Read Bakoko Yákop 4 Bible Online

Yákop 4 - Bakoko bible

Yákop 4

¹Á élōgyāŋ, yéé ɛ́ ŋga sɔ́la mélan la biɓándá á póla yaná é? Ɛ́ sē ɓé mbálɛ nɛ́ bíg sɔ́le ja á míɔ̄ŋɔ miɓé mí ŋga dū átē wāná é?

²Miní byɛ́ɛ́ ehép ɛ́ mam, ndí miní ŋgá kuh ɓé mɔ̄, miní lɛ́ ɓot bí míólan la ɓot bí nzoŋ, miní ŋgá la ɓé li tombanɛ lí tɔ jam, kasig miní ŋga dú biɓándá la wélan. Miní ŋgá kuh ɓé tɔ jam ánsī nɛ miní ŋgá yí ɓé lí yaga lí Ɔ́lolómɛ̄.

³Miníg yaga ndí miní ŋgá kuh ɓé, átɔm nɛ́ miníg ɓéé lí yaga, miníg yaga ányúū li yáhɛ lí kóó yáná míson.

⁴Á ɓot bí mpuŋgú ɓá! Ɓaá, miní ŋgá yí ɓé nɛ li tɛ́g lí líwāndá la ŋkɔŋ-á-sí lí lɛ́ lí pún lí Ɔ́lolómɛ̄ é? Tɔ nzáá a ŋga sómo li ɓɛ́ lí líwāndá lí ŋkɔŋ-á-sí, ag yaan hɔ́ ǹlem a Ɔlolómɛ̄.

⁵Tɔ nɛ́, miníg ɔ́ŋɔ nɛ́ yɛ̄mɛ́ nɛ yé epah Lícii-Lipúán ɛ́ ŋga lága nɛ́: «Ɔlolómɛ̄ a byɛ́ɛ́ ekɔ́ɔ́ ŋgandag la M̀búl nyú a vá átē wāhá!»

⁶Ndí, Ɔlolómɛ̄ a tí ɓɛ́hɛ likaale licɛ́ŋ lítām, ányúū náŋ nɛ́ Lícii-Lipúán lí ŋga yó nɛ́: «Ɓot bí kúmba, Ɔlolómɛ̄ ag letle ɓɔ́ m̀mím, ndí ag ɓɔt m̀mím ányúū ɓá bí esuhɛ-nyuú.»

⁷Jɔ́ hɔ́ nɛ́, miní óglé Ɔlolómɛ̄, ndí miní byēlɓán lā ŋguu nɛ́ ǹsɔhɔ ah díág ɓé ɓɛ́nɛ cíŋ, váŋ ag nɛŋɛ la ɓɛ́nɛ.

⁸Siŋglán Ɔlolómɛ̄ ɓɛ́ɓɛ, nyɛ́g ag kɛ ɓɛ́nɛ li siŋgle lí ɓɛɓɛ. Soán mɔ máná á ɓáɓɔŋ-miɓé, miní púɛ́ mimím máná á ɓot bí ŋga ndɛ́ŋg ɓá!

⁹Lemán nɛ́ miní lɛ́ ŋgɔ́ɔ́, jálán mbɔ́tí yí mílɛɛ, lelán, vɔl váná ví yáan liwú, mivag máná ki mí yáan nsúnānɛ́.

¹⁰Ɓɛ́án la esuhɛ-nyuú á ŋgwáāg Nyɔ́ŋ-Ɛsáŋɛ́, ag kɛ ɓɛ́nɛ li ɓétɛ.

¹¹Á élōgyāŋ, miníh sɔgkágán ɓé ɓɛ́nɛ la ɓɛ́nɛ. Tɔ nzáá a ŋga sɔ̄g mɔɔ́nɛ́sāŋ ndí tɔ li kááhɛ lí nyɛ, ɛnɛ a pɔ́t áɓē likɔlɓan la mbéndá, ɔ kááhɛ ki yɔ. Ndí kíyáɓɛ́nɛ ɔg kááhɛ mbéndá, ɛnɛ ɔ ŋgɔ́ oŋle ɓé yɔ, wa yáan jā ŋ̀kááhɛ yɔ.

¹²Ndí, Ɔlolómɛ̄ nyɛ́-ntámɛ́ nɛ́ a lɛ̄ ǹtɛ́ɛ́yɛ-mbéndá, la ŋ̀kááhɛ ɓot. Nyɛ́ nɛ́ a ŋga lá li suŋ, nyɛ́ ki nɛ́ a ŋga lá li cɛ́hɛ. Wa hɔ́, ɔ lɛ́ nzáá ɔ ŋgɔ kááhɛ mɔɔ́nɛ́sɔ̄ŋ é?

¹³Á élōgyāŋ, ɓɛ́nɛ ɓá miní ŋga lága nɛ́: «Nyí lɛn, tɔ likɛ́ɛ́, biíg kɛ á nyí tísɔn, bí tɔ́ɔ́ wóŋ m̀bú ŋwút, bi ɓɔ̄ŋ nyuŋgá, bi kúh mɔní.»

¹⁴Nyaa nɛ́ miní ŋgá yí ɓé kaa kítí ɛ ŋga yɛ́, kaa láá éniŋ yáná ɛ́ ŋga ɓɛ́. Miní lɛ́ jā kaa m̀búl á éɓɛŋga á ŋga ɛ́ni ányúū pupúhú eceg, ámbúh náŋ wá nyɔ́ŋ.

¹⁵Miní ŋga nyɛ́ɛ ja lí yó nɛ́: «Kí Nyɔ́ŋ-Ɛsáŋɛ́ a kɔ́n ŋgɔ́ɔ́, biíg kɛ li niŋ, biíg kɛ li ɓɔŋ lí jé jam tɔ nɛ́ jéŋé.»

¹⁶Ndí ɓɛ́nɛ, miní lɛ́ lípaló, nyíŋ nyaa eyát ɛ lɛ éɓē.

¹⁷Tɔ nzáá a ŋga yí li ɓɔŋ lí m̀ɓɛɛŋ ndí āh ɓɔŋ ɓé wɔ̄, ɛnɛ a ɓɔ̄ŋ áɓē.