Read Bakoko Biyɛ́ɛ́léné 13 Bible Online

Biyɛ́ɛ́léné 13 - Bakoko bible

Biyɛ́ɛ́léné 13

¹Váŋ nɛ́ ma Yohánɛs ma ɛ́n tít nyí jóom lí míɓēg[7] la mimú nzambúwá ɛg pámle á túwɛ. M̀ɓég sig a byɛ́ɛ̄ ɔtot, m̀mú sig ki á byɛ́ɛ joó bí ŋga vɔ́ɔ́léne Ɔlolómɛ̄.

²Tít mi ɛ́nɛ́ɛ́ ɛ ŋgí punan la nzɛ, miɓɔ mɛ́ɛ́ mí ɓɛ́ɛ́ ákaa miɓɔ mí patí eŋgágáŋ yé éyoo wá[8]; anyu wɛ́ɛ́ á ŋgí punan la anyu á ŋgíla. Nyuŋgu yu tí nyíŋ tít ŋguu yɛ́ɛ̄, yu tí ki yɔ etɔɓé-líkanʼyɛ yɛ́ɛ́ la likanʼyɛ licɛ́ŋ jɛ́ɛ́.

³M̀mú wɛ́ɛ́ wá á ɓɛ́ɛ́la ekwɛɛ yé ŋgí la yɔ li ól, ndí yéŋ ekwɛɛ yɛ́ɛ́ yú man. Ŋkɔŋ-á-sí ásɛ wú mɛmɛ nyíŋ tít, wú ōŋ yɔ.

⁴Ɓot bísɛ bú ɓégɛ́ nyuŋgu ányúū nɛ ɛ tíéé tít likanʼyɛ jɛ́ɛ́; ámbúh náŋ, bú ɓégɛ́ tít bíg laga nɛ́: «Nzáá a byɛ́ɛ̄ ŋguu ákaa nyí tít é? Nzáá a ŋga lá yɔ li duhɛ é?»

⁵Bú tí tít kundɛ li pɔ́t lí bíɓaŋgá bí kúmba la bí bí ŋga vɔ́ɔ́le Ɔlolómɛ̄; la yɔ yu kūh likanʼyɛ ányúū muúmínáa mí sóŋ la ɛ́ɓáa.

⁶Váŋ nɛ́ tít ya ɓágá ányu, yu vɔ́ɔ́lé Ɔlolómɛ̄, yu vɔ́ɔ́lé jóō jɛ́ɛ́, yu vɔ́ɔ́lé líndūm lipúán ápah Ɔlolómɛ̄ a lɛ, la ɓáŋ bísɛ bí ŋga tɔ́ɓene wóŋ a lóō.

⁷Bú tí tít kundɛ li duhɛ lí ndog-Ɔlolómɛ̄ wélan la li dí lí yɔ cíŋ, bu tí yɔ likanʼyɛ lí mílōmɛ mísɛ, milóm mísɛ, mipɔ́t mísɛ la bikombo bísɛ.

⁸Ɓot bí ŋkɔŋ-á-sí bíg kɛ yɔ li ɓégɛ, ɓá moó máh ciiɓɛ ɓé á kálati eniŋ li ɓotle á míɓōtlé mí ŋkɔŋ-á-sí; á kálati eniŋ nyí mɔɔ́n ntómbɛ́ ɓá ól.

⁹Nyɔ́ a byɛ́ɛ̄ miɔ́ɔ́, a ámblé!

¹⁰Nyɔ́ yá tɛ́ɛ́ɓɛ́ nɛ ag byelɓɛ á wélan, ag kɛ ja lí kɛ á m̀ɓog á wélan. Nyɔ́ yá tɛ́ɛ́ɓɛ́ nɛ ag kɛ li wú la mboná, mboná nɛ ɛ ŋga kɛ́ nyɛ́ lí ól. Jɔ́ hɔ́ nɛ, ndog-Ɔlolómɛ̄ ya nyɛ́ɛ lí ɓɛ́la lí eɔ́hánɛ la ŋyéɓé.

¹¹Váŋ nɛ́ ma ɛ́n sīg-pɛ tít etám ɛg pámléne á sí. Ɛ ɓɛ́ɛ́la míɓēg míɓáa ákaa mɔɔ́n ntómbɛ́, ndí ɛg pɔ́t ákaa nyuŋgu.

¹²Ɛ ɓɛ́ɛ́la ŋguu ɛsɛ̄ nyí tít ɔsú, á lí ɓɔŋ lí mam á jóō jɛ́ɛ́. Ɛ ŋgí kágyɛ ŋkɔŋ-á-sí la ɓatɔɓene ɓɛ́ɛ́ nɛ́ bí ɓégɛ́ nyíŋ tít ɔsú nyí ɛ ɓɛ́ɛ́la ekwɛɛ yé ŋgí la yɔ li ól ndí yú man.

¹³Nyíŋ tít ya yáhɛ́ ɛ́ɓáa, yu ɓɔ̄ŋ mínɛ́ŋ micɛ́ŋ, nɛ́-tɛ́ɛ yu ɓógtɛ́ nzáan á lóō, yu súhɛ̄ yɔ á sí ɔ́sū ví ɓot bí ŋkɔŋ-á-sí

¹⁴La nyíŋ tít yu yɛ́ɛ́ ɓot bí ŋkɔŋ-á-sí la ŋguu ɓá tí yɔ á li ɓɔŋ lí mínɛ́ŋ ɔ́sū ví tít ɔsú. Yu kágyɛ́ ɓɔ nɛ́ bí mɛ̄ njimbilí á épunan ɛ́ nyí tít ɛ byɛ́ɛ̄ ékwɛɛ ɛ́ ŋga lá yɔ li ól ndí yú mān á lí tíi lí yɔ adit.

¹⁵Tít ya yáhɛ́ ɛ́ɓáa yu kūh ŋguu li tíi lí nyíŋ njimbilí m̀búl á éniŋ á li ɓɔŋ nɛ́ ɛ lá li pɔ́t, la li ól lí ɓáŋ bísɛ bí ŋgá ɓégɛ ɓé njimbilí.

¹⁶Tít yu kágyɛ́ ɓot bísɛ: ɓatɔ́ga la ɓacɛ́ŋ, mimbyaŋ la ŋgɔ́ɔ́, miyɔ́ŋ la kundɛ, nɛ́ bí ɓɛ́la ndembye á wɔ á m̀ɓɛ́nlómɛ tɔ nɛ́ á mbɔm.

¹⁷La náŋ, mut tɔ wa a ŋga kɛ ɓé li sóm ndí tɔ li nuŋu, kíyáɓɛ́nɛ ah byɛ́ɛ́ ɓé ndembye nyí nyíŋ tít, joó jɛ́ɛ́ tɔ táŋga nyí ɛ ŋga kɛ́la joó jɛ́ɛ́.

¹⁸Eceg lí étɛ nɛ́ mut a sɔ́ŋtánɛ́ jam hɔ́ yé. Nyɔ́ a byɛɛ́ éyī, a yɛ́lɛ́ táŋga nyí ɛ ŋga étɛ joó lí nyíŋ tít, átɔm nɛ́ nyíŋ táŋga ɛ lɛ jóō lí mut. Nyíŋ táŋga ɛ lɛ hɔ́ ja: bíɓógo bísáama la muúmísáama la bísáama.