Read Balantak Matius 24 Bible Online

Matius 24 - Balantak bible

Matius 24

¹Na tempo i Yesus namarerei Laiganna Alaata'ala, murit-Na notakamo na Ko'ona ka' ninsiso' Laiganna Alaata'ala.

²Yesus norobu na ko'ona i raaya'a, tae-Na, “Too daa i kuu nimiile giigii' iya'a? Imamat iya'a. Bantilkonon-Ku na ko'omuu se' ni'imarian sianta sa'angu'po watu na Laiganna Alaata'ala kani'i a men dauga' patalaion pootapi'. Wiwi'na bo runtunion!”

³Komburi'na i Yesus nomae'mo na Buu'na Zaitun ka' na tempo i Ia oru-oruang, murit-Na notakamo bo pootundunii tii Ia men tongko' raaraaya'ana. Taena i raaya'a, “Bantilkon i kai se' ipi a bo sidaanna men tae-Muu umba'a, ka' oosan upa men bo pinginti'ian kotakaan-Muu ka' kakabusanna tempo?”

⁴Ia simbati Yesus tae-Na, “Maka'amat dako' i kuu ko'akalian.

⁵Gause biai' a mian bo taka ka' mangaan ngaan-Ku ka' morobu taena, ‘Yaku'mo a Tomundo' Pansalamatkon!’ Raaya'a bo mangakalkon mian biai'.

⁶Kuu bo momorongor lelena mian poopapate ka' laungna sindapanna mian men poopapate, kasee alia uga' layaon. Gause upa-upa iya'a tio bo sida, kasee iya'a taasi'po kakabusanna tempo.

⁷Lipu' men sa'angu' bo poopapate mintimbangi lipu' men sambana, ka' batomundo'an sa'angu' bo poopapate mintimbangi batomundo'an men sambana. Na toropii dodongoan takaionna loluan tia lili'.

⁸Giigii' iya'a baasi tumbena, koi polos men baasi ia suri sa'angu' wiwine na tempo mindompu'.

⁹Tempo iya'a i kuu bo rakopon ka' rookonon bo repaion kasi papateion. Kuu bo kokundaionna giigii' lipu' gause na pongololo'an i Yaku'.

¹⁰Na tempo iya'a biai' a mian bude'mo sida murit-Ku. Raaya'a pookalaakkon tia simbaya'na men pooka'idek.

¹¹Bo taka a biai' minti nabi-nabii men tongko' momboreki mian biai'.

¹²Idek bo kanturangan men dodoa tuu' pataka mian biai' sianmo pookolingu'kon.

¹³Kasee mian men mantaan pataka kokomburi'anna bo salamatkonon.

¹⁴Ka' Lele Pore men mambantilkon Batomundoanna Alaata'ala bo lelekonon na longkop tano' balaki' kada' giigii' mian momorongor. Moko daa iya'a kasi taka a kakabusanna tempo.

¹⁵Sa'angu' tempo i kuu bo mimiile' pinsilaka'i men ba'idek kumekerer na tampat men molinas, koi wurungna Tumpu men ia tadulkon i Nabii Daniel. (Sulano i kuu men mambasa iya'a sida minginti'i.)

¹⁶Na tempo iya'a mian men isian na libutan Yudea tio mamarere na buu'na.

¹⁷Mian men monda'a na wawona laiganna amo' malau ka' minsoop na laigan mangala upana.

¹⁸Mian men na ale' sobii ka' mule'kon mangala pakeanna.

¹⁹Marepa a wiwine men mampaiwawa tempo iya'a, ka' sina men dauga' momosusui anak.

²⁰Pa'ase' na samabayangmuu kada' alia paraa mamarere na tempo memel kabai na ilio Sabat.

²¹Gause na tempo iya'a bo taka a sa'angu' repaan men marepa tuu' koi men sianpo ia toosuri mian nuntumbeipo nosidaanna tano' balaki' pataka koini'i. Ka' sianmo isian repaan men koiya'a soosoodo.

²²Kalu Alaata'ala sian monsondo'i tempo marepa iya'a, mbaka' sianta sa'angu'po mian men salamat. Kasee kada' mian men Ia ruruki sida salamat, mbaka' bo sondo'ion-Na tempo iya'a.

²³Na tempo iya'a kalu isian mian morobu na ko'omuu taena, ‘Piile', kani'imo a Tomundo' Pansalamatkon!’ kabai taena, ‘Piile', kale'emo a Tomundo' Pansalamatkon!’ alia mamarasaya upa men ia ngaan mian kanono'.

²⁴Gause pansalamatkon borek tia minti nabi-nabi bo taka. Raaya'a bo mingilimang oos men pore tuu' ka' upa kosamba' bo pangakalianna mian, maupo mian men ia rurukimo Alaata'ala bo mian-Na. Uga' pi'akalionna i raaya'a kalu too pokoona.

²⁵Daa Yaku' bantilkonmo a upa men bo rumpakion ini'imari.

