Read Bakoko Pétlos 1 1 Bible Online

Pétlos 1 1 - Bakoko bible

Pétlos 1 1

¹Ma Pétlos, ŋ̀ómɓɛ a Yésus Kilístus, mag ciile ɓot Ɔlolómɛ̄ a pɔ́hɔ, ɓá bí lɛ́ ɓácɛn-bí-ɓot ɓá cámān á épah-ékombo yé Pɔ́nto, yé Galátia, yé Kapadóse, yé Ásia la yé Bitínia.

²Etāa Ɔlolómɛ̄ a pɔ́hɔ̄ ɓɛ́nɛ li oŋle la bisúghɛ́nɛ́ a nyɔŋɔ́ɔ́ ɔ́sū ví eceg. Li kele la M̀búl Mpúán, a ɓāg ɓɛ́nɛ á lí ɓɔŋ nɛ́ miní óglé Yésus Kilístus, la ki nɛ́ micii mɛ́ɛ́ mí má kómɓɛ mí púɛ́ ɓɛ́nɛ. Ndómbo Ɔlolómɛ̄ la nsaŋ bí ɓɛ́ la ɓɛ́nɛ nlohanɛ́!

³Eɓégɛ ɛ ɓɛ́ la Ɔlolómɛ̄, Ɛsáŋɛ́ a Ɛtáŋɛ wahá Yésus Kilístus. Átē a ŋgandag yɛɛ́ ekɔnan-ŋgɔ́ɔ́, ɔ ɓɔŋ nɛ́ bi byáá libyáa lí péná nɛ́ bi ɓɛ́la lipitá lí éniŋ, li kele la lipahye lí Yésus Kilístus á póla ɓá ɓá wū,

⁴ányúū embámbá yé ɛ́ ŋgá cɛ́ ɓé, yé ɛ́ ŋgá ɔ́gɔ ɓé lívīn, ndí tɔ li veŋghan lí épaa yɛ́ɛ́. A nāŋʼyé ɓɛ́nɛ yéŋ embámbá á lóō.

⁵Á ɓɛ́nɛ ɓá ŋguu Ɔlolómɛ̄ ɛ ŋga tát li kele la ŋyéɓé ányúū lisuŋga lí ŋga kɛ́ li ɛ́ni á lísūg lí eceg.

⁶Miní sophɛ́ɛ la mivag tɔ yá ɓɛ́ ja nɛ́, miceglan mí nyaa la nyaa míg yɔ̄ŋɓɛ ɓɛ́nɛ ányúū puh éceg,

⁷á lí ɓɔŋ nɛ́ míŋ miceglan mí étɛ ɔvega ví ŋyéɓé wáná. Góol ɛg lɔɓe, tɔ náŋ kaa bí ŋga vá yɔ á nzáan á lí yí kí nɛ́ ɛ lɛ taŋ. Nlemlem á jam nɛ́ bí ŋga li ɓɔ̄ŋ la ŋyéɓé wáná nyú á lɛ́ taŋ li loo lí nyíŋ góol, á lí ɓɔŋ nɛ́ miní kuh bíɓégɛ, lipém la adit eceg Yésus Kilístus a ŋga kɛ́ li étɛ lí nyúū yɛ́ɛ̄.

⁸Nyɔ́ Yésus maná diŋɛ, ɓɛ́nɛ ŋgi lí ɛ́n lí nyɛ, nyɔ́ Yésus miní ŋga yéɓe, nyɔ́ miníh ɛ́nɛ́g ɓé. Jɔ nɛ́, miní sophɛ́ɛ la mivag mí ŋgá man ɓé, la mí mí lípēm,

⁹la náŋ miníg kuh nsɛ́ŋ nyú á ŋyéɓé wáná. Nyúŋ nsɛ́ŋ nɛ́ a lɛ́ lísuŋga jé lí mimbúl máná.

¹⁰Ɓapɔ́tle-bí-Ɔ́lolómɛ̄ ɓá somo, bú wan ŋgandag, likɔlɓan la jéŋ lisuŋga, bú pɔ́t mam likɔlɓan la mikaale mí Ɔ́lolómɛ̄ mí a nāŋʼyénéé ɓɛ́nɛ.

¹¹Ɓáŋ ɓapɔ́tle-bí-Ɔ́lolómɛ̄ ɓá somó lí sɔ́ŋtánɛ á yɔɔ́yɔ́ɔ eceg la láá míŋ mam mí ŋga kɛ́ li ɓɔŋɓɛ, li oŋle kaa M̀búl á Kilístus nyɔ́ á ɓɛ́ɛ́ ɓɔ́ átē, a yíhɛ ɓɔ ɔ́sū ví éceg, bísɔghe Nyɔ́-a-Pɔ́hlɛ a ŋga kɛ́ li kuh la lipém lí ŋga kɛ́ li sɔ́ ámbúh bíŋ bisɔghe.

