-mɛn nɛ́ mi ŋga pɔ́t ndí ah Nyɔ́ŋ-Ɛsáŋɛ́ ɓé. Mag laga hɔ́ ɓáŋá ɓátām nɛ, kíyáɓɛ́nɛ mɔɔ́lyāŋ wá a byɛ́ɛ́ ŋ̀gáá wɛ́ɛ̄ nyɔ́ a ŋgá yéɓe ɓé la Ɔlolómɛ̄, ndí nyɔ́ŋ mindígá a ɓɛ́la kóó li niŋ la nyɛ́, ah duhlág ɓé nyɛ.

¹³Kí yá ɓɛ́ ki nɛ́ mindígá nyɛ́g a byɛ́ɛ́ nlóm nyɔ́ a ŋgá yéɓe ɓé la Ɔlolómɛ̄, ndí nlóm a ɓɛ́la kóó li niŋ la nyɛ́ ah duhlág ɓé nyɛ.

¹⁴Ányúū nɛ, páam nyí ɛ ŋgá yéɓe ɓé la Ɔlolómɛ̄ ɛg kɛ li púú li kele la ŋ̀gáá wɛ́ɛ̄, nlemlem á jam ki, mindígá nyɔ́ a ŋgá yéɓe ɓé la Ɔlolómɛ̄ nyɛ́g ag kɛ li púú li kele la nlóm wɛ́ɛ̄. Ah náŋ ɓé, ɓɔɔ́n ɓáná bíg la li ɓɛ́ lí mívīn nyaa nɛ́ nyí vɔ́ŋɔ́ɔ bíg púú ɔ́sū ví Ɔ́lolómɛ̄.

¹⁵Mut la mut nyɔ́ a ŋgá yéɓe ɓé la Ɔlolómɛ̄, ndí ag sómo li ɓáglan, a ɓɔŋ náŋ. Váŋ hɔ́ nyɔ́ a ŋga yéɓe la Ɔlolómɛ̄, a ɓɛ́ páam tɔ mindígá ag tɛ́lɛ kundɛ. Ányúū nɛ Ɔlolómɛ̄ a yáŋá ɓɛ́nɛ nɛ́ miní nīŋ átē á nsaŋ.

¹⁶Ákaa ɛ́sɛ, á míndīgá, ɓaá, ɔg yí kí nɛ́ ɔg kɛ li suŋ lí nlóm wɔ́ɔ é? Á páam, ɓaá, ɔg yí kí nɛ́ ɔg kɛ li suŋ lí ŋ̀gáá wɔ́ɔ é?

¹⁷Á élōgyāŋ, mut sig a nīŋ li oŋle la liɓɛ́ɛg Nyɔ́ŋ-Ɛsáŋɛ́ a tí nyɛ kaa ɛjɛ́ɛ́ jóga, ákaa a ɓɛ́ɛ́ eceg Ɔlolómɛ̄ a yáŋléé nyɛ́. Nyíŋ ndag nɛ́ mi ŋga tíi á Bíɓasɛ bísɛ.

¹⁸Nyɔ́ la nyɔ́ Ɔlolómɛ̄ a yáŋléé kí a lɛ ŋ̀kwɛɛ́g ah sɔɔ́g ɓé jéŋ liɓɛ́ɛg. Nyɔ́ nyɛ́g a yáŋlɛ́ kí a lɛ̄ épɔ ah ɓɔŋɔ́g ɓé nɛ́ bí kwɛɛ nyɛ́.

¹⁹Likwɛɛ lí sē ɓé tɔ jam, á liɓɛ́ɛg lí épɔ ki lí sē ɓé tɔ jam, yé ɛ́ lɛ́ nsɛ́ŋ ɛ́ lɛ́ lí ógle lí bíkanʼyɛ́nɛ́ bí Ɔlolómɛ̄.

²⁰Mut sig a tɔ́ɔ ákaa ā ɓɛ́ɛ́ éceg Ɔlolómɛ̄ a yáŋléé nyɛ́.

