Read Balantak Markus 1 Bible Online

Markus 1 - Balantak bible

Markus 1

¹Koi kani'imari a tumbene Lele pore men ringkat ni Yesus Kristus, men Anakna Alaata'ala.

²Lele iya'a nosida koi men ia tulis i Nabii Yesaya na kitapna, taena, “ ‘Imamat ini'imari! Yaku' bo momosuu' mian-Ku mongolukoni i kuu. Mian iya'a bo montoropoti salan-Muu.’

³Bo isiana sa'angu' mian na tano' maleas men mengeleelo'kon ka' mambantilkon, taena, ‘Toropoti a salan bona Tumpu; loosikon a salan bo Ko'ona.’ ”

⁴Koi men ia tulis i Yesaya, koiya'a uga' a tatakana i Yohanes Pansarani. Ia dumodongo na tano' maleas, ka' nuntundunkon lelena Tumpu, taena, “Sosoli ka' kadarai a gau'muu men ba'idek ka' i kuu tio saranion kada' Alaata'ala mangampuni dosamuu.”

⁵Mian na longkop libutan Yudea ka' giigii' mian na kota Yerusalem notaka na ko'ona. Raaya'a nonsosoli ka' nangkadarai wawauna men sala', ka' ia sarani i Yohanes na Weerkauna Yordan.

⁶Pakean ni Yohanes wuluna unta a niwawau, ka' boborna lolosna anit a niwawau. Kakaanna katumbang tia gurana wani'.

⁷Koi kani'imari a men ia bantilkon i Yohanes mian, taena, “Moko daa i yaku' bo taka i Ia men dauga' labi i yaku' a kuasa-Na. Dumudungku' mangalakai lui'na sapato-Napo, [1] yaku' koo'.

⁸Ai yaku' mansarani i kuu tia weer, kasee i Ia bo mansarani i kuu tia Alus Molinas.”

⁹Tempo iya'a, ai Yesus norumingkatmo na Nazaret na lipu' Galilea, notaka ni Yohanes. Yesus ia sarani i Yohanes na weerkauna Yordan.

¹⁰Sarataa i Yesus no' umuar na weer, Ia nimiile' langit nokobongkatian, ka' Alus Molinas koi marampatii nalau na waka-Na.

¹¹Kasi nokamporongoran a wurungna Alaata'ala nda'amari surugaa, tae-Na, “Koomo a Anak-Ku men kolingu'-Ku ka' i koo a men daa kokana'-Ku.”

¹²Noko daa iya'a, Alus Molinas nangandaarkonmo i Yesus na tano' maleas.

¹³Ia dongo-dongo patompulo' ilio na tano' maleas ka' ia topongi Ibiliis. Ia na tanga-tanga'na ayop malela', kasee malaa'ikatna Alaata'ala nansambai Ia.

¹⁴Noko daa i Yohanes nitarungkumo, taka i Yesus na Galilea mengelelekon Lele pore men ringkat na Alaata'ala,

¹⁵tae-Na, “Temponamo. Batomundo'anna Alaata'ala karani'mo. Sosoli ka' kadarai a gau'muu men ba'idek ka' parasayamo a Lele Pore men ringkat na Alaata'ala!”

¹⁶Tempona i Yesus nomae' noso'ole na Danau Galilea, Ia nimiile' i Simon tii Andreas moto'utus. Raaya'a pintanga' muntuong puka' na danau, gause palimangonna i raaya'a pupuka' susum.

¹⁷Taeni Yesus na ko'ona i raaya'a, “Mai i kuu, lolo' i Yaku', kada' poposidaon-Ku pumuka' mian.”

¹⁸Raaya'a liuliu namarerei puka'na ka' nongololo' i Yesus.

¹⁹Ndee-ndee'e Ia nimiile'mo i Yakobus tii Yohanes, anak ni Zebedeus, pintanga' montotobo'i puka'na na lalomna duangan.

