Read Bakoko Elōg-Tésaloníka 1 2 Bible Online

Elōg-Tésaloníka 1 2 - Bakoko bible

Elōg-Tésaloníka 1 2

¹Á élōgyāŋ, ɓɛ́nɛ-mɛ̄n miníg yí m̀ɓɛɛŋ m̀ɓɛɛŋ nɛ́, ah yɛmɛ́ ɓé nɛ maná lɛ́glé ɓɛ́hɛ á mbóg yāná.

²Miníg yí ki nɛ́ bi ŋgí pámle á mítaka, bu óŋlɛ́ á tísɔn nyí Filípi. Ndí tɔ la náŋ, Ɔlolómɛ̄ a tí ɓɛ́hɛ ŋguu nɛ́ bi lɛ́gɛ́ ɓɛ́nɛ Pɔ́l M̀ɓɛɛŋ yɛɛ́ átē a bísɔghe.

³Á mbálɛ, likálo bi ŋga tɛ́ɛ líg sɔ́le á mbálɛ, lí sē ɓé jam lí miɔ́ŋɔ miɓé, tɔ jam lí mínaa.

⁴Ndí, kasig Ɔlolómɛ̄ a ɛ́n nɛ bi kɔ́ɔ, ányúū náŋ nɛ́ a tí ɓɛ́hɛ nsɔ́n á lí lɛgɛ lí Pɔ́l M̀ɓɛɛŋ yɛ́ɛ̄ kaa ɛ́ ŋga sōmlɛ. Ányúū náŋ nɛ́ bi ŋga lɛ́gɛ yɔ, ah ányúū li nyɛɛle lí ɓot ɓé, ndí ányúū lí nyɛɛle lí Ɔlolómɛ̄ nyɔ́ a ŋga yí mímīn máhá.

⁵Miníg yí m̀ɓɛɛŋ nɛ́, m̀ɓá-mɓá bi ɓáág ŋgí lí ɓɔŋle lí bíɓaŋgá bí milɔ́ɔ́ndán, bi ɓáág ŋgí lí ɓɔŋle lí míɔ̄ŋɔ miɓé á lí tombanɛ lí jam, Ɔlolómɛ̄ a lɛ mbóŋ yāhá.

⁶M̀ɓá-mɓá, bi ɓáág ŋgí lí somo lí lípēm, ɛ́ ɓɛ́ á póla ɓot, ɛ́ ɓɛ́ á póla yāná tɔ á póla ɓáŋá ɓatám.

⁷Tɔ náŋ ákaa ɓɛ́hɛ ɓaómɓɛ bí Nyɔ́-a-Pɔ́hlɛ, bi ɓɛ́ɛ́ nɛ ɓa ɓɔŋlé líkundɛ jáhá, ndí á mveŋghanɛ́, eceg bi mɓɛ́ á póla yaná, ɓaá kóóhánɛ́ ɓɛ́nɛ kaa mindígá a ŋga nyɔ̄ŋ eceg la ɓɔɔ́n ɓɛ́ɛ́.

⁸Ŋgandag ekɔ́ɔ́ bi ɓɛ́ɛ́la ányúū yāná yú yíglé ɓɛ́hɛ nɛ́, amáh sig Pɔ́l M̀ɓɛɛŋ Ɔlolómɛ̄ ɓaá tí ɓɛ́nɛ, bi ɓɛ́ɛ́ ɓɛ́ɓɛ li tíi lí éniŋ yáhá yɔ́-mɛ̄n ányúū yāná, ányúū nɛ miní timáán ɓɛ́hɛ li ɓɛ́ lí díyɛ ŋgandag.

⁹Á élōgyāŋ, miní ŋgí ɔ́ŋlāg misɔ́n máhá la etɔmb yáhá, eceg bi ŋgí lɛgɛ ɓɛ́nɛ Pɔ́l M̀ɓɛɛŋ nyí Ɔlolómɛ̄. Bi ŋgí sál díɓe la nzámuh, á lí pún nɛ́ bīh ɓɛ́ɛ́g ɓé ɓɛ́hɛ mbɛgɛ nyí mut waná tɔ wa.

¹⁰Miní lɛ́ mbóŋ yáhá, Ɔlolómɛ̄ ki ɔ ɓɛ́ mbóŋ nɛ́ ɓa wɛɛ́ átē a mipúú, bu wɛ́ɛ á nyaa ɛ tɛ́ɛ, ŋgíla ɔnɛ́g á ŋgwáāg yāná ɓɛ́nɛ ɓayéɓe.

