Read Bakoko Yákop 1 Bible Online

Yákop 1 - Bakoko bible

Yákop 1

¹Ma Yákop, m̀ɓɔŋle a Ɔlolómɛ̄ la nyɔ́ a Nyɔ́ŋ-Ɛsáŋɛ́ Yésus Kilístus, mag tama jóom lí mílōmɛ la míɓáa mí Ɔ́lolómɛ̄ má cámān á ŋkɔŋ-á-sí ásɛ.

²Á élōgyāŋ, miní ɔ́hánɛ miceglan mísɛ mí ŋga pámle ɓɛ́nɛ la m̀mím á mívag.

³Yíán nɛ́, kíyáɓɛ́nɛ ŋyéɓé wáná wá loolé á éceglɛ, yéŋ eceglɛ ɛ́g letɛ ɓɛ́nɛ.

⁴Ndí, ɛ́g ɓat nɛ́ nyúŋ alet wáná á pám nɛ́-tɛ́ɛla á lísūg á lí ɓɔŋ nɛ́ miní ɓɛ́ ɓot bí lɛ́ kaa ɛ́ ŋga sōmlɛ, ŋgíla ɔnɛ́g, tɔ jam ki líh yɛ́ɛ́légé ɓé ɓɛ́nɛ.

⁵Kíyáɓɛ́nɛ mut á póla yaná ag yɛ́ɛ́ peg, a ɓāt yɔ Ɔlolómɛ̄, nyɛ́ ag kɛ nyɛ́ yɔ li tíi, átɔm nɛ́, Ɔlolómɛ̄ nɛ́ a ŋga tíi la elɔ́ŋgɔ m̀mím, yé ɓot bísɛ bí ŋga ɓāt nyɛ́ ɛ́h ɓɛ́ ɓé ntɔghanɛ́.

⁶Ndí, eceg mut a ŋga ɓāt, a ɓāt la ŋyéɓé, ɛ́h ɓɛ́ ɓé pendan tɔ ya, átɔm nɛ́ nyɔ́ la nyɔ́ a ŋga péndan ag punan la minɔŋgɔ́ mí túwɛ nɛ́ ŋgɔá ɛ ŋga pógɛ.

⁷Nyíŋ nyaa mut, ɛh ɔ́ŋlág ɓé nɛ Nyɔ́ŋ-Ɛsáŋɛ́ ag kɛ nyɛ́ lí tíi lí jam,

⁸ányúū nɛ m̀mím wɛ́ɛ́ wá kaaɓan, ag ndɛ́ŋg á mam mɛ́ɛ́ mísɛ.

⁹Ɛ́g somlɛ nɛ́ nyɔ́ mɔɔ́nɛ́tāŋ a lɛ ŋ̀yɛ́ɛ́yɛ́ɛ a kɔ́n mivag nɛ́ Ɔlolómɛ̄ a ɓétɛ́ nyɛ.

¹⁰Nyɔ́ ki a lɛ̄ mbyaŋ, nyɛ́g a kɔ́n mivag nɛ́ Ɔlolómɛ̄ a sūhɛ́ nyɛ, ányúū nɛ́ kaa mbonji, m̀byaŋ-á-mut á ŋgá ɓem ɓé.

¹¹La mbálɛ, vaŋgá víg pám la adíg wɛ́ɛ́, vá dígɛ́ ékāā, mbonji yɛɛ́ ya ɓɛ́han, la aláám á yéŋ ekáá wá man. Nlemlem á jam nɛ́ á ŋga kɛ́ li loole lí m̀byaŋ-á-mut átē a misɔ́n mɛ́ɛ́ mísɛ.

¹²Misɔ́tá la mut a ŋga ɔ́hánɛ miceglan, ányúū nɛ ámbúh míŋ miceglan, ag kɛ li kuh lí ɔtot ví éniŋ, ví Ɔlolómɛ̄ a kákānɛ̄ ɓot bísɛ bí ŋga dīŋ nyɛ́.

¹³Á élōgyāŋ, mut tɔ wa, eceg miceglan mí ŋga pámle nyɛ́, ah laglág ɓé nɛ: «Ɔlolómɛ̄ nɛ a ŋga céglɛ ma.» Átɔm nɛ́, Ɔlolómɛ̄ a ŋgá la ɓé tɔ lí ɔ́ŋɔ lí lí ɓɔŋ lí áɓē, á ŋgá vá ɓé ki tɔ mut á sí miceglan.

¹⁴Mut nɛ́ a ŋga óm nyɛ́-mɛ̄n á míceglan li kele la kóó-míson yɛ́ɛ́. Yɔ́ nɛ́ ɛ́ ŋga dúutɛ nyɛ́ la yɔ́ yá óm nyɛ á áɓē.

