Read Bakoko Elōg-Hébɛl 7 Bible Online

Elōg-Hébɛl 7 - Bakoko bible

Elōg-Hébɛl 7

¹Nyɔ́ŋ Mɛlkisédɛk a ɓɛ́ɛ́ káísa nyí ɓot bí Sálɛm[1], ǹtíi-nsúlé a Nyɔlɛ. A kɛnɛ́ɛ́ á lí ɓoman la Áblaháam eceg nyɔ́ŋ a ŋgí sɔ́léne á wélan ápah a ɓomóó yíŋí káísa etám. La Mɛlkisédɛk ɔ lómbó nyɛ.

²Nyɛ́ Mɛlkisédɛk nɛ́ Áblaháam a súléé joga já átē á jóom lí byóōm bísɛ a sɔ́ɔ́la á wélan. Jé joó nɛ Mɛlkisédɛk líg kɔplɛ ja nɛ́: «káísa nyí etɛ́l-sim.» Nyɛ́ ki nɛ́ a lɛ káísa nyí ɓot bí Sálɛm, náŋ ag mínɛ nɛ́ «káísa nyí nsaŋ.»

³Nyɛ́ Mɛlkisédɛk, ah byɛ́ɛ́ ɓé ɛ́sāŋɛ́ tɔ nyaŋɛ́, ah byɛ́ɛ́ ɓé ndándó. Ɔlɔ́ vɛ́ɛ́ ví líbyáa ví ŋgá yílɛ ɓé, tɔ ví ví nyɛmb, a lɛ jā ǹtíi-nsúlé á éɓem la eɓem ákaa Mɔɔ́n Ɔ́lolómɛ̄.

⁴Mɛ̄mlán lítaŋgá lí Mɛlkisédɛk, nyɛ́ mut nyɔ́ Áblaháam, ǹcɛ́ŋ a lilómɛ a tíéé joga já átē a jóom lí tāŋ ŋkuh a sɔ́ɔ́la á wélan.

⁵Á mbálɛ, li oŋle la mbéndá, ɓatíi-nsúlé á m̀biya á Lévi bí byɛ́ɛ́ kundɛ li kuh lí joga já átē a jóom lí míɓɛɛŋ mí lílōmɛ, náŋ ɛnɛ á mbóg yéŋé élōgyāŋ yáɓá yé ɛ́ lɛ́ á mbota nyí Áblaháam.

⁶Ndí, nyɛ́ Mɛlkisédɛk, tɔ náŋ ákaa āh ɓɛ́ɛ́ ɓé a m̀biya wáɓá, a kuhúú joga já átē a jóom lí míɓɛɛŋ á mbóg Áblaháam, ámbúh náŋ, ɔ lómbó nyɛ́ Áblaháam, mut Ɔlolómɛ̄ a tíéé míkakanɛ.

⁷Ɛ́h ɓɛ́ ɓé péndan tɔ ya, ǹcɛ́ŋ nɛ a ŋga lómbo ntɔ́ga.

⁸Vá ki, ɓot bí m̀biya á Lévi bí ŋga kuh joga já átē a jóom lí míɓɛɛŋ mí lílōmɛ bí lɛ́ ɓot bí ŋga wú kaa yaa mut. Ndí Mɛlkisédɛk, nyɛ́ mut a kūh nlemlem á jam, a ŋgí lɛ á éniŋ ákaa Licii-Lipúán lí ŋga lága.

⁹Á lí sɛ́m lí pɛ́m, tɔ náŋ ákaa m̀biya á Lévi a ŋga kūh joga já átē a jóom lí míɓɛɛŋ mí lílōm, nyɛ́-mɛ̄n Lévi a sálá nyíŋ táas ányúū nɛ a lɛ á mbota nyí Áblaháam.

¹⁰Átɔm nɛ́, nyɛ́ Lévi a ɓɛ́ɛ́ a ŋgí lɛ á mínyɛ̄ mí mbómbó yɛ́ɛ̄ Áblaháam eceg nyɔ́ŋ a ɓomáán la Mɛlkisédɛk.

¹¹Mbéndá ɛg laga nɛ́, ɓatíi-nsúlé bíg pámléne á m̀biya á Lévi. Ndí kí ɓɔ́ŋ nɛ́ ɓatíi-nsúlé bí Élōg-Lévi bí yáhɛ́gɛ nsɔ́n wáɓá m̀ɓɛɛŋ, ɓaá, kí nsɛ́ŋ á yéé á mɓɛ́ á li somo lí ǹtíi-nsúlé ntám á liɓɛ́ɛg lí Mɛlkisédɛk é? Nyɔ́ a sē ɓé kaa ɓá ɓá pámléné á m̀biya á Álon.

¹²Átɔm nɛ́, yɛkɛsig mveŋghanɛ́ a nsɔ́n a ǹtíi-nsúlé ag sɔ́la mveŋghanɛ́ a mbéndá.

¹³Bíŋ biɓaŋgá bí Licii-Lipúán bíg pɔ́tléne Ɛtáŋɛ wahá nyɔ́ a sɔ́lé á lílōmɛ litám, ápah mut tɔ wa āh yáŋlɛ ɓé á lí sál á étága-nsúlé.

