Read Bakoko Biyɛ́ɛ́léné 14 Bible Online

Biyɛ́ɛ́léné 14 - Bakoko bible

Biyɛ́ɛ́léné 14

¹La ma Yohánɛs mu ɛ́n, mɔɔ́n ntómbɛ́ a tɛ́ɛ á ɔ́kolá vícɛ̄ŋ ví Síon, elɔŋ la yé eɓógo ákōō la muúmínáa la ánáa yé ɓot. Mut sig múŋ á yéŋ elɔŋ a ɓɛ́ɛ́la joó lí mɔɔ́n ntómbɛ́ la jé lí Ɛsáŋɛ́ nciíg á mbɔm.

²La ma mu ámblé cíŋ ɛg sɔ́le á lóō, ákaa eduŋgú yé mínɔŋgɔ́ mí túwɛ, ákaa mbámká nyí mbambat, Cíŋ mi ŋgí ámble ɛ́ ɓɛ́ɛ́ ákaa yaá yé ɓálɔ́ŋgɛ-ŋgoso kí bíg kut andende wáɓá.

³Bí ŋgí lɔ́ŋgɛ ŋgoso péná, á ɔ́sū ví étɔɓé-líkanʼyɛ, ɔ́sū ví bíveglé bínáa la ɔ́sū ví ɓácɛ̄ŋ bí Ékombo-lóō. Ndí tɔ mut a ŋgí la ɓé lí yége lí nyíŋ ŋgoso, amáh sig yé eɓógo ákōō la muúmínáa la ɛ́náa yé ɓot ɛ́ sómɓɛ́ɛ la micii mí mɔɔ́n ntómbɛ́ á ŋkɔŋ-á-sí

⁴Ɓɔ́, bíh ɓɔ̄ŋɔ́ɔ ɓé mpuŋgú la ɓondígá, la náŋ, bí lɛ́ kɔ́njí. Ɓɔ́, bíg oŋ mɔɔ́n ntómbɛ́ tɔ véé á ŋga kɛ̄. Ɓɔ́ nɛ́ ɓá sómɓɛ́ la micii até á ɓot-bí-bínam, jɔ́ nɛ́ ɓá dúgu lí tíéɓɛ lí Ɔ́lolómɛ̄ la mɔɔ́n ntómbɛ́ ákaa mpumu ɔ́sū;

⁵la ki nɛ́ minyu máɓá mí ɓáág ŋgi lí pɔ́t lí mínaa; ɓáh kɔt ɓé ɓɔ ɔvuha tɔ vá.

⁶La ma mu ɛ́n sīg-pɛ áŋgɛl etám nyí ɛ ŋgí puple á lóō lóō. Ɛ ɓɛ́ɛ́la nɛ́ ɛ lɛ́gɛ́ ɓátɔɓene bí sí ɛsɛ̄ Pɔ́l M̀ɓɛɛŋ nyí eɓem: ɛ́ ɓɛ́ á mílōmɛ, á mílōm, á mípɔ̄t mísɛ la á bíkombo.

⁷Nyíŋ áŋgɛl ɛ ŋgí lɛgɛ la ŋguu nɛ́: «Kɔnán Ɔ́lolómɛ̄ woŋ, miní tí nyɛ́ lípēm átɔm nɛ́ eceg yá nyɛ́g, ŋgɛ́ŋ yɛ́ɛ̄ li kááhɛ ya kɔlan. Ɓéghánɛ m̀veg sí la lóō, túwɛ la ɓavoóm bísɛ mindím mí ŋga pámle.»

⁸Mu ɛ́n áŋgɛl etám, nyí ya yáhɛ́ ɛ́ɓáa, yu ōŋ nyí ɔsú yu lága nɛ: «Ya ɓɛ́han é! Ya ɓɛ́han é! Babílon ecɛ́ŋ ya ɓɛ́han, nyí ɛ ŋgí nyúhɛ bikombo bísɛ wáany yɛ́ɛ̄ nyí nlohanɛ́ a mpuŋgú.»

⁹Mu ɛ́n áŋgɛl etám nyí ya yáhɛ́ ɛ́ŋháa, yu ōŋ yíŋí ɛ́ɓáa, yu pɔ́t la ŋguu nɛ́: «Tɔ nzáá a ŋga ɓégɛ tít la edíŋgɛ́-díŋgɛ yɛ́ɛ́, ndí tɔ li ɓɛ́la lí ndembye yɛ́ɛ̄ á mbɔm tɔ á wɔ,

¹⁰nyɛ́g ag kɛ li nyú lí wáany nyí nlohanɛ́ a ɔún ví Ɔ́lolómɛ̄, nyí ɓá ɔlɔ́ á líɓondó lí ɔ́ūn vɛ́ɛ́, ɛ́h ɓɛ́ ɓé yɔ li puu; ag kɛ li kuh lí také até a nzáan la nzuhú, ɔ́sū ví áŋgɛl púán la ɔ́sū ví mɔɔ́n ntómbɛ́.

