Read Bakoko Elōg-Éféso 1 Bible Online

Elōg-Éféso 1 - Bakoko bible

Elōg-Éféso 1

¹Ma Póol, ŋ̀ómɓɛ a Yésus Kilístus li oŋle la nsom á Ɔlolómɛ̄, mag ciile ndog-Ɔlolómɛ̄ nyí ɛ lɛ́ ɓot ɓá tiŋɓé la Yésus Kilístus.

²Ɔlolómɛ̄ Etāa wahá la Nyɔ́ŋ-Ɛsáŋɛ́ Yésus Kilístus bí lómbó ɓɛ́nɛ bí tí ki ɓɛ́nɛ nsaŋ.

³Eɓégɛ ɛ́ ɓɛ́ la Ɔlolómɛ̄, Ɛsáŋɛ́ a Ɛtáŋɛ wahá Yésus Kilístus, kasig ɓaá āt la Nyɔ́-a-Pɔ́hlɛ, a lómbó ɓɛ́hɛ la ndómbo yí M̀búl ɛ́sɛ ɛ́ ŋga sɔ́le á lóō.

⁴Átē a ediŋ yɛ́ɛ́, a dúgú ɓɛ́hɛ li pɔhɔ sɔ́kágánɛ́ ŋkɔŋ-á-sí ág vegɓɛ, nɛ́ bi átán la Nyɔ́-a-Pɔ́hlɛ, la nɛ́ bi ɓɛ́ ɓápūán, ŋgíla ɔnɛ́g ɔ́sū vɛ́ɛ́.

⁵Á jóō lí Yésus Kilístus nɛ́ a tɛ́ɛ́yɛ́ ɔ́sū ví éceg nɛ́ bi ɓɛ́ ɓɔɔ́n ɓɛ́ɛ́ bí tín-aɓɛl. La elɔ́ŋgɔ yɛ́ɛ́ m̀mím nɛ́ a sómo nɛ bi ɓɛ́ náŋ.

⁶Bi lɔ́ŋgɛ́ hɔ́ lipém lí Ɔlolómɛ̄, ányúū taŋ míkaale a tí ɓɛ́hɛ la m̀mím nláám á ŋ̀atanɛ́ wāhá la edidíŋɛ yɛ́ɛ́ Mɔ́ɔ̄n Yésus Kilístus.

⁷La micii mɛ́ɛ́ nyɛ́ Yésus Kilístus nɛ́ ɓaá kɔplɛ. Á ŋ̀atanɛ́ la nyɛ́ nɛ́ ávuha wáhá wá kūh élaakɛ kasig Ɔlolómɛ̄ a lóohán lí ɓɛ́ lí elɔ́ŋgɔ.

⁸Ɔlolómɛ̄ a yáhɛ́ ɓɛ́hɛ la ɔbul vɛ́ɛ́ ví míkaale, ányúū náŋ nɛ́ a yáhɛ́ ɓɛ́hɛ la peg la eyí.

⁹A yɛ́ɛ́léné ɓɛ́hɛ mbaŋ nyí nsom wɛ́ɛ́, ɔ yɛ́ɛ́léné ki ɓɛ́hɛ peg a vúl la m̀mím á m̀ɓɛɛŋ ɔ́sū ví eceg á jóō lí Nyɔ́-a-Pɔ́hlɛ.

¹⁰A tɛ́ɛ́yɛ́ eceg á lí yáhɛ lí nyíŋ peg a vúl. Nyíŋ peg yɛ́ɛ̄ ɛ lɛ nɛ́ a kómánɛ̄ mam mísɛ mí lɛ́ á sí la á lōó, á lí vá lí mɔ́ á sí likanʼyɛ lí pɔ̄m ŋ̀kanʼyɛ nɛ́ Yésus Kilístus.

¹¹Á ŋ̀atanɛ́ wāhá la Nyɔ́-a-Pɔ́hlɛ nɛ́ ɓaá kuh ɛ́jāhá joga lí émbāmbá, ányúū nɛ Ɔlolómɛ̄ a tɛ́ɛ́yɛ́ ɓɛ́hɛ á ɔ́sū ví éceg li oŋle la peg yɛ́ɛ́ a vúl. Ag ɓɔ̄ŋ joó nɛ jam ákaa a súgɛ la ákaa a ɔ́ŋɔ.

¹²Ɓɛ́hɛ ɓot ɓaá dúgú lí pitye lí Nyɔ́-a-Pɔ́hlɛ, bi lɔ́ŋgɛ́ hɔ́ lípēm lí Ɔ́lolómɛ̄.