¹⁵La ki nɛ́, eceg kóó-míson yá nyɔ̄ŋ étɔ, ɛ́g byál áɓē, aɓé ki, eceg wá ólo, ág sɔ́la nyɛmb.

¹⁶Á élōgyāŋ yé édiŋ, miníh yɛ́ɛ́kɛ́gɛ́ ɓé ɓɛ́nɛ-mɛ̄n,

¹⁷joó nɛ taŋ líkaale la joó nɛ elɔ́ŋgɔ ɛ́ jam bíg sɔ́léne á lóō, á mbóg Etāa Ɔlolómɛ̄, m̀veg mipúú, nyɔ́ a ŋgá veŋ ɓé, tɔ li ɓɛ́la lí pupúhú jam lí ŋga étɛ nsɛlanɛ́.

¹⁸La nsom wɛ́ɛ́ nyɛ́-mɛ̄n nɛ́ a tí ɓɛ́hɛ eniŋ li kele la eɓaŋgá yɛ́ɛ́ ɛ́ mbálɛ, á lí ɓɔŋ nɛ́ ɓɛ́hɛ nɛ́ bí ɓɛ́ á étɛ̄l ɔ́sū á bíveglé byɛ́ɛ́ bísɛ.

¹⁹Á élōgyāŋ yé édiŋ, kasig miní lɛ́ ɓáyī-jam, mut sig a nyɔ́ŋ ndún á lí ámble, ndí ah vóóhɛ́gɛ́ ɓé lí pɔ́t, tɔ li vóó lí lí ála,

²⁰átɔm nɛ́, mut a ŋga ála a ŋgá ɓɔŋ ɓé jam lí tɛ́ɛ́ sim á miíh mí Ɔ́lolómɛ̄.

²¹Jɔ́ nɛ́, ɓógyán á mam mísɛ mí ŋga vínɛ ɓɛ́nɛ, la nlohanɛ́ a m̀ɓé-a-m̀mím. Lɛ́glán éɓaŋgá Ɔ́lolómɛ̄ a ɓɛ́ɛl átē wāná la ewú-m̀mím, yɔ́ nɛ́ ɛ́ kɔ́ɔ ɓɛ́nɛ li suŋ.

²²Ndí, ɓɛ́án ɓáōgle eɓaŋgá Ɔ́lolómɛ̄, miníh lɛndkágán ɓé ja yɔ́ lí ámble, miní táág náaɓán.

²³La mbálɛ, nyɔ́ la nyɔ́ a ŋga ámble eɓaŋgá Ɔ́lolómɛ̄, ndí áh óglé ɓé yɔ, ag punan la mut a ŋga légɓe asú wɛ́ɛ́ á élembán á lí ɛ́n ákaa á lɛ.

²⁴Ɛnɛ́ a ɛ́n ásū wɛ́ɛ́, ɔ kɛ̄, á ékūyá-kúyá, ɔ vólánɛ́ láá a lɛ.

²⁵Ndí, nyɔ́ la nyɔ́ a ŋga ɛ́gɓéne á taŋ mbéndá nyí ɛ ŋga tɛ́ɛ́yɛ kundɛ, la nyɛ́ a tíŋɓéné átē, ag kɛ li kuh lí mísɔ̄tá á mam mísɛ a ŋga kɛ́ li ɓɔŋ. A ŋgá ɓɛ́ ɓé ákaa nyɔ́ mut a ámble yɔ, la nyɛ́ ɔ vólanɛ, ndí ag ɓɛ́ ákaa nyɔ́ a ŋga ógle yɔ́.

²⁶Kíyáɓɛ́nɛ mut a ɔ́ŋɔ́ nɛ́ a lɛ̄ mut a eɓasɛ, ndí āh byee ɓé ɔ́lēmb vɛ́ɛ́, ɛnɛ ag naaɓan, ɛnɛ liɓɛ́ɛg jɛ́ɛ́ á éɓasɛ ki lí lɛ́ yɛ̄mɛ́.

²⁷Taŋ li ɓɔŋle lí éɓasɛ átē a mípūū ŋgíla ɔnɛ́g á miíh mí Ɔlolómɛ̄ Etāa wahá ɛ lɛ́ já: Li óŋgánɛ lí ɓɔ́ɔ̄n-bí-nyul la mikúh mí ɓóndīgá ɓá bí lɛ́ á ndútu la li yíhe nɛ́ mam mí ŋkɔŋ-á-sí míh vínhɛ̄gɛ́ ɓé mut.