Read Bakoko Timotéo 1 2 Bible Online

Timotéo 1 2 - Bakoko bible

Timotéo 1 2

¹Á élōgyāŋ, kaa jam lí ɔ́sū, mag tíi nyí ndag nɛ́, ɓatán Ɔlolómɛ̄, kánhánɛ nyɛ́, sɔ́hyán nyɛ́, tíán nyɛ́ mítamlan ányúū ɓot-bí-bínam bísɛ.

²Ɓɔŋán bíŋ bísɛ ányúū káísa la ányúū ɓakanʼyɛ bísɛ, á lí ɓɔŋ nɛ́ bi nīŋ mwɛ́ɛ̄, bi nīŋ átē a nsaŋ, bi nīŋ átē a ŋyéɓé la Ɔlolómɛ̄ la á nyaa ɛ ŋga tíi adit.

³Náŋ nɛ́ a lɛ m̀ɓɛɛŋ la liŋgɔ́ŋɔ́ á miíh mí Ɔlolómɛ̄ Ǹsuŋ wahá,

⁴nyɔ́ a ŋga sómo nɛ́ ɓot bísɛ bí sūŋɓɛ̄, bí pám ki á lí yí lí mbálɛ.

⁵Ányúū nɛ́ Ɔlolómɛ̄ a lɛ jā wā, ǹloɛ ki ɔ ɓɛ́ wa á póla Ɔlolómɛ̄ la ɓot-bí-bínam, nyɛ́ nɛ́ a lɛ́ Yésus Kilístus,

⁶nyɛ́ nɛ́ a tí eniŋ yɛ́ɛ́ ákaa eɓeeka á lí suŋ lí ɓot bísɛ. Nyíŋ mbóŋ nɛ ɛ tíéɓɛ́ɛ á eceg Ɔlolómɛ̄ a tɛ́ɛ́yɛ́ɛ.

⁷Ányúū li tíi lí yɔ nɛ́ ɓá tɛ́ɛ́yɛ́ ma ǹlɛgɛ-pɔ́l la ŋ̀ómɓɛ. Mag pɔ́t mbálɛ, mi ŋgá yɛ́ɛ ɓé ma, ma nɛ́ ɓá tí nsɔ́n á lí yéglɛ lí bíkombo bí bí sē ɓé ɓɔ́ɔ̄n bí Élōg-Yúda li ɓɛ́la lí ŋyéɓé la li yí lí mbálɛ.

⁸Mi byɛ́ɛ́ hɔ́ kóó nɛ, tɔ véé páam yá ɓɛ́, eceg ɛ́ ŋga kánɛ, ɛ́ ɓétɛ́ mɔ á lōó la m̀mím á ŋga púú, ɛ́h ɓɛ́ ɓé ɔ́ūn tɔ mikálá.

⁹Á yé ɛ́ ŋga légɓe ɓondígá, bí jál á nyaa ɛ tɛ́ɛ́, bí ɓɔŋ liŋgɔn á nyaa ɛ kɔ́ɔ̄ la nyí ɛ ŋga dítɛ ɓɔ́, náŋ ag mínɛ nɛ́ bíh ɓágág ɓé mímū, bíh jálág ɓé míkēmbé mí góol tɔ ɓaláám bí mísāŋ, bíh jálág ɓé mbɔ́tí yá loohán lí véé lí díyɛ.

¹⁰Ndí, bí étɛ́ jā aláám wáɓá á mísɔ̄n mí m̀ɓɛɛŋ, á nyaa ɛ kɔɔ́, ákaa ɓondígá bí ŋga páha ŋyéɓé wáɓá la Ɔlolómɛ̄.

¹¹Á eceg yé éyēge, mindígá a nyɛ́ɛ lí tɔɔ lí pií, la li suhɛ lí nyɛ́-mɛ̄n.

¹²Mi ŋgá yéɓe ɓé ma nɛ́ mindígá a yéglɛ́ páam, tɔ li kanʼyɛ lí yɔ. Mindígá a tɔ́ɔ hɔ́ pií.

¹³Átɔm nɛ́, Ádam nɛ́ Ɔlolómɛ̄ a dúgú lí veg sɔ́kágánɛ́ ag veg ki Éva.

¹⁴Ah Ádam ɓé tɔ nɛ́ Sátan a yɛ́ɛ, ndí mindígá. Ɛnɛ́ míndīgá a yéɓé mínaa, áh ógle ɓé pɛ mbéndá nyí Ɔlolómɛ̄.

¹⁵Ndí tɔ la náŋ, ag kɛ li suŋɓɛ ányúū nɛ a lɛ̄ nyáŋɛ̄ a ɓɔɔ́n, ndí, ɛ́g kɛ li ɓat nɛ́ a tíŋɓé á ŋyéɓé, a tíŋɓé á ediŋ, a tíŋɓé á eniŋ yé mipúú, bíŋ bísɛ á nyaa ɛ kɔ́ɔ̄.