Read Bakoko Biyɛ́ɛ́léné 19 Bible Online

Biyɛ́ɛ́léné 19 - Bakoko bible

Biyɛ́ɛ́léné 19

¹Ámbúh náŋ, ma Yohánɛs mu ámblé ǹdumka ɔ́ŋgɛn eduŋgú yé límut licɛ́ŋ nɛ́ lí lɛ́ á lóō ndí líg laga nɛ́: «Alelúya[9] Lisuŋga, lipém la ŋguu bí ɓɛ́ la Ɔlolómɛ̄ wahá.

²Átɔm nɛ́ bikááhɛ́nɛ́ byɛ́ɛ́ bí lɛ́ mbálɛ, bí tɛ́ɛ́ ki sim. A kááhɛ́ míndīgá a ŋga kānʼyɛ akwala, nyɔ́ a ŋgí yɛ́ɛ ɓot bí ŋkɔŋ-á-sí la akwala wɛɛ́; Ɔlolómɛ̄ a kɔ́ghɛ́ nyɛ ányúū micii mí ɓáɓɔŋle ɓɛ́ɛ́, ndí nyúŋ aɓé ág timan la nyɛ́.»

³Jéŋ limut lú lága sīg-pɛ nɛ́: «Alelúya! Víta ví tísɔn ya nyɔ̄ŋ nzáan víg ɓét á éɓem la á éɓem.»

⁴Míŋ muúmɓáa mí ɓácɛ̄ŋ la bínáa la bí biveglé bínáa bú úlɓan á lí ɓégɛ lí Ɔlolómɛ̄ nyɔ́ a tɔɔ́ á étɔɓé-líkanʼyɛ ndí bíg laga nɛ́: «Ɛ́ ɓɛ́ náŋ, Alelúya!»

⁵Váŋ nɛ́ cíŋ ɛ sɔ́léé á étɔɓé-líkanʼyɛ yu laga nɛ́: «Ɓéghánɛ Ɔlolómɛ̄ wahá, ɓɛ́nɛ ɓaɓɔŋle ɓɛ́ɛ́ bísɛ, ɓatɔ́ga la ɓacɛ́ŋ, ɓɛ́nɛ ɓakɔn nyɛ́ woŋ.»

⁶La ma mu ámblé ǹdumka ɔ́ŋgɛn eduŋgú yé límut licɛ́ŋ, yéŋ eduŋgú ɛ ɓɛ́ɛ́ ákaa eduŋgú mínɔŋgɔ́ mí túwɛ, la ákaa mbámká yí mbambat kí ɛ́g kóndo; ɛ́g laga nɛ́: «Alelúya! Átɔm nɛ́, Ɛtáŋɛ Ɔlolómɛ̄ wāhá a Ŋguu-mísɛ a étɛ́ Líkanʼyɛ jɛ́ɛ́.

⁷Bi sóphɛ́ɛ, bi ɓɛ́ até á mivag, bi tí nyɛ́ lipém, átɔm nɛ́ eceg ɛ́ ŋgand aúg ɛ́ mɔɔ́n ntómbɛ́ yé! Ŋ̀gáá wɛ́ɛ̄ a súgɛ́ m̀ɓoŋhanɛ́.»

⁸Ɓá tí nyɛ taŋ liɓato lí vɛ́lvɛ́ti lí ŋga púú nɛ́ pɛ́ŋ nɛ́ a jāl, jé lí ŋgíla ɔnɛ́g; átɔm nɛ́ nyíŋ vɛ́lvɛ́ti nɛ́ ɛ lɛ́ misɔ́n miɓɛɛŋ mí ndog-Ɔlolómɛ̄.

⁹Váŋ nɛ́ áŋgɛl ya, ya laga ma nɛ́ mi cíi nɛ́: «Misɔ́tá la ɓot ɓá yáŋlɛ́ á ŋgand aúg nyí mɔɔ́n ntómbɛ́.» Yu lága sīg-pɛ nɛ́: «Bíŋ biɓaŋgá bí lɛ́ kɔɔ biɓaŋgá bí Ɔlolómɛ̄ nyɛ́-mɛ̄n.»

¹⁰La ma mu úlɓán ɔ́sū ví áŋgɛl á lí ɓégɛ lí yɔ; ndí yu lága ma nɛ́: «Nyɔ̄ŋ lítāt, ɔh ɓɔŋɔ́g ɓé naŋ! Mág mi lɛ ja m̀ɓɔŋle nlemlem ákaa wa, la ákaa yéŋé élōgɛ́sɔ̄ŋ yá tiŋɓé lí tíi lí mbóŋ nyí Yésus. Ɔlolómɛ̄ nɛ wa nyɛ́ɛ lí ɓégɛ; átɔm nɛ́ li tíi lí mbóŋ nyí Yésus lí lɛ́ li máŋa nɛ́ yé ɓápɔ́tle-bí-Ɔ́lolómɛ̄ ɓá lɛgɛ ɛ́ lɛ́ mbálɛ.»

