Read Bakoko Pétlos 1 2 Bible Online

Pétlos 1 2 - Bakoko bible

Pétlos 1 2

¹Mwahánɛ̄ hɔ́ m̀ɓé-a-m̀mím la micaŋg, ɔtaɓa, etáman la misɔgáan.

²Kaa mikɛ́gá mí ɓɔ́ɔ̄n mí byɛ́ɛ̄ kóó minyámíndím, ɓɛ́nɛ ki ɓɛ́án la kóó eɓaŋgá Ɔlolómɛ̄ yé ɛ́ lɛ́ taŋ minyámíndím, á li ɓɔŋ nɛ́ li kele la mɔ́ miní nāŋ ányúū lisuŋga,

³ánsī nɛ maná cegé, munú ógtán nɛ́ Nyɔ́ŋ-Ɛsáŋɛ́ a lɛ m̀ɓɛɛŋ.

⁴Siŋglán nyɛ́ ɓɛ́ɓɛ, nyɛ́ nɛ́ a lɛ ŋgɔg eniŋ nyí ɓot ɓá ɓen, ndí nyí ya pɔ̄hlɛ, yu ɓɛ́ ki taŋ ɔ́sū ví Ɔlolómɛ̄.

⁵Ɓɛ́nɛ-mɛ̄n ɓɛ́án kaa ŋgɔg yí éniŋ, níŋglán á mióŋ mí ndáá ápah M̀búl a ŋga tɔ́ɓene, á lí yaan lí lilómɛ lipúán jé lí ɓatíi-nsúlé, á lí tíi lí misúlé mipúán, mí ŋga nyɛ́ɛle Ɔlolómɛ̄ li kele la Yésus Kilístus.

⁶Ákaa ɛ́sɛ, Licii-Lipúán líg laga nɛ́: «Leɓyáŋ sig ma pɔ́hɔ̄ taŋ ŋgɔg nyí mi ŋga kɛ́ li ɓɛl kaa ŋgɔg nyí likáh lí ndáá á Síon. Nyɔ́ la nyɔ́ a ŋga nāŋʼye yɔ lipitá a ŋgá kɛ ɓé lí kɔn lí mbɔɔla.

⁷Á ɓɛ́nɛ ɓot bí ŋyéɓé, nyíŋ ŋgɔg ɛ lɛ ɓɛ́nɛ nsɛ́ŋ ŋgándag, ndí ányúū ɓot bí ŋgíla ŋyéɓé, ŋgɔg nyí ɓaóŋ-ndáá ɓá ɓen, yɔ nɛ́ ya tímān lí ɓɛgɛ lí ndáá.»

⁸Á epah etám, bíg laga ki nɛ́: «Ɛ lɛ̄ ŋgɔg ɔɓag, ŋgɔg nyí ɛ ŋga ɓɛ́h ɓot.» Bíg ɓomtan yɔ ányúū nɛ ɓá pún lí yéɓe lí eɓaŋgá Ɔ́lolómɛ̄, náŋ nɛ́ yá tɛ́ɛ́ɓɛ́ ányúū yáɓá.

⁹Ndí, ɓɛ́nɛ miní lɛ́ mbota Ɔlolómɛ̄ a pɔ́hɔ, lilómɛ lí ɓatíi-nsúlé lí káísa, ndog-Ɔlolómɛ̄ nyí púán, lilóm jé Ɔlolómɛ̄ a pɔ́hɔ á li ɓɔŋ nɛ́ miní lɛ̄gɛ́ mam micɛ́ŋ a ɓɔ̄ŋ; nyɛ́ nɛ́ a yáŋá ɓɛ́nɛ nɛ́ miní ɓógó á lívito, á lí níŋgi á taŋ yɛɛ́ mipúú.

¹⁰Á kwakwáŋɛ, miníh ɓɛ́ɛ́ ɓé lilóm lí Ɔlolómɛ̄, ndí nyí lɛn, maná timan lilóm jɛ́ɛ́, ɓɛ́nɛ ɓá miníh ɓɛ́ɛ́la ɓé ékɔnan-ŋgɔ́ɔ́ yɛ́ɛ́, nyí lɛn, maná kūh yɔ.

¹¹Á élōgyāŋ yé ediŋ, mag sɔ́hye ɓɛ́nɛ nɛ́, ákaa ɓaloo-nzen, la ɓacɛn-bí-ɓot, miní nɛ́ŋɛ̄ la kóó-míson yí ɛ́ ŋgá dúhɛ m̀búl á mut-a-binam.

¹²Ɓɛ́án la bilɛ́m bílāām á póla ɓot bí ŋgá yéɓé ɓé la Ɔlolómɛ̄, á li somo nɛ́, tɔ ɓɔŋ nɛ́ bíg ɓéeyɛ ɓɛ́nɛ nɛ́ miní lɛ́ ɓot ɓaɓé, bí ɛ́n miɓɔŋɔg máná mílāām, la ɓɔ́ bí ɓégɛ́ Ɔlolómɛ̄ ɔlɔ́ a ŋga kɛ́ li sɔ́.

