Read Bakoko Elōg-Fílípi 2 Bible Online

Elōg-Fílípi 2 - Bakoko bible

Elōg-Fílípi 2

¹Á élōgyāŋ, kasig ŋ̀atanɛ́ wāná la Nyɔ́-a-Pɔ́hlɛ a ŋga tíi mikúndá, kasig ediŋ yɛ́ɛ́ ɛ́ ŋga létɛ nyúū, kasig M̀búl wɛ́ɛ́ wá aát ɓɛ́nɛ, kasig miní byɛ́ɛ̄ eɓɔɓɔtɛ-m̀mím la m̀mím-á-ŋgɔ́ɔ́ á póla yaná,

²miní nīŋ hɔ́ átē a ŋ̀ámblānɛ́ á lí ɓɔŋ nɛ́ mivag mána mí yāl. Miní ɓɛ́la nlemlem á ediŋ, m̀mím wá, miní sōmó lí ɓɛ́ lí jam já.

³Miníh ɓɔŋɔ́g ɓé jam tɔ já á pembhán, tɔ li somo lí yɛ̄mɛ́ lípēm. Ndí, la esuhɛ-nyuú, miní nyɔŋ ɓáŋá ɓátām ɔ́ŋgɛn bíg loo ɓɛ́nɛ.

⁴Mut tɔ wa ah somlág ɓé jā m̀ɓɛɛŋ ányúū yɛ́ɛ̄ nyɛ́-ntámɛ́, ndí a ɔ́ŋɔ̄ ki ɓáŋá ɓátām.

⁵Niŋán náŋ ɓɛ́nɛ la ɓɛ́nɛ ákaa ɓot bí ŋga nīŋ átē a ŋ̀atanɛ́ la Yésus Kilístus.

⁶Nyɛ́ Yésus Kilístus, tɔ náŋ ákaa a byɛ́ɛ̄ líɓɛ́ɛg lí Ɔ́lolómɛ̄, āh ɔ́ŋɔ ɓé nɛ́ kaa a kɔ́ɔ la Ɔlolómɛ̄, náŋ a lɛ́ jam a nyɛ́ɛ lí tɔɓene.

⁷Ndí, nyɛ́-mɛ̄n ɔ mwáhɛ́ líɓɛ́ɛg jɛ́ɛ́, ɔ nyɔ̄ŋ líɓɛ́ɛg lí m̀ɓɔŋle, ɔ ɓɛ́ á épunan yé mut-a-binam, ɔ lēmɓɛ́ɛ á yéŋ eɓɛ́lé ákaa mut-a-binam.

⁸Ɔ súhɛ̄ nyɛ́-mɛ̄n, ɔ ɓɛ́ éōgle nɛ́-tɛ́ɛ la á nyɛmb, ndí nyɛmb nyí mbásá ki.

⁹Ányúū náŋ nɛ́ Ɔlolómɛ̄ a tí nyɛ etɛ́l ɛ́ kahɛ́ á lōó lí bítɛ̄l bísɛ ɔ lō ki nyɛ́ jóō lí lɛ́ á lōó lí móō mísɛ,

¹⁰nɛ́ ndí á jóō lí Yésus, jóō nɛ́ eveglé, ɛ́ ɓɛ́ á loó, ɛ́ ɓɛ́ á sí, ɛ́ ɓɛ́ á sí-ntím ɛ́ úm miɓɔ́ŋ á sí,

¹¹la ki nɛ́, á lípēm lí Etāa Ɔlolómɛ̄, ɔlémb sig ví páhá nɛ́: «Yésus Kilístus nɛ́ a lɛ Nyɔ́ŋ-Ɛsáŋɛ́.»

¹²Á élōgyāŋ yé ediŋ, á yé ma sɔ́lé ɓɛ́nɛ li laga, ɓɛ́nɛ ɓá miní ɓáág éōgle, miníh ɓɛ́ɛ́g ɓé jā yɔ́ ɔ́sū vama, ndí nyí vɔ́ŋɔ́ɔ mi sē ɓé ma, miní lóohán sīg-pɛ yɔ́ lí ɓɛ́. Átē a woŋ la nsɛ́glānɛ́, miní lɔ́gɓán á lí étɛ nɛ́ maná suŋɓɛ.

¹³Átɔm nɛ́, Ɔlolómɛ̄ nɛ́ a ŋga sál á póla yāná, nyɛ́ nɛ́ a tí ɓɛ́nɛ ŋguu nɛ́ miní ɓɛ́la kóó lí ɓɔŋ la ŋguu nyí li yáhɛ lí mam li oŋle la m̀ɓɛɛŋ á peg a vúl.

¹⁴Ɓɔŋán mam mísɛ ɛ́h ɓɛ́ ɓé lí dumlan tɔ li kála,

¹⁵á lí ɓɔŋ nɛ́ miní ɓɛ́ ŋgíla njɔm, miní ɓɛ́ mipúú, la nɛ́ miní ɓɛ́ ɓɔɔ́n bí Ɔlolómɛ̄, ɓá bí lɛ́ ŋgíla ɔnɛ́g átē a nyí nyɔŋɔn ɓot bí kɔ́tɛ́ la nyí nyɔŋɔn eɓé, ápah miní ŋga kɛ́ li paa ákaa mipúú á ŋkɔŋ-á-sí,

¹⁶ɓɛ́nɛ ɓot miní ɓɛ́gɛ̄ eɓaŋgá yé eniŋ. Náŋ miníg ɓɛ́ ma ewáhlé-ŋgáŋ á ɔ́lɔ̄ Nyɔ́-a-Pɔ́hlɛ a ŋga kɛ́ li sɔ́, ányúū nɛ maná étɛ nɛ́ mih wúēē ɓé ma nlɔ́gɓānɛ́ ndí tɔ li sál ányúū yɛmɛ́.

