Read Bakoko Biyɛ́ɛ́léné 4 Bible Online

Biyɛ́ɛ́léné 4 - Bakoko bible

Biyɛ́ɛ́léné 4

¹Ámbúh náŋ, ma Yohánɛs mu ɛ́n líkooká lí áhɛ á lóō, cíŋ ɔsú mí ámbléé ɛ ŋgí pɔ́tɛ ma ákaa nséɓá, yu pɔ́t nɛ́: «Ɓét vá, mag kɛ wa lí étɛ lí yé ɛ́ ŋga kɛ́ li sɔ́.»

²Á nlemlem á eceg, M̀búl ɔ nyɔ̄ŋ ma. Váŋ nɛ́ ma ɛ́n étɔɓé-líkanʼyɛ yé Ɔ́lolómɛ̄ á lóō, mut wa ki a tɔ́ɔ̄ múŋ.

³Nyɔ́ a ɓɛ́ɛ́ a tɔ́ɔ̄ á yéŋ etɔɓé-líkanʼyɛ a ŋgí páa kaa sɛŋgɛ bí ŋga yáŋa nɛ́ yáspe la saldóna. Ǹdum á ŋga páa ákaa tāŋ ŋgɔg bí ŋga yáŋa nɛ́ emelóde wú díí étɔɓé-líkanʼyɛ.

⁴Muúmɓáa mí bítɔɓé-bí-líkanʼyɛ la bínáa mú díí yéŋ etɔɓé-líkanʼyɛ; muúmɓáa mí ɓácɛ̄ŋ bí ékombo-lóō la bínáa ki mí tɔ́ɔ̄ á bíŋ bitɔɓé-bí-líkanʼyɛ, bí ɓɛ́ɛ́ bí jáhɛ bipúpúɛ bí mbɔ́tí, bí jáhɛ ki atot á góol á mímú máɓá.

⁵Yé ɛ́ ŋgí pámle múŋ á yéŋ etɔɓé-líkanʼyɛ ɛ́ ɓɛ́ɛ́: m̀wɛg, mbámká yí mbambat la eduŋgú yé mpɔ́t. Bitúlkáŋ nzambúwá bí ŋga páa ákaa nzáan lisalká bí ɓɛ́ɛ́ ɔ́sū ví yéŋ etɔɓé-líkanʼyɛ, bíŋ bitúlkáŋ bí lɛ́ mímbūl nzambúwá mí Ɔ́lolómɛ̄.

⁶Ɔsú ví étɔɓé-líkanʼyɛ ví ɓɛ́ɛ́ ákaa bipúpúɛ bí mindím, mí ŋga púnan la elembán, nɛ kí ɔ tɛ́ɛ́ á yé epah ɔg ɛ́n yéŋé. Biveglé bínáa bí byɛ́ɛ̄ miíh ŋgandag ɔ́sū la á mbúh bí ɓɛ́ɛ́ á m̀mím la á míŋgwáāg mí yéŋ etɔɓé-líkanʼyɛ.

⁷Eveglé ɔsú ɛ ŋgí punan la ŋgíla, yé yá yáhɛ́ bíɓáa ɛ́g punan la eɓɔ́g nyága, yé yá yáhɛ́ bíŋháa ɛ́ ɓɛ́ɛ́la asú ákaa mut-a-binam, yé yá yáhɛ́ bínáa ɛ́ ŋgí punan la ŋyogó[3] nɛ á ŋga pūple.

⁸Bíŋ biveglé bínáa bí ɓɛ́ɛ́la yá sig mipaa mísáama, mí mí byɛ́ɛ̄ miíh á lóō la á sí. Bí ŋgí tɔmb ɓé lí lɛgɛ díɓe la nzámuh nɛ́: «Mpúán, mpúán, ɔ lɛ mpúán! Wa Nyɔ́ŋ-Ɛsáŋɛ́, Ɔlolómɛ̄ a Ŋguu-Mísɛ, nyɔ́ a ɓɛ́ɛ́, nyɔ́ a lɛ la nyɔ́ a ŋga sɔ́!»

⁹Eceg sig bíŋ biveglé bí ŋgí tíi nyɔ́ a tɔɔ́ á étɔɓé-líkanʼyɛ, a ŋga nīŋ á éɓem la á éɓem lipém, bíg ŋgí ɓégɛ nyɛ́ la lí tíi lí nyɛ mítamlan.

¹⁰Míŋ muúmɓáa mí ɓácɛ̄ŋ bí ékombo-lóō la bínáa mí ŋgí úm míɓɔ̄ŋ ɔ́sū ví nyɔ́ a tɔɔ́ á étɔɓé-líkanʼyɛ; má ɓégɛ ki nyɔ́ a lɛ á éniŋ á éɓem la á éɓem míg lɛŋgɛ átot wáɓá ɔ́sū ví étɔɓé-líkanʼyɛ, la li laga nɛ́:

¹¹«Ɛtáŋɛ wahá Ɔlolómɛ̄, ányúū nɛ wa nɛ́ wa vēg joó nɛ̄ jam, wa sómo nɛ míŋ mam mí ɓɛ́, la mɔ́ mú vēgɓɛ, ɔ kɔ́ɔ́ la lipém, eɓégɛ, la ŋguu!»