Read Bakoko Biyɛ́ɛ́léné 2 Bible Online

Biyɛ́ɛ́léné 2 - Bakoko bible

Biyɛ́ɛ́léné 2

¹Ciilé áŋgɛl nyí Eɓasɛ yé Éféso nɛ́: Nyɔ́ a byɛ́ɛ̄ átɛ̄ nzambúwá á wɔ wɛ́ɛ́ á m̀ɓɛ́nlómɛ, a ŋga lóole á m̀mím á bítūlkáŋ bí góol nzambúwá ag pɔ́t nɛ́:

²«Mag yí mísɔ̄n mɔ́ɔ, ndutu yɔɔ la m̀ɓán wɔ́ɔ, mag yí nɛ́ ɔh byɛ́ɛ́ ɓé eɔ́hánɛ ányúū bíɓēɓéyɛ bí ɓot. Wa céglɛ̄ ɓáŋ bísɛ bí ŋga lága nɛ́ bí lɛ ɓáōmɓɛ, ndom nɛ́ bí sē ɓé ɓɔ̄, la wá wu ɛ́n nɛ bí lɛ́ ɓot bí minaa.

³Ɔ byɛ́ɛ m̀ɓán, wa táka ányúū joó jáma, ndí tɔ la náŋ wu létɛ̄ nyúū.

⁴Ndí á Eɓasɛ yé Éféso, mag tɔghan wa jam já, ediŋ yɔ́ɔ ɔ mɓɛ́la la ma á míɓōtlé yá man.

⁵Ɔ́ŋɔ́ hɔ́ ápah wa ɓógye ndí wu kū; veŋé éniŋ, timán á mísɔ̄n mɔ́ɔ ɔ ŋgí ɓɔŋ kwaŋ. Ah la náŋ ɓé, mag lɛ́ŋle wa, kí má kɔ́p nɛ wāh veŋe ɓé éniŋ, mag ɓógtɛ etúlkáŋ yɔ́ɔ ápah ɛ́ lɛ̄.

⁶Jam lí ŋga nyɛ́ɛle ma wa lí lɛ́ nɛ́: Ɔg síŋgɛ miɓɔŋɔg mí ɔ́ku ví Nikolā[1] ákaa ma.

⁷Nyɔ́ a byɛ́ɛ̄ miɔ́ɔ́, a ámblé yéé M̀búl a ŋga lága Biɓasɛ: Ǹdí-cíŋ, mag kɛ nyɛ́ lí tíi lí eéé éniŋ ɛ́ tɛ́ɛ́ á paladīs nyí Ɔlolómɛ̄ ákaa lidí.»

⁸Ciilé áŋgɛl nyí Eɓasɛ yé Simílna nɛ́: Nyɔ́ Ɔsú la nyɔ́ a Tíile, nyɔ́ a wúēē, ndí ɔ pāhye ag pɔ́t nɛ́:

⁹«Mag yí ésɔghe yɔ́ɔ la liyɛ́ɛ́ jɔ́ɔ, tɔ náŋ ákaa ɔ lɛ m̀byaŋ; mag yí mam bí ŋga ɓéeyɛ wa la ɓá bí ŋga sɛ̄gɓan nɛ́ bí lɛ́ ɓɔ́ɔ̄n bí Élōg-Yúda; ndom nɛ́ bí sē ɓé ɓɔ̄, bí lɛ́ ja ‹ɓot bí nlɔŋ á Sátan›.

¹⁰Ɔg kɛ li sɔghe, ndí ɔh kɔnɔ́g ɓé woŋ. Ɛ́n sig, á lí ceglɛ lí ɓɛ́nɛ, ǹsɔhɔ ag kɛ li vá lí jogo lí ɓot jáná á m̀ɓog; miníg kɛ li ɓɛ́la lí jóom lí alɔ́ lí míceglan. Tiŋɓé nɛ́-tɛ́ɛ la á nyɛmb, mag kɛ wa lí tíi lí ɔ́tot ví éniŋ.

¹¹Nyɔ́ a byɛ́ɛ̄ miɔ́ɔ́, a ámblé yéé M̀búl a ŋga lága Biɓasɛ. Ǹdí-cíŋ, a ŋgá kɛ ɓé lí wú lí nyɛmb ya yáhɛ́ ɛ́ɓáa nyí ya tíile.»

¹²Ciilé áŋgɛl nyí Eɓasɛ yé Pɛlgáma nɛ́: Nyɔ́ a byɛ́ɛ̄ mboná nsɔŋ ɛ ŋga vóó bípah bíɓáa ag pɔ́t nɛ́:

¹³«Mag yí yóg yɔ́ɔ; váŋ nɛ́ Sátan a byɛ́ɛ̄ etɔɓé-líkanʼyɛ yɛ́ɛ́. Ndí ɔ átɛ la ma, wāh táŋɓan ɓé ŋyéɓé wɔ́ɔ ɔ byɛ́ɛ̄ la ma tɔ á eceg yé bí ólóó mbóŋ yáma nyí ɛ́ tɛ́ɛ́ nɛ́ Antípas, á yóg yaná, ápah Sátan a ŋga tɔ́ɓene.

