Read Bakoko Biyɛ́ɛ́léné 5 Bible Online

Biyɛ́ɛ́léné 5 - Bakoko bible

Biyɛ́ɛ́léné 5

¹La ma Yohánɛs mu ɛ́n kálati nyí ɛ ɓɛ́ɛ́ m̀vúlkége á wɔ á m̀ɓɛ́nlómɛ á nyɔ́ a tɔɔ́ á étɔɓé-líkanʼyɛ, ɛ ɓɛ́ɛ́la micila átē la á mbúh, ɛ́ ɓɛ́ɛ́ nlegéeg la biɓátan-bí-ndembye nzambúwá.

²La ma mu ɛ́n mbimban ángɛl ya ɛg lɛgɛ la elóh cíŋ nɛ: «Ɓaá, nzáá a kɔɔ́ nɛ a kɔ́pɔ́ bí bíɓátan bí ndembye nɛ́ ndí a vúlú nyí kálati é?»

³Ndí, ɛ́ ɓɛ́ a lóō, ɛ́ ɓɛ́ a sí, ɛ́ ɓɛ́ átē á sí-ntím, mut tɔ wa ah mɓɛ́la ɓé ŋguu li vúlu lí yɔ, tɔ li légɓe lí yé ɛ́ lɛ́ átē wɛ́ɛ̄.

⁴Mu lée ŋgandag nɛ́ mut tɔ wa āh ɛ́ni ɓé nyɔ́ a kɔɔ́ yɔ li vúlu ndí tɔ li légɓe lí yé ɛ́ lɛ́ átē wɛ́ɛ̄.

⁵Ndí, ǹcɛ́ŋ á ékombo-lóō wa ɔ lāgá ma nɛ́: «Ɔh lelég ɓé! Ɛ́n sig, ŋgíla nyí lilómɛ lí ɓɔ́ɔ̄n bí Yúda, ntɔ́m á mbota nyí káísa Dávid, yɔ nɛ́ ya dí cíŋ; yɔ nɛ́ ɛ ŋga kɛ́ li kɔpɔ lí bíɓátan bí ndembye nzambúwá nɛ́ ndí ɛ́ vúlú kálati.»

⁶Váŋ nɛ́ ma ɛ́n hɔ́, mɔɔ́n ntómbɛ́ nyɔ́ a ɓɛ́ɛ́ ɔ́ŋgɛn ɓá sɛ́m líbīt á lí tíi á nsúlé, á tɛ́ɛ́ á m̀mím á étɔɓé-líkanʼyɛ, á póla biveglé bínáa, lá a m̀mím á éti ɓacɛ́ŋ bí ékombo-lóō. A ɓɛ́ɛ́la míɓēg nzambúwá la miíh nzambúwá mí mí lɛ́ mímbūl nzambúwá mí Ɔ́lolómɛ̄, mí a ómóó á ŋkɔŋ-á-sí ásɛ.

⁷Ɔ sīŋglé á lí lɛ́gle lí kálati á wɔ á m̀ɓɛ́nlómɛ a nyɔ́ a tɔɔ́ á étɔɓé-líkanʼyɛ.

⁸Ɛnɛ́ a lɛ́glé yɔ, bíŋ biveglé bínáa elɔŋ la mí muúmɓáa mí ɓácɛ̄ŋ bí ékombo-lóō la bínáa mú úlɓan, mú úm míɓɔ̄ŋ á sí á ɔ́sū ví mɔɔ́n ntómbɛ́. Mut sig á élɔŋ yáɓá a ɓɛ́ɛ́ á byɛ́ɛ ɔndende la miɓondó mí góol ŋyálāg la binumba, bí bí lɛ́ míkánɛ mí ndog-Ɔlolómɛ̄.

⁹Bí ŋgí lɔ́ŋgɛ ŋgoso péná nɛ: «Ɔ kɔ́ɔ́ li lɛ́gle lí kálati la li kɔpɔ lí bíɓátan bí ndembye byɛ́ɛ́; ányúū nɛ ɓá sɛ́m wa líbīt, bú tí wa ákaa nsúlé; ányúū Ɔlolómɛ̄, wu sóm la micii mɔ́ɔ, ɓot bí jóō nɛ bikombo, bí jóō nɛ lilóm, bí jóō nɛ lilómɛ la ɓá bí mípɔ̄t mísɛ.

¹⁰Wu yáanɛ́ ɓɔ ɓɔɔ́n bí ékombo yé Ɔlolómɛ̄ la ɓatíi-nsúlé nsúlé, ányúū Ɔlolómɛ̄ wahá; bíg kɛ li kanʼyɛ á ŋkɔŋ-á-sí»

¹¹Váŋ nɛ́ ma ɛ́n hɔ́, mu ámblé ki cíŋ nyí edila ɛ́ áŋgɛl, yí ɛ́ díí étɔɓé-líkanʼyɛ, yú díí bíveglé la ɓacɛ́ŋ bí ékombo-lóō; táŋga ɛ yéŋ edila ɛ́ áŋgɛl ɛ ɓɛ́ɛ́ adun ndí ádun la akóó nyú á ádun.

¹²Yéŋ edila áŋgɛl ɛ́ ŋgí lɔ́ŋgɛ á lóō lóō nɛ́: «Mɔɔ́n ntómbɛ́ nyɔ́ ɓá sɛ́m cíŋ á lí tíi ákaa nsúlé, a byɛ́ɛ́ kundɛ li kuh lí ŋguu, abyaŋ, peg, mbimban, adit, lipém la eɓégɛ.»

¹³Váŋ nɛ́ ma ámblé ki biveglé bí lɛ́ á lóō, bí bí lɛ́ á sí, bí bí lɛ́ á sí-ntím la á túwɛ; byɔ́ bísɛ bíg lón nɛ́: «Eɓégɛ, adit, lipém, la ŋguu bí ɓɛ́la nyɔ́ a tɔɔ́ á étɔɓé-líkanʼyɛ, nyɛ́ la mɔɔ́n ntómbɛ́ á éɓem la á éɓem.»

¹⁴Váŋ nɛ́ bíŋ biveglé bínáa bí lagléé nɛ́: «Ɛ́ ɓɛ́ náŋ!» Á ékūyá-kúyá ɓacɛ́ŋ bí ékombo-lóō bú úlɓan, bú úm míɓɔ̄ŋ á sí la ɓɔ́ bú ɓégɛ́ Ɔlolómɛ̄.