²¹Ɓaá, ɔ ɓɛ́ɛ́ ŋyɔ́ŋ éceg ɔ yáŋlɛ́ɛ é? Náŋ ah teeŋgɛ́gɛ́ ɓé wa. Ndí ki póla yá ɛ́ni nɛ́ ɔ ɓɛ́ kúndɛ, byeléné váŋ!

²²Átɔm nɛ́, ŋyɔ́ŋ nyú wá yáŋlɛ á ŋ̀atanɛ́ la Nyɔ́ŋ-Ɛsáŋɛ́ wa tɛ́lɛ́ kundɛ la Nyɔ́ŋ-Ɛsáŋɛ́. Nlemlem á jam, mut a yáŋlɛ kí a lɛ̄ kúndɛ, a lɛ ŋyɔ́ŋ á Nyɔ́-a-Pɔ́hlɛ.

²³Mut wa a lɛ nyɔ́ a sála díyɛ ŋgandag á li kɔpɔ lí ɓɛ́nɛ. Miníh yaankágán ɓé pɛ miyɔ́ŋ mí ɓot-bí-bínam.

²⁴Á élōgyāŋ, mut waná sig a tɔ́ɔ ɔ́sū ví Ɔlolómɛ̄ ákaa a ɓɛ́ɛ́ eceg a yáŋléé nyɛ́.

²⁵Á élōgyāŋ, á yé ɛ́ ŋga légɓé mikɔl-mí-ɓot, mi ŋgá yí ɓé ma nɛ́ Nyɔ́ŋ-Ɛsáŋɛ́ a yígíí ndag likɔlɓan ɓɔ́. Mag tíi ja ɛ́yáma eɔ́ŋɔ yé mut-a-binam, nyɔ́ bí kɔ́ɔ̄ lí vále lí lipitá li kele la ekɔnan-ŋgɔ́ɔ́ yé Nyɔ́ŋ-Ɛsáŋɛ́.

²⁶Mag ɔ́ŋɔ nɛ́, la ndutu yí bí biceg bí lɛn, ɛ sē ɓé nsɛ́ŋ lí lɔ́mɓan. Ɔɔ, ɛ́ lɛ́ nsɛ́ŋ nɛ mut sig a tɔ́ɔ ákaa a lɛ.

²⁷Ɓaá, ɔ byɛ́ɛ́ mindígá é? Ɔh somlág ɓé lí ɓáglan la nyɛ́. Kíyáɓɛ́nɛ ɔ lɛ̄ ŋkɔl, ɔh lɔ́mɓágán ɓé.

²⁸Ndí á póla eceg, kí wā lɔ́mɓān, wāh ɓɔŋ ɓé aɓé. Kíyáɓɛ́ ki nɛ́ ŋgɔn mindígá ya lɔ́mɓan, yāh ɓɔŋ ɓé aɓé. Ndí ɓot ɓá lɔ́mɓan bíg kɛ li kuh lí bísɔghe bicɛ́ŋ bí ɓá nyɛɛ́ lí ɔ́hánɛ. Ndí ma, mi byɛ́ɛ́ kóó lí ɓagɓanɛ lí ɓɛ́nɛ bíŋ bisɔghe bísɛ.

²⁹Á élōgyāŋ, mag yó ɓɛ́nɛ nɛ́ eceg yá tunu. Li ɓotle la vɔ́ŋɔ́ɔ, páam yá lɔ́mɓan yá nyɛɛ́ lí ɓɔŋ ɔ́ŋgɛn ɛ́h byɛ́ɛ́ ɓé ɓóndīgá.

³⁰Ɓá bí ŋga lée bí ɓɔŋ ɔ́ŋgɛn bí ŋgá lee ɓé, ɓot bí ŋga sóphɛ bí ɓɔŋ ɔ́ŋgɛn bí ŋgá sophɛ ɓé, ɓá bí ŋga sóm byoóm bí ɓɔŋ ɔ́ŋgɛn bíh byɛ́ɛ́ ɓé tɔ jam.

³¹Ɓá bí ŋgá tómbanɛ mam mí nyú ŋkɔŋ-á-sí bí ɓɔŋ ɔ́ŋgɛn bí ŋgá tombanɛ ɓé kɔɔ tɔ jam. Á mbálɛ, nyú ŋkɔŋ-á-sí á lɛ̄n ág loo la mam mɛ́ɛ́.