¹²Ɔlolómɛ̄ a yɛ́ɛ́léné ɓɔ nɛ́, nyíŋ pɔ́l bí ŋgí lɛ́gɛ ɛh ɓɛ́ɛ́ ɓé ányúū yaɓá ɓɔ́-mɛ̄n, ndí ɛ ɓɛ́ɛ́ ányúū yāná. Yɔ nɛ́, nyí vɔ́ŋɔ́ɔ, ɓalɛgɛ Pɔ́l M̀ɓɛɛŋ bí ŋga lɛ́gɛ ɓɛ́nɛ la ŋguu nyí M̀búl Mpúán nyɔ́ a sɔ́lé á lōó. Nyíŋ pɔ́l, áŋgɛl yɔ́-mɛ̄n ɛ́g somo yɔ lí yí.

¹³Jɔ́ nɛ́, ɓɛ́án pɛɛ, miní ɓoŋhán nsɔ́n, naŋʼyán mípitá máná á míkaale Ɔlolómɛ̄ a ŋga kɛ́ ɓɛ́nɛ li tíi á eceg Yésus Kilístus a ŋga kɛ́ ɓɛ́nɛ li étɛ lí nyɛ́-mɛ̄n.

¹⁴Kasig miní lɛ́ ɓɔ́ɔ̄n bí éōgle, miníh tiŋɓégé ɓé á kóó-ēɓé yáná yí éceg ɛ́ kwaŋ, eceg miní ɓɛ́ɛ́ ŋgí li yí lí jam.

¹⁵Ndí, nlemlem kaa nyɔ́ a yáŋá ɓɛ́nɛ a lɛ mpúán, ɓɛ́nɛ ki miní yáan ɓapúán á miɓɔŋɔg máná mísɛ,

¹⁶ányúū nɛ́ yá ciiɓɛ́ nɛ: «Ɓɛ́án ɓápūán, átɔm nɛ́ mi lɛ mpúán.»

¹⁷Kasig miní ŋga yáŋa joó lí Etāa á míkánɛ, nyɔ́ ah byɛ́ɛ́ ɓé ndɔ́tlán tɔ ya, nyɔ́ a ŋga kááhɛ mut sig li oŋle la miɓɔŋɔg mɛ́ɛ́, kɔnán hɔ́ Ɔlolómɛ̄ wōŋ á míɓɔŋɔg máná eceg ɛ́sɛ miní ŋga nīŋ á ŋkɔŋ-á-sí.

¹⁸Kasig miní ŋga yí nɛ́ ah la byoóm bí ŋga lɔ́ɓe ɓé, kaa góol tɔ sílba nɛ́ maná kɔplɛ́ á m̀ɓé a eniŋ yé maná kotó á yóg ɓasɔ́ŋɛ́ ɓáná,

¹⁹ndí, maná kɔplɛ́ la taŋ micii mí Nyɔ́-a-Pɔ́hlɛ, mí mí lɛ́ ákaa micii mí mɔɔ́n ntómbɛ́ á ŋgíla elɛ́m tɔ ɔnɛ́g.

²⁰Nyɔ́-a-Pɔ́hlɛ nɛ́ Ɔlolómɛ̄ a pɔ́hɔ sɔ́kágánɛ́ ag veg ŋkɔŋ-á-sí, ɔ ɓɔ̄ŋ nɛ a yílɛ̄ á mísūg mí eceg ányúū m̀ɓɛɛŋ wáná.

²¹Li kele la nyɛ́ nɛ́ miní ŋga yéɓe la Ɔlolómɛ̄, nyɛ́ nɛ́ a pāhyɛ́ nyɛ á póla ɓá ɓá wū, la nyɛ́ ɔ tí nyɛ lipém, nyaa nyí ɛ lɛ̄ nɛ́ máná nāŋʼyéné ŋyéɓé wáná la lipitá jáná la Ɔlolómɛ̄.

²²Kasig maná óglé mbálɛ, maná púɛ́ mímbūl máná, á lí wɛɛhɛnɛ á édiŋ línyaŋ yé ŋgíla ɔtaɓa. Miní diŋán ɓɛ́nɛ la ɓɛ́nɛ la m̀mím á ŋga púú ɛ́h ɓɛ́ lí tɔmb.

²³Ɓɛ́nɛ ɓá maná byáá libyáa lí péná, ah la mbóó nyí ɛ ŋga lɔ́ɓe ɓé, ndí nyí ɛ ŋga ɓéem, nyí ɛ lɛ̄ éɓaŋgá éniŋ ɛ́ Ɔ́lolómɛ̄ yé ɔ́lɔ̄ sig.

²⁴Átɔm nɛ́, mut-a-binam sig a lɛ kaa ekáá, lipém jɛ́ɛ́ ki ákaa mbonji nyí ekáá, kí ékāā yá wú, mbonji yɛ́ɛ̄ ɛg ɓɛ́han,

²⁵ndí eɓaŋgá ɛ́ Nyɔ́ŋ-Ɛsáŋɛ́ ɛg tɔɔ á éɓem la eɓem. Yéŋ eɓaŋgá nɛ ɛ́ lɛ́ Pɔ́l M̀ɓɛɛŋ nyí ɓá lɛ̄gɛ́ ɓɛ́nɛ.