Read Bakoko Elōg-Tésaloníka 2 2 Bible Online

Elōg-Tésaloníka 2 2 - Bakoko bible

Elōg-Tésaloníka 2 2

¹Á élōgyāŋ, biíg laga ɓɛ́nɛ likɔlɓan la misɔ́ mí Ɛtáŋɛ wahá Yésus Kilístus la ŋkomanɛ́ wāhá á ŋgwáāg yɛ́ɛ̄ nɛ́:

²miníh mwahkɛ́gɛ́ ɓé nɛ yé mut a yɛ́ɛ́léné ɓɛ́nɛ ɔ́ŋgɛn ɛ́g sɔ́le la Ɔ́lolómɛ̄, ɛ́ ɓɛ́ á mpɔ́t á ányu, ɛ́ ɓɛ́ ɔ́ŋgɛn nyíŋ káati ɛg sɔ́le la ɓɛ́hɛ, ɛ́ vóɛ̄ ɓɛ́nɛ li pamblanɛ ndí tɔ li kɔnɛ lí woŋ, á lí ɓɔŋ nɛ́ miní yéɓé nɛ́ ɔlɔ́ ví Nyɔ́ŋ-Ɛsáŋɛ́ vá nyɛ́g.

³Miníh mwahkɛ́gɛ́ ɓé nɛ mut tɔ wa a yɛ́ɛ́ ɓɛ́nɛ á tɔ yɔɔ́yɔ́ɔ patí. Átɔm nɛ́, sɔ́kágánɛ́ víŋ ɔlɔ́ víg kɔlan, lisandá lícɛ̄ŋ lí ŋga tɛ́ŋgánɛ Ɔlolómɛ̄ líg kɛ li ɓɛ́han, M̀ɓɔŋ-aɓé ki ag kɛ li yɛ́lɛ, nyɛ́ nɛ́ a lɛ̄ Mɔ́ɔ̄n á njáŋgá,

⁴nyɛ́ nɛ́ a ŋga tɛ́ŋgánɛ yé ɛ́sɛ ɓot bí ŋga nyɔ̄ŋ kaa miloó la li ɓégɛ, ag kɛ li ɓáá lí m̀mím lí tɔɔ nyɛ́-mɛ̄n á ndáá-ēcɛ́ŋ-Ɔlolómɛ̄, la li sɛgɓan nɛ́ a lɛ̄ Ɔ́lolómɛ̄.

⁵Ɓaá, miní ŋgí ɔ́ŋlāg nɛ́ mí ŋgí laga ɓɛ́nɛ míŋ mam eceg mi ɓɛ́ɛ́ elɔŋ la ɓɛ́nɛ é?

⁶Nyí vɔ́ŋɔ́ɔ hɔ́, miníg yí yé ɛ́ ŋgí byɛ́ɛ̄ nɛ́ nyɔ́ŋ M̀ɓɔŋ-aɓé a yɛ́lɛ́ nyɛ́-mɛ̄n. Ndí ag kɛ ja lí yɛ́lɛ lí nyɛ́-mɛ̄n kí eceg yá kɔ́lan,

⁷átɔm nɛ́, ŋguu ɛ sɔlɛ́ nyí M̀ɓɔŋ-aɓé ya ɓōtlé nsɔ́n. Ɛ́ ŋgí tɔ́ɔ ja nɛ́ mut a ŋgí byelég yɔ tɛɛla nyí vɔ́ŋɔ́ɔ a ɓágɓán, á lí ɓɔŋ nɛ́ nsɔ́n wɛ́ɛ́ á ɓét ŋguu.

⁸Váŋ hɔ́ nɛ́ M̀ɓɔŋ-aɓé a ŋga kɛ́ li yɛ́ɛ́lɛ nyɛ́-mɛ̄n, la Nyɔ́ŋ-Ɛsáŋɛ́ Yésus a ól nyɛ́ la m̀búl wɛ́ɛ́ nyú á ányu, la nyɛ́ a dímbhánɛ̄ nyɛ́ la epaa yé misɔ́ mɛ́ɛ́.

⁹Eceg M̀ɓɔŋ-aɓé a ŋga kɛ́ li sɔ́ la ŋguu nyí Sátan, ag ɓɛ́ ag ɓɔŋ mam micɛ́ŋ, minɛ́ŋ la binanaŋga bí mam á lí jáŋɛ lí ɓot.

¹⁰Átē a misɔ́n mɛ́ɛ́ míɓē mísɛ, ag ɓɛ́ ag yɛ́ɛ ɓot bí lɛ́ á nzen njáŋgá, ányúū nɛ ɓáh lɛ́glé ɓé mbálɛ ndí tɔ li diŋ lí yɔ, nyaa nɛ́ nyíŋ mbálɛ nɛ́ ɛ mɓɛ́ nɛ ya sūŋ ɓɔ.

¹¹Ányúū náŋ nɛ́ Ɔ́lolómɛ̄ a ómlé ɓɔ̄ ŋguu njáŋgá, nyí ɛ ŋga yígle ɓɔ́ lí yéɓe lí mínaa,

¹²nɛ́ ndí nyɛ́ Ɔ́lolómɛ̄ a kááhɛ́ ɓá bísɛ ɓáh yéɓe ɓé mbálɛ, ndí bú kɔ̄n ja mívag á lí ɓɔŋ lí yé ɛ́h tɛ́ɛ́ ɓé.

¹³Á élōgyāŋ, á yé ɛ́ ŋga légɓe ɓɛ́hɛ, biíg nyɛɛ li tíi lí Ɔlolómɛ̄ mítamlan eceg ɛ́sɛ ányúū yaná ɓɛ́nɛ ɓá Nyɔ́ŋ-Ɛsáŋɛ́ a ŋga dīŋ, átɔm nɛ́, nyɛ́ Ɔlolómɛ̄ a pɔ́hɔ̄ ɓɛ́nɛ li ɓotle á míɓōtlé nɛ́ miní sūŋɓɛ̄ la M̀búl Mpúán nyɔ́ a ŋga púɛ, miní sūŋɓɛ̄ ki la mbálɛ nyí miní ŋga yéɓe.

¹⁴Ányúū náŋ nɛ́ Ɔlolómɛ̄ a yáŋléé ɓɛ́nɛ li kele la Pɔ́l M̀ɓɛɛŋ bi lɛgléé ɓɛ́nɛ, nɛ́ ndí miní ɓɛ́la joga á lipém lí Ɛtáŋɛ wahá Yésus Kilístus.

¹⁵Jɔ́ hɔ́ nɛ, á élōgyāŋ, lethánɛ, miní náŋɛ̄ mam ɓaá yéglɛ́ ɓɛ́nɛ m̀ɓɛɛŋ, ɛ́ ɓɛ́ mí ɓaá pɔ́t la anyu, tɔ mí ɓaá cii.

¹⁶Ɔlolómɛ̄ Etāa wahá nyɔ́ a dīŋ ɓɛ́hɛ, á ékɔnan-ŋgɔ́ɔ́ yɛ́ɛ́, a sɔ́la ɓɛ́hɛ emɔ́mɛ yé éɓem, a tí ki ɓɛ́hɛ taŋ lipitá,

¹⁷nyɛ́ la Ɛtáŋɛ wahá Yésus Kilístus nyɛ́-mɛ̄n, bí mɔ́mɛ́ ɓɛ́nɛ, bí tí ki ɓɛ́nɛ ŋguu á lí ɓɔŋ la li pɔ́t lí mam mí m̀ɓɛɛŋ.