Read Bakoko Elōg-Kɔlínto 2 8 Bible Online

Elōg-Kɔlínto 2 8 - Bakoko bible

Elōg-Kɔlínto 2 8

¹Á élōgyāŋ, biíg somo ɓɛ́nɛ li yíhɛ nɛ̄-láá Ɔ́lolómɛ̄ a étɛ́ Bíɓasɛ bí Masedónia elɔ́ŋgɔ yɛ́ɛ́ m̀mím.

²Tɔ náŋ ákaa bíŋ biɓasɛ byá kuh ŋgandag bísɔghe, mivag máɓá mí ɓɛ́ɛ́ nlohanɛ́, byá tí ŋgandag, ŋgíla nsɔŋgí tɔ náŋ ákaa bí lɛ́ nlohanɛ́ a liyɛ́ɛ́.

³Mi lɛ mbóŋ nɛ byá tí li oŋle la bikuhlé byáɓá, lí loo yágá ki, ɛ́h ɓɛ́ ɓé byɔ li ɓoŋhan náŋ,

⁴byá sɔ́hyé ɓɛ́hɛ ŋgandag nɛ́ byɔ́g bí nyɔ́ŋ ŋgaan á míŋ mióŋgánɛ mí ŋga kɛ́ á yóg ndog-Ɔlolómɛ̄ nyí Yelúsalɛm.

⁵Byá tí byɔ́-mɛ̄n ákaa nsúlé li loo lí yé bií ŋga láaŋkene byɔ́. Byá dúgú lí tíi lí byɔ́-mɛ̄n Nyɔ́ŋ-Ɛsáŋɛ́, ámbúh náŋ, bú tí ɓɛ́hɛ byɔ́-mɛ̄n li oŋle la nsom á Ɔ́lolómɛ̄.

⁶Ányúū náŋ nɛ́ ɓaá sɔ́hyé Títo nɛ́, nsɔ́n á lípūū-lí-m̀mím a ɓōtlé á yóg yāná, a mānɛ́ wɔ́ á nyaa m̀ɓɛɛŋ ákaa a ɓōtléé wɔ́, nyú á lí óŋgánɛ lí ndog-Ɔlolómɛ̄ nyí Yelúsalɛm.

⁷Ndí, kasig miní byɛ́ɛ́ byoóm bísɛ nlohanɛ́, ɛ́ ɓɛ́ ŋyéɓé, eyí-ŋkwɛl, li ɓɛ́la lí taŋ-taŋ eyí, ɛ́ ɓɛ́ ákwāā nyaa ɛ́sɛ, la ediŋ yé ɓaá dīŋ ɓɛ́nɛ, ɓɛ́án ki la nlohanɛ́ a m̀mím á m̀ɓɛɛŋ vɔ́ŋɔ́ɔ á yé eceg.

⁸Mi ŋgá pɔ́t ɓé mā náŋ ákaa ŋkágyɛ́gɛ-á-jam, ndí kí mag máŋlɛ ɓɛ́nɛ akwáá á ɓáŋá, náŋ a lɛ ányúū li ɓɔŋ nɛ́ miní étɛ́ taŋ taŋ yaná ediŋ.

⁹La mbálɛ, miníg yí elɔ́ŋgɔ m̀mím yé Ɛtáŋɛ wahá Yésus Kilístus, nyɔ́ a lɛ nɛ́, átē a abyaŋ wɛ́ɛ́, a yáanɛ́ nyɛ́-mɛ̄n ŋ̀yɛ́ɛ́yɛ́ɛ ányúū yāná, nɛ́ ndí la liyɛ́ɛ́ jɛ́ɛ́ a byāŋɓɛ́ ɓɛ́nɛ.

¹⁰Múŋ á jéŋ litɔt, miɔ́ŋɔ máma mi ŋga tíi mí nɛ́: Yé ɛ́ lɛ́ m̀ɓɛɛŋ ányúū yāná yɔ́ yé nɛ́ miníh tɔmbɔ́g ɓé, kasig ɓɛ́nɛ nɛ́ miní mɓɛ́ ɓot bí ɔ́sū á lí komanɛ lí míŋ mióŋgánɛ, ndí amáh sig náŋ, ɓɛ́nɛ ki nɛ́ miní ɓɛ́ɛ́ ɓot bí ɔ́sū á lí nyɔŋ lí bísúghɛ́nɛ́ nɛ miníg ɓɔŋ náŋ li ɓotle lí m̀bú wá loo.

¹¹Nyí vɔ́ŋɔ́ɔ hɔ́, miní súgɛ́ li komanɛ lí míŋ mióŋgánɛ, la náŋ, peg eláám maná vúl ɛ́g kɛ li yál li oŋle la bikuhlé byáná.

