Read Bakoko Elōg-Gálátia 2 Bible Online

Elōg-Gálátia 2 - Bakoko bible

Elōg-Gálátia 2

¹Ámbúh jóom lí mimbú la mínáa, ma Póol mu tímān lí ɓét á Yélūsalɛm elɔŋ la Balnábas, mu nyɔ̄ŋ ki Títo á elɔŋ yáma.

²Mi timáán wóŋ á li yáhɛ li yé Ɔlolómɛ̄ a yɛ́ɛ́lénéé ma, la ma mu máŋlɛ́ ɓɔ Pɔ́l M̀ɓɛɛŋ nyí mi ŋgí lɛgɛ á póla ɓot bí ŋgíla ŋyéɓé. Mu lɛ́gɛ̄ ki yɔ mbii-ɓōt á éti yé tóɓó-tóɓó, á ŋkɔnwoŋɛ́ nɛ́ nsɔ́n wáma áh ɓɔ́lkágán ɓé.

³Ndí, bíh kágyɛ́ɛ ɓé Títo, mɔɔ́n Gelékia, mut a elɔŋ yáma dúwɛ, nɛ́ a kwɛ́ɓɛ,

⁴tɔ náŋ ákaa ɓaɓɔŋ-mpuŋgú ɓá bí byáŋáá elɔŋ la ɓɛ́hɛ, bí ŋgí somo nɛ́ a kwɛ́ɓɛ́ɛ. Ɓáŋ ɓot bí byáŋáá élɔŋ la ɓɛ́hɛ á lí somo nɛ́ bí yí kúndɛ bi byɛ́ɛ̄ nyí ya sɔ́lé la Yésus Kilístus, nɛ́ ndí bí yáanɛ́ ɓɛ́hɛ miyɔ́ŋ mí mbéndá.

⁵Ndí, ɓāh tíi ɓé ɓáŋ ɓot póla tɔ ya tɔ li yéɓe nɛ́ bí dúumbɛ́ ɓɛ́hɛ, nɛ́ ndí ɓɛ́nɛ miní tīŋɓé á mbálɛ nyí Pɔ́l M̀ɓɛɛŋ.

⁶Ndí ányúū mbii-ɓōt, eɓɛ́lé yáɓá ɛ́h byɛ́ɛ́ ɓé mā nsɛ́ŋ tɔ wá átɔm nɛ́, Ɔlolómɛ̄ ah byɛ́ɛ́ ɓé ndɔ́tlán tɔ ya la ɓot-bí-bínam, la ki nɛ́ yíŋ mbii-ɓōt yáh kágyɛ ɓé ma jam tɔ já.

⁷Á mveŋghanɛ́, bí ɛ́nɛ́ɛ́ nɛ́ Ɔlolómɛ̄ a tíéé ma mbóŋ nɛ́ mi lɛ́gɛ́ ɓot bí sē ɓé ɓɔ́ɔ̄n bí Élōg-Yúda Pɔ́l M̀ɓɛɛŋ, nlemlem ákaa a tíéé Pétlos mbóŋ li lɛ́gɛ lí ɓɔ́ɔ̄n bí Élōg-Yúda Pɔ́l M̀ɓɛɛŋ.

⁸Kasig Ɔlolómɛ̄ a yaanɛ́ɛ Pétlos ŋ̀ómɓɛ a Elōg-Yúda, náŋ ki nɛ́ a yáanɛ́ ma ŋ̀ómɓɛ a míŋí mílōm mí mí sē ɓé ɓɔ́ɔ̄n bí Élōg-Yúda.

⁹Ɛnɛ́ Yákop, Séfas la Yohánɛs mbii-ɓōt yí éɓasɛ, ɓá ɛ́n líkaale Ɔlolómɛ̄ a tíéé ma, bú sám ma la Balnábas wɔ, ákaa ndembye nyí ŋ̀atanɛ́ wahá átē a nsɔ́n, á li ɓɔŋ nɛ́ ɓɛ́hɛ bi kɛ̄ ápah ɓot bí sē ɓé ɓɔ́ɔ̄n bí Élōg-Yúda bí lɛ, ɓɔ́g bí kɛ á yóg ɓɔɔ́n bí Élōg-Yúda.

¹⁰Bí lagléé jā ɓɛ́hɛ nɛ́ bih vólkágánɛ́ ɓé ɓɛ́hɛ ɓayɛ́ɛ́yɛ́ɛ bí Yélūsalɛm, náŋ ki nɛ́ ma nyɔ̄ŋ éceg lí ɓɔŋ.

¹¹Ndí, ɛnɛ́ Séfas a sɔ́ɔ́ á tísɔn Antiókia, mu lága nyɛ̄ mbálɛ á m̀ɓambá, átɔm nɛ́ a vuhúú.

