Read Bakoko Elōg-Hébɛl 8 Bible Online

Elōg-Hébɛl 8 - Bakoko bible

Elōg-Hébɛl 8

¹Taŋ jam á mam mísɛ ɓaá laga ɓɛ́nɛ ɛ lɛ̄ nɛ́, bi byɛ́ɛ̄ nyíŋ nyaa ǹtíi-nsúlé ǹcɛ́ŋ, nyɔ́ a tɔɔ́ á lóō, á m̀ɓɛ́nlómɛ a etɔɓé-líkanʼyɛ yé Nyɔlɛ a Ŋguu-Mísɛ.

²Nyɛ́ nɛ́ a lɛ á nsɔ́n á ndugá púán, náŋ ɛnɛ á taŋ lindúm jé lá óŋɓɛ́ la Nyɔ́ŋ-Ɛsáŋɛ́, ndí ah la mut-a-binam ɓé.

³Joó nɛ ǹtíi-nsúlé ǹcɛ́ŋ a tɛ́ɛ́ɓɛ́ ányúū li tíi lí míkaale la misúlé, jɔ́ nɛ́, ɛ́ lɛ́ nsɛ́ŋ nɛ́ nyɛ́g a ɓɛ́la puh jam a ŋga tíi.

⁴Ki ɓɔ̄ŋ nɛ́ Nyɔ́-a-Pɔ́hlɛ a ɓɛ́ á ŋkɔŋ-á-sí, kí a sē ɓé tɔ ki ǹtíi-nsúlé, ányúū nɛ ɓot bí lɛ́ váŋ á yéŋ etɛ́l ɓá bí ŋga sál nyúŋ nsɔ́n li oŋle kaa mbéndá Móse ɛ ŋga lága.

⁵Ɓɔ́ nɛ́ bí ŋga ɓɔ̄ŋ esaa, yé ŋga púnan la titih-ɛ́-mam yí ŋga ɓɔ̄ŋɓɛ á lōó, li oŋle kaa Ɔlolómɛ̄ a dúgléé lí yíhɛ lí Móse, eceg a ŋgí nyɛɛ lí óŋ lí líndūm lípūān. A lagléé nyɛ́ nɛ́: «Légɓé, ɔ ɓɔŋɔg mam mísɛ li oŋle la ndembye ɓá étɛ́ wa á lōó lí ɔ́kolá.»

⁶Á mbálɛ, Yésus a kūh nsɔ́n á ŋga lóo nyú á ɓáŋá ɓátíi-nsúlé bísɛ, átɔm nɛ́, nyɛ́ nɛ́ á lɛ á póla Ɔlolómɛ̄ la ɓot-bí-bínam á li ɓɔŋ lí ésaa-líat yé yá loohán lí ɓɛ́ lí m̀ɓɛɛŋ yé yá loolé á míkakanɛ mí má loohán lí ɓɛ́ lí m̀ɓɛɛŋ.

⁷Ákaa ɛ́sɛ, kí ɓɔŋ nɛ́ esaa-líat ɔ́sū ɛ́ ɓɛ́ɛ́ ŋgíla ɔnɛ́g, kí nsɛ́ŋ áh ɓɛ́ɛ́ ɓé á lí veŋghanɛ lí yɔ la yé yá yáhɛ́ bíɓáa.

⁸Ndí, ɔvuha víŋ Ɔlolómɛ̄ a ŋga sɛ́m lílōm jɛ́ɛ́ eceg a ŋga lága ɓɔ́ nɛ́: «Légɓyán, Nyɔ́ŋ-Ɛsáŋɛ́ ag laga nɛ́, alɔ́ ág sɔ́, ápah mi ŋga kɛ́ li ɓɔŋ lí esaa-líat ɛ́ péná la lilóm lí Íslāɛl elɔŋ la jé lí Yúda.

⁹Ndí, ah kaa esaa-líat yé mi ɓɔŋɔ́ɔ́ la ɓasáŋɛ́ ɓáɓá ɓé, ɔlɔ́ ví mi byeléé ɓɔ́ á wɔ á lí pámɛ lí ɓɔ á ékombo yé Égípto. Kasig ɓɔ́-mɛ̄n ɓáh tɔɓene ɓé á ésaa-líat ma ɓɔ̄ŋ la ɓɔ́, ányúū náŋ nɛ́ ma cóó ɓɔ, Nyɔ́ŋ-Ɛsáŋɛ́ nɛ a pɔ́t.»

¹⁰Nyɔ́ŋ-Ɛsáŋɛ́ ag kɛ la ɔsú nɛ́: «Esaa-líat mi ŋga kɛ́ li ɓɔ̄ŋ la lilóm lí Íslāɛl, ámbúh nyúŋ alɔ́ yɔ́ yé nɛ́, eceg mi ɓɛ́ mag tíi ɓɔ́ mbéndá yáma, mag kɛ ja yɔ́ lí cíi á míɔ̄ŋɔ máɓá la á mímīm máɓá. Mag kɛ li ɓɛ́ lí Loó jáɓá, ɓɔ́g bí ɓɛ́ lilóm jáma.

¹¹Mut tɔ wa āh ɓɛ́ ɓé pɛ ag yéglɛ mɔɔ́nɛ́sāŋ nyɔ́ a nlemlem á ékombo ndí tɔ mɔɔ́nyāŋ, á lí laga lí nyɛ nɛ́: ‹Yí Nyɔ́ŋ-Ɛsáŋɛ́›! Átɔm nɛ́, ɓot bísɛ bíg kɛ ma lí yí, li ɓotle á ntɔ́ga li pám á ǹcɛ́ŋ.

¹²Mag kɛ ɓɔ́ lí laakɛ lí ávuha wáɓá, tɔ míɓē máɓá ki mi ŋgá kɛ ɓé pɛ ma mɔ́ lí ɔ́ŋɔ.»

¹³Eceg Ɔlolómɛ̄ a ŋga pɔ́t likɔlɓan la esaa-líat ɛ́ péná, ag yaanɛ esaa-líat ɔ́sū nlom, la nɛ́ jam lá yaán nlom, jé lá un ki, puh eceg lí ŋgá ɓɛ́ ɓé pɛ.