Read Bakoko Elōg-Kɔlínto 1 8 Bible Online

Elōg-Kɔlínto 1 8 - Bakoko bible

Elōg-Kɔlínto 1 8

¹Á élōgyāŋ, á yé ɛ́ ŋga légɓe tít ɓá súlé bísāt, ɛ́g yílɛ nɛ́, ɓɛ́hɛ bísɛ biíg yí nyúŋ ŋkwɛl. Eyí ɛ́g yáhɛ mut la kúmba, ndí ediŋ ɛ́g óŋ.

²Kíyáɓɛ́nɛ mut ag ɔ́ŋɔ nɛ́ ag yí jam, ɛnɛ āh ŋyííg ɓé kaa ɛ́ ŋga sōmlɛ.

³Ndí tɔ nzáá a ŋga dīŋ Ɔlolómɛ̄, Ɔlolómɛ̄ nyɛ́g ag yí nyɛ́.

⁴Ɓaá, tít ɓá súlé bísāt ɛ́g la li díéɓɛ é? Biíg yí m̀ɓɛɛŋ nɛ́ esát tɔ yá ɛ́ sē ɓé mú á nyú ŋkɔŋ-á-sí, la ki nɛ́ miloó mítām mí sē ɓé amáh sig pɔmbɛ Ɔlolómɛ̄.

⁵Ákaa ɛ́sɛ, mam mí lɛ́ mí ɓot bí ŋga nyɔ̄ŋ kaa miloó mítām á lōó la á sí, ɛnɛ á mbálɛ miloó mí lɛ́ ŋgandag, ɓatáŋɛ ki bú ɓɛ́ ŋgandag.

⁶Ndí ányúū yāhá Loó a lɛ̄ wāhwa, nyɛ́ nɛ́ a lɛ́ Etāa, mam mísɛ míg sɔ́le la nyɛ́, ɓɛ́hɛ bísɛ ki biíg kɛ á yóg yɛ́ɛ̄. Nyɔ́ŋ-Ɛsáŋɛ́ ki a lɛ jā wāhwa, nyɛ́ nɛ́ a lɛ Yésus Kilístus, la nyɛ́ nɛ́ mam mísɛ má vēgɓɛ, la nyɛ́ ki nɛ́ ɓɛ́hɛ bísɛ bi lɛ́ á éniŋ.

⁷Ndí, ɓot bísɛ bíh byɛ́ɛ́ ɓé yéŋ eyí. Jogo já, kasig bí ɓɛ́ɛ́la elɛ́m lí ɓégɛ lí bísāt, líg dí tít mísūlé ɔ́ŋgɛn yá tíéɓɛ́ bísāt byɔ́-mɛ̄n ákaa nsúlé la mbálɛ. Kasig miɔ́ŋɔ máɓá mí ŋga ɓɔ̄t, cíŋ-m̀mím yāɓá ɛg kááhɛ ɓɔ́.

⁸Ah patí lidí yā ɓé nɛ ɛ ŋga kɛ́ ɓɛ́hɛ li siŋglɛ á ŋgwáāg Ɔlolómɛ̄, nyí ɛ lɛ nɛ́, kíyáɓɛ́nɛ ɓa dí yɔ tɔ nɛ́ ɓāh dí ɓé yɔ, náŋ a lɛ jā ɓɛ́hɛ nyaa ya la kaa ya.

⁹Ndí, nyɔŋán lítāt nɛ nyíŋ kundɛ yaná, ɛ́h yaankágán ɓé ɔ́ɓag ányúū mitɔt-mí-ɓot.

¹⁰Ákaa ɛ́sɛ, wa nyɔ́ ɔ byɛɛ́ yéŋ eyí, kíyáɓɛ́nɛ ɓá ɛ́n wa ɔ tɔ́ɔ á téɓeli lidí á ndáá bisát, ɓaá, nyíŋ nyaa liɓɔŋɔg ɛ ŋgá la ɓé lí yígle lí nyɔ́ la nyɔ́ a byɛɛ́ míɔ̄ŋɔ mí ŋga ɓɔ̄t nɛ́ a dí tít ɓá súlé bísāt é?

¹¹La náŋ, ányúū yéŋ eyí yɔ́ɔ, nyɔ́ mɔɔ́nɛ́tāŋ a byɛɛ́ míɔ̄ŋɔ mí ŋga ɓɔ̄t ag kɛ li wú, nyɛ́ mut Nyɔ́-a-Pɔ́hlɛ a wúēle.

¹²Eceg miní ŋga ɓɔ̄ŋle elōgɛ́sɔ̄ŋ yáná áɓē náŋ, ndí miníg ɓáálɛ ki miɔ́ŋɔ máɓá mí ŋga ɓɔ̄t, ɛnɛ Nyɔ́-a-Pɔ́hlɛ nyɛ́-mɛ̄n nɛ́ miní ŋga ɓɔ̄ŋle aɓé.

¹³Ányúū náŋ nɛ́, kíyáɓɛ́nɛ patí lidí yā ɛg kɛla mɔɔ́lyāŋ á míceglan, ɛnɛ m̀ɓá-mɓá māh nyɛɛ ɓé ma lí dí lí nyíŋ tít á lí pún nɛ́ mɔɔ́lyāŋ a táág ku á míceglan.