¹²Ákaa ɛ́sɛ, sɔ́kágánɛ́ ɓot Yákop a ómóó bí ŋgí sɔ́, Séfas a ŋgí dí elɔŋ la ɓot bí ŋgíla ŋyéɓé. Ndí ɛnɛ́ ɓá sɔ́, ɔ nɛ́ŋɛ̄ la ɓɔ́, átɔm nɛ́ a ŋgí kɔn Elōg-Yúda woŋ.

¹³Ɓáŋá ɓɔ́ɔ̄n bí Élōg-Yúda ɓɔ́g bú nyɔ̄ŋ ákoo wɛ́ɛ́ á líɓōg nyaa nyí ɛ lɛ nɛ́ Balnábas ki ɔ ōŋ ɓɔ̄.

¹⁴Ndí ɛnɛ́ mi ɛ́nɛ́ɛ́ nɛ bí ŋgá wɛɛhɛnɛ ɓé á nzen mbálɛ nyí Pɔ́l m̀ɓɛɛŋ, ma mu laga Séfas ɔsú ví ɓot bísɛ nɛ́: «Kíyáɓɛ́nɛ wa mut ɔ lɛ mɔɔ́n Élōg-Yúda, ɔg niŋ ákaa ɓot bí sē ɓé ɓɔ́ɔ̄n bí Élōg-Yúda, ndí ah ákaa mɔɔ́n Élōg-Yúda ɓé, nɛ́ láá hɔ́ ɔ lɛ nɛ́ ɔ kágyɛ ɓot bí sē ɓé ɓɔ́ɔ̄n bí Élōg-Yúda nɛ́ bí niŋ ákaa ɓɔɔ́n bí Élōg-Yúda é?

¹⁵Ɓɛ́hɛ bi lɛ mbyááhɛ yí Élōg-Yúda, bi sē ɓé ɓɛ́hɛ ɓot bí ŋgíla ŋyéɓé, ɓáŋ ɓaɓɔŋ-miɓé.

¹⁶Ndí ɓaá nyɛɛ́ lí yí nɛ́, ah li naŋɛ lí mbéndá ɓé nɛ lí lɛ́ lí tɛ́lɛ lí sim ɔ́sū ví Ɔ́lolómɛ̄, ndí li yéɓe la Yésus Kilístus. Ányúū náŋ nɛ́ ɓɛ́hɛ ki ɓaá yéɓé la Yésus Kilístus á lí ɓɔŋ nɛ́ bi lēmɓɛ́ kaa ɓá bí tɛ́ɛ́ sim ányúū ŋyéɓé bi byɛɛ́ la nyɛ́, ndí ah lí ógle lí mbéndá Móse ɓé. Átɔm nɛ́, mut tɔ wa a ŋgá kɛ́ ɓé lí ɓɛ́ lí sim ɔsú ví Ɔ́lolómɛ̄ ányúū nɛ́ a óglé mbéndá ɛsɛ̄.

¹⁷Ndí, Kíyáɓɛ́nɛ biíg somo nɛ́ bí lēmɓɛ́ kaa ɓá bí tɛ́ɛ́ sim li kele la Kilístus, ɛ́g ɛ́ni nɛ́ ɓɛ́hɛ ki bi lɛ ɓaɓɔŋ-miɓé nlemlem ákaa ɓá bí sē ɓé ɓɔ́ɔ̄n bí Élōg-Yúda. Ɓaá, ɛnɛ náŋ ag somo li laga nɛ́ Kilístus a lɛ njɔm aɓé wáhá é? Á li pɔ́t lí mbálɛ, kɛ́m.

¹⁸Jɔ́ nɛ́ kí ma timan li óŋ li yé ma búg, ɛnɛ́ ma yáanɛ́ mā-mɛn ǹtɛ́ŋgānɛ-mbéndá.

¹⁹Ndí, á yé ɛ́ ŋga légɓe mbéndá, ma wú nyɛmb nyí ya sɔ́lé á mbéndá yɔ-mɛn á li ɓɔŋ nɛ́ mi lā li niŋ ányúū Ɔlolómɛ̄. Ma tōmlɛ́ á mbásá elɔŋ la Kilístus.

²⁰Mag niŋ, ndí ah mā-mɛ̄n ɓé nyɔ́ŋ, Kilístus nɛ́ a ŋga nīŋ átē wama, átɔm nɛ́, eniŋ yáma yé lɛ̄n, yé líɓɛ́ɛg lí mut-a-binam, mag niŋ yɔ́ átē a ŋyéɓé la Mɔɔ́n Ɔlolómɛ̄ nyɔ́ a dīŋ ma, ɔ wú ányúū yáma.

²¹Ɛ́ sē hɔ́ ɓé pɛ epíl nɛ̄ mi pún likaale lí Ɔ́lolómɛ̄, átɔm nɛ́ Kíyáɓɛ́nɛ mbéndá nɛ ɛ ŋga tɛ́ɛ́yɛ sim, ɛnɛ Kilístus a wú yɛ̄mɛ́.»