Read Balantak Matius 27 Bible Online

Matius 27 - Balantak bible

Matius 27

¹Sarataa boomo ilio, giigii' tanaasna imam tia motu-motu'ana lipu' Yahudi nobarimpungmo ka' nopoosangadai mampapatei i Yesus.

²Raaya'a numungumo i Ia kasi nangawawa mae' ni Pilatus men gubernuur na libutan iya'a.

³Sarataa i Yudas men nongorookon i Yesus nimiile' se' i Yesus nikana'imo ukuman pate, ia ninsosolmo. Kasi ia nungule'kon doi' salaka' men tolumpulo' iya'a na tanaasna imam tia motu-motu'a,

⁴ka' norobu taena, “Yaku' nodosaonmo gause nongorookon rara'na mian men sian sala'na.” Kasee ia simbati i raaya'a taena, “Upa a urusanmai tia kanono'? Kanono' urusaan suuwung!”

⁵Mbaka' ia nambalo'konmo doi' salaka iya'a na lalomna Laiganna Alaata'ala, kasi nomae' nintipegot.

⁶Tanaasna imam nangalamo doi' salaka iya'a ka' norobu taena, “Sian poturangon monsoopkon doi kani'i na pundi, gause doi' kani'i doi'na rara'.”

⁷Noko daa i raaya'a nopoosangadai, raaya'a namba'ilikonmo doi' iya'a ningili tano' men ngaanon Tano'na Tukang Kuren. Tano' iya'a nisidakon tampat bo baleananna mian men tumaka.

⁸Mbali' iya'a, pataka koini'i tano' iya'a ngaanion Tano' Rara'.

⁹Tempo i raaya'a mangawawau men koiya'a mbaka' nosidamo a wurungna Tumpu koi men ia tadulkon i Nabii Yeremia taena, “Raaya'a nangalabot tolumpulo' doi' salaka', ya'amo a ilina men ia poosangadaikonmo lipu' Israel bo pambayar i Ia.

¹⁰Ka' doi' iya'a ia pakemo i raaya'a bo pingili Tano'na Tukang Kuren koi men ia potookonmo Tumpu na ingku'.”

¹¹Kasi i Yesus niwawa na gubernuurna libutan iya'a. Ka' gubernuur iya'a nimikirawari i ia taena, “Koomo a tomundo'na lipu' Yahudi?” Ia simbati i Yesus tae-Na, “Koi nooro'o men taemuu.”

¹²Kasee tempo tanaasna imam tia motu-motu'a mambantilkon giigii' men raitkononna i raaya'a ni Yesus, Ia sian santaa' ninsimbati.

¹³Mbaka' i Pilatus norobuma ni Yesus taena, “Sian rongoroon se' biai' a men raitkononna mian karaani'i na Ko'oom?”

¹⁴Kasee i Ia sian ninsimbati santaa'po, tamban gubernuur iya'a nosamba' tuu'.

¹⁵Sanda' ramean Paska, delena gubernuur iya'a sabole munguarkon sa'angu mian na tarungkuan koi men ko'uusionna mian.

¹⁶Ka' na tempo iya'a isian sa'angu' mian men nitarangku. Ngaanna i Barabas. Ia tongaan ba'idek tuu' a gau'na.

¹⁷Tempo mian biai' nobarimpung na tampat iya'a, ai Pilatus norobumo na ko'ona i raaya'a taena, “Ime a men ko'uusmuu bo uarkononku bo ko'omuu, Barabas kabai se' i Yesus men ngaanon i Kristus?”

¹⁸Pilatus inti-inti'i se' i raaya'a nangkalaakkon i Yesus gause i raaya'a kokoo'ankon i Yesus.

¹⁹Sarataa i Pilatus no'umoruang na oruangan pungukumian, boroki'na nomotuun i ia taena, “Alia i koo mangawawau upapo na mian men sian sala'na kanono', gause i Ia i yaku' nunsuri marepa tuu' na lalomna ipionku rimputu'.”

²⁰Kasee tanaasna imam ka' motu-motu'a nomosuu' mian biai' mama'ase ni Pilatus kada' i Barabas a uarkonon ka' i Yesus a ukumon pate.

²¹Gubernuur iya'a norobu na ko'ona i raaya'a taena, “Na rurua' mian kani'i, ime a men ko'uusmuu uarkonon bo ko'omuu?” Ia simbati i raaya'a taena, “Barabas.”

