Read Bakoko Elōg-Gálátia 1 Bible Online

Elōg-Gálátia 1 - Bakoko bible

Elōg-Gálátia 1

¹Ma Póol ŋ̀ómɓɛ, áh nyɔ́ a ɓot-bí-bínam ɓé, tɔ nyɔ́ a mut-a-binam, ndí ŋ̀ómɓɛ a Yésus Kilístus, la ŋ̀ómɓɛ a Ɔlolómɛ̄ Etāa, nyɔ́ a pāhyɛ́ Yésus á póla ɓá ɓá wū.

²Ma Póol, á jóō lí yé elōgyāŋ ɛ lɛ́ vá, mag ciile biɓasɛ bí Galátia nɛ́:

³Ɔlolómɛ̄ Etāa wāhá la Nyɔ́ŋ-Ɛsáŋɛ́ Yésus Kilístus bí lómbó ɓɛ́nɛ bí tí ki ɓɛ́nɛ nsaŋ,

⁴nyɛ́ Yésus a tí nyɛ́-mɛ̄n ányúū miɓé máhá á lí ɓɔŋ nɛ́ a sūŋ ɓɛ́hɛ á míɓē mí ŋkɔŋ-á-sí, li oŋle la nsom á Ɔlolómɛ̄ Etāa wahá.

⁵Lipém lí ɓɛ́ la nyɛ́ á éɓem la á éɓem, ɛ ɓɛ́ náŋ.

⁶Náŋ ag nyágɛ ma nɛ́, maná vóó lí úm lí Ɔlolómɛ̄ mbúh, nyɔ́ a yáŋá ɓɛ́nɛ li kele la elɔ́ŋgɔ m̀mím yé Kilístus, nɛ́ miní ámblé pɔ́l m̀ɓɛɛŋ etám.

⁷La mbálɛ, pɔ́l m̀ɓɛɛŋ etám ɛ sē ɓé, ndí ɓot bí mpuŋgú bí lɛ́ á póla yaná nɛ bí ŋga sómo li sáá lí Pɔ́l M̀ɓɛɛŋ nyí Kilístus á lí tɔɔyɛ lí ɛ́yaɓá.

⁸Ɛ́ ɓɛ́ ɓɛ́hɛ-mɛ̄n, ɛ́ ɓɛ́ áŋgɛl nyí ɛ lɛ á lóō, tɔ nzáá a ŋga lɛ́gɛ́ ɓɛ́nɛ pɔ́l m̀ɓɛɛŋ etám nyí ɛ sē ɓé Pɔ́l M̀ɓɛɛŋ ɓaá lɛgɛ́ ɓɛ́nɛ, eɓómá ɛ́ ɓɛ́ la nyɛ́.

⁹Ɓaá dúgú lí laga náŋ, mag yīgyɛ sīg-pɛ náŋ nyí vɔ́ŋɔ́ɔ nɛ́: «Kíyáɓɛ́nɛ mut a lɛ́gɛ́ ɓɛ́nɛ pɔ́l m̀ɓɛɛŋ etám nyí ɛ sē ɓé Pɔ́l M̀ɓɛɛŋ ɓaá lɛgɛ́ ɓɛ́nɛ, eɓómá ɛ́ ɓɛ́ la nyɛ́!»

¹⁰Nyí vɔ́ŋɔ́ɔ, ɓaá, mi byɛ́ɛ́ kóó la ɔɔ nyí ɓot bí binam tɔ nɛ́ nyí Ɔlolómɛ̄ é? Ɓaá, mag somo li nyɛɛle lí ɓot bí binam é? Ki ɓɔŋ nɛ́ mi ŋgí somo li nyɛɛle lí ɓot-bí-bínam, kí mi sē ɓé pɛ ma m̀ɓɔŋle a Kilístus.

