Read Bakoko Elōg-Hébɛl 2 Bible Online

Elōg-Hébɛl 2 - Bakoko bible

Elōg-Hébɛl 2

¹Ákaa náŋ nɛ́ ɛ́ lɛ, biíg nyɛɛ li tiŋɓe á pɔ́l ɓā ámble kíyáɓɛ́nɛ bi ŋgá somo ɓé li kɛ á njáŋgá.

²Ákaa ɛ́sɛ, kíyáɓɛ́nɛ eɓaŋgá ɛ́ lɛglɛ́ɛ li loole la áŋgɛl yá ɛ́ni nɛ́ ɛ́ lɛ́ mbálɛ, ɛnɛ ɓot bí sáá yɔ́, la ɓá bíh óglée ɓé ki yɔ́ bí kūhúú nsála á ɓɛ́ɛ́ á kɔ́ɔ́ la ɓɔ́.

³Nɛ́-láá hɔ́ ɓɛ́hɛ-mɛ̄n bi ŋga lá li véé lí ékɔ́ghɛ kíyáɓɛ́nɛ ɓaá yaŋá bíɓaŋgá bí ŋga sɔ́la nyíŋ taŋ lisuŋga é? Jéŋ lisuŋga nɛ́ Nyɔ́ŋ-Ɛsáŋɛ́ nyɛ́-mɛ̄n a dúgléé lí lɛgɛ, ámbúh nyɛ́, ɓot bí ámbléé nyɛ́ bú tímān ɓɛ́hɛ li yīgyɛ lí nlemlem á jam,

⁴Ɔlolómɛ̄ nyɛ́-mɛ̄n ki ɔ nīt nyíŋ mbóŋ yāɓá li kele la ndembye ɛ́ mam a ŋgí ɓɔŋ, li kele la minɛ́ŋ, la binanaŋga bí mam bí nyaa la nyaa, la li kele la mikaale mí M̀búl Mpúán mí a ŋgí kaa li oŋle la nsom wɛ́ɛ́.

⁵Ákaa ɛ́sɛ, ŋkɔŋ-á-sí á ŋga kɛ́ lí sɔ́, nyú bi lɛ lí máŋle, Ɔlolómɛ̄ āh vá ɓé wɔ á sí likanʼyɛ lí áŋgɛl.

⁶Mut wa a yīgyɛ́ náŋ voóm wa á Lícii-Lipúán nɛ́: «Á Ɔ́lolómɛ̄, ɓaá mut-a-binam a lɛ yéé nɛ́ ɔ ɔ́ŋɔ́ nyɛ́ é? Tɔ nɛ́ byálag mut-a-binam ɛ lɛ yéé nɛ́ ɔ nyɔŋ eceg yɛ́ɛ́ é?

⁷Wa súhɛ̄ nyɛ ányúū puh eceg á sí áŋgɛl, wa jáhɛ́ nyɛ ekót yé káísa, yé ɛ́ ŋga tíi nyɛ́ ádit la li yaanɛ lí nyɛ́ mut ǹcɛ́ŋ.

⁸Ɔ váá byóōm bísɛ á sí míkoo mɛ́ɛ́.» Eceg a ŋgí vá byóōm bísɛ á sí likanʼyɛ jɛ́ɛ́, jam tɔ já líh yéglée ɓé jé lí ɓɛ́ɛ́ ɓé á sí yɛ́ɛ̄. Ndí tɛɛla nyí vɔ́ŋɔ́ɔ, bih ŋgɛ́nɛ́g ɓé ɓɛ́hɛ nɛ́ byoóm bísɛ bí lɛ́ á sí likanʼyɛ jɛ́ɛ́.

⁹Ndí, ɓaá sɔm nɛ nyɔ́ Yésus a mɓɛ́ puh eceg á sí áŋgɛl, nyɛ́ nɛ́ li kele la nyɛmb yɛ́ɛ̄ á mbásá ɓá jáhɛ́ nyɛ ekót yé káísa, yé ɛ́ ŋga tíi nyɛ́ ádit la li yaanɛ lí nyɛ́ mut ǹcɛ́ŋ. Jɔ́ nɛ́, li kele la elɔ́ŋgɔ m̀mím yé Ɔ́lolómɛ̄, a wú ányúū ɓot bísɛ.

