Read Bakoko Elōg-Fílípi 3 Bible Online

Elōg-Fílípi 3 - Bakoko bible

Elōg-Fílípi 3

¹Á élōgyāŋ, á lí súgɛ lí ŋkwɛl wáma, mag laga ɓɛ́nɛ nɛ́, miní sōphɛ́ɛ la mivag á ŋ̀atanɛ́ wāná la Nyɔ́ŋ-Ɛsáŋɛ́. Náŋ a ŋgá téeŋgɛ ɓé ma á li ciile lí ɓɛ́nɛ milemlem mí mam, átɔm nɛ́ náŋ ag letɛ ɓɛ́nɛ nyuú.

²Nyɔŋán lítāt la ɓaɓɔŋle ɓaɓé, ɓɔ́ yí tít-ɓot, ɛ́ ŋga yīgyɛ nɛ́ likwɛɛ lí Élōg-Yúda nɛ́ lí lɛ́ taŋ.

³Á mbálɛ, titih míkwɛɛ́g mí ɓot ɛ́ lɛ́ ɓɛ́hɛ, ányúū nɛ ɓɛ́hɛ nɛ́ M̀búl á Ɔlolómɛ̄ a ŋga óŋgánɛ li ɓɔŋle lí nyɛ esaa epúán, ányúū nɛ Yésus Kilístus nɛ́ a lɛ ɓɛ́hɛ ɛyáhá éwāhlé-ŋgáŋ, la ki nɛ́ ɓɛ́hɛ bi ŋgá pitye ɓé ɓɛ́hɛ-mɛ̄n.

⁴Mi byɛ́ɛ̄ pɔ́n kúndɛ li pitye lí mā-mɛn. Kíyáɓɛ́nɛ mut ntám ag ɔ́ŋɔ nɛ́ ag la li pitye lí nyɛ́-mɛ̄n, ɛnɛ mág, mag la li pitye lí mā-mɛn li loo lí nyɛ.

⁵Mā mut ma kwɛ́ɛɓɛ́ á ɔlɔ́ vá yáhɛ mwaam, ma mɔɔ́n Íslāɛl á lílōmɛ lí Bínyámin, mbyááhɛ nyí Elōg-Hébɛl, nyí ɛ ŋga ōŋle mbéndá Elōg-Yúda ákaa taŋ mɔɔ́n Falísái.

⁶Yéŋ ekɔ́ɔ́ mi ɓɛ́ɛ́la yú yíglé ma lí váŋgɛ lí Eɓasɛ la ndeeŋgɛ. Á yé ɛ ŋga légɓe eniŋ ɛ́ tɛ́ɛ́ sim kaa mbéndá ɛ ŋga lága, bí ŋgá tɔghan ɓé mā tɔ̄ jam.

⁷Ndí, bíŋ byoóm bísɛ bí bí ɓɛ́ɛ́ ma nsɛ́ŋ, nyí lɛn mag ɛ́n byɔ́ yɛmɛ́ ányúū Nyɔ́-a-Pɔ́hlɛ.

⁸Ɔɔ, mag ɛ́n mam mísɛ yɛmɛ́ ányúū nɛ, li yí lí Yésus Kilístus Ɛtáŋɛ wama lá loohán lí ɓɛ́ lí élɔ́ŋgɔ jam. Ányúū yɛ́ɛ̄, ma ɓɔ́lán mam mísɛ, ndí mag ɛ́n jā mɔ́ mísɛ kaa bináán á lí ɓɔŋ nɛ́ mi tómbánɛ Nyɔ́-a-Pɔ́hlɛ,

⁹mi ɓɛ́ á ŋ̀atanɛ́ la nyɛ́. Liɓɛ́ɛg jáma lí sim lí ŋgá sɔ́le ɓé á lí oŋle jáma lí mbéndá, ndí líg sɔ́le ja á ŋyéɓé mi byɛ́ɛ̄ la Nyɔ́-a-Pɔ́hlɛ. Yéŋ etɛ́l-sim ɛ́g sɔ́le la Ɔlolómɛ̄, la yɔ́ yá tɔɓéné á ŋyéɓé.

¹⁰Yé ɛ́sɛ mi ŋga sómo, ɛ́ lɛ́ lí yí lí Nyɔ́-a-Pɔ́hlɛ, li yí lí ŋguu nyí ya pāhyɛ́ nyɛ, nɛ́ ndí mi nyɔ́ŋ ŋgaan á bísɔghe byɛ́ɛ́, á lí ɓɔŋ nɛ́ mi púnān la nyɛ́ á nyɛ̄mb yɛ́ɛ̄.

