Read Bakoko Yohánɛs 3 1 Bible Online

Yohánɛs 3 1 - Bakoko bible

Yohánɛs 3 1

¹Á Gáyus nyɔ́ a ediŋ, ma ǹcɛ́ŋ á eɓasɛ, mag ciile wā, wa nyɔ́ mi ŋga dīŋ ediŋ ɛ́ mbálɛ.

²Á édidíŋɛ yáma Gáyus, miɔ́ŋɔ máma mi lɛ́ nɛ́ mam mɔ́ɔ mísɛ mí wɛɛ m̀ɓɛɛŋ, ɔ ɓɛ́la mbólí-nyuú, nlemlem kaa m̀búl wɔ́ɔ a lɛ́ mbólí.

³Ákaa ɛ́sɛ, ma kɔ̄n mivag ŋgandag nɛ́, eceg ndog yahá yá pám mú, yá tí mbóŋ élāām nyí eniŋ yɔ́ɔ; ányúū nɛ ɔg wɛɛhɛnɛ á mbálɛ.

⁴Jam lí ŋga lóohan ma lí kɔnɛ lí mivag li lɛ́ nɛ́ ma ámble nɛ́ ɓɔɔ́n ɓáma bíg wɛɛhɛnɛ á mbálɛ.

⁵Á édidíŋɛ yáma Gáyus, átē á ŋyéɓé wɔ́ɔ, ɔg nyɔ̄ŋ eceg la yéŋé elōgétāŋ, tɔ náŋ ákaa bí lɛ́ ɓacɛn-bí-ɓot.

⁶Ɓá tí mbóŋ nyí ediŋ yɔ́ɔ ɔ́sū ví Éɓasɛ, mag sɔ́hye wa nɛ́ ɔ óŋgánɛ ɓɔ́ li kɛla lí duwɛ jáɓá ɔ́sū á nyaa ɛ ŋga nyɛ́ɛle Ɔlolómɛ̄.

⁷Ákaa ɛ́sɛ, ányúū jóō lí Kilístus nɛ́ ɓá nyɔ̄ŋ duwɛ ɛ́h ɓɛ́ ɓé ɓɔ́ li ɓāt lí ɓot ɓáh yéɓé ɓé la Ɔlolómɛ̄ jam tɔ já.

⁸Ɓɛ́hɛ hɔ́, biíg nyɛɛ li nit lí nyíŋ nyaa ɓōt, á lí ɓɔŋ nɛ́ ɓɛ́hɛ ki bi óŋgánɛ á li camanɛ lí mbálɛ elɔŋ la ɓɔ́.

⁹Ma cíilé éɓasɛ mɔ́ɔ̄n káati, ndí Diotɛ́lɛ́fe nyɔ́ a ŋga díiŋ li tɛ́lɛ ɔ́sū á jam sig, ag pún lí yéɓe lí yé bi ŋga lága.

¹⁰Jɔ́ nɛ́, eceg mi ŋga kɛ́ li sɔ́ wóŋ, mag kɛ li yɛ́lɛ́ lí míɓɔŋɔg mɛ́ɛ́, nyɛ́ mut a ŋga pɔ́t aɓé likɔlɓan la ɓɛ́hɛ. Kasig náŋ ah kɔ́ɔ́ ɓé, nyɛ́-mɛ̄n a pún lí kale lí yéŋé elōgétāŋ yáhá, ag púnɛ ki ɓot ɓatám lí kale lí ɓɔ, nyɛ́ ag duhu ɓɔ́ á Éɓasɛ.

¹¹Á édidíŋɛ yáma Gáyus, ɔh nyɔŋlégé ɓé ɔ́vega á jam liɓé, ndí nyɔŋlé ɔ́vega á jam lí m̀ɓɛɛŋ. Nyɔ́ la nyɔ́ a ŋga ɓɔ̄ŋ m̀ɓɛɛŋ a lɛ la Ɔlolómɛ̄, ndí nyɔ́ la nyɔ́ a ŋga ɓɔŋ aɓé áh yí ɓé Ɔlolómɛ̄.

¹²Á yé ɛ́ ŋga légɓe Demetílius, ɓot bísɛ bíg tíi nyɛ́ mbóŋ élāām. Mbálɛ yɔ-mɛn ɛg tí mbóŋ yɛ́ɛ̄, ɓɛ́hɛ ki biíg tíi nyɛ́ mbóŋ élāām, la ki nɛ́ wā-mɛ̄n ɔg yí nɛ́ mbóŋ yāhá ɛ lɛ mbálɛ.

¹³Mi ŋgí byɛ́ɛ́ pɛ mam ŋgandag á lí laga lí wa, ndí mi ŋgá somo ɓé ma mɔ́ lí cii la esáó yé tíŋtɛ,

¹⁴átɔm nɛ́ mi byɛ́ɛ́ lipitá nɛ́ biíg kɛ li ɛ́nan lí puh eceg, váŋ biíg kɛ́ li máŋa á mbɔm la mbɔm.

¹⁵Nsaŋ a ɓɛ́ la wa! Miwándá mí mú míg tama wa, wág támá líwāndá sig wóŋ tóɓó-tóɓó.