Read Bakoko Biyɛ́ɛ́léné 11 Bible Online

Biyɛ́ɛ́léné 11 - Bakoko bible

Biyɛ́ɛ́léné 11

¹Váŋ nɛ́ ɓá tí ma líkāā li ŋga púnan la enjéŋ bí ŋga nyɔ̄ŋle avega, bú lagá ma nɛ́: «Tɛ́lɛ, nyɔ̄ŋ avega á Ndáá-ēcɛ́ŋ-Ɔlolómɛ̄ la etága-nsúlé, ɔ nyɔ̄ŋ ki nsɔŋgí á ɓot bi ŋga ɓégɛ múŋ.

²Ndí, mwahɛ́ m̀mím-átān á ndáá-ēcɛ́ŋ-Ɔlolómɛ̄ nyú á ápūū, ɔh vegég ɓé wɔ̄, ányúū nɛ ɓá mwahlé wɔ ɓot bíh byɛ́ɛ́ ɓé ŋyéɓé la Ɔlolómɛ̄. Bíg kɛ́ li lɔɔ lí tísɔn púán la nzóó, náŋ muúmínáa mí sóŋ la ɛ́ɓáa.

³Mág ma kɛ li óm lí mbóŋ yáma ɛ́ɓáa yí jáhɛ́ mipég á lí étɛ nɛ́ ɛ́ lɛ́ á li wú, nɛ́ bí yíhɛ mam mí Ɔlolómɛ̄ mí ŋga kɛ́ li sɔ́; náŋ ag kɛ li ɓem lí ɔkóó la biɓógo bíɓáa la muúmísáama mí alɔ́.

⁴Yíŋ mbóŋ ɛ́ɓáa ɛ lɛ́ tín olíva ɛ́ɓáa la bitúlkáŋ bíɓáa bí tɛ́ɛ́ á ɔ́sū ví Nyɔ́ŋ-Ɛsáŋɛ́ a ŋkɔŋ-á-sí.

⁵Kíyáɓɛ́nɛ mut ag somo yɔ́ li teeŋgɛ, a yí nɛ́ nzáan ya ɛg kɛ́ li pám á anyu wáɓá la yɔ ɛ ól ɓalem ɓáɓá. Ɔɔ, kíyáɓɛ́nɛ mut aá ŋga somo yɔ́ li teeŋgɛ, náŋ nɛ́ a ŋga kɛ́ li wú.

⁶Yíŋ mbóŋ ɛ́ byɛ́ɛ́ ŋguu li leg lí lóō á li ɓɔŋ nɛ́ mbeŋ ɛh nɔ́ɔ́g ɓé eceg ɛ́sɛ ɛ́ ɓɛ́ ɛ́g yíhɛ mam mí Ɔlolómɛ̄ mí ŋga kɛ́ li sɔ́. Ɛ́ byɛ́ɛ́ ŋguu li yaanɛ lí mindím mícii la li óm lí nyaa la nyaa bisɔghe á ŋkɔŋ-á-sí ákaa ɛ́ ŋga díiŋ.

⁷Ndí eceg ɛ́ ŋga kɛ́ li manɛ lí li tíi lí mbóŋ yaɓá, tít nyí ŋga pámléne á eɓél-écɛ̄hɛ ɛg kɛ yɔ́ lí duhɛ, ɛg dí yíŋ mbóŋ cíŋ la yɔ ɛ ól yɔ́.

⁸Mimbim máɓá míg ɓɛ́ mí náŋɛ á voóm á m̀ɓambá, á tísɔn ecɛ́ŋ nyí ya kūh jóō múŋ á yéŋ eceg nɛ́ ‹Sódom› la ‹Egípto›, ápah Ɛtáŋɛ wáɓá a tōmlɛ́ɛ á mbásá.

⁹Ɓot bí milóm, ɓá bí mílōmɛ, ɓá bí mípɔ̄t la ɓá bí bíkombo bíg ɓɛ́ bíg loole li légɓé lí mímbim máɓá alɔ́ áŋháa la epah ɛ́h ɓɛ́ ɓé lí yéɓé nɛ́ bí jé ɓɔ́.

¹⁰Ɓatɔɓene bí ŋkɔŋ-á-sí bíg kɛ li kɔn lí mívag ányúū nyɛmb yaɓá; bíg kɛ li ɓɔŋ li ŋgand, la li tíélan lí mikaale átɔm nɛ́ ɓáŋ ɓapɔ́tle-bí-Ɔ́lolómɛ̄ bíɓáa ɓá tí ɓɔ také ŋgandag.