¹³Á joó lí Nyɔ́ŋ-Ɛsáŋɛ́, ɓɛ́án á sí joó nɛ ŋ̀kanʼyɛ á lɛ á ŋkɔŋ-á-sí, ɛ́ ɓɛ́ káísa nyɔ́ a byɛ́ɛ̄ ekanʼyɛ ɛ́sɛ,

¹⁴ɛ́ ɓɛ́ mígɔ́mna micɛ́ŋ mí a tí ŋguu á li kɔ́ghɛ lí ɓáɓɔŋ-miɓé la li ségɛ lí ɓáɓɔŋ-m̀ɓɛɛŋ.

¹⁵Ákaa ɛ́sɛ, nsom á Ɔlolómɛ̄ á lɛ́ nɛ́, miní ɓɔ̄ŋ m̀ɓɛɛŋ, á lí somo nɛ́ miní leg minyu mí bíjōŋ-bí-ɓot ɓá bí ŋgá sɔ́ŋtánɛ ɓé.

¹⁶Niŋán kaa kundɛ-ɓōt, ɛ́h ɓɛ́ ɓé li ɓɔŋle lí nyíŋ kundɛ kaa ecéŋka á lí sɔɔ lí m̀mím-ɓé wáná, ndí ɓɔŋán mam kaa ɓaɓɔŋle bí Ɔ́lolómɛ̄.

¹⁷Tíán ɓot bísɛ adit, diŋán elōgétāŋ yáná, kɔnán Ɔlolómɛ̄ woŋ, tíán káísa adit.

¹⁸Á ɓaɓɔŋle, ɓɛ́án á sí ɓasɔ́ŋɛ́ ɓáná bí nsɔ́n, miní tí ɓɔ́ ŋgandag adit. Ah ɓá ɓɔ́-ntámɛ́ ɓé bí lɛ́ bílɔ̄ŋgɔ la nsaŋ, ndí la ɓá ki bí lɛ́ míkat.

¹⁹Ákaa ɛ́sɛ, li ɔ́hánɛ lí bísɔghe mut a ŋga kūh ányúū tɔ jam á lí tíi lí Ɔ́lolómɛ̄ lípēm, nɛ̄ lí lɛ́ líkaale Ɔlolómɛ̄ a ŋga tíi nyɛ́.

²⁰Á mbálɛ, wɔɔ́wɔ́ɔ adit mut a byɛ́ɛ̄ á lí ɔ́hánɛ lí áso kí ɔ ɓɔ̄ŋ aɓé é? Ndí kíyáɓɛ́nɛ maná mánɛ́ lí ɓɔŋ lí m̀ɓɛɛŋ ndí máná ɔ́hánɛ́ áso, náŋ a lɛ likaale ɔ́sū ví Ɔlolómɛ̄.

²¹Ányúū náŋ nɛ́ maná yáŋlɛ, átɔm nɛ́ Nyɔ́-a-Pɔ́hlɛ nyɛ́g a sɔ̄ghe ányúū yáná, la nyɛ́ ɔ yíglé ɓɛ́nɛ náŋ kaa ndembye á li ɓɔŋ nɛ́ miní oŋlé míkoo mɛ́ɛ́.

²²Nyɛ́, mut āh ɓɔŋ ɓé aɓé tɔ wá, anyu wɛ́ɛ́ ki wáh pɔ́t ɓé mínaa.

²³Nyɛ́ mut ɓá óŋo, ah timanɛ ɓé lióó tɔ já, átē á esɔghe yɛ́ɛ́ āh pɔ́t ɓé mut eɓaŋgá éɓē, ndí a ŋgí tíi jā ndag la Ɔlolómɛ̄ nyɔ́ a lɛ ŋ̀kááhɛ a tɛ́ɛ́ sim.

²⁴Nyɛ́ nɛ́ a ɓɛ́gɛ̄ aɓé wáhá á nyúū yɛ́ɛ̄ á loó lí mbásá, á li ɓɔŋ nɛ́ bih ɓɛ́ɛ́g ɓé pɛ á sí likanʼyɛ lí áɓē, ndí bi nīŋ eniŋ ɛ́ tɛ́ɛ́ sim. Mbála yɛ́ɛ́ yá tɔ́ɔyɛ́ ɓɛ́nɛ mbólí.

²⁵Ákaa ɛ́sɛ, miní mɓɛ́ mijáŋag kaa mítōmbɛ́, ndí nyí vɔ́ŋɔ́ɔ maná timán á mbóg m̀wɛɛla la ǹtát mímbūl máná.