Read Bakoko Elōg-Gálátia 4 Bible Online

Elōg-Gálátia 4 - Bakoko bible

Elōg-Gálátia 4

¹Ma Póol, miɔ́ŋɔ máma mí nɛ́, eceg ɛ́sɛ ŋ̀koto-embámbá a ŋgí lɛ mɔ́ɔ̄n ntɔ́ga, liɓɛ́ɛg jɛ́ɛ́ líg punan la liɓɛ́ɛg lí ŋyɔ́ŋ, tɔ náŋ ákaa nyɛ́ nɛ́ a lɛ m̀wɛɛ́n a míŋ míɓɛɛŋ mísɛ,

²kasig a lɛ jā á sí likanʼyɛ lí ɓasáŋɛ́-bí-líɓóŋgó, ɓá bí byɛɛ́ nɛ̄ bí tát míɓɛɛŋ mɛ́ɛ́, li pám á éceg yé m̀byál nyɛ́ a tɛ́ɛ́yɛ́ɛ ányúū yɛ́ɛ̄.

³Náŋ a lɛ nlemlem á jam la ɓɛ́hɛ, éceg bi ɓɛ́ɛ́ ɓɔ́ɔ̄n ɓátɔ̄ga, bi ɓɛ́ɛ́ míyɔ̄ŋ, á sí likanʼyɛ lí biveglé bí ŋkɔŋ-á-sí.

⁴Ndí, ɛnɛ́ eceg yá kɔlan, Ɔlolómɛ̄ ɔ óm Mɔ́ɔ̄n wɛ́ɛ̄, nyɔ́ a byáá la mindígá, ɔ ɓɛ́ á sí mbéndá Elōg-Yúda,

⁵la nyɛ́ ɔ sóm kundɛ nyí ɓáŋ bí ɓɛ́ɛ́ á sí mbéndá á li yaanɛ lí ɓɔ ɓɔɔ́n bí Ɔlolómɛ̄.

⁶Kasig miní lɛ́ kɔɔ ɓɔɔ́n ɓɛ́ɛ́, Ɔlolómɛ̄ a vá M̀búl á Mɔ́ɔ̄n wɛ́ɛ̄ átē á mimím máhá, nyúŋ M̀búl nɛ́ á ŋga lón nɛ́: «Ába!» Náŋ a lɛ nɛ́ Etāa.

⁷Jɔ́ nɛ́, ɔ sē hɔ́ ɓé pɛ ŋyɔ́ŋ, ndí ɔ lɛ mbyááhɛ. Kasig ɔ lɛ mbyááhɛ, wág ɔ lɛ ja ŋ̀koto-embámbá yé Ɔlolómɛ̄ a nāŋʼyéné ɓɔ́ɔ̄n ɓɛ́ɛ́.

⁸Á kwakwáŋɛ, miní ŋgí yí ɓé Ɔlolómɛ̄, ányúū náŋ nɛ́ miní ɓɛ́ɛ́ míyɔ̄ŋ mí míloó, mí mí sē ɓé kɔɔ miloó.

⁹Ndí, nyí vɔ́ŋɔ́ɔ hɔ́ miní ŋga yí Ɔlolómɛ̄, tɔ nɛ́ nyɛ́ Ɔ́lolómɛ̄ a ŋga yí ɓɛ́nɛ, nɛ́-láá miní ŋgí óglégé míloó mí míh byɛ́ɛ́ ɓé ŋguu tɔ eɓáha é? Miní ŋgí byɛ́ɛ́ kóó li ɓɛ́ lí míyɔ̄ŋ máɓá é?

¹⁰Átē a eɓasɛ, miní byɛ́ɛ alɔ́ wá, sóŋ yá, biceg bí m̀bú byá la mimbú má mí miní ŋga dítɛ tóɓó-tóɓó.

¹¹Miníg kɔnhanɛ mā woŋ á lí ɔ́ŋɔ́ nɛ́ ma sál yɛmɛ́ ányúū yāná!

¹²Á élōgyāŋ, mag sɔ́hyé ɓɛ́nɛ nɛ́, miní ɓɛ́ kaa ma, kasig ma yáan kaa ɓɛ́nɛ. Manáh ɓɔŋ ɓé ma jam liɓé tɔ já.

¹³Miníg yí m̀ɓɛɛŋ nɛ́, ɔkɔn váma nɛ́ ví ɓɔŋɔ́ɔ́ nɛ́ mi lɛ́gɛ̄ ɓɛ́nɛ Pɔ́l M̀ɓɛɛŋ á ŋgele ɔsú,

¹⁴tɔ náŋ ákaa eɓóg yáma ɛ́ nyúū ɛ tíéé ɓɛ́nɛ ndutu, miníh púnúu ɓé ma ndí tɔ li píti lí ma. Ndí, á mveŋghanɛ́, miní lɛ́gléé mā kaa áŋgɛl Ɔlolómɛ̄ la ákaa Yésus Kilístus.

¹⁵Mivag máná mí kwakwáŋɛ mí lɛ́ hɔ́ véé é? Á mbálɛ, mag tíi nyí mbóŋ nɛ́: kí ɓɔŋ nɛ́ miní ŋgí la, kí miní ɓógtɛ́ɛ miíh máná á lí tíi lí ma mɔ́.

¹⁶Ndí, nyí vɔ́ŋɔ́ɔ, ɓaá, ma yáan ǹlem waná ányúū nɛ mag laga ɓɛ́nɛ mbálɛ é?

