Read Bakoko Elōg-Hébɛl 10 Bible Online

Elōg-Hébɛl 10 - Bakoko bible

Elōg-Hébɛl 10

¹Mbéndá Móse ɛ byɛ́ɛ ja puh mam yí ɛ́ lɛ ndíndímɛ a mam mí ŋga kɛ́ li sɔ́, ndí ah titih mam ɓé. Tɔ la milemlem mí mísūlé, bi ŋga tíi náŋ la náŋ m̀bú sig, m̀ɓá mbéndá ɛ ŋgá la ɓé lí púɛ lí ɓot bi ŋga siŋgle Ɔlolómɛ̄ ɓɛ́ɓɛ.

²Ki ɓɔŋ nɛ́ míŋ misúlé bí ŋga tíi náŋ mí ŋgí la li púɛ lí ŋgele ya ányúū yɔ́ ɛ́sɛ, kí mímīm mí ɓaɓɔŋ mɔ́ mí lɛ́ nsaŋ nɛ́ bí ɓɛ́ ŋgíla ɔnɛ́g, la ɓɔ́ ɓáh tí ɓé pɛ nsúlé tɔ wá.

³Ndí á mveŋghanɛ́, míŋ misúlé bí ŋgí tíi náŋ la náŋ mí ŋgí ɔ́ŋlánɛ jā ɓot miɓé máɓá m̀bú la m̀bú sig.

⁴Átɔm nɛ́, m̀ɓá micii mí ɓalóm bí nyaga la mí mí ɓálōm bí mítōmbɛ́ mí ŋgá la ɓé li so lí míɓē.

⁵Ányúū náŋ nɛ́, eceg Nyɔ́-a-Pɔ́hlɛ a ŋgí sɔ́ á ŋkɔŋ-á-sí, a lagléé Ɔlolómɛ̄ nɛ́: «Ɔlɔ́ tɔ̄ vá, wāh somo ɓé nsúlé tɔ likaale, ndí wa vēg ma la nyuú.

⁶Tít bí ŋgá dígɛ á étága-nsúlé tɔ misúlé ɓot bí ŋga tíi ányúū li so lí míɓē byáh nyɛɛle ɓé wa.

⁷Náŋ nɛ́ a yígle ma nɛ́ mi laga nɛ́: ‹Ma nyɔ́, átɔm nɛ́ ányúū yáma mā-mɛ̄n nɛ́ yá ciiɓɛ́ á kálati Licii-Lipúán nɛ́: Á Ɔ́lolómɛ̄, ma sɔ́ á li ɓɔŋ lí nsom wɔ́ɔ›.»

⁸Yésus Kilístus a dúgléé li laga nɛ́: «Wāh somo ɓé mísūlé, mikaale, tít bí ŋgá dígɛ á étága-nsúlé tɔ misúlé ɓot bí ŋga tíi ányúū li so lí míɓē bíŋ bísɛ byáh nyɛɛle ɓé wa.» Bi yí nɛ́ míŋ mikaale mí lɛ míkaale mbéndá ya tɛ́ɛ́yɛ́.

⁹Yésus Kilístus ɔ laga sīg-pɛ nɛ́: «Ma nyɔ́, ma sɔ́ á li ɓɔŋ lí nsom wɔ́ɔ.» La náŋ, ag manɛ nyaa ɔsú nyí li tíi lí mísūlé á lí tɛ́ɛ́yɛ́ lí nyí péná.

¹⁰Ányúū li yáhɛ lí nsom á Ɔlolómɛ̄ nɛ́ Yésus Kilístus a tí nyúū yɛ́ɛ̄ káa nsúlé ŋgele ya ányúū yɔ́ ɛ́sɛ, náŋ ɔ púɛ́ ɓɛ́hɛ miɓé máhá.

¹¹Joó nɛ ǹtíi-nsúlé ag tɛ́lɛ ɔlɔ́ sig á li ɓɔŋ lí nsɔ́n wɛ́ɛ́, la li tíi lí milemlem mí mísūlé eceg la eceg sig, mí mí lɛ́ nɛ, m̀ɓá mí ŋgá la ɓé tɔ lí ɓógtɛ lí míɓē.

