Read Bakoko Elōg-Kɔlínto 2 7 Bible Online

Elōg-Kɔlínto 2 7 - Bakoko bible

Elōg-Kɔlínto 2 7

¹Á élōgyāŋ yé édiŋ, kasig ɓaá kuh yíŋ nyaa míkakanɛ, bi púɛ́ ɓɛ́hɛ-mɛ̄n á yé ɛ́sɛ ɛ́ ŋga vínɛ nyúū la m̀búl. Bi mánɛ́ li yaanɛ lí ɓɛ́hɛ-mɛ̄n ɓápūán á sí woŋ á Ɔ́lolómɛ̄.

²Á élōgyāŋ, váán ɓɛ́hɛ á mimím máná, ɓāh ɓɔŋ ɓé ɓɛ́hɛ mut tɔ wa jam liɓé, ɓāh óm ɓé ɓɛ́hɛ mut tɔ wa á njáŋgá, ɓāh tombanɛ ɓé tɔ jam á m̀mú á mut tɔ wa.

³Mi ŋgá pɔ́t ɓé ma náŋ á lí kááhɛ lí ɓɛ́nɛ, átɔm nɛ́ ma mān li laga nɛ́: miní lɛ́ á mímīm máhá, ɛ́ ɓɛ́ á éniŋ tɔ á nyɛ̄mb.

⁴Mi byɛ́ɛ́ lipitá lícɛ̄ŋ la ɓɛ́nɛ, eyát mi byɛɛ́ ányúū yāná ɛ́ lɛ́ écɛ̄ŋ, mi yáhɛ la akwáá, tɔ la ndutu yáhá ɛ́sɛ, mag sophɛ la mivag.

⁵Ákaa ɛ́sɛ, káán bu sɔ́ á Masedónia, bi ɓáág ŋgí lí vɛ́ɛɓan, bi ɓáág jā ndutu la ndutu, biɓándá la biɓándá bí ŋga sɔ́le ɓɛ́hɛ la ɓot ɓatám, woŋ ki á ɓáág jā á mímīm máhá.

⁶Ndí, Ɔlolómɛ̄ nyɔ́ a ŋga mɔ́mɛ ɓot bí ésuhɛ-nyuú, a létɛ̄ ɓɛ́hɛ nyuú la misɔ́ mí Títo.

⁷Ah la misɔ́ mɛ́ɛ́ mɔ́-ntámɛ́ ɓé ja, ndí la eletɛ-nyúū ɛ́sɛ a kūh á ŋgwáāg yāná. A yíhɛ́ ɓɛ́hɛ yé yá loohán ɓɛ́nɛ li ɓɛ́ lí kóó, a yíhɛ́ ɓɛ́hɛ liwú maná lee, la akwáá miní byɛ́ɛ̄ ányúū yáma, nyaa nyí ɛ lɛ nɛ́ mivag mú ól ma.

⁸Ɔɔ, kíyáɓɛ́nɛ káati ma ómlé ɓɛ́nɛ ya vín ɓɛ́nɛ á m̀mím, mi ŋgá tám ɓé ma náŋ, ndí ma tám náŋ ɛnɛ́ ma sɔ̄m nɛ̄ nyíŋ káati ya vín ɓɛ́nɛ á m̀mím á puh epah éceg.

⁹Nyí vɔ́ŋɔ́ɔ mag kɔn mivag, ah ányúū ɓé nɛ ya ályɛ́ ɓɛ́nɛ, ndí ányúū mveŋghanɛ́ a eniŋ ya sɔ́la ɓɛ́nɛ. Ányúū nɛ Ɔlolómɛ̄ nɛ a súgɛ́ nɛ miníg kɛ li ála, la náŋ, ɓɛ́hɛ biíg ɛ́n nɛ́ ɓāh ɓɔŋ ɓé ɓɛ́nɛ jam liɓé tɔ já.

¹⁰Ákaa ɛ́sɛ, ɔún Ɔlolómɛ̄ a tɛ́ɛ́yɛ víg sɔ́la mveŋghanɛ́ a eniŋ nyɔ́ a ŋga kɛ́la á lísuŋga, ɛ́h ɓɛ́ ɓé lí sɔ́la lí étámka tɔ yá. Evínɛ-m̀mím yé ɛ́ ŋga sɔ́le la nyú ŋkɔŋ-á-sí ɛ́g sɔ́la nyɛ̄mb.

¹¹Léɓyán hɔ́ sig yé evínɛ-m̀mím Ɔlolómɛ̄ a tɛ́ɛ́yɛ yá sɔ́la ɓɛ́nɛ. Mɔɔ́ a! Sē míkwásí á mbyēleg ē! Sē lí yí lí lí suŋ lí nyúū ē! Sē líyɔ̄t kí mut ɔ ɓɔ̄ŋ jam ɓé ē! Sē woŋ á lí ɓéé lí lí ɓɔŋ ē! Sē évēhé yé lí ɛ́n lí mā sīg-pɛ ē! Sē ákwāā ē! Sē pɛ́lɛ-pɛ́lɛ ekɔ́ghɛ ányúū m̀ɓéé lí ɓɔŋ ē! Ndí, maná étɛ́ ɓɛ́nɛ-mɛ̄n á nyaa yɔ́ ɛ́sɛ nɛ́ miní lɛ́ mípūū á nyúŋ ŋkwɛl.

¹²Á lí sɛ́m lí pɛ́m, kíyáɓɛ́nɛ ma cíilé ɓɛ́nɛ, náŋ a sē ɓé ányúū mut a ɓɔ̄ŋ áɓē, tɔ ányúū mut a kūh njɔm, ndí náŋ a lɛ ányúū li ɓɔŋ nɛ́ ɓɛ́nɛ-mɛ̄n miní ɛ́n akwáá miní byɛ́ɛ̄ ányúū yāhá ɔ́sū ví Ɔ́lolómɛ̄.

¹³Mam má letɛ́ ɓɛ́hɛ nyuú mīŋ. Ɔ ɓógtɛ́ sig yéŋ eletɛ-nyúū yé mut sig, ɓaá ógtán sīg-pɛ mivag ŋgandag eceg ɓā ɛ́n Títo ag vag ányúū nɛ, ɓɛ́nɛ bísɛ maná suhɛ́ nyɛ m̀mím ŋgándag.

¹⁴Á mbálɛ, kíyáɓɛ́nɛ mi ɓáág ma yátɓéne nyɛ́ ányúū yāná, ɛnɛ ányúū nɛ manáh kɔnɛ ɓé mā ɔ́sɔ̄n ndí, ákaa ɓaá mwuan biíg laga ɓɛ́nɛ mbálɛ, eyát bi byɛ́ɛ̄ ányúū yāná ɔ́sū ví Títo ɛ́ byɛ́ɛ́ etɔ.

¹⁵Ekɔ́ɔ́ yɛ́ɛ́ á ŋgwáāg yāná ɛ́g náŋ bí lí náŋ, eceg a ŋga ɔ́ŋɔ eógle yáná ɓɛ́nɛ bísɛ á ŋgwáāg yɛ́ɛ̄, la kaa maná kalé nyɛ á sí woŋ la nsɛ́glānɛ́.

¹⁶Mi lɛ̄ mívag nɛ́ mag la li ɓɛ́la lí lípitá la ɓɛ́nɛ á mam mísɛ.