¹¹Miníg yí nɛ́, bi ɓɛ́ɛ́ ányúū mut waná sig yé ɛ́sāŋɛ́ a ɓɔɔ́n a lɛ ányúū ɓɔɔ́n ɓɛ́ɛ́.

¹²Ɓaá éélé ɓɛ́nɛ, bu létɛ́ ɓɛ́nɛ nyúū, bu lóohán ɓɛ́nɛ li sɔ́hye nɛ́ miní nīŋ ákaa Ɔlolómɛ̄ a ŋga sómo, nyɛ́ mut a yáŋá ɓɛ́nɛ á lí ɓɛ́la lí joga á Ékombo yɛ́ɛ́ la á lípēm jɛ́ɛ́.

¹³Á élōgyāŋ, jɔ́ nɛ́ á ɛ́yāhā épah, ɓāh tɔmb ɓé ɓɛ́hɛ lí tíi lí Ɔlolómɛ̄ mítamlan, ányúū nɛ maná lɛ́glé eɓaŋgá yɛ́ɛ́ ɓaá lɛgɛ́ ɓɛ́nɛ. Manáh lɛ́gle ɓé yɔ ákaa eɓaŋgá yé mut-a-binam, ndí maná lɛ́glé yɔ ákaa ɛ́ lɛ̄, yɔ́ nɛ́ ɛ́ lɛ́ eɓaŋgá Ɔ́lolómɛ̄, yé ɛ́ ŋga sál átē wāná ɓɛ́nɛ ɓayéɓe.

¹⁴Á élōgyāŋ, ákaa ɛ́sɛ, maná ōŋlé míɓɔŋɔg mí Bíɓasɛ bí Ɔlolómɛ̄ bí lɛ́ á ŋkɔŋ á Yúdēa, bí byá āt la Yésus Kilístus. Ányúū nɛ, nlemlem ákaa maná taká la ɓot bí ékombo yáná, náŋ ki nɛ́ bíŋ Biɓasɛ byá kuh také la ɓɔɔ́n bí Élōg-Yúda.

¹⁵Ɓɔ́ nɛ́ ɓá ól Nyɔ́ŋ-Ɛsáŋɛ́ Yésus la ɓapɔ́tle-bí-Ɔ́lolómɛ̄, bú váŋgɛ́ ki ɓɛ́hɛ la ndeeŋgɛ. Bí ŋgá nyɛɛle ɓé Ɔlolómɛ̄, bí lɛ́ ɓálem bí ɓot bísɛ.

¹⁶Bíg céŋɛ ɓɛ́hɛ li lɛgɛ lí ɓot bí sē ɓé ɓɔ́ɔ̄n bí Élōg-Yúda Pɔ́l M̀ɓɛɛŋ nɛ́ ɓɔ́g bí sūŋɓɛ̄. La náŋ, bíg bulɛ nsɔŋgí á miɓé máɓá bí ŋga ɓɔ̄ŋ eceg ɛ́sɛ. Ndí á mísúgle, ɔún ví Ɔlolómɛ̄ vá timán ɓɔ li kuele.

¹⁷Á élōgyāŋ, kasig bi ɓágláán la ɓɛ́nɛ ányúū puh eceg á mison, ndí ah á miɔ́ŋɔ ɓé, kóó li ɛ́n lí ɓɛ́nɛ sīg-pɛ ɛ ŋgí byɛ́ɛ́ ɓɛ́hɛ, ányúū náŋ nɛ́ bi lɛ lí lɔ́gɓan nɛ́ náŋ a yāl.

¹⁸Jɔ́ nɛ́ ɓaá sómo ɓɛ́nɛ li lɛ́ŋle. Mā-mɛn Póol, mi cegléé lí ɓɔŋ náŋ ŋgele ŋgandag, ndí Sátan a céŋɛ́ɛ mā la ndog yama.

¹⁹Á mbálɛ, amáh ɓɛ́nɛ, nzáá ntám a lɛ̄ lipitá jáhá la mívag máhá é? Nzáá a lɛ ewáhlé-ŋgáŋ yáhá yé ɛ́ ŋga ɓɛ́ ɔ́tot váhá á ɔ́lɔ̄ ví mísɔ̄ mí Nyɔ́ŋ-Ɛsáŋɛ́ Yésus é?

²⁰La mbálɛ, ɓɛ́nɛ nɛ́ miní lɛ́ lipém jáhá la mivag máhá!