¹²Ndí á mveŋghanɛ́, Nyɔ́-a-pɔ́hlɛ, ɛnɛ́ a tí pɔm nsúlé ányúū elaakɛ-miɓé, ɔ tɔ́ɔ ki ŋgele ya ányúū yɔ́ ɛ́sɛ á mɓɛ́lómɛ a Ɔlolómɛ̄,

¹³á nlaaŋkán nɛ̄ li ɓotle la yéŋ eceg, Ɔlolómɛ̄ a yáanɛ́ ɓalem ɓɛ́ɛ́ etɛ́lɓéné-míkoo mɛ́ɛ́.

¹⁴Jɔ́ nɛ́, la pɔm likaale nɛ́ Yésus Kilístus a púɛ́ ɓot ŋgele ya ányúū yɔ́ ɛ́sɛ, ɓot a tímānɛ̄ á ŋgwáāg Ɔlolómɛ̄.

¹⁵M̀búl Mpúán ag laga ɓɛ́hɛ nɛ́ náŋ a lɛ mbálɛ. A dúgú lí lága nɛ́:

¹⁶«Nyɔ́ŋ-Ɛsáŋɛ́ a laga nɛ́: ‹Esaa-líat mi ŋga kɛ́ li ɓɔŋ la ɓɔ́ ɛ́g ɓɛ́ nɛ́, ámbúh nyúŋ alɔ́, Eceg mi ɓɛ́ mag tíi ɓɔ́ mbéndá yáma, á mímīm máɓá la á míɔ̄ŋɔ máɓá nɛ mi ŋga kɛ́ yɔ́ lí cii.

¹⁷La ki nɛ́, mi ŋgá kɛ ɓé pɛ ma lí ɔ́ŋɔ lí míɓē máɓá tɔ avuha wáɓá›.»

¹⁸Ndí, ápah miɓé ma kūh élaakɛ, li tíi lí míkaale ányúū li so lí míɓē líh byɛ́ɛ́ ɓé pɛ nsɛ́ŋ.

¹⁹Á élōgyāŋ, bi lɛ mbáki nɛ biíg kɛ li níŋgi á ndugá púán, li kele la micii mí Yésus.

²⁰Nyɛ́ nɛ́ a légē ɓɛ́hɛ nzen péná, nzen nyí eniŋ, ɔ lóoléné á liɓato lí ndugá púán, náŋ ɛnɛ li kele la nyuú yɛ́ɛ́ nyí mut-a-binam.

²¹La náŋ, bi byɛ́ɛ́ ǹtíi-nsúlé ǹcɛ́ŋ nyɔ́ á tɛ́ɛ́ɓɛ́ á m̀mú á ndog-Ɔlolómɛ̄.

²²Bi síŋglé hɔ́ Ɔ́lolómɛ̄ ɓɛ́ɓɛ la m̀mím a tɛ́ɛ́, la ŋyéɓé á yáhɛ́, la m̀mím á ŋga púú nyú cíŋ-m̀mím ɛ ŋgá kááhɛ ɓé, la nyúū nyí ɓá so la mindím mí ŋga púú nɛ́ pɛ́ŋ.

²³Ɛ́h ɓɛ́ ɓé li tɔmb, bi kóndyé lí páha lí lípitá jáhá, átɔm nɛ́, mut a kákānɛ̄ jɔ ag yáhɛ biɓaŋgá byɛ́ɛ́.

²⁴Bi táthán ɓɛ́hɛ la ɓɛ́hɛ á li ɓɔŋ nɛ́ bi tíélán míkūndá nɛ bi díŋán, la lí ɓɔŋ lí mísɔ̄n mí m̀ɓɛɛŋ.

²⁵Biíh cóóg ɓé ɓɛ́hɛ mikɔtán máhá ákaa ɓot ɓá, ɓá mwaán bíg túŋ átē. Ndí á mveŋghanɛ́, bi tíélán jā míkūndá, kasig miní ŋga ɛ́n nɛ́, ɔlɔ́ ví Nyɔ́ŋ-Ɛsáŋɛ́ ví lɛ́ lí siŋgle.

²⁶Ányúū nɛ kíyáɓɛ́nɛ ɓaá yégé lí yí lí mbálɛ nɛ́ ɓam, ndí biíg kondye li ɓɔŋ lí áɓē la cɛŋ, nsúlé tɔ wá á sē ɓé pɛ nyú a ŋga lá li so lí nyúŋ aɓé.

