Read Bakoko Elōg-Tésaloníka 1 5 Bible Online

Elōg-Tésaloníka 1 5 - Bakoko bible

Elōg-Tésaloníka 1 5

¹Á élōgyāŋ, miníh byɛ́ɛ́ ɓé kóó nɛ bí cíilé ɓɛ́nɛ likɔlɓan la eceg tɔ likag lí ɔ́lɔ̄ ví mísɔ̄ mí Nyɔ́ŋ-Ɛsáŋɛ́.

²Ɓɛ́nɛ-mɛ̄n miníg yí m̀ɓɛɛŋ nɛ́, ɔlɔ́ ví Nyɔ́ŋ-Ɛsáŋɛ́ víg kɛ ɓɛ́nɛ li púhe ákaa mut a wií a ŋga sɔ́ la díɓe.

³Eceg ɓot bí ɓɛ́ bíg laga nɛ́: «Sē nsaŋ é, sē mitáthan é!» Váŋ hɔ́ nɛ á ékūyá-kúyá, libúmbé lí ŋga kɛ́ ɓɔ́ lí kuele ákaa ŋkogɛ nɛ́ a ŋga byee mindígá. Bí ŋgá kɛ ɓé jɔ li véé.

⁴Á élōgyāŋ, ndí ɓɛ́nɛ, kaa Miní sē ɓé á lívito, ɛ́ ŋgá somlɛ ɓé nɛ víŋ ɔlɔ́ ví púhé ɓɛ́nɛ kaa mut a wií.

⁵Ányúū nɛ, ɓɛ́nɛ bísɛ miní lɛ́ ɓot bí mípūū, ɓot bí nzámuh. Bi sē ɓé ɓot bí díɓe tɔ ɓá bí lívito.

⁶La náŋ, biíh lálág ɓé kaa ɓáŋá ɓot ɓatám, ndí bi tɔ́ɔ pɛɛ, bi táthán la ɓɛ́hɛ-mɛ̄n.

⁷Ɓá bí ŋga lál, bíg lál la díɓe. Ɓapéé-mílɔg, bíg péé mɔ́ la díɓe.

⁸Ndí ɓɛ́hɛ ɓá bi lɛ ɓot bí nzámuh, bi táthán hɔ́ la ɓɛ́hɛ-mɛ̄n. Bi ɓɛ́la ŋyéɓé la ediŋ ákaa bí ŋga jál mbɔ́tí bícɛɛ nyí wélan, bi ɓɛ́la ki lipitá jé lí lísuŋga ákaa bí ŋga jál ékōŋgó.

⁹Ányúū nɛ Ɔlolómɛ̄ ah tɛ́ɛ́yɛ ɓé ɓɛ́hɛ ákaa ɓot bí ŋga nyɛ́ɛ li ógtan lí mbímban nyí ɔún vɛ́ɛ́, ndí a tɛ́ɛ́yɛ́ ɓɛ́hɛ nɛ́ bi sūŋɓɛ̄ li loole la Ɛtáŋɛ wahá Yésus Kilístus,

¹⁰nyɔ́ a wú ányúū yāhá, á lí ɓɔŋ nɛ́, ɓa ɓɛ́ pɛ́ɛ tɔ á ɔ́lɔ̄, bi nīŋ élɔŋ la nyɛ́ átē a ŋ̀atanɛ́.

¹¹Jɔ́ hɔ́ nɛ, miní lēthán nyúū ɓɛ́nɛ la ɓɛ́nɛ, miní ólɓɛ liɓɛ́ɛg jáná ɓɛ́nɛ la ɓɛ́nɛ ákaa maná ɓōtlé lí ɓɔŋ.

¹²Á élōgyāŋ, biíg sɔ́hye ɓɛ́nɛ nɛ́ miní dítɛ̄ ɓá bí ŋga nyɔ̄ŋ esɔghe ŋgandag á póla yāná, ɓɔ́ nɛ́ bí ŋga táthan la ɓɛ́nɛ á joó lí Nyɔ́ŋ-Ɛsáŋɛ́, ɓɔ́ ki nɛ́ bí ŋga ééle ɓɛ́nɛ.

¹³Tíán ɓɔ́ ŋgandag adit, miní dīŋ ɓɔ́ ányúū nsɔ́n wáɓá. Niŋán átē a nsaŋ.

¹⁴Á élōgyāŋ, biíg sɔ́hye ɓɛ́nɛ nɛ́, miní ɓéhyɛ́ ɓot bí mpuŋgú nɛ bí tɛ́ɛ́yɛ́ nsɔ́n wáɓá, miní létɛ̄ ɓot bí ŋga vɔ́l nyúū, miní nit ɓot bí ŋga ɓɔ̄t, miní ɓɛ́la eɔ́hánɛ á ŋgwáāg ɓot bísɛ.

¹⁵Nyɔŋán lítāt nɛ mut waná tɔ wa ah timkágánɛ́ ɓé áɓē ányúū aɓé, ndí eceg ɛ́sɛ, miní sōmó ja nɛ́ m̀ɓɛɛŋ á ɓɛ́ á póla yāná, á ɓɛ́ ki ányúū ɓot bísɛ.

¹⁶Ɓɛ́án mívag eceg ɛ́sɛ.

¹⁷Kánhánɛ ɛ́h ɓɛ́ ɓé lí tɔmb.

¹⁸Tíán Ɔ́lolómɛ̄ mítamlan á tɔ yɔɔ́yɔ́ɔ eceg, átɔm nɛ́, náŋ nɛ́ a ŋga láaŋkene ɓɛ́nɛ, ɓɛ́nɛ ɓá maná āt la Yésus Kilístus.

¹⁹Miníh cēŋég ɓé nsɔ́n á M̀búl Mpúán,

²⁰ndí tɔ li yaŋa lí bíɓaŋgá bí ɓápɔ́tle-bí-Ɔ́lolómɛ̄,

²¹miní yí li légɓe lí mam mísɛ ákaa ɛ́ ŋga sōmlɛ, á li naŋɛ lí yé ɛ́ lɛ́ m̀ɓɛɛŋ,

²²miní nɛ́ŋɛ̄ la yé ɛ́sɛ ɛ́ lɛ́ áɓē.

²³Ɔlolómɛ̄ nyɔ́ a ŋga tíi nsaŋ nyɛ́-mɛ̄n a púɛ́ ɓɛ́nɛ nɛ́ ɓam, a tát m̀búl wáná, liɓɛ́ɛg jáná la nyúū yāná nɛ́ ndí miní ɓɛ́ ŋgíla ɔnɛ́g á misɔ́ mí Ɛtáŋɛ wahá Yésus Kilístus.

²⁴Nyɔ́ a yáŋá ɓɛ́nɛ ag yáhɛ́ biɓaŋgá byɛ́ɛ́, nyɛ́ ki nɛ́ a ŋga kɛ́ li yáhɛ lí míŋ mam.

²⁵Á élōgyāŋ, kánhánɛ ki ányúū yāhá.

²⁶Tamlán ki élōgyāŋ yáhá ɛ́sɛ, miní óóɓé ɓɔ́ kaa línyaŋ.

²⁷Mag sɔ́hye ɓɛ́nɛ á jóō lí Nyɔ́ŋ-Ɛsáŋɛ́ nɛ́, miní sɔ́ŋglé élōgyāŋ yɔ́ ɛ́sɛ nyí káati.

²⁸Ndómbo nyí Ɛtáŋɛ wahá Yésus Kilístus ɛ ɓɛ́ la ɓɛ́nɛ.