Read Bakoko Elōg-Kɔlínto 1 9 Bible Online

Elōg-Kɔlínto 1 9 - Bakoko bible

Elōg-Kɔlínto 1 9

¹Á élōgyāŋ, ɓaá, mí sē ɓé kúndɛ é? Ɓaá, mí sē ɓé ŋ̀ómɓɛ é? Ɓaá, māh ɛ́n ɓé Ɛtáŋɛ wahá Yésus Kilístus é? Ɓaá, ɓɛ́nɛ ɓé nɛ́ miní lɛ́ mítām mí nsɔ́n wáma ma sál ányúū Nyɔ́ŋ-Ɛsáŋɛ́ é?

²Kíyáɓɛ́nɛ ányúū ɓot ɓatám, mi sē ɓé ma ŋ̀ómɓɛ, mi lɛ̄ nyɛ́ ányúū yāná. Átɔm nɛ́, ŋ̀atanɛ́ wāná la Nyɔ́ŋ-Ɛsáŋɛ́ nɛ́ a ŋga étɛ nɛ́ ma ɓɔ̄ŋ nsɔ́n wāná á ŋ̀ómɓɛ.

³Mag pele ɓásɔ̄mánɛ ma nɛ́:

⁴Ɓaá, bih ɓɛ́ɛ́la ɓé kúndɛ li dí ndí tɔ li nyú é?

⁵Ɓaá, bih ɓɛ́ɛ́la ɓé kúndɛ li wɛɛla lí ɓondígá ɓáhá ɓá ɓá yéɓé la Nyɔ́-a-Pɔ́hlɛ, nlemlem ákaa ɓáŋá ɓáōmɓɛ ɓatám, Pétlos la elōgyāŋ yé Nyɔ́ŋ-Ɛsáŋɛ́ é?

⁶Ɓaá, amáh Balnábas la ma ja nɛ́ biíh mɓɛ́ ɓé nɛ ɓā tɔɔ́ ŋgi lí sál é?

⁷Nzáá a ví sál á sónja ndí á sálá nyɛ́-mɛ̄n é? Nzáá a ví sál ǹdíí ndí āh pumu ɓé é? Tɔ nɛ́, nzáá a ví díɛ́hɛ liɓembá ndí āh nyú ɓé mínyāmíndím mí bílēm bí jéŋ liɓembá é?

⁸Ɓaá, náŋ ɓé nɛ ɓot-bí-bínam bí ŋga ɓɔ̄ŋ é? Ɓaá, mbéndá ki ɛ́ ŋgá laga ɓé jā nlemlem á jam é?

⁹Ákaa ɛ́sɛ, yá ciiɓɛ́ á mbéndá Móse nɛ́: «Ɔ ŋgɔ́ kɛ ɓé lí vá lí nyaga ŋkóm á ányu á eceg ɛ́ mpumu á lí suŋɛ lí yɔ li dí.» Ɓaá, Ɔlolómɛ̄ ag kótle nyaga é?

¹⁰Ɓaá ányúū yāhá ɓɛ́hɛ̄-ntámɛ́ ɓé nɛ Ɔlolómɛ̄ a ŋga pɔ́tléne náŋ é? Ɔɔ, ányúū yāhá nɛ́ náŋ a cíiɓɛ, átɔm nɛ́ nyɔ́ la nyɔ́ a ŋga sál, ag nyɛɛ li ɓɛ́la lí lípitá nɛ ag kɛ li pumu, la ki nɛ́, nyɔ́ la nyɔ́ a ŋga púmu, nyɛ́g ag nyɛɛ li ɓɛ́la lí lípitá nɛ ag kuh ɛjɛ́ɛ́ jóga.

¹¹Kíyáɓɛ́nɛ ɓaá ɓɛl bilɔ́ŋgɔ bí mam bí M̀búl Mpúán átē wāná, ɓaá, yéé yá lóohán lí ɓɛ́ lí áɓē nɛ́ bi púmú jóga já lí míɓɛɛŋ máná é?

¹²Kíyáɓɛ́nɛ ɓot ɓatám bí byɛ́ɛ́ nyíŋ kundɛ ányúū yāná, ɛbuu-la-ŋgele yáŋvéé la ɓɛ́hɛ é? Ndí, ɓāh ɓɔ̄ŋle ɓé nyíŋ kundɛ, á mveŋghanɛ́ biíg ɔ́hánɛ mɔ́ mísɛ á lí ɓɔŋ nɛ́ bih váág ɓé ɓɛ́hɛ ɔɓag tɔ vá á lí tɛ́ŋgánɛ lí Pɔ́l M̀ɓɛɛŋ nyí Nyɔ́-a-Pɔ́hlɛ.

¹³Ɓaá, miní ŋgá yí ɓé nɛ ɓot bí ŋga sál á ndáá-ēcɛ́ŋ-Ɔlolómɛ̄, bíg niŋlene múŋ é? La ki nɛ́, ɓatíi-nsúlé bíg kuh ɛjáɓá jóga múŋ á míŋ mísūlé é?

¹⁴Náŋ ki nɛ́ Nyɔ́ŋ-Ɛsáŋɛ́ a ɓɔ̄ŋ eceg a tí kundɛ nɛ́ ɓálɛgɛ Pɔ́l M̀ɓɛɛŋ ɓɔ́g bí niŋléné múŋ á nsɔ́n wáɓá.

