Read Bakoko Elōg-Kɔlínto 2 5 Bible Online

Elōg-Kɔlínto 2 5 - Bakoko bible

Elōg-Kɔlínto 2 5

¹Á élōgyāŋ, biíg yí la mbálɛ nɛ́, kíyáɓɛ́nɛ litɔɓéné jáhá vá á ŋkɔŋ-á-sí, lí lɛ́ kaa eláá ɛ́ ŋga búge, bi yí nɛ́ bi byɛ́ɛ́ ndáá ɛ ŋga ɓéem á ékombo-lóō, nyí ya óŋɓɛ́ la Ɔlolómɛ̄ ndí ah la mut-a-binam ɓé.

²Jɔ́ nɛ́, bi ŋga ɓé la esɔghe, ányúū nɛ bi byɛ́ɛ́ kóó écɛ̄ŋ nyí li níŋgí á nyíŋ ndáá yāhá ékombo-lóō,

³nɛ́ ndí Ɔlolómɛ̄ a kɔ́p nɛ́ bi jáhɛ mbɔ́tí li loo nɛ́ biíg ɓɛ́ nsɔ́.

⁴Ɓɛ́hɛ ɓá bi ŋga nīŋ mú á yéŋ eláá, mbálɛ nyíŋ, biíg ɓé la esɔghe ányúū nɛ mbɛgɛ ɛg ditle ɓɛ́hɛ, ánsī nɛ bi ŋgá somo ɓé lí cóó lí líɓɛ́ɛg jáhá lí mut a ŋkɔŋ-á-sí, ndí biíg somo ki lí jálɓan lí líɓɛ́ɛg lí mut a loó, á lí ɓɔŋ nɛ́, yé ɛ́ ŋga nīŋ á éɓem la eɓem ɛ́ mīn yé ɛ́ ŋga wú.

⁵Ɔlolómɛ̄ nyɛ́-mɛ̄n nɛ́ a ɓōŋhán ɓɛ́hɛ ányúū yéŋ eniŋ ɛ́ ŋga sɔ́, nyɛ́ mut a vá ɓɛ́hɛ M̀búl Mpúán á mímīm kaa ndembye mbáki nyí mikaale bi ŋga kɛ́ li kuh.

⁶La náŋ hɔ́, bi lɛ mbáki ŋgandag la yé bi ŋga yí nɛ́, nlee la eceg ɓaá tíglé á líɓɛ́ɛg lí mut a ŋkɔŋ-á-sí, bi sē ɓé ɓɛ́hɛ á lítɔɓéné jáhá, bi lɛ énɛŋɛ́ la Nyɔ́ŋ-Ɛsáŋɛ́,

⁷átɔm nɛ́ ŋyéɓé nɛ á ŋga wɛ́ɛla ɓɛ́hɛ ndí ah yé bi ŋga ɛ́n ɓé.

⁸Ɔɔ, bi lɛ mbáki ŋgandag la ɓɛ́hɛ-mɛ̄n nɛ́, biíg pɔhɔ li cóó lí nyí nyuú mut-a-binam, á lí kɛ lí lí ɓole á ŋgwáāg Nyɔ́ŋ-Ɛsáŋɛ́.

⁹Ndí evéhé yáhá ɛ́ lɛ́ nɛ́, bi nyɛ́ɛ́lé Ɔ́lolómɛ̄, ɓaá tíglé á liɓɛ́ɛg jáhá lí mut a ŋkɔŋ-á-sí, tɔ ɓaá cóó jɔ.

¹⁰Ákaa ɛ́sɛ, ɛ́g kɛ li somlɛ nɛ́ ɓɛ́hɛ bísɛ bi tɛ́lɛ́ á ntélélé ɔ́sū ví bíkāāhɛ́nɛ́ bí Nyɔ́-a-Pɔ́hlɛ, nɛ́ ndí mut sig a púmú yé ɛ lɛ́ nɛ a sál a éniŋ yɛ́ɛ́ míson, ɛ́ ɓɛ́ m̀ɓɛɛŋ, ɛ́ ɓɛ́ aɓé.

¹¹Á élōgyāŋ, kasig bi ŋga yí lí kɔn lí Nyɔ́ŋ-Ɛsáŋɛ́ woŋ, jɔ́ nɛ́ bi ŋga lɔ́gɓan nɛ́ ɓot bí yéɓé yé bi ŋga lága ɓɔ́, náŋ nɛ́ a pámɛ́ ɓɛ́hɛ á ntélélé ɔ́sū ví Ɔ́lolómɛ̄. Ányúū náŋ nɛ́, mi byɛ́ɛ́ lipitá nɛ ɓɛ́nɛ ki miníg yí mā asɛ̄ nɛ́ ɓam.