¹⁴Ndí á éɓasɛ yé Pɛlgáma mi byɛ́ɛ puh ntɔghanɛ́ ányúū yɔ́ɔ: ɔ byɛ́ɛ́ ɓot á yóg yɔ́ɔ bí ŋga átɓé á míēēlé mí Bálaam, nyɔ́ a ŋgí ééle Bálak nɛ́ a ám ɓɔ́ɔ̄n bí Íslāɛl, nɛ́ bí dí tít ɓá súlé bísāt la li niŋ lí éniŋ ɛ́ mpuŋgú.

¹⁵Á yóg yɔ́ɔ, ɔ byɛ́ɛ́ ki ɓot ɓá átɓé nlemlem á míēēlé mí ɔ́ku ví Nikolā.

¹⁶Tám hɔ́ áɓē wɔ́ɔ, ɔ véŋé éniŋ. Ah la náŋ ɓé, mag lɛ́ŋle wa puh eceg; la má mi dúhɛ̄ ɓɔ́ la mboná ɛ ŋga pámle á ányu wáma.

¹⁷Nyɔ́ a byɛ́ɛ̄ miɔ́ɔ́, a ámblé yéé M̀búl a ŋga lága Biɓasɛ. Ǹdí-cíŋ, mag kɛ nyɛ́ lí tíi lí mána mí sɔ́lɛ̄, mag kɛ nyɛ́ lí tíi lí épūpúɛ ɛ́ ŋgɔg, ápah ɓá cií jóō lí péná, jé tɔ mut a ŋgá yí ɓé, amáh sig nyɔ́ a ŋga kūh jɔ́.»

¹⁸Ciilé áŋgɛl nyí Eɓasɛ yé Tiatíla nɛ́: Mɔɔ́n Ɔ́lolómɛ̄, nyɔ́ miíh mí ŋga lóŋ kaa ɔlémb ví nzáan, la mikoo mí ŋga vɔ́ŋɔ́ɔ ákaa taŋ enúná ɓá vá á nzáan ag pɔ́t nɛ́:

¹⁹«Mag yí mísɔ̄n mɔ́ɔ, ediŋ yɔ́ɔ, ŋyéɓé wɔ́ɔ, miŋgómán ɔ ŋgɔ kɛ́ la m̀ɓán ɔ byɛ́ɛ̄; misɔ́n mɔ́ɔ má tiile míg loo mí mí ɔ́sū nsɔŋgí.

²⁰Ndí á éɓasɛ yé Tiatíla mag tɔghan wa nɛ́ wa yéɓé Yézabɛl, nyɔ́ mindígá a ŋga lága nɛ́ a lɛ m̀pɔ́tle-a-Ɔlolómɛ̄ ndí ag jáŋɛ ɓáɓɔŋle ɓáma, ag yéglɛ ɓɔ́ lí niŋ lí éniŋ ɛ́ mpuŋgú la li dí lí tít ɓá súlé bísāt.

²¹Ma tí nyɛ eceg nɛ́ a véŋé éniŋ, ndí a ŋgá somo ɓé lí cóó lí éniŋ yɛ́ɛ́ yé ákwala.

²²Jɔ́ nɛ́, mag nantɛ nyɛ́ até a esɔghe yé ŋguu, nlemlem á jam ki la ɓot bí ŋga ɓɔ̄ŋ mpuŋgú á ndeŋg la nyɛ́, amáh nɛ́ ɓá veŋé éniŋ, ɓá mwahɛ́ mísɔ̄n máɓá bí ŋga ɓɔ̄ŋ.

²³Mag kɛ li ól lí ɓɔ́ɔ̄n ɓɛ́ɛ́[2]; váŋ, Biɓasɛ bísɛ bíg kɛ li yí nɛ́ ma nɛ́ mi lɛ nyɔ́ a ŋga pígi miɔ́ŋɔ la kóó yí ɓot-bí-bínam; mag kɛ li sála lí mut waná sig li oŋle la misɔ́n mɛ́ɛ́.

²⁴Ndí, ɓɛ́nɛ ɓot bí Éɓasɛ yé Tiatíla, ɓɛ́nɛ ɓá manáh oŋle ɓé míŋ miéélé tɔ li somo lí li sɔ́ŋtánɛ lí yé bí ŋga yáŋa ‹njiɓa ɛ́ mam mí Sátan›, mag laga ɓɛ́nɛ nɛ́, mi ŋgá kágyɛ ɓé ma ɓɛ́nɛ edidítɛ mbɛgɛ etám tɔ yá;

²⁵ndí yé miní byɛ́ɛ̄, nanyán yɔ́ m̀ɓɛɛŋ nɛ́-tɛ́ɛ ma sɔ́.

²⁶Ǹdí-cíŋ, nyɔ́ a ŋga kɛ́ li sál lí mísɔ̄n máma nɛ́-tɛ́ɛ la á lísūg, mag kɛ nyɛ́ lí tíi lí líkanʼyɛ lí bíkombo;

²⁷ag ɓɛ́ ag wɛɛla byɔ́ á sí ŋguu likanʼyɛ la ɔso ví écɛɛ. A ɓɛ́ ag lɔ́g byɔ́, ag kɔgte byɔ́ ákaa bisóá bí ntɔ́ɔ́;

²⁸ákaa Etāa a tí ma nyíŋ ŋguu, mág mag kɛ nyɛ́ yɔ li tíi, mi tí ki nyɛ́ ɔ́tɛ̄ ví miyɛ́ mí kítí.»

²⁹Nyɔ́ a byɛ́ɛ̄ miɔ́ɔ́, a ámblé yé M̀búl a ŋga lága Biɓasɛ.