¹⁰Ákaa ɛ́sɛ, Ɔlolómɛ̄ nɛ a vēg jóō nɛ́ jam, jam sig ki lú ɓɛ́ ɛjɛ́ɛ́. Kóó yɛ́ɛ̄ ɛ lɛ́ nɛ́ ɔbul ví ɓot ví yaan ɓɔɔ́n ɓɛ́ɛ́ la ɓɔ́ bí nyɔŋ ŋgaan á lípēm jɛ́ɛ́. Kaa Yésus nɛ́ a ŋgí nyɛɛ li ɓɔŋ nɛ́ bí sūŋɓɛ̄, ɛ́ ŋga sōmlɛ nɛ́ la bisɔghe byɛ́ɛ́ a ŋga kuh, a ɓɛ́ nyɔ́ a kɔɔ́ ɓɔ́ lí suŋ.

¹¹Jɔ́ nɛ́, Yésus nyɔ́ a lɛ m̀púɛ, la ɓot ɓá a púɛ míɓē, ɓɔ́ bísɛ bí byɛ́ɛ́ ja ɛsáŋɛ́ wa, ányúū náŋ nɛ́ Yésus a ŋgá kɔn ɓé ɔ́sɔ̄n li yáŋá lí ɓɔ́ nɛ́ elōgyāŋ,

¹²ányúū náŋ nɛ́ a ŋga lága nɛ́: «Ɔ́lolómɛ̄, mag kɛ li lɛgɛ lí élōgyāŋ joó jɔ́ɔ, mag kɛ wa lí ɓégɛ á ŋkɔtanɛ́ a ɓot»,

¹³la ki nɛ́: «Mag kɛ li vá lí lípitá jáma lísɛ la Ɔlolómɛ̄.» Ag laga ki nɛ́: «Ma nyɔ́! Ma la ɓɔɔ́n Ɔlolómɛ̄ a tí ma, ɓaá sɔ́.»

¹⁴Kasig ɓáŋ ɓɔɔ́n bí lɛ́ ɓot-bí-bínam, bú oŋgɓɛ́ nyaa ya á nyuú la á micii, Yésus ki a yāán kaa ɓɔ́, ɔ púnān la ɓɔ́ á líɓɛ́ɛg lí mut-a-binam. Ányúū náŋ nɛ́, li kele la nyɛmb yɛɛ́, a yáanɛ́ ǹsɔhɔ yɛmɛ́, nyɔ́ a mɓɛ́ a byɛ́ɛ́ ŋguu nyí li óm á nyɛmb.

¹⁵A kɔ̄pɔ́ ki ɓot bísɛ, ɓá woŋ á nyɛmb wá yaanɛ́ míyɔ̄ŋ á éniŋ yáɓá ɛ́sɛ.

¹⁶Ákaa ɛ́sɛ, ah áŋgɛl ɓé nɛ́ Yésus a ŋga sɔ́ lí óŋgánɛ, ndí mbota nyí Áblaháam.

¹⁷Ányúū náŋ nɛ́ a ŋga nyɛ́ɛ li punan la elōgésāŋ á pánd ɛ́sɛ, nɛ́ ndí a yáan ǹtíi-nsúlé ǹcɛ́ŋ nyɔ́ a yáhɛ́ la m̀mím á ŋgɔ́ɔ́, nyɔ́ a ŋga sál nsɔ́n wɛ́ɛ́ kaa ɛ́ ŋga sōmlɛ ɔ́sū ví Ɔ́lolómɛ̄. Nyɛ́ nɛ́ a tɛ́ɛ́ɓɛ́ á lí kuhle lí ɓot-bí-bínam elaakɛ-miɓé.

¹⁸Kasig nyɛ́-mɛ̄n ɓá ceglɛ nyɛ, nyɛ́g ag la li óŋgánɛ lí ɓot bí lɛ́ á sí míceglan.