²⁷Ndí, ɛ́g yéglé já ɓɛ́hɛ nɛ́, á sí esɔghe ecɛ́ŋ bi lááŋké ŋkál, bi lááŋké ki bilbil adíg á nzáan nyí ɛ ŋga kɛ́ li dígɛ lí ɓot ɓá ndɔ́gɓéné Ɔ́lolómɛ̄.

²⁸Nyɔ́ la nyɔ́ a ŋgá óglé ɓé mbéndá Móse bíg ól nyɛ́ ɛ́h ɓɛ́ ɓé ŋgɔ́ɔ́, kíyáɓɛ́nɛ ɓot bíɓáa tɔ bíŋháa ɓá tɛ́lɛ mbóŋ nɛ a búú mbéndá.

²⁹Ɓaá, mut a ŋga yáŋa Mɔɔ́n Ɔlolómɛ̄ a ŋgá kɛ́ ɓé li kuh lí ékɔ́ghɛ ɛ́ ŋga lóo yéŋ é? Kasig nyɔ́ŋ mut a ŋgá ditɛ ɓé mícii mí ésaa-líat mí má so míɓē mɛ́ɛ́. Ag óŋo M̀búl Mpúán nyɔ́ a yíhɛ́ ɓɛ́hɛ nɛ́ Ɔlolómɛ̄ a byɛ́ɛ́ elɔ́ŋgɔ m̀mím.

³⁰Ɔɔ, ɓɛ́hɛ-mɛ̄n biíg yí mut a lágā nɛ: «Mipuná mi lɛ ɛ́máma, ma nɛ́ mi ŋga tíi mut sig yé ɛ kɔ́ɔ̄ la nyɛ́!» La ki nɛ́: «Nyɔ́ŋ-Ɛsáŋɛ́ ag kɛ li kááhɛ lí lílōm jɛ́ɛ́.»

³¹Eɓéé-nyúū la nyɔ́ a ŋga ku ŋkál ɔ́sū ví Ɔlolómɛ̄ nyɔ́ a lɛ á éniŋ!

³²Ndí, ɔ́ŋlán míɓotlé máná mí ŋyéɓé, ɓɛ́nɛ la li kuh lí mípūū mí Ɔlolómɛ̄, biɓándá bú ɓōtlé ɓɛ́nɛ la ɓɛ́nɛ, munú ɔ́hánɛ́ ndutu la bisɔghe.

³³Mú á yé epah, miníg óŋlɛ́ɛ la li kuh lí ndeeŋgɛ á ntélélé, á yéŋé épah, miníg nit ɓot ɓá kūh milemlem mí bísɔghe.

³⁴Ákaa ɛ́sɛ, maná nyɔ̄ŋ ŋgaan á bísɔghe bí ɓot-bí-míɓog, munú yéɓé ki la mivag nɛ́ bí nyɔŋlé ɓɛ́nɛ miɓɛɛŋ máná, átɔm nɛ́ miníg yí nɛ́, miní byɛ́ɛ míɓɛɛŋ mí má loohán bílɔ́ŋgɔ li loo lí mīŋ, mí mí ŋga man ɓé.

³⁵Miníh tɔmbɔ́g ɓé lí yéɓe la Ɔlolómɛ̄, átɔm nɛ́, mbáglé écɛ̄ŋ ví lɛ́ ámbúh yɛ́ɛ̄.

³⁶Ákaa ɛ́sɛ, miní byɛ́ɛ́ kóó la kɔkɔ á lí yáhɛ lí nsom á Ɔ́lolómɛ̄, nɛ́ ndí miní kuh yé a kákānɛ̄ ɓɛ́nɛ.

³⁷Átɔm nɛ́ yá ciiɓɛ́ á Lícii-Lipúán nɛ: «Ɛ́ ŋgí tɔ́ɔ ja puh eceg, pupúhú eceg yágá ki, nyɔ́ a ŋga nyɛ́ɛ li sɔ́, ag sɔ́, a ŋgá kɛ ɓé lí bíŋhān.

³⁸Nyɔ́ a tɛ́ɛ́ sim á miíh máma ag kɛ li niŋ, li oŋle la ŋyéɓé a byɛɛ́ ndí kíyáɓɛ́nɛ a tímān la mbúh, a ŋgá kɔnɛ ɓé pɛ mā mívag.»

³⁹Ɓɛ́hɛ, bi sē ɓé ɓɛ́hɛ ɓatiman-la-mbúh á li kɛ á njáŋgá, ndí bi lɛ ɓot bí ŋyéɓé ányúū lisuŋga jáhá.