¹¹Ndí ámbúh nyúŋ alɔ́ áŋháa la epah, mvɛɛɓan á éniŋ nyú á ŋga sɔ́léne la Ɔlolómɛ̄ ág kɛ li níŋgi á nyúū yáɓá la ɓɔ́ bí tɛ́lɛ́.» La náŋ, ɓot bí légɓéé ɓɔ́ bú nát la wóŋ.

¹²Yíŋ mbóŋ yú ámblé cíŋ ecɛ́ŋ nyí ɛ ŋgí sɔ́léne á lóō ɛg laga nɛ́: «Ɓétán mú!» La ɓɔ́ bú ɓét á lóō átē á mbaga á miíh mí ɓalem ɓáɓá.

¹³Á nlemlem á eceg, sí yu póghán taŋ-taŋ, epah ɛ́ tísɔn yá átē á jóom yú mūglan, la akóó á ɓot nzambúwá wú wú múŋ á jéŋ libúmbé. Ɓot bí véé nyɛmb bú kɔɔ́n woŋ la ɓɔ́ bú ɓégɛ́ Ɔlolómɛ̄ a lɛ á lóō.

¹⁴Náŋ nɛ́ eɓéé-nyúū yá yáhɛ́ bíɓáa ɛ́ ŋga loo; ndí eɓéé-nyúū yá yáhɛ bíŋháa ɛ́g sɔ́ puh eceg.

¹⁵Ɛnɛ́ áŋgɛl ya yáhɛ́ nzambúwá ya ɔ́ŋ nséɓá wɛ́ɛ́; cíŋ ecɛ́ŋ yú sɔ́le á lóō yú lága nɛ́: «Nyí vɔ́ŋɔ́ɔ likanʼyɛ lí ŋkɔŋ-á-sí la timan jé lí Ɛtáŋɛ wahá la jé lí Nyɔ́-a-Pɔ́hlɛ; ag kɛ li kanʼyɛ á éɓem la á éɓem.»

¹⁶Mí muúmɓáa mí ɓácɛ̄ŋ bí ékombo-lóō la bínáa bí ɓɛ́ɛ́ á bitɔɓé-bí-líkanʼyɛ byáɓá á ɔsú ví Ɔlolómɛ̄, bú úm míɓɔ̄ŋ, mbɔm ɛ́g cág á sí bú ɓégɛ́ Ɔlolómɛ̄

¹⁷bíg yó nɛ́: «Biíg tíi wa mítamlan á Ɛtáŋɛ Ɔlolómɛ̄ nyɔ́ a Ŋguu-mísɛ, nyɔ́ a ɓɛ́ɛ́ la nyɔ́ a lɛ, átɔm nɛ́, wa ɓɔ̄ŋlé ŋguu yɔɔ ecɛ́ŋ la wá wu tɔ́ɔyɛ́ likanʼyɛ jɔ́ɔ.

¹⁸Ɓot bí bikombo bísɛ ɓá ála ndí ɔún vɔ́ɔ nɛ́ vá ɛ́ni; eceg yɔ́ɔ lí kááhɛ lí ɓot ɓá wú yé, eceg yɔ́ɔ lí tíi li ɓaɓɔŋle ɓɔ́ɔ nsála yé, ɓá bí lɛ́ ɓápɔ́tle-bí-Ɔ́lolómɛ̄, ndog-Ɔlolómɛ̄ la ɓá bí ŋga kɔn joó jɔ́ɔ woŋ, ɓatɔ́ga la ɓacɛ́ŋ; eceg yɔ́ɔ lí ól lí ɓálɔɔ ŋkɔŋ-á-sí yé.»

¹⁹Ɛnɛ́ ndáá-ēcɛ́ŋ-Ɔlolómɛ̄ nyí ɛ lɛ á lóō ya léglan la ŋkúú á ésaa-líat wú ɛ́ni múŋ á nyíŋ ndáá-ēcɛ́ŋ-Ɔlolómɛ̄; váŋ nɛ́ lóō lá mwɛg, cíŋ yú lón, mbambat yú ɓām, sí yu póghan la mitámŋga mú ɓɛ́hán ŋgándag.