¹¹La mbálɛ á élōgyāŋ, mag yíhɛ ɓɛ́nɛ nɛ́, nyí Pɔ́l M̀ɓɛɛŋ ma laga ɓɛ́nɛ ɛ ŋgá sɔ́le ɓé la mut-a-binam.

¹²Ɛ́nán sig nɛ́, ah mut-a-binam ɓé nɛ á yíglé mā yɔ, ndí tɔ li yéglɛ lí mā yɔ, ndí Yésus Kilístus nɛ́ a yɛ́ɛ́léné mā yɔ.

¹³Ákaa ɛ́sɛ, maná ámblé míɓɔŋɔg máma mí kwaŋ likɔlɓan la eɓasɛ yé Élōg-Yúda. Miníg yí nɛ́ mi ŋgí duhɛ eɓasɛ Ɔ́lolómɛ̄ ŋgandag á lí ɓɔŋ nɛ́ mi cɛ́hɛ́ yɔ́.

¹⁴Akwáá á ŋgándag mi ɓɛ́ɛ́la ányúū míɓɔŋɔg mí kwakwáŋɛ mí ɓatāa wá yíglé ma nɛ́ mi ɓɔ̄ŋlé éɓasɛ yé Élōg-Yúda ŋgandag li loo lí jogo licɛ́ŋ lí siga yáma, la ɓot bí lílōm jáma.

¹⁵Ndí, Ɔlolómɛ̄ a pɔhléé ma tóɓó-tóɓó kí mi ŋgí lɛ á líbum lí yɛɛ, á édiŋ yɛ́ɛ́ ɔ yáŋá ma, ɔ ɛ́n m̀ɓɛɛŋ

¹⁶nɛ́ a yɛ́ɛ́léné mā Mɔ́ɔ̄n wɛ́ɛ̄ nɛ́ ndí, mi lɛgɛ jóō jɛ́ɛ́ á mílōm mí mí sē ɓé mí Élōg-Yúda. Ɛ́g kɛ li ɓat nɛ́ mi vóó li ɓɔŋ náŋ ɛ́h ɓɛ́ ɓé ma lí ɓat lí mut ŋgéélé,

¹⁷ndí tɔ li ɓét á Yélūsalɛm á lí ɓoman la ɓá ɓá dúgú lí ɓɛ́ lí ɓáōmɓɛ. Ányúū náŋ nɛ́ ma kɛ́ jā á épah-ékombo yé Alábya, ámbúh váŋ mu tímān á tísɔn Dámas.

¹⁸Ámbúh mimbú míŋháa, mu ɓét á Yélūsalɛm á lí yí lí nzáá a lɛ Séfas[1], la ma mu tɔ́ɔ élɔŋ la nyɛ́ jóom lí alɔ́ la átáan.

¹⁹Mih ɛ́nɛ́ɛ ɓé ma ŋ̀ómɓɛ ntám tɔ wa, amáh sig Yákop mɔɔ́nyāŋ a Nyɔ́ŋ-Ɛsáŋɛ́.

²⁰Yé ma cíilé ɓɛ́nɛ, mag kan-sɔŋ á jóō lí Ɔ́lolómɛ̄ nɛ minaa ɓé míŋ.

²¹Ámbúh náŋ, mu kɛ́ á epah ékombo yé Sília la yé Silísia.

²²Ndí, ɓot bí Bíɓasɛ bí Kilístus bí lɛ́ á Yúdēa bí ŋgí yí ɓé ma.

²³Ɓot bí bíŋ biɓasɛ bí ŋgí ámble jā ɓot bí laga nɛ́: «Á eceg ɔ́sū, nyɔ́ mut a ŋgí váŋgɛ ɓɛ́hɛ la ndeeŋgɛ, nyí lɛn, ag lɛgɛ ŋyéɓé nyú a ŋgí duhɛ.»

²⁴Náŋ ɔ yíglé nɛ ɓot bí bíŋ biɓasɛ bú ɓégɛ́ Ɔlolómɛ̄ ányúū yáma.