Read Bakoko Biyɛ́ɛ́léné 10 Bible Online

Biyɛ́ɛ́léné 10 - Bakoko bible

Biyɛ́ɛ́léné 10

¹La ma Yohánɛs mu ɛ́n mbimban áŋgɛl etám nyí ɛ ŋgí sɔ́le á lóō; mbaga yu díí yɔ ákaa mbɔ́tí, ǹdum a ɓɛ́ɛ́ nyɛ́ á lóō lí m̀mú ɔ́ŋgɛn ɔtot, asú wɛ́ɛ́ á ŋgí paa ákaa vaŋgá, mikoo mɛ́ɛ́ mí ɓɛ́ɛ́ ákaa mikɔŋgɔ mí nzáan.

²Ɛ ɓɛ́ɛ́ ɛ byɛ́ɛ mɔɔ́n kálati a áhɛ́ á wɔ wɛ́ɛ́; Yu tɛ́ɛ́yɛ́ ákoo wɛ́ɛ́ á m̀ɓɛ́nlómɛ á lóō lí túwɛ, nyú á m̀ɓɛ́ŋgáa ki á sí.

³La yɔ yu tɛ́ɛ́ nlón ákaa ŋgíla nɛ́ ɛ ŋga ɓām. Ɛnɛ́ ya tɛ́ɛ́ nlón, mbámká nzambúwá yí mbambat yú ámblɛ.

⁴Eceg mbámká nzambúwá yí mbambat yá ámblɛ́, mu sōmó lí cii, la ma mu ámblé cíŋ ya sɔ́lé á lóō ɛg laga ma nɛ́: «Sɔɔ́ njɛn á yí mbámká nzambúwá yí mbambat, ɔh ciíg ɓé wɔ.»

⁵Váŋ nɛ́ nyí áŋgɛl ma ɛ́n bítɛ́tɛ́lí á lóō lí túwɛ la á sí ya ɓétɛ́ wɔ á m̀ɓɛ́nlómɛ á lóō

⁶yu kān-sɔŋ, á jóō lí Ɔ́lolómɛ̄ nyɔ́ a ŋga nīŋ á éɓem la eɓem, nyɔ́ a vēg lóō la yé ɛ́sɛ ɛ́ lɛ́ átē, nyɔ́ a vēg sí la yé ɛ́sɛ ɛ́ lɛ́ átē, nyɔ́ a vēg túwɛ la yé ɛ́sɛ ɛ́ lɛ́ até; yu yó nɛ: «Eceg ɛ́ sē ɓé pɛ.»

⁷Ndí, eceg bí ɓɛ́ bíg ámble áŋgɛl ya yáhɛ́ nzambúwá, ɛg ɔ́ŋ nséɓá, váŋ nɛ́ mbaŋ Ɔlolómɛ̄ ɛ ŋga kɛ́ li yɛ́ɛ́lɛ, ákaa a lɛgléé ɓaɓɔŋle ɓɛ́ɛ́ bí lɛ́ ɓápɔ́tle-bí-Ɔ́lolómɛ̄.

⁸Váŋ nɛ́ cíŋ mi ámbléé ɛg sɔ́le á lóō ya yó sīg-pɛ ma nɛ́: «Kɛɛ́n, nyɔ̄ŋ nyíŋ kálati ɛ áhɛ́ á wɔ á áŋgɛl nyí ɛ tɛ́ɛ́ á lóō lí túwɛ la á sí.»

⁹Mu sīŋglé ɔ́sū ví áŋgɛl, mu sɔ́hye yɔ nɛ́ ɛ tí ma nyɔ́ŋ mɔɔ́n kálati. Yu lága ma nɛ́: «Nyɔ̄ŋ kálati, dí yɔ. Ɛg ɓɛ́ ɛg díglan wa á líbum, ndí átē á anyu wɔ́ɔ, ɛg ɓɛ́ lɛ̄ɛ́-lɛ̄ɛ́ kaa weé.»

¹⁰Mu nyɔ̄ŋ mɔɔ́n kálati á wɔ á áŋgɛl, la má mu dí yɔ. Ɛ ɓɛ́ɛ́ lɛ̄ɛ́-lɛ̄ɛ́ kaa weé átē á anyu wáma; Ndí ɛnɛ́ ma dí yɔ, libum lú díglán ma.

¹¹Váŋ nɛ́ ɓá lagá ma nɛ́: «Ɛ́g somlɛ wa nɛ́ ɔ kóndyé lí yíhɛ lí mílōm, bikombo, mipɔ́t la ŋgandag káísa, yé Ɔ́lolómɛ̄ a yíhɛ́ ɔ́sū ví eceg.»