²⁰Yesus liuliu nengeleelo' i raaya'a ka' raaya'a uga' namarereimo tamana men i Zebedeus tia mian men ia tamboi i raaya'a balimang na duangan, kasi nongololo'i Yesus.

²¹Noko daa koiya'a, ari Yesus notakamo na kota Kapernaum. Na ilio sabat, ai Yesus ninsoopmo na laigan bakitumpuan ka' nimisiso' mian.

²²Raaya'a kodaawan nongorongor pisiso' ni Yesus, gause pimisiso'-Na koi mian men kuasaan ka' poosasala' tia pimisiso'na wawa ukum Torat.

²³Tempo iya'a, isian sa'angu' mian men ia lampingi meena na lalomna laigan bakitumpuan iya'a. Mian iya'a nangkakaro', taena,

²⁴“Oo Yesus samba Nazaret, aupa a urusaan tii kai? Kabai i koo taka bo pinsilaka'i i kai? Inti'ionku se' i ime i koo: koo a men Molinas nda'ara'amari na Alaata'ala.”

²⁵Kasee ai Yesus nengerengeaki meena iya'a, taena, “pimporokot! Uarom i koo na mian kanono'!”

²⁶Meena iya'a ningirimpa-rimpa'konmo mian men ia lampingi, ka' nangkakaro', kasi no'umuar.

²⁷Wiwi'na mian men nimiile' nosamba'mo, tamban i raaya'a nopootundunii, taena, “Se', aupa inta ini'i? Sa'angu' pisiso' u'uru men kuasaan. Meenapo posuu'on-Na umuar, ka' raaya'a malolo' na Ko'ona.”

²⁸Liuliu notolele a wawau ni Yesus na longkop libutan Galilea.

²⁹Tonguar na laigan bakitumpuan iya'a, ari Yesus nomae'mo na laigan ni Simon tii Andreas. Ai Yakobus tii Yohanes uga' nomae'.

³⁰Taka inde'e, Ia takai monian ni Simon men sinana boroki'na tokotokol suminggar. Mian na laigan iya'a liuliu nambantilkon i Yesus.

³¹Ia nomae'mo na tokolanna wiwine iya'a, ningintoni limana ka' nangawangonkon. Wiwine iya'a liuliu nalesi'. Noko daa koiya'a wiwine iya'a nangkalesangmo i raaya'a.

³²Guntumalom, [2] niwawamo ni Yesus a wiwi'na mian men manggeo tia mian men lampingionna meena.

³³Wiwi'na mian na kota iya'a nobarimpung na soopanna laigan iya'a.

³⁴Ia nengelesi'imo mian biai' men biai' kaliangan a nggeona. Ka' Ia uga' numbuse'i meena biai'. Ai Yesus sian namatalai meena iya'a morobu, [3]gause raaya'a ninginti'imo i Ia.

³⁵Ma'ulo-ulop tuu', ilio dauga' pintung, Yesus nowangonmo ka' nomae' na liwana kota. Ia nomae' oloa na mian ka' nosambayang.

³⁶Kasee i Simon tia mian sambana mae' nansarak i Ia.

³⁷Sarataa ia rumpaki i raaya'a, raaya'a nambatilkonmo, taena, “Wiwi'na mian mansarak i Kuu.”

³⁸Kasee taeni Yesus, “Mai, kita rae' na dodongoan sambana, na kota men beebeel kaniaale'e, kada' inda'aa uga' ai Yaku' sida mengelelekon lele Pore, gause i Yaku' notaka bo pengelelekon Lele Pore.”

³⁹Kasi i raaya'a nomae' longkop libutan Galilea. Ia nengelelekon Lele Pore na laigan bakitumpuan, ka' numbuse'i meena men nangalampingi mian.

⁴⁰Tempo iya'a, isian sa'angu' mian kustaon[4] notaka ni Yesus, ka' nobanintuur na arop-Na. Ia nokitulung ni Yesus, taena, “Kalu i Kuu maloos, Kuu sida mengelesi'i i yaku