¹¹Váŋ nɛ́ lóō lá léglan; mu ɛ́n épūpúɛ ɛ́ vɔ́si, mut a tɔɔ́ á lóō jɛ́ɛ́ ag yáŋlɛ nɛ́ Ewíyɛ́ ag yáŋlɛ ki nɛ́ Ɓátúpēgɛ. Ag kááhɛ, ag du ki á nyaa ɛ tɛ́ɛ́ sim.

¹²Miíh mɛ́ɛ́ míg lóŋ ákaa alémb á nzáan; á ɓɛ́ɛ́la bikót bí líkanʼyɛ ŋgandag á m̀mú, joó já lí ɓɛ́ɛ́ nyɛ́ nciíg á nyúū jé nyɛ́-ntámɛ́ nɛ a ŋgí yí yé lí ŋga mínɛ.

¹³A jáhɛ mbɔ́tí nyí ya dúuɓɛ́ á mícii; ag yáŋlɛ nɛ́: Eɓaŋgá Ɔlolómɛ̄.

¹⁴Ndog ɓadu-wélan nyí ɛ lɛ á lóō ɛ ŋgí oŋ nyɛ́ á lóō lí bípúpúɛ bí vɔ́si, ɛ jáhɛ taŋ bípúpúɛ bí míɓato mí vɛ́lvɛ́ti, mí ŋgíla ɔnɛ́g.

¹⁵Mboná nsɔŋ yu pámlé nyɛ á ányu á lí sɔghɛ lí bíkombo. Ag kɛ́ li ɓɛ́la lí ɔso ví écɛɛ á lí kanʼyɛ lí byɔ́ la ŋguu, ag kɛ li cógte lí m̀ɓálá nyú a byɛ́ɛ̄ wáany nyí ɛ ŋga tɔ̄g la ɔún ví Ɔlolómɛ̄ á Ŋguu-mísɛ.

¹⁶Joó jé lí lɛ́ nciíg á ébuɓá yɛ́ɛ́ la á áɓɛl wɛ́ɛ́ li lɛ́ nɛ́: Káísa nyí yíŋí Káísa la Nyɔ́ŋ-Ɛsáŋɛ́ a ɓásāŋɛ́ bísɛ.

¹⁷Váŋ nɛ́ ma ɛ́n áŋgɛl ɛ tɛ́ɛ́ á vāŋgá, yu lónlé anɔn ásɛ á ŋga pūple á lóō lóō la ŋguu nɛ́: «Sɔ́án, miní kómān ányúū lindémá lí Ɔlolómɛ̄,

¹⁸á lí dí lí míson mí káísa, mison mí ɓákanʼyɛ milɔŋ mí wélan, mison mí bilóh bí ɓot, mison mí vɔ́si la ɓaɓét-yɔ́-á-lóō, mison mí ɓot bísɛ bí lɛ́ kundɛ la mí mí míyɔ̄ŋ, mison mí ɓatɔ́ga la ɓacɛ́ŋ.»

¹⁹La ma mu ɛ́n tít, káísa yí ŋkɔŋ-á-sí la ndog ɓadu-wélan yáɓá, bú kómān á lí dúhɛ lí mut a tɔɔ́ á vɔ́si la ndog yɛ́ɛ̄ ɓadu-wélan.

²⁰La tít yu byéelɓɛ́ ŋkómá, bú byeé ki m̀pɔ́tle-a-Ɔlolómɛ̄ a minaa nyɔ́ a ɓɔŋɔ́ɔ́ mínɛ́ŋ ɔ́sū ví tít, ányúū li jáŋɛ lí ɓot bí kuhúú ndembye nyí tít la li ɓégɛ lí edíŋgɛ́-díŋgɛ yɛ́ɛ́. Tít la m̀pɔ́tle-a-Ɔlolómɛ̄ a minaa bú lééɓɛ́ bíg vɛɛɓan átē á éɓēl-nzáan nyí ɛ ŋgá dím ɓé, nyí nzuhú ɛ ŋga lóŋɛ.

²¹Mboná nyí ɛ ŋgí pámle á ányu á mut a tɔɔ́ á lóō lí vɔ́si yu ól ɓáŋá ɓádu-wélan bísɛ; anɔn ásɛ wú dí míson máɓá.