¹¹La váŋ, mag ɓɛ́la lipitá nɛ mag kɛ li pahye átē a ɓá ɓá wū kí póla ya ɛ́ni.

¹²Náŋ a ŋgá somo ɓé lí laga nɛ́ ma kūh bíŋ bísɛ, tɔ nɛ́ mi lɛ́ ŋgíla ɔnɛ́g, ndí mi ŋgí lɔ́gɓágan á lí kuh lí míŋ mam mísɛ, ányúū nɛ Yésus Kilístus a mān mā lí nyɔŋ.

¹³Á élōgyāŋ, mi ŋgá ɔ́ŋɔ ɓé ma nɛ́ ma kūh mam mísɛ, ndí, pɔ̄m kóó mi byɛ́ɛ̄ ɛ lɛ́ nɛ́, mi vólánɛ̄ yé ɛ́sɛ yá loo á éniŋ yáma, mi ōŋ jā yé ɛ́sɛ ɛ́ tɛ́ɛ́ ma ɔ́sū.

¹⁴Jɔ́ nɛ́ mi ŋga nāŋga m̀bíí nɛ́ mi pám á lísūg lí nlee, á lí tombanɛ lí nsála nyú á ŋga sɔ́le á ŋyáŋlán á lɛ́ nɛ Ɔlolómɛ̄ a yáŋléné ɓɛ́hɛ á lōó á ŋ̀atanɛ́ wāhá la Yésus Kilístus.

¹⁵Ɓɛ́hɛ bísɛ ɓá ɓaá óló á ŋyéɓé, bi ɓɛ́la míŋ miɔ́ŋɔ. Ndí, kí yá ɓɛ́ hɔ́ nɛ́ miní byɛ́ɛ miɔ́ŋɔ mitám, Ɔlolómɛ̄ ag kɛ ɓɛ́nɛ li étɛ lí yé ɛ́ lɛ.

¹⁶Á nlaaŋkán, á ɔ́vega ví bi lɛ, bi wɛ́ɛ́hɛ́nɛ jā á nlemlem á nzen.

¹⁷Á élōgyāŋ, ɓɛ́nɛ bísɛ miní nyɔŋ ɔvega á yóg yáma, miní nyɔŋlé ndembye á ɓá ɓot bí ŋga nīŋ ákaa ɓɛ́hɛ.

¹⁸La mbálɛ, ma lāgá ɓɛ́nɛ náŋ ŋgandag ŋgéle, nyí vɔ́ŋɔ́ɔ mi ŋgí laglág ki ɓɛ́nɛ la bíya á miíh nɛ́, ŋgandag ɓot ɛ́ ŋgí niŋíg ákaa ɓatɛ́ŋgánɛ pɔ́l nyɛmb nyí Nyɔ́-a-Pɔ́hlɛ á mbásá.

¹⁹Ɓáŋ bísɛ lísūg jáɓá líg kɛ lí ɓɛ́ lí m̀ɓɔ́lanɛ́. Mibum máɓá nɛ́ mí lɛ́ míloó máɓá, mam mí ŋga nyɛ́ɛ ɓɔ́ lí kɔnhanɛ lí mbɔɔla nɛ́ ɓɔ́ bí ŋga nyɔ̄ŋ ákaa lípēm jáɓá, ɓɔ́ ɓot ɓá vá jā mímīm á mam mí ŋkɔŋ-á-sí.

²⁰Ndí ɓɛ́hɛ, bi lɛ̄ ɓɔ́ɔ̄n bí ékombo ɛ́ lōó. Bi lɛ á nlaaŋkán nɛ Nyɔ́ŋ-Ɛsáŋɛ́ Yésus Kilístus ag sɔ́léne wóŋ ákaa ǹsuŋ.

²¹Nyɛ́ nɛ́ a ŋga kɛ́ li yaanɛ lí nyí nyuú yāhá aɓɔt ákaa nyúū yɛ́ɛ̄ nyí lipém, li loole la ŋguu yɛ́ɛ̄ nyí ɛ ŋga yígle nyɛ́ lí vá lí mam mísɛ á sí likanʼyɛ jɛ́ɛ́.