¹²Bih byɛ́ɛ́ ɓé pɛ ɓɛ́hɛ kóó li tíi lí mbóŋ yāhá ɓɛ́hɛ-mɛ̄n ɔ́sū váná, ndí biíg somo ɓɛ́nɛ li tíi lí póla nɛ́ bi ɓɛ́ eyátɓéné yáná, á lí ɓɔŋ nɛ́ miní la li pele lí ɓá bi ŋga vá líŋgagá jáɓá á mām mí ŋga ɛ́ni á ápūū ndí ah mí mí átē a m̀mím ɓé.

¹³Ákaa ɛ́sɛ, kíyáɓɛ́nɛ eyí ɛ́ jáŋáá ɓɛ́hɛ, náŋ a ɓɛ́ɛ́ ányúū Ɔlolómɛ̄, kíyáɓɛ́ ki nɛ́ biíg yí jam, náŋ a lɛ ányúū yāná.

¹⁴Á mbálɛ, ediŋ ɛ́ Nyɔ́-a-Pɔ́hlɛ ɛ́g kág ɓɛ́hɛ, ɓɛ́hɛ ɓot bi ŋga yí nɛ́, kasig pɔ̄m mut ya wú ányúū ɓot bísɛ, la náŋ ɓot bísɛ ɓá wú.

¹⁵La ki nɛ́, Nyɔ́-a-Pɔ́hlɛ a wú ányúū ɓot bísɛ, á lí ɓɔŋ nɛ́ ɓá bí lɛ́ á éniŋ, bíh niŋíg ɓé pɛ ányúū yāɓá ɓɔ́-mɛ̄n, ndí bí nīŋ ja ányúū nyɛ́ mut a wú, la nyɛ́ ɔ pāhyé ányúū yāɓá.

¹⁶Ányúū náŋ hɔ́ nɛ, li ɓotle nyí vɔ́ŋɔ́ɔ, bi ŋgá ɛ́n ɓé pɛ ɓɛ́hɛ mut tɔ wa ákaa ɓot bí nyí sí ɓɔ́ bí ŋga ɛ́n. Mbálɛ nɛ́, á kwākwáŋɛ bií ŋgí ɛ́n Nyɔ́-a-Pɔ́hlɛ ákaa ɓot bí nyí sí ɓɔ́g bí ŋgí ɛ́n nyɛ́, ndí nyí vɔ́ŋɔ́ɔ bi ŋgá ɛ́n ɓé pɛ ɓɛ́hɛ nyɛ́ náŋ.

¹⁷La ki nɛ́, kíyáɓɛ́nɛ mut a áat la Nyɔ́-a-Pɔ́hlɛ, nyɔ́ŋ mut a yáan eveglé ɛ́ péná. Yé ɛ́sɛ ɛ́ ɓɛ́ɛ́ kwaŋ yá man lí loo, léɓyán sig nɛ́ mam mísɛ má timán péná.

¹⁸Mɔ́mísɛ míg sɔ́le la Ɔlolómɛ̄, nyɔ́ a sáŋgá ɓɛ́hɛ la nyɛ́-mɛ̄n li loole la Nyɔ́-a-Pɔ́hlɛ, la nyɛ́ ɔ tí ki ɓɛ́hɛ nsɔ́n nyú á lí sáŋga lí ɓot.

¹⁹Ákaa ɛ́sɛ, Ɔlolómɛ̄ nɛ a ŋgí sáŋga nyɛ́-mɛ̄n la ɓot bí ŋkɔŋ-á-sí li loole la Nyɔ́-a-Pɔ́hlɛ, ɛ́h ɓɛ́ ɓé nyɛ̄ li sɔ́ŋgɔ lí ávuha á ɓot-bí-bínam, la nyɛ́ ɔ tí ki ɓɛ́hɛ nɛ́ bi lɛ́gɛ́ nyíŋ pɔ́l ányúū li sáŋga lí ɓot.

²⁰Á jóō lí Nyɔ́-a-Pɔ́hlɛ hɔ́ nɛ̄ bi lɛ̄ ɓápɔ́tle. Á mbálɛ, li loole la ɓɛ́hɛ nɛ́ Ɔ́lolómɛ̄ nyɛ́-mɛ̄n a ŋga yáŋá ɓɛ́nɛ. Á jóō lí Nyɔ́-a-Pɔ́hlɛ, biíg sɔ́hye ɓɛ́nɛ nɛ́ miní yéɓé lí sáŋglan la Ɔlolómɛ̄.

²¹Yésus Kilístus nyɛ́ mut āh yí ɓé áɓē, Ɔlolómɛ̄ a ɓɛ̄glɛ́ nyɛ miɓé máhá nɛ́ ndí li loole la nyɛ́, bi yáan ɓot bí lɛ́ sim ɔ́sū ví Ɔ́lolómɛ̄.