¹¹Víta ví nzáan ápah bí lɛ́ á také víg ɓét á éɓem la eɓem. Ɓot bí ŋga ɓégɛ tít ndí tɔ edíŋgɛ́-díŋgɛ yɛ́ɛ́, tɔ nɛ́ ɓá ɓɛ́la ndembye joó jɛ́ɛ́, bí ŋgá ɓɛ́la ɓé evɛɛɓan díɓe tɔ nzámuh.

¹²Jɔ́ nɛ́, eceg yé nɛ́ ndog-Ɔlolómɛ̄ bí ɓɛ́la m̀ɓán, bí náŋɛ̄ mbéndá yí Ɔ́lolómɛ̄, bí ɓɛ́la ki ŋyéɓé la Yésus.»

¹³La ma mú ámblé cíŋ ɛg sɔ́le á lóō ɛg laga nɛ́: cií nɛ́, «Nyí vɔ́ŋɔ́ɔ, misɔ́tá la ɓá bí ŋga wúēle até á ŋyéɓé á Nyɔ́ŋ-Ɛsáŋɛ́! M̀búl ag yó kɔɔ nɛ́, bí nyɔŋ evɛɛɓan yé misɔ́n máɓá, átɔm nɛ́ misɔ́n máɓá mí m̀ɓɛɛŋ, míg oŋ ɓɔ́.»

¹⁴Má Yohánɛs mu ɛ́n sīg-pɛ mbaga ɛ ŋga púú, ɛ́ ŋgí ɛ́ni ɔ́ŋgɛn mɔɔ́n mut nɛ́ a tɔ́ɔ̄ á lóō jɛ́ɛ́. A ɓɛ́ɛ́la ɔtot ví góol á m̀mú, la mikwátɛ a mpumu a ŋga vóó á wɔ.

¹⁵Ámbúh náŋ, áŋgɛl etám yu pámlé á ndáá-ēcɛ́ŋ-Ɔlolómɛ̄, la yɔ yú lága nyɔ́ a ɓɛ́ɛ́ a tɔ́ɔ̄ á lóō lí mbaga nɛ́: «Lɛŋgɛ́ mikwátɛ wɔ́ɔ a mpumu, ɔ púmú; ŋgɛ́ŋ mpumu ya kɔlan, átɔm nɛ́ mindíí mí ŋkɔŋ-á-sí má ólo.»

¹⁶Váŋ nɛ́ nyɔ́ a ɓɛ́ɛ́ a tɔ́ɔ̄ á lóō lí mbaga a lɛ̄ŋgɛ́ mikwátɛ wɛɛ́ a mpumu á ŋkɔŋ-á-sí, la mpumu wú ɓɔ̄ŋɓɛ́.

¹⁷Ámbúh náŋ, áŋgɛl etám yu pámlé á ndáá-ēcɛ́ŋ-Ɔlolómɛ̄ nyí ɛ lɛ á lóō, yɔg ɛ ɓɛ́ɛ́ ɛ byɛ́ɛ́ mikwátɛ a mpumu a ŋga vóó.

¹⁸Ámbúh nyíŋ, áŋgɛl etám yu pámlé á étága-nsúlé. Ɛ ɓɛ́ɛ́la ŋguu nyí li kanʼyɛ lí nzáan; yɔg yu lága nyí ɛ byɛ́ɛ̄ míkwátɛ a mpumu a ŋga vóó la cíŋ ŋguu nɛ́: «lɛŋgɛ́ nyɔ́ŋ mikwátɛ wɔɔ a mpumu, ɔ sɛ́m bisaŋ bí bínyɛŋgɛ́n bí wáany á míndīī mí ŋkɔŋ-á-sí, átɔm nɛ́ mitám mɛ́ɛ́ má ólo.»

¹⁹La áŋgɛl yu lɛ̄ŋgɛ́ míkwátɛ a mpumu wɛɛ́ á ŋkɔŋ-á-sí, yu sɛ́m bísaŋ bí bínyɛŋgɛ́n bí wáany á míndīī mí ŋkɔŋ-á-sí, yu lɔ́ŋɔ̄ mɔ á m̀ɓáláŋ á m̀ɓálá nyú ɔ́ūn ví Ɔ́lolómɛ̄.

²⁰Nyúŋ m̀ɓálá ápah bi wuuléné mítām mí bínyɛŋgɛ́n bí wáany á ɓɛ́ɛ́ á mɓagɓanɛ́ la tísɔn; la micii mú yál múŋ átē, mú sóɓe, mí ɓɛ́ɛ́la mbip nyí tól ya la epah, mú cámān jam-kaa biɓógo bí kílométa bíŋháa.