Read Bakoko Biyɛ́ɛ́léné 20 Bible Online

Biyɛ́ɛ́léné 20 - Bakoko bible

Biyɛ́ɛ́léné 20

¹La ma Yohánɛs mu ɛ́n áŋgɛl nyí ɛ ŋgí sɔ́le á lóō. Ɛ ɓɛ́ɛ́la ɔdiɓa ví eɓél-écɛ̄hɛ la edidítɛ ɛ́ nsáŋ-á-bícɛɛ á wɔ.

²Váŋ nɛ́ ya byée nyuŋgu, nlom á nyɔ nyú bí ŋga yáŋa nɛ́ ǹsɔhɔ, tɔ nɛ́ Sátan, la yɔ yu kág nyíŋ nyɔ ányúū ɔkóó ví mímbú.

³Áŋgɛl yu lɛ̄ŋgɛ́ nyɔ á eɓél-écɛ̄hɛ, yu lēglénéé yɔ múŋ átē, yu kwɛ́hɛ̄ la lilálo, á lí ɓɔŋ nɛ́ ɛh sɔ́ɔ́g ɓé pɛ li yɛ́ɛ lí bikombo nɛ́-tɛ́ɛ víŋ ɔkóó ví mímbú vá yál. Ndí ámbúh náŋ, ɛ́g kɛ li somlɛ nɛ́ bí kúhú yɔ ányúū epah éceg.

⁴La ma mú ɛ́n bítɔɓé-bí-líkanʼyɛ. Bú tí ɓot bí ŋgí sɔ́ lí tɔ́ɔ̄ múŋ ŋguu nyí li kááhɛ. Mu ɛ́n ki mimbúl mí ɓot bí ólóó ányúū nɛ bí ŋgí tíi mbóŋ nyí Yésus la ányúū nɛ bí ŋgí lɛgɛ eɓaŋgá Ɔlolómɛ̄. Ɓɔ́ bíh ɓéghɛ́ɛ ɓé tít tɔ edíŋgɛ́-díŋgɛ yɛ́ɛ́, bíh ɓɛ́ɛ́la ɓé ndembye yɛ́ɛ́ á mbɔm tɔ á wɔ. Bú tímān á éniŋ, la ɓɔ́ bú tɔ́ɔ̄ á lí kanʼyɛ la Kilístus ányúū ɔkóó ví mímbú;

⁵Ɓáŋá ɓot ɓatám bí wúēē bíh timan ɓé á éniŋ sɔ́kágánɛ́ víŋ ɔkóó ví mímbú víg yál. Lipahye lí ɔ́sū jéŋ.

⁶Misɔ́tá la ndog-Ɔlolómɛ̄ nyí ya nyɔ̄ŋ ŋgáɓo á jéŋ lipahye lí ɔ́sū. Bí ŋgá kɛ ɓé lí yí lí nyɛmb ya yáhɛ ɛ́ɓáa nyí ya tíile; bíg kɛ li ɓɛ́ lí ɓátíi-nsúlé bí Ɔlolómɛ̄ la ɓá bí Kilístus; bíg kɛ li tɔɔ la nyɛ́ á líkanʼyɛ ányúū ɔkóó ví mímbú.

⁷Eceg víŋ ɔkóó ví mímbú ví ŋga kɛ́ li yál, bíg kɛ li pámɛ lí Sátan á m̀ɓog,

⁸ag kɛ li lɔ́ɔ́nde lí bikombo bí lɛ́ á míkāh mínáa mí ŋkɔŋ-á-sí, mí ŋga yáŋlɛ nɛ́ Gɔ̄g la Mágɔg á lí jáŋɛ lí byɔ́. Ag kɛ li komanɛ lí mílōm mí mí lɛ ɔ́bul ákaa ŋkógá á túwɛ ányúū eɓándá.

⁹Bú sā ŋkɔŋ-á-sí ásɛ, la ɓɔ́ bú díí yáli yé ndog-Ɔlolómɛ̄ la tísɔn nyí Ɔlolómɛ̄ a ŋga dīŋ. Ndí, nzáan yu sɔ́lé á lóō, yu dígɛ́ ɓɔ.

¹⁰La ǹsɔhɔ, ŋ̀yɛ́ɛ ɓɔ́ ɔ lɛ̄ŋgɓɛ́ á ébúle yé nzáan la yé nzuhú ápah tít ɛ lɛ la ɓapɔ́tle-bí-Ɔ́lolómɛ̄ bí mínaa. Bíg kɛ li taka ŋgandag, díɓe la nzámuh á éɓem la á éɓem.

¹¹Váŋ hɔ́ nɛ ma ɛ́n m̀ɓáláŋ á épūpúɛ á étɔɓé-líkanʼyɛ, la mut nyɔ́ a tɔɔ́ múŋ. Sí la lóō bú nyɔ́ŋ ɔ́sū vɛ́ɛ́ ɛ́h ɓɛ́ ɓé lí yíg lí ndembye.

¹²La ma mu ɛ́n ɓot ɓá wú, ɓacɛ́ŋ la ɓatɔ́ga bí tɛ́ɛ ɔ́sū ví étɔɓé-líkanʼyɛ; kálati yú vúúlɛ. Kálati etám yu vúúlɛ sīg-pɛ; yɔ nɛ́ ɛ lɛ kálati nyí eniŋ. Bú kááhɛ́ ɓot ɓá wú, mut sig li oŋle la miɓɔŋɔg mɛ́ɛ́, ákaa yá ciiɓɛ́ á kálati.

¹³Túwɛ ɔ pámɛ́ mímbim mɛ́ɛ́, nyɛmb la ŋkɔŋ á ɓádūgu ɓɔ́g bú pámɛ́ mímbim máɓá; bú kááhɛ́ mut sig li oŋle la miɓɔŋɔg mɛ́ɛ́.

¹⁴Váŋ nɛ́ ɓá lɛŋgɛ́ nyɛmb la ŋkɔŋ á ɓádūgu á ébúle yé nzáan. Ebúle yé nzáan nɛ́ ɛ́ lɛ nyɛmb ya yáhɛ́ ɛ́ɓáa nyí ya tíile!

¹⁵Ndí nyɔ́ la nyɔ́ jóō líh cíiɓɛ ɓé á kálati nyí eniŋ ɔ lɛ̄ŋgɓɛ́ á yéŋ ébúle yé nzáan.