¹²Eceg miɔ́ŋɔ mí lɛ́ kɔɔ m̀ɓɛɛŋ, Ɔlolómɛ̄ ag lɛ́gle likaale mut a ŋga tíi li oŋle la yé a byɛɛ́, ndí ah li oŋle ɓé la yé ah byɛ́ɛ́ ɓé.

¹³Náŋ a ŋgá somo ɓé lí laga nɛ́ miní ku liyɛ́ɛ́ ányúū li óŋgánɛ li ɓáŋá ɓátām, ndí náŋ a lɛ ányúū li ɓɔŋ nɛ́ miní ɓɛ́ á nlemlem á ɔ́vega.

¹⁴Váŋ hɔ́, yé miní byɛ́ɛ̄ á nlohanɛ́ ɛ́g kɛ ɓɔ́ lí óŋgánɛ, nɛ́ ndí ɔlɔ́ vá, yé ɓɔ́g bí ŋga kɛ́ li ɓɛ́la á nlohanɛ́ yɔ́g ɛ́ óŋgánɛ ɓɛ́nɛ. Náŋ ag kɛ li ɓɔŋ nɛ́ miní ɓɛ́ á nlemlem á ɔ́vega,

¹⁵kaa yá ciiɓɛ́ nɛ: «Nyɔ́ la nyɔ́ a kɔtɔ́ɔ́ mána ŋgandag āh looháán ɓé lí ɓɛ́la, nyɔ́ ki āh kɔ́tɔɔ ɓé ndōŋgó ah yɛ́ɛ ɓé tɔ jam.»

¹⁶Mítamlan la Ɔlolómɛ̄ nyɔ́ a ɓɔ̄ŋ nɛ Títo, a ɓɛ́la nlemlem á ákwāā á m̀mím wɛ́ɛ́ ányúū yāná.

¹⁷Títo a yéɓé ŋyáŋlán wáhá, la nyɛ́ ɔ dīgɓan li kɛ á yóg yāná ɛ́h ɓɛ́ ɓé m̀ɓoŋhanɛ́ tɔ wa.

¹⁸Ɓaá óm mɔɔ́lyāŋ wahá ntám élɔŋ la nyɛ́, nyɔ́ biɓasɛ bísɛ bí ŋga tíi mbóŋ élāām likɔlɓan la nsɔ́n wɛ́ɛ́ nyú á li camanɛ lí Pɔ́l M̀ɓɛɛŋ.

¹⁹Li loo náŋ, Biɓasɛ bísɛ bí pɔhléé nyɛ́ á lí ɓɛ́ lí líwāndá jáhá lí dúwɛ ányúū nyúŋ nsɔ́n á ékɔnan-ŋgɔ́ɔ́, nyú bií ŋga sál ányúū lipém lí Nyɔ́ŋ-Ɛsáŋɛ́ nyɛ́-mɛ̄n, la ányúū li yáhɛ lí míɔ̄ŋɔ máhá mílāām.

²⁰Biíg nyɔ́ŋ hɔ́ lítāt nɛ bíh úmúg ɓé ɓɛ́hɛ nsɔh likɔlɓan la li ɓɔŋle jáhá lí nyí mbáŋ-mbáŋ ŋkuh ɓá byeehɛ́ ɓɛ́hɛ.

²¹Ɓɛ́hɛ, biíg somo yé ɛ́ lɛ́ m̀ɓɛɛŋ, ah á miíh mí Nyɔ́ŋ-Ɛsáŋɛ́ nyɛ́-ntámɛ́ ɓé, ndí la á miíh mí ɓot-bí-bínam ki.

²²Ɓaá óm nyɔ́ŋ mɔɔ́lyāŋ wāhá elɔŋ la ɓaómle ɓáhá, nyɔ́ a ŋga yɔ̄g ɓɛ́hɛ li étɛ lí ákwāā wɛ́ɛ́, ndí a ŋgí éthɛgɛ ki wɔ́ tɛɛla nyí vɔ́ŋɔ́ɔ, átɔm nɛ́ a loohán ɓɛ́nɛ li váléne lí lípitá.

²³Títo, a lɛ líwāndá jáma lí dúwɛ, ɔ ɓɛ́ ki liwándá jáma lí nsɔ́n á ŋgwáāg yāná. Elōgyāŋ yáhá ɛ́ lɛ́ ɓā ɓaómle ɓá tɛ́ɛ́yɛ́ á Bíɓasɛ, bíg sál ányúū lipém lí Nyɔ́-a-Pɔ́hlɛ.

²⁴Éthánɛ hɔ́ ɓɔ édiŋ yáná ɔ́sū ví Bíɓasɛ, miní étɛ́ ki ɓɔ́ nɛ eyát bi ŋga ɓɔ̄ŋle ɓɔ́ ányúū yāná ɛ́ byɛ́ɛ́ etɔ.