¹⁷Ɓot bí ŋga sómo li átɓe la ɓɛ́nɛ bí sē ɓé m̀ɓɛɛŋ. Bíg somo ja nɛ́ bí ɓágá ma la ɓɛ́nɛ, nɛ́ ndí miní tímān la ɓɔ́.

¹⁸Ndí, ɛ́ lɛ m̀ɓɛɛŋ nɛ́ ɓáŋ ɓot bí étɛ́ ɓɛ́nɛ ekɔ́ɔ́ éceg ɛ́sɛ, ɓáh nyɛɛ ɓé ja yɔ́ lí étɛ eceg mi lɛ̄ élɔŋ la ɓɛ́nɛ.

¹⁹Á ɓɔ́ɔ̄n ɓáma, mi ŋgí sɔghégé ányúū yaná kaa mindígá nɛ a ŋga kóogɛ, náŋ la náŋ tɛɛ maná yéɓé nɛ Kilístus a tɔ́ɔ á mímīm máná.

²⁰Ɔɔ, mi byɛ́ɛ́ kóó lí ɓɛ́ á ŋgwáāg yaná mú á yé eceg, ányúū li máŋlɛ lí ɓɛ́nɛ kaa ɛ́ ŋga sōmlɛ, átɔm nɛ́, mi ŋgá yí ɓé pɛ ma kaa mi ɓɔ̄ŋ la ɓɛ́nɛ.

²¹Laglán ma, ɓɛ́nɛ ɓá miní byɛ́ɛ̄ kóó li ɓɛ́ á sí likanʼyɛ lí mbéndá, ɓaá, manáh ámble ɓé yé nyíŋ mbéndá ɛ ŋga lága é?

²²Ákaa ɛ́sɛ, ɛ́ cíiɓɛ́ɛ nɛ́ Áblaháam a ɓɛ́ɛ́la ɓɔɔ́n-bí-páam bíɓáa, wá, nyaŋɛ́ Ágāal a ɓɛ́ɛ́ ǹdimí, nyɔ́ŋɔ́ ki nyaŋɛ́ Saalá ɔ ɓɛ́ kundɛ-mindígá.

²³Ndí, mɔ́ɔ̄n a ǹdimí-á-míndīgá ɔ byáa á kóó nyí mut-a-binam, nyɔ́ a kundɛ-mindígá ɔ byáá á míkakanɛ mí Ɔ́lolómɛ̄.

²⁴Ŋgan ɛ lɛ mú á nyú ŋkwɛl. Ɛg yéglɛ ɓɛ́hɛ nɛ́, ɓá ɓondígá bíɓáa bí lɛ́ bísaa-bí-míat bíɓáa. Esaa-líat yá ɛ́ lɛ yé yá sɔ́lé á ɔ́kolá ví Sinái, yɔ́ nɛ́ ɛ́ lɛ́ Ágāal ŋ̀kol mindimí.

²⁵Ɔkolá ví Sinái ví lɛ́ á épah-ékombo yé Alábya. Ágāal a lɛ́ Yélūsalɛm nyí lɛn, ányúū nɛ nyɛ́ la ɓɔɔ́n ɓɛ́ɛ́ bí lɛ́ míndimí.

²⁶Ndí, nyí Yelúsalɛm ɛ lɛ á lōó ɛ lɛ́ kundɛ, yɔ nɛ́ ɛ lɛ̄ yɛɛ wahá,

²⁷átɔm nɛ́ yá cíiɓɛ́ nɛ: «Sophɛ́ɛ, á ékom-míndīgá, wa nyɔ́ ɔ ŋgí byál ɓé, tɛ́ɛ́ mílōn mí mívag, wa nyɔ́ wāh yí ɓé esɔghe yé ábyāl, átɔm nɛ́ mindígá ɓá cóó a byɛ́ɛ ɓɔɔ́n ŋgandag li loo lí míndīgá a byɛ́ɛ̄ nlóm.»

²⁸Ndí ɓɛ́nɛ á élōgyāŋ, ákaa Ísaak, miní lɛ́ ɓɔ́ɔ̄n bí líkakanɛ lí Ɔlolómɛ̄.

²⁹Á kwakwáŋɛ, ákaa nyɔ́ mɔɔ́n a byááyéé á kóó nyí mut-a-binam á ŋgí teeŋgɛ mɔɔ́n a byááyéé la M̀búl á Ɔ́lolómɛ̄, náŋ ki nɛ́ ɛ́ ŋgí ɓɔ̄ŋɓɛ́gɛ́ nyí lɛn.

³⁰Ndí, Licii-Lipúán jɔ́ líg laga nɛ́ yéé é? Licii-Lipúán líg laga nɛ́: duhú ǹdimí-á-míndīgá la mɔ́ɔ̄n wɛ́ɛ̄, ányúū nɛ, ɛ́ ŋgá somlɛ ɓé nɛ mɔɔ́n ǹdimí-á-míndīgá a kótō émbāmbá elɔŋ la mɔɔ́n kundɛ-mindígá.

³¹Jɔ́ hɔ́ nɛ á élōgyāŋ, bi sē ɓé ɓɛ́hɛ ɓɔɔ́n bí ǹdimí-á-míndīgá, ndí bi lɛ́ ɓɔ́ɔ̄n bí kundɛ-mindígá.