¹³La nyɛ́ ki nɛ́ maná ámblé eɓaŋgá yé mbálɛ, Pɔ́l M̀ɓɛɛŋ nyí lisuŋga jáná. La nyɛ́ sīg-pɛ nɛ́ maná yéɓe, bú átyɛ́ ɓɛ́nɛ ndembye nyí ɛ lɛ̄ M̀búl Mpúán a kákanɛ. Nyɔ́ŋ M̀búl Mpúán

¹⁴nɛ á lɛ́ éɓeeka yé émbāmbá bií ŋga kɛ́ li koto á éceg bí ŋga mān ɓɛ́hɛ li kɔpɔ á áɓē. Bi lɔ́ŋgɛ́ hɔ́ lípēm lí Ɔ́lolómɛ̄.

¹⁵Ányúū náŋ nɛ́ ma Póol, eceg ma ámblé pɔ́l ŋyéɓé miní byɛ́ɛ̄ la Nyɔ́ŋ-Ɛsáŋɛ́ Yésus, la ediŋ miní byɛ́ɛ̄ ányúū ndog-Ɔlolómɛ̄ ɛsɛ̄,

¹⁶māh tɔmb ɓé ma lí tíi lí Ɔlolómɛ̄ mítamlan ányúū yāná eceg sig mi ŋga símhánɛ ɓɛ́nɛ á míkánɛ máma.

¹⁷Ɔlolómɛ̄, Loó lí Ɛtáŋɛ wahá Yésus Kilístus, Etāa nyɔ́ a lipém, a tí ɓɛ́nɛ M̀búl á peg nyú á ŋga yɛ́ɛ́léne ɓɛ́nɛ nyɛ́, la li yíhɛ lí ɓɛ́nɛ nyɛ́ m̀ɓɛɛŋ m̀ɓɛɛŋ.

¹⁸A légé mimím máná nɛ́ mípūū mɛ́ɛ́ mí paayé ɓɛ́nɛ, á lí ɓɔŋ nɛ́ miní sɔ́ŋtánɛ jɔɔ́jɔ́ɔ lipitá ŋyáŋlán wɛ́ɛ́ á ŋga sɔ́la ɓɛ́nɛ, nɛ́ miní sɔ́ŋtánɛ wɔɔ́wɔ́ɔ ábyaŋ lipém jɛ́ɛ́ lí ŋga sɔ́la ɓɛ́nɛ, yɔɔ́yɔ́ɔ embámbá a ŋga káahanɛ ɓɛ́nɛ la ndog yɛ́ɛ̄,

¹⁹yɔɔ́yɔ́ɔ ŋguu ecɛ́ŋ a étɛ́ á ŋgwáāg yāhá ɓɛ́hɛ ɓayéɓe. Nyíŋ ŋguu yɛ́ɛ̄ la mbimban yɛ́ɛ̄,

²⁰a éthɛ́nɛ́ ɓɛ́hɛ byɔ́ á Nyɔ́-a-Pɔ́hlɛ, eceg a pāhyɛ́ nyɛ á póla ɓá ɓá wū, ámbúh náŋ, ɔ tɔ́ɔyɛ́ nyɛ á m̀ɓɛ́nlómɛ wɛɛ́ á ékombo-lóō.

²¹Ányúū náŋ nɛ́, Nyɔ́-a-Pɔ́hlɛ a lɛ á lōó lí jóō nɛ Gɔ́mna, jóō nɛ Likanʼyɛ, jóō nɛ Ŋguu, jóō nɛ́ Káísa la míŋí móō mítām, tɔ yá ɓɛ́ nɛ míg yáŋlɛ láá mú á nyí sí, ndí tɔ á nyí ɛ ŋga kɛ́ li sɔ́.

²²Ɔɔ, Ɔlolómɛ̄ a vá byóōm bísɛ á sí míkoo mí Nyɔ́-a-Pɔ́hlɛ, ɔ ɓétɛ́ nyɛ á lōó lí mam mísɛ, ɔ tɛ́ɛ́yɛ́ nyɛ á m̀mú á Éɓasɛ,

²³yé ɛ́ lɛ́ nyúū nyí Nyɔ́-a-Pɔ́hlɛ. Átē á yéŋ eɓasɛ nɛ́ Nyɔ́-a-Pɔ́hlɛ a lɛ nyɛ́ asɛ̄, átē a nyɛ́ Nyɔ́-a-pɔ́hlɛ nɛ́ Ɔlolómɛ̄ a tɔ́ɔ̄ nyɛ́ asɛ̄.