³²Mīh byɛ́ɛ́ ɓé ma kóó nɛ jam tɔ já lí téeŋgɛ́ ɓɛ́nɛ. Nyɔ́ la nyɔ́ āh lɔ́mɓan ɓé, ag nyɔŋ eceg la mam mí Nyɔ́ŋ-Ɛsáŋɛ́, ag sómo nɛ̄-láá a nyɛ́ɛ́lé Nyɔ́ŋ-Ɛsáŋɛ́.

³³Ndí nyɔ́ la nyɔ́ a lɔ́mɓan, ag nyɔŋ éceg la mam mí ŋkɔŋ-á-sí, ag somo nɛ̄-láá a nyɛ́ɛ́lé ŋ̀gáá wɛ́ɛ̄,

³⁴la náŋ, m̀mím wɛ́ɛ́ wá kaaɓan. Nlemlem ki, mindígá nyɔ́ āh byɛ́ɛ́ ɓé nlóm la ŋgɔn mindígá, bíg nyɔŋ eceg la mam mí Nyɔ́ŋ-Ɛsáŋɛ́. Bíg somo li ɓɛ́ elɔŋ la nyɛ́ nɛ́ ɓam ɓam. Ndí mindígá a lɔ́mɓɛ́ɛ ag nyɔŋ eceg la mam mí ŋkɔŋ-á-sí, ag somo nɛ̄-láá a nyɛ́ɛ́lé nlóm wɛ́ɛ̄.

³⁵Mag laga ɓɛ́nɛ míŋ mam mísɛ ányúū nsɛ́ŋ wáná, ah ányúū li ám li ɓɛ́nɛ ɓé, ndí á lí ɓɔŋ nɛ́ miní ɓɔŋ yé ɛ́ kɔ́ɔ̄ á nyaa m̀ɓɛɛŋ, la nɛ́ miní tīŋɓé jā la Nyɔ́ŋ-Ɛsáŋɛ́ nyɛ́-ntámɛ́.

³⁶Kíyáɓɛ́nɛ mut a lóohán lí diŋ lí évān yɛ́ɛ́, ndí ag kɔn woŋ nɛ́ a ŋgá la ɓé yɔ li ditɛ nɛ́ a ɔ́hánɛ pɛ puh, ndí ag somo ki nɛ́ mam mí kɛ la ɔsú nɛ́-tɛ́ɛla á éceg bí ŋga lɔ́mɓan, a ɓɔ́ŋ ákaa kóó ɛ lɛ nyɛ́. Āh ɓɔŋ ɓé áɓē, bí lɔ́mɓán.

³⁷Ndí, nyɔ́ la nyɔ́ a súgɛ́ á m̀mím wɛ́ɛ́ la miɔ́ŋɔ mɛ́ɛ́ mísɛ ɛ́h ɓɛ́ ŋkágán, nɛ́ ag ditɛ eván yɛ́ɛ́, ag ɓɔŋ m̀ɓɛɛŋ!

³⁸Jɔ́ nɛ́, nyɔ́ la nyɔ́ a ŋga lɔ́m évān yɛ́ɛ́, a ɓɔ̄ŋ m̀ɓɛɛŋ, nyɔ́ ki a ŋgá lɔ́m ɓé yɔ a lóohán lí ɓɔŋ lí m̀ɓɛɛŋ.

³⁹Mindígá a āt la nlóm wɛ́ɛ̄ eceg nyɔ́ŋ a lɛ á éniŋ. Ndí kíyáɓɛ́nɛ nlóm a wú, a byɛ́ɛ́ kundɛ li lɔ́mɓan la páam ɛ lɛ nyɛ́ kóó, ndí tóɓó-tóɓó nyí ɛ ŋga yéɓe la Nyɔ́ŋ-Ɛsáŋɛ́.

⁴⁰Ndí á ɛ́jāma liɛ́nɛg, ag kɛ li niŋ lí m̀ɓɛɛŋ kí á tɔ́ɔ́ kaa a lɛ. Má, mag ɔ́ŋɔ nɛ́ mi byɛ́ɛ́ M̀búl á Ɔ́lolómɛ̄.