²⁶Kalu i kuu momorongor mian morobu na ko'omuu taena, ‘Piile! Ia isian na tano' maleas,’ alia i kuu waale'e. Kabai kalu taena, ‘Piile'! Ia ninsapit na lalomna tambin kani'i,’ alia mamarasaya.

²⁷Gause kotakaana Anak Manusia bo sida koi kilap men tarang dumilep ringkat na bete'an taka na sopokan.

²⁸Aana a men isian bangke, ino'o moriwut a sapu' men mangkaan bangke.

²⁹Sarataa moko daa repaan na tempo iya'a, matana ilio bo pintung, ka' wulan sianmo tarang. Bitu'on bo mandawo' ra'amari na langit, ka' pungkuasai langit iya'a bo toyunggot.

³⁰Tempo iya'a oosanna Anak Manusia bo kampiile'an na langit. Giigii' lipu' na tano' balaki' bo wiri. Raaya'a bo mimiile' Anak Manusia taka ra'amari na wawona antong tia kuasa ka' lingkaangan tuu'.

³¹Torompeet balaki' bo duupon, ka Anak Manusia bo momosuu' malaa'ikat-Na mingirimpung mian men Ia ruruki bo mian-Na na longkop tano' balaki' ka' na puusna langit men sa'angu' pataka puusna men sambana.

³²Inau' a timbaani'na kau ara. Kalu panga'na malalas ka' molusa', ka' nosumumpemo, inti'ionmuu se' tempona pengkar booboomo.

³³Koiya'a uga' kalu i kuu mimiile' men taeng-Ku' kaekae'mo sida. Inti'ionmuu se' tempona booboomo.

³⁴Imamat a men taeng-Ku', ka' uga' bantilkonon-Ku na ko'omuu se' giigii upa men Yaku' poko bantilkonmo na ko'omuu iya'a bo sida koo'po tia mian men tumuo' tempo koini'i lapus giigii'na.

³⁵Langit ka' tano' balaki' bo penta', kasee wurung-Ku isian pataka sidutu.

³⁶Kasee sianta sa'angu'po mian men minginti'i iliona tia jaamna. Malaa'ikat na surugaa sian, Anakna Alaata'ala uga' sian. Tongko' Tama na surugaa a men daa ninginti'i.

³⁷Gause koi upa a men nosida na tempo ni Nuh mbaripian, mbaka' koiya'a uga' a men bo sida na tempo Kotakaanna Anak Manusia.

³⁸Na tempo koo'po tia tano' balaki' ia limbusi weer, mian kumaan, ba'inum, mosuo' ka' mompoposuo' anakna. Koiya'a pataka na ilio ninsoopan ni Nuh na lalomna kapal.

³⁹Na tempo tano' balaki' ia limbusi weer iya'a ka' ninsilaka'i i raaya'a giigii', ya'asi ka' ia inti'i i raaya'a a upa men kaekae' sida. Koiya'a uga' a men bo sida na tempo Kotakaanna Anak Manusia.

⁴⁰Na tempo iya'a, rua' mian pintanga' balimang na ale'. Sa'angu' mian bo wawaon, ka' men sa'angu bo parereion.

⁴¹Rua' wiwine pintanga' minggiling gandum. Sa'angu' bo wawaon, ka' men sa'angu' bo parereion.

⁴²Mbaka' mandagaisi, gause ilio kotakaanna Tumpumuu sian inti'ionmuu.

⁴³Imamat a timbaani' kani'imari! Kalu tombono laigan inti-inti'i se' jaam pipii a takaanna mian mamangan na tempo malom, ia sabole sian royot kada' mian mamangan sian minsoop na laiganna.

⁴⁴Mbali' iya'a, kuu uga'a tio maka'amat. Gause Anak Manusia bo taka na tempo men sian sasaakionmuu.”

⁴⁵“Kalu isian tutulungi men malolo' ka' motu'a noana, iamo a men nakatonna tanaasna bo pantanaasi tutulungi sambana ka' mantarai i raaya'a kumaan na tempona

⁴⁶Barakaatan a tutulungi iya'a kalu tanaasna mule'kon ka' mantakai i ia pintanga' mingilimang palimangona.

⁴⁷Imamat a men taeng-Ku', ka' uga' bantilkonon-Ku na ko'omuu se' tanaas iya'a bo mamarasayakon giigii' kupangna na tutulungi iya'a.

⁴⁸Kasee kalu tutulungi iya'a ba'idek, ia bo morobu na noana taena,

⁴⁹‘Tanaasku dauga' manau' ka' mule'kon.’ Mbaka' ia nampapolosimo tutulungi men sambana, ka' kumaan ba'inum tia mian men bukuna lio'.

⁵⁰Kasee kokomburi'anna tanaasna bo mule'kon na ilio men sian sasaakiona tutulungi iya'a, ka' jaam men sian inti'ion.

⁵¹Mbaka' tutulungi iya'a bo papolosionna tanaasna, ka' tibarkonon na tampatna mian men minti pore-pore! Indo'o i raaya'a bo tumando' ka' marepa tuu'.”