²²Taena i Pilatus na ko'ona i raaya'a, “Ansee ka' koiya'a upaionkumo ni Yesus men ngaanon i Kristus?” Raaya'a giigii' nangkakaro' taena, “Ia tio saliipkonon!”

²³Taena i Pilatus, “Kasee idek upa a men Ia poko wawaumo?” Kasee i raaya'a tongko' kaekae' dodoa mangkakaro' taena, “Ia tio saliipkonon!”

²⁴Sarataa i Pilatus nunsuri se' ia sian moko ba'upa, ka' mian biai' kaekae dodoa gora', ia nangalamo weer ka' ningoso' na aropna mian biai' ka' norobu taena, “Yaku' sian sala' na rara'na mian kani'i. Ya'a urusanmuu!”

²⁵Ka' giigii' mian ninsimbati taena, “Daa. Rara'-na kaisi tia anakmai a bo pantaup!”

²⁶Kasi ia nunguarkon i Barabas bo ko'ona i raaya'a, ka' nomosuu mian mansasali i Yesus, kasi nongorookon bo saliipkonon.

²⁷Surudaduna gubernuur nangawawamo i Yesus na laiganna gubernuur, kasi nengeleelo' giigii' surudadu barimpung mintikumi i Yesus.

²⁸Raaya'a nungukatimo pakean-na ka' nimpisoki i Ia tia juba kakamumu'.

²⁹Raaya'a nanganam sa'angu' likok ruri' niwawau koi mahkota ka' nunsulon na takala'-Na, kasi nomo'intoni tokon na lima-Na uanan. Kasi i raaya'a nobanintuur ka' ningiroki i Ia, taena, “Tabea', oo tomundo'na lipu' Yahudi!”

³⁰Raaya'a ninginori i Ia ka' nangala tokon iya'a kasi nomoolkon na takala'-Na.

³¹Noko daa i Yesus nibibiani, ia ukatimo i raaya'a a juba-Na, kasi nipopisokikon a pakean-Na soosoodo. Kasi i raaya'a nangawawa i Ia umuar bo saliipkonon.

³²Sarataa i raaya'a mae' umuar na kota, raaya'a nopootuungmo sa'angu' mian samba Kirene men ngaanna i Simon. Mian iya'a ia pakisaamo i raaya'a mamasa'an saliip ni Yesus.

³³Mbaka' notakamo i raaya'a na sa'angu' tampat men ngaanon Golgota, aratina: Tampat Lamasna Takala'.

³⁴Kasi i raaya'a nantarai i Ia minginum anggur men nibauri sopoyu'. Sarataa Ia nangananami, Ia nobude' ninginum.

³⁵Noko daa nansaliipkon i Ia, raaya'a nungundimo pakean-Na ka' nongobo-obos.

³⁶Kasi i raaya'a no'umoruang indo'o mandagai i Ia.

³⁷Ka' na wawona takala'-Na nipakampa'i tulisan men mangaan nongko'upa se' i Ia ni'ukum. Tulisan iya'a koi kani'imari: NI'IMO I YESUS TOMUNDO'NA LIPU YAHUDI.

³⁸Singkat tii Ia uga' isian rurua' mian puraga nisaliipkon, sa'angu' paraas uanan-Na ka' sa'angu' paraas kauri'-Na.

³⁹Mian men lumiu inda'a ningililokkon takala'na ka' mingiroki i Yesus.

⁴⁰Raaya'a norobu taena, “Wee i Koo men bo munguruntuni Laiganna Alaata'ala ka' tongko'tolu' ilio pokoowonmo patindongon soosoodo. Salamatkon a wakaam. Kalu i Koo Anakna Alaata'ala, palau na saliiwip kanono'!”

⁴¹Koiya'a uga' tanaasna imam tia wawa ukum Torat ka' motu-motu'a ningiroki i Ia ka' nangaan taena,

⁴²“Mian sambana pokoon-Na salamatkonon, kasee waka-Na sian pokoon-Na salamatkonon! Kalu i Ia tomundo'na lipu' Israel, porena i Ia malau na saliip iya'a kada' i kai parasaya na Ko'ona!

⁴³Ia mamarasayakon waka-Na na Alaata'ala. Sobii Alaata'alasi a pansalamatkon i Ia koini'i kalu Alaata'ala mo'lingu'kon i Ia. Gause i Ia isian nangaan se' i Ia Anakna Alaata'ala.”

⁴⁴Koiya'a uga' mian puraga men nisaliipkon tii Ia uga' mangaani.