¹⁷Ndí, tɔ yá pám ja nɛ́ micii máma má nyɛ́ɛ lí kómɓɛ ákaa likaale lí ŋga ɓátle á nsúlé nyú á lɛ́ nsɔ́n miní ŋga sál ányúū ŋyéɓé wáná, náŋ ag kɔnɛ jā ma mívag, mi sōphɛ́ ki elɔŋ la ɓɛ́nɛ bísɛ.

¹⁸Ɓɛ́nɛ ki, kɔnán mívag nlemlem, miní sōphɛ́ elɔŋ la ma.

¹⁹Á élōgyāŋ, kí Nyɔ́ŋ-Ɛsáŋɛ́ Yésus a kɔ́n ŋgɔ́ɔ́, puh eceg mag óm ɓɛ́nɛ Timotéo, á lí ɓɔŋ nɛ́ pɔ́l yāná a ŋga kɛ́ ma lí sɔ́la, ɛ́ letɛ́ ma nyúū.

²⁰Amáh nyɛ́, mih byɛ́ɛ́ ɓé ma mut ntám tɔ wa nyɔ́ a byɛ́ɛ̄ mílemlem mí míɔ̄ŋɔ kaa ma, nyɔ́ a byɛ́ɛ̄ kɔ́ɔ ekɔ́ɔ́ la ɓɛ́nɛ.

²¹Ɓáŋá ɓot bísɛ bíg somo ja m̀ɓɛɛŋ wáɓá ɓɔ́-mɛ̄n, ndí ah m̀ɓɛɛŋ á Yésus Kilístus ɓé.

²²Ndí nyɛ́, miníg yí nɛ́ a étɛ́ yé a kɔ́ɔ̄ lí ɓɔŋ. A byáŋ élɔŋ la ma ákaa mɔɔ́n á ŋgwáāg ɛsáŋɛ́, á nsɔ́n á lí lɛgɛ lí Pɔ́l M̀ɓɛɛŋ.

²³Nyɛ́ hɔ́ nɛ mi ŋga ɔ́ŋɔ ɓɛ́nɛ li óm, eceg mi ŋga kɛ́ li yí lí m̀ɓɛɛŋ yéé ɛ́ ŋga kɛ́ ma lí loole.

²⁴Mi lɛ́ yágá ki mbáki la Nyɔ́ŋ-Ɛsáŋɛ́ nɛ, mā-mɛ̄n mag sɔ́ wóŋ á yóg yāná puh eceg.

²⁵Ndí tɔ la náŋ, ma ɛ́n nsɛ́ŋ lí tímānɛ̄ lí ɓɛ́nɛ mɔɔ́lyāŋ wāhá Epafolodítɛ, mut a elɔŋ yáma yé nsɔ́n la eɓándá, nyɔ́ ɓɛ́nɛ-mɛ̄n miní ómóó eceg mi ɓɛ́ɛ́la kóó mióŋgánɛ.

²⁶Ányúū nɛ a lóohán lí ɓɛ́la lí kóó li ɛ́n lí ɓɛ́nɛ bísɛ, la ki nɛ́ náŋ a téeŋgɛ́ nyɛ nɛ́ maná ámblé pɔ́l ɔkɔn vɛ́ɛ́.

²⁷La mbálɛ a kɔnɔ́ɔ́, li pám ɓɛɓɛ la nyɛmb. Ndí, Ɔlolómɛ̄ a kɔ́nlé nyɛ ŋgɔ́ɔ́, ah nyɛ́-ntámɛ́ ɓé, ndí la ma ki, á lí pún nɛ́ mih loohágán ɓé mā lí mɔtɔ.

²⁸Jɔ́ hɔ́ nɛ mi ŋga dīgɓan ɓɛ́nɛ nyɛ́ lí óm, á li somo nɛ́ eceg miní ŋga ɛ́n sīg-pɛ nyɛ́, miní sōphɛ́ɛ la mivag la nɛ́ mág mih loohágán ɓé ma lí súnan.

²⁹Á ŋ̀atanɛ́ wāhá la Nyɔ́ŋ-Ɛsáŋɛ́, miní kālé nyɛ́ la mivag micɛ́ŋ ákaa linyaŋ. Miní tí ɓot bí lɛ́ ákaa nyɛ́ ŋgandag adit,

³⁰átɔm nɛ́, a mɓɛ́ ɔ wú ányúū nsɔ́n á Nyɔ́-a-Pɔ́hlɛ, a mɓɛ́ ɔ ɓɔ́lán éniŋ yɛ́ɛ́ á lí óŋgánɛ lí ma, jam jé ɓɛ́nɛ-mɛ̄n manáh kuh ɓé póla á lí ɓɔŋle lí ma.