¹⁴Á mbálɛ, biíg yí nɛ́ Ɛtáŋɛ wahá a pámléné á lilómɛ lí Yúda, lilómɛ jé lí lɛ́ nɛ́ Móse āh símhánɛ ɓé a bíciilé byɛ́ɛ́ eceg a ŋgí pɔ́t likɔlɓan la nsɔ́n á ɓatíi-nsúlé.

¹⁵Náŋ a kōndyé lí étɛ lí mbálɛ nɛ́, nyɔ́ŋɔ́ ǹtíi-nsúlé ntám a lɛ̄ kaa Mɛlkisédɛk.

¹⁶A sē ɓé ǹtíi-nsúlé li oŋle la mbéndá yá nyí ɓot-bí-bínam bí ŋga ōŋle, ndí a lɛ̄ ǹtíi-nsúlé li oŋle la ŋguu nyí ɛ ŋga sɔ́le á éniŋ yɛ́ɛ́, yéŋ eniŋ ɛ́ ŋgá man ɓé.

¹⁷Ákaa ɛ́sɛ, mbóŋ bí ŋga tíi nyɛ́ yɔ nyí nɛ́: «Ɔ lɛ ǹtíi-nsúlé á éɓem la á éɓem ákaa Mɛlkisédɛk.»

¹⁸La náŋ, nlom á mbéndá wá sááɓɛ, ányúū nɛ á ŋgí saa la ki nɛ́ áh ɓɛ́ɛ́la ɓé la eɓáha,

¹⁹átɔm nɛ́, mbéndá Móse yāh púɛ ɓé mut tɔ wa. Ndí, ɓaá kūh taŋ lipitá jé lí ŋga ɓɔŋ ɓɛ́hɛ nɛ́ bi lá li siŋgle ɓɛɓɛ la Ɔlolómɛ̄.

²⁰Li loo náŋ Ɔlolómɛ̄ a kanáá-sɔŋ. Ɓáŋá ɓátām ɓá yaán ɓátíi-nsúlé ɛ́h ɓɛ́ ɓé Ɔ́lolómɛ̄ li kan lí sɔŋ.

²¹Ndí Yésus, nyɛ́ a tɛ́ɛ́ɓɛ́ ǹtíi-nsúlé eceg Ɔlolómɛ̄ a kanáá-sɔŋ, ɔ lāgá nyɛ́ nɛ́: «Nyɔ́ŋ-Ɛsáŋɛ́ a kān-sɔŋ, a man lí súgɛ́ nɛ́, Ɔ lɛ ǹtíi-nsúlé á éɓem la á éɓem.»

²²Ányúū náŋ nɛ́ la Yésus bi lɛ mbáki nɛ́ bi byɛ́ɛ́ esaa-líat yé yá loohán lí ɓɛ́ lí élɔ́ŋgɔ.

²³Li loo náŋ, ŋgandag ɓot yá yāán ɓátíi-nsúlé, ɓá bí ŋgí yihan á mímū mí ɓáŋá, ányúū nɛ nyɛmb ɛ ŋgí ɓógtɛ ɓɔ́ á nsɔ́n wáɓá.

²⁴Ndí, kasig Yésus a ŋga nīŋ á éɓem la eɓem, liɓɛ́ɛg jɛ́ɛ́ lí ǹtíi-nsúlé lí lɛ́ tóɓó-tóɓó.

²⁵Ányúū náŋ nɛ́ ŋgele ya ányúū yɔ́ ɛ́sɛ, Yésus a kɔɔ́ lí suŋ lí ɓá bí ŋga lóole la nyɛ́ á lí siŋgle lí Ɔlolómɛ̄ á ŋgwáāg. Kasig a ŋga nīŋ á éɓem la á éɓem, á lí kánɛ lí Ɔ́lolómɛ̄ ányúū yāɓá.

²⁶Ɔɔ, nyíŋ titih ǹtíi-nsúlé ǹcɛ́ŋ nɛ ɛ ŋgí sōmlɛ ɓɛ́hɛ, nyí ɛ lɛ mpúán, nyí ɛ lɛ̄ ŋgíla njɔm, ŋgíla aɓé, nyí ɛ sē ɓé á élɔŋ yé ɓáɓɔŋ-miɓé, nyí Ɔlolómɛ̄ a ɓétɛ́ á lóō lóō.

²⁷Yésus ah byɛ́ɛ́ ɓé kóó lí tíi lí nsúlé ɔ́lɔ̄ sig ányúū miɓé mɛ́ɛ́ nyɛ́-mɛ̄n yágá, la ányúū miɓé mí lílōm ákaa ɓáŋá ɓátíi-nsúlé ɓácɛ̄ŋ. A tíéé nsúlé wá ŋgele ya ányúū yɔ́ ɛ́sɛ, eceg a tí nyɛ́-mɛ̄n ákaa nsúlé.

²⁸Mbéndá Móse ɛ tɛ́ɛ́yɛ́ɛ ɓot-bí-bínam la aɓɔt wáɓá ákaa ɓatíi-nsúlé ɓacɛ́ŋ. Ndí, Ɔ́lolómɛ̄ a kanáá-sɔŋ kí mbéndá yɔ ɛ lɛ. Ɔ tɛ́ɛ́yɛ́ Mɔ́ɔ̄n wɛ́ɛ̄ ákaa taŋ ǹtíi-nsúlé ǹcɛ́ŋ, nyɔ́ a lɛ mípūū á éɓem la á éɓem.