¹⁵Ndí ma, mah ɓɔŋlene ɓé ma kúndɛ tɔ ya á yíŋ ɛ́sɛ, la ki nɛ́ māh cii ɓé ma bíŋ bísɛ ányúū li ɓat lí byɔ. Ákaa ɛ́sɛ, ɛ́ lɛ́ nsɛ́ŋ nɛ́ mi wú li loo nɛ́ bíg ɓógtɛ mā yé ɛ́ lɛ́ éyāt yáma.

¹⁶Ákaa ɛ́sɛ, li lɛgɛ lí Pɔ́l M̀ɓɛɛŋ lí sē ɓé mā jam lí éyāt, átɔm nɛ́ nyúŋ nsɔ́n á lɛ́ mā épīl, á lɛ́ mā ɔ́kaŋ ví líle. Eɓéé-nyúū la mā, Kíyáɓɛ́nɛ māh lɛgɛ ɓé ma Pɔ́l M̀ɓɛɛŋ!

¹⁷Kí ɓɔ̄ŋ nɛ́ mií ŋga ɓɔ̄ŋ náŋ la mā-mɛ̄n, kí mí byɛ́ɛ́ kundɛ la nsála, ndí kasig nyúŋ nsɔ́n á lɛ́ mā épīl, mi lɛ ŋkágán lí sál lí wɔ.

¹⁸Nsála wáma á lɛ́ hɔ́ yéé é? Nsála wáma á lɛ́ nɛ́ mi lɛ́gɛ́ Pɔ́l M̀ɓɛɛŋ yɛmɛ́, ɛ́h ɓɛ́ ɓé lí ɓɔŋle lí kúndɛ nyíŋ Pɔ́l ɛ ŋga tíi ma.

¹⁹Ɔɔ, mi lɛ̄ kúndɛ ɔ́sū ví ɓot bísɛ, ndí ma yáanɛ́ mā-mɛn ŋyɔ́ŋ á ɓot bísɛ nɛ́ ndí mi tómbánɛ ɔbul ví ɓot.

²⁰Mi mɓɛ́ élɔŋ la ɓɔ́ɔ̄n bí Élōg-Yúda ɔ́ŋgɛn mɔ́ɔ̄n Élōg-Yúda, nɛ́ ndí mi tómbánɛ ŋgandag ɛ́ ɓɔ́ɔ̄n bí Élōg-Yúda. Mi mɓɛ́ la ɓá bí lɛ́ á sí likanʼyɛ lí mbéndá Móse ɔ́ŋgɛn mā-mɛ̄n mi lɛ átē, nɛ́ ndí mi tómbánɛ ɓá bísɛ bí lɛ́ á sí likanʼyɛ lí nyíŋ mbéndá Móse, tɔ náŋ ákaa mi sē ɓé ma á sí jéŋ likanʼyɛ.

²¹Mi mɓɛ́ élɔŋ la ɓá bí ŋgá yí ɓé mbéndá Móse ɔ́ŋgɛn mā mi mɓɛ́ ŋgíla mbéndá, nɛ́ ndí mi tómbánɛ ɓá bí ŋgá yí ɓé mbéndá, tɔ náŋ ákaa mi lɛ á sí mbéndá Ɔlolómɛ̄, kasig Nyɔ́-a-Pɔ́hlɛ nɛ́ a lɛ mbéndá yáma.

²²Ma yáanɛ́ mā-mɛn ntɔt-á-mut á ŋgwáāg mitɔt-mí-ɓot, nɛ́ ndí mi tómbánɛ mɔ́. Ma tí éniŋ yáma ɛ́sɛ ányúū ɓot bísɛ nɛ́ ndí yɛkɛsig mi súŋ jogo lí ɓot.

²³Mag ɓɔ́ŋ míŋ mísɛ, ányúū Pɔ́l M̀ɓɛɛŋ nɛ́ ndí mi kūh ɛ́jāma joga múŋ átē.

²⁴Á élōgyāŋ, ɓaá, miní ŋgá yí ɓé nɛ, á voóm bí ŋga náŋgle m̀bíí, ɓanāŋga-m̀bíí bísɛ bíg ɓógo elɔŋ, ndí mut wāhwa nɛ́ a ŋga kūh ɔtot é? Náŋglán hɔ́ m̀bíí nyaa nyí ɛ lɛ nɛ́ miní kuh ɔtot.

²⁵Ɓot bí patí micaa ɛ́sɛ, eceg bí ŋga víhyɛ ɓɔ́-mɛ̄n á ɓōŋhánɛ́ a micaa, bíg ɓɔŋ náŋ ányúū li kuh lí ɔ́tot ví ŋga lɔ́ɓe, ndí ɓɛ́hɛ, biíg ɓɔŋ náŋ ányúū li kuh lí ɔ́tot ví ví ŋgá lɔɓe ɓé.

²⁶Ma hɔ́, náŋ nɛ́ mi ŋga nāŋga m̀bíí, ndí ah ndúmá-ndúma ɓé, náŋ ki nɛ́ mi ŋga úm bíkūt, ndí mi ŋgá úm ɓé ma byɔ́ á ŋgɔ̄á.

²⁷Ndí, mag sɔghɛ nyúū yáma taŋ-taŋ, mag kanʼyɛ ki yɔ ɛsɛ̄, á ŋkɔnwoŋɛ́ nɛ eceg mi ŋga mánɛ li lɛgɛ lí ɓáŋá ɓátām Pɔ́l M̀ɓɛɛŋ, mā-mɛn Ɔlolómɛ̄ aah váág ɓé mā á ŋgwáāg.