⁴⁵Muntumbei jaam duablaas, nopintungmo a longkop libutan iya'a pataka jaam tiga.

⁴⁶Toro jaam tiga i Yesus nangkakaro'mo men boolak tae-Na, “Eli! Eli! Lema sabakhtani?” Aratina: Alaata'alang-Ku! Alaata'alang-Ku Nongko'upa se' i Kuu mandalai i Yaku'?

⁴⁷Nomorongor iya'a toropii mian men potokerer iraando'o norobu taena, “Ia mengeleelo' i Elia.”

⁴⁸Sa'angu mian men isian tii raaya'a nomae'mo pasa-pasasara' nangala garanggan mongura' ka nongorom na anggur makarang, kasi ia potoor na kau ka' nisoorkon waara'a, mimi'inumi i Yesus.

⁴⁹Kasee mian sambana norobu taena, “Alia. Mai kita piile'a, too i Elia taka mansalamatkon i Ia.”

⁵⁰Yesus nangkakaro'mo boolak soosoodo kasi nolapus.

⁵¹Singkat iya'a, toik men pongola'i olisna Laiganna Alaata'ala nokoberak rua' inda'ana tudun indo'ona. Isian lili' ka' buu'na watu kinobotakmo.

⁵²Baleanan kinobongkatian ka' biai a mian men malolo' na Tumpu men nolapusmo notuo'mo soosoodo.

⁵³Ka' noko daa i Yesus tumuo' soosoodo, raaya'a uga' umuar na baleanan, kasi minsoop na Yerusalem, kota molinas, ka' mintipiile' na mian biai'.

⁵⁴Tanaasna surudadu tia surudaduna men mandagai i Yesus nolayaonmo tuu'. Sarataa i raaya'a nunsuri lili' ka'upa men nosida, raaya'a norobumo taena, “Mian kani'i tuutuu' Anakna Alaata'ala!”

⁵⁵Isian uga' indo'o biai' a wiwine men montoa'i na ko'oloaan. Wiwine i raaya'a a men nongololo' i Yesus ka' nangakalesang ringkatpo na Galilea.

⁵⁶Isian i Maria Magdalena, ka' i Maria sina ni Yakobus tii Yusuf, ka' sinana anak ni Zebedeus, ka' isian uga' men sambana.

⁵⁷Guntumalom notakamo a sa'angu' mian men kupangon, samba Arimatea. Ngaanna i Yusuf men uga' nosidamo murit ni Yesus.

⁵⁸Ia nomae'mo ni Pilatus ka' nama'ase' biibii ni Yesus. Mbaka' i Pilatus nomosuu'mo mianna kada' biibii ni Yesus iya'a rookonon na ko'ona.

⁵⁹Kasi i Yusuf nangala biibii iya'a ka' nambalun tia toik pobalun biibii men bubulak maloe'. Pobalun iya'a, toik lenang a niwawau.

⁶⁰Ia nomotokolmo biibii iya'a na baleanan u'uru men nipa'atkon na buu'na watu. Noko daa iya'a, ia ningilinda'mo watu balaki' ka' nongompodi soopanna baleanan iya'a, kasi ia nomae'.

⁶¹Kasee Maria Magdalena tii Maria men sambanaan moraando'o poto'oruang na baleanan.

⁶²Koi liilana, Noko daa ilio batoropotan, tanaasna imam tia mian Farisi notakamo ni Pilatus,

⁶³ka' nambantil taena, “Tuan, inau'onmai se' tempo i tukang borek dauga' tumuo', Ia isian norobu tae-Na, ‘Moko daa tolu' ilio, Yaku' bo tumuo' soosoodo.’

⁶⁴Mbali' iya'a, posuu'kon mian mandagai baleanan iya'a pataka ilio kotolu'na, dako' murit-Na taka mamangan biibii-Na ka' mambantilkon na mian se' i Ia nipotuo'imo noko daa lapus. Ka' pimborekan men kokomburi'anna kani'i ba'idek tuu' tia men olukon.”

⁶⁵Taena i Pilatus na ko'ona i raaya'a, “Karaani'i a surudadu bo pandagaimuu. Rae' ka' dagai a baleanan iya'a pore-pore.”

⁶⁶Mbaka'i raaya'a nomae'mo tia surudadu, ka' i raaya'a nensegelmo watu men nongompodi baleanan iya'a ka' nandagai dako' singaonna mian.