Read Bakoko Yákop 2 Bible Online

Yákop 2 - Bakoko bible

Yákop 2

¹Á élōgyāŋ, ɓɛ́nɛ ɓot miní byɛ́ɛ̄ ŋyéɓé la Ɛtáŋɛ wahá Yésus Kilístus nyɔ́ a yáhɛ́ la lipém, miníh tɔ́tlág ɓé ɓot.

²Ákaa ɔvega, kíyáɓɛ́nɛ mut a níŋgí á éti yáná, a jáhɛ ɓalɔndɛ́ bí góol la taŋ mbɔ́tí yí díyɛ, ndí ŋ̀yɛ́ɛ́yɛ́ɛ-a-mut ki a sɔ́ a jáhɛ ǹdunɛ a mbɔ́tí,

³kíyáɓɛ́nɛ maná légɓé ja mut a jáhɛ́ taŋ mbɔ́tí yí díyɛ, la ɓɛ́nɛ maná lágā nyɛ́ nɛ́: «Wa, yɔgɔ́ vá á yé etɔɓé», ndí maná lágā ki ŋ̀yɛ́ɛ́yɛ́ɛ nɛ́: «Wa tɛ́lɛ́ vá, tɔ nɛ́ tuhyán vá á sí yáma míkoo.»

⁴Eceg miní ŋga ɓɔ̄ŋ náŋ, ɓaá, ɛnɛ ɓɛ́nɛ-mɛ̄n maná sɔ́la ɓé ndɔ́tlán é? Ɓaá, manáh yaan ɓé ja ɓakááhɛ bí byɛ́ɛ̄ miɔ́ŋɔ miɓé é?

⁵Ámblán á élōgyāŋ yé édiŋ, ɓaá, ah Ɔlolómɛ̄ ɓé nɛ a pɔ́hɔ̄ ɓá bí lɛ́ ɓáyɛ̄ɛ̄yɛ́ɛ li oŋle la liɛ́nɛg lí ɓot bí ŋkɔŋ-á-sí, á lí byaŋɓɛ lí ɓɔ á ŋyéɓé, la li yaanɛ lí ɓɔ ɓakoto-embámbá yé Ékombo-lóō yé a kákānɛ̄ ɓot bí ŋga dīŋ nyɛ́ é?

⁶Ndí ɓɛ́nɛ, miníg yaŋa ŋ̀yɛ́ɛ́yɛ́ɛ. Ɓaá, ah mimbyaŋ-mí-ɓot ɓé nɛ mí ŋga téeŋgɛ ɓɛ́nɛ é? Ah mɔ́ ɓé nɛ́ mí ŋga kɛla ɓɛ́nɛ á ndáá-bikááhɛ́nɛ́ é?

⁷Ah mɔ́ ɓé ki nɛ́ mí ŋga lɔ́ɔ joó lílāām ɓá tí ɓɛ́nɛ é?

⁸La mbálɛ, kíyáɓɛ́nɛ miníg ógle mbéndá nyí likanʼyɛ lí Ɔ́lolómɛ̄ ákaa yá ciiɓɛ́ nɛ: «Ɔg kɛ li diŋ lí mɔɔ́nɛ́sɔ̄ŋ kaa wā-mɛ̄n», ɛnɛ miníg ɓɔŋ m̀ɓɛɛŋ.

⁹Ndí, kíyáɓɛ́nɛ miní byɛ́ɛ́ ndɔ́tlán á póla yaná, ɛnɛ maná ɓɔŋ áɓē, la náŋ mbéndá ɛg byee ɓɛ́nɛ, ányúū nɛ́ manáh óglé ɓé yɔ.

¹⁰Jɔ́ nɛ́, tɔ nzáá a ŋga ógle míŋí mítiŋ mí mbéndá mísɛ, ndí á vūhlé lítiŋ jáhjá, ɛnɛ a búú mbéndá ɛsɛ̄,

¹¹átɔm nɛ́ Ɔlolómɛ̄ a lágā nɛ: «Ɔh kɛnɛ́g ɓé á ndeŋg», nyɛ́ nɛ́ a lágā sīg-pɛ nɛ́: «Ɔh ólóg ɓé.» La náŋ, kí wāh kɛ ɓé á ndeŋg ndí wā ól mut, ɛnɛ wāh ógle ɓé mbéndá.

¹²Pɔ́tán, miní ɓɔŋ ki kaa ɓot Ɔlolómɛ̄ a ŋga kɛ́ li kááhɛ li oŋle la mbéndá nyí ɛ ŋga tɛ́ɛ́yɛ kundɛ.

¹³Ákaa ɛ́sɛ, á eceg bikááhɛ́nɛ́, Ɔlolómɛ̄ a ŋgá kɛ ɓé lí kɔnle lí mut āh kɔnle ɓé nyɔ́ŋɔ́ ntám ŋgɔ́ɔ́. La mbálɛ, mut a ŋga kɔnle ɓot ŋgɔ́ɔ́ a ŋgá kɔn ɓé bíkāāhɛ́nɛ́ woŋ.

¹⁴Á élōgyāŋ, nsɛ́ŋ á yéé lí sɛgɓan nɛ́ mi byɛ́ɛ ŋyéɓé, kíyáɓɛ́nɛ náŋ a ŋgá ɛ́ni ɓé á mísɔ̄n é? Ɓaá, nyíŋ nyaa ŋyéɓé ɛg la li suŋ lí mut é?

¹⁵Ákaa ɔvega, kíyáɓɛ́nɛ mɔɔ́nɛ́tāŋ wa átē a ŋyéɓé ag wɛɛ nsɔ́, tɔ nɛ́ āh byɛɛ́ ɓé yoóm li dí ɔlɔ́ sig,

¹⁶ndí mut wa á élɔŋ yáná a lágá nyɛ nɛ́: «Kɛnɛ́g la nsaŋ, jál mbɔ́tí ɛ́ ŋga díitanɛ wā nyúū, lidí lí nyɛɛlé wa.» Kíyáɓɛ́nɛ nyɔ́ŋ mut āh tíi ɓé nyɛ yé ɛ́ ŋga sōmlɛ nyɛ́ ányúū eniŋ, ɛnɛ a sál yéé é?

¹⁷Náŋ a lɛ̄ nlemlem ányúū ŋyéɓé, kíyáɓɛ́nɛ misɔ́n mɛ́ɛ́ mí ŋgá ɛ́ni ɓé, ɛnɛ wá wú.

¹⁸Ndí, mut ag kɛ li laga nɛ́: «Wa ɔ byɛ́ɛ́ ŋyéɓé, mág mag ɓɔŋ misɔ́n. Étɛ́ sig mā nyúŋ ŋyéɓé wɔ́ɔ á ŋgíla misɔ́n, má, mag kɛ wa lí étɛ la misɔ́n máma nɛ́ mi byɛ́ɛ́ ŋyéɓé.»

¹⁹Ɓaá, ɔg yéɓé nɛ́ Ɔlolómɛ̄ a lɛ̄ pɔmbɛ é? Náŋ a lɛ̄ m̀ɓɛɛŋ. Mimbúl míɓē mɔ́g míg yéɓé náŋ, la mɔ́ má sɛ́glán lā woŋ.

²⁰Á énāān-ɛ́-mut yé, ɓaá, nyí vɔ́ŋɔ́ɔ ɔg sɔ́ŋtánɛ nɛ́ ŋyéɓé á ŋgíla misɔ́n á lɛ́ yɛ̄mɛ́ é?

²¹Ɓaá, la misɔ́n ɓé nɛ́ Áblaháam etāa wāhá a ɛ́ni kaa nyɔ́ a tɛ́ɛ́ sim ɔ́sū ví Ɔ́lolómɛ̄, eceg a tí mɔɔ́n wɛ́ɛ̄ Ísaak ákaa nsúlé á lōó lí étága-nsúlé é?

²²Ɔg ɛ́n nɛ́ ŋyéɓé wɛ́ɛ́ la misɔ́n mɛ́ɛ́ bí ŋgí kɛhan, átɔm nɛ́, misɔ́n mɛ́ɛ́ má yáhɛ́ ŋyéɓé wɛ́ɛ́.

²³La náŋ, jé Licii-Lipúán lá yál, eceg lí ŋga lága nɛ́: «Áblaháam a ɓɛ́ɛ́la ŋyéɓé la Ɔlolómɛ̄, ányúū náŋ nɛ́ Ɔlolómɛ̄ a nyɔ̄ŋ nyɛ kaa mut a tɛ́ɛ́ sim, la nyɛ́ ɔ kūh joó nɛ́: liwándá lí Ɔ́lolómɛ̄.»

²⁴Miníg ɛ́n nyí vɔ́ŋɔ́ɔ nɛ́, Ɔlolómɛ̄ ag ɛ́n etɛ́l-sim ɛ́ mut li oŋle la misɔ́n mɛ́ɛ́, ndí ah la yéɓé wɛ́ɛ́ wɔ́-ntámɛ́ ɓé.

²⁵Nlemlem á jam nɛ́ wá loolé la Láhab mindígá a akwala. Ɓaá, la misɔ́n mɛ́ɛ́ ɓé nɛ́ a ɛ́ni kaa nyɔ́ a tɛ́ɛ́ sim ɔ́sū ví Ɔ́lolómɛ̄, eceg a lɛ́glé ɓot-bí-ŋgómán bí Íslāɛl á yóg yɛ́ɛ̄, ɔ sɔ́ɔ ɓɔ, ámbúh náŋ ɔ kɛ́hánɛ̄ ɓɔ á nzen etám á mítiman máɓá é?

²⁶La mbálɛ, nyúū ɛ ŋgíla m̀búl ɛg wú, nlemlem kaa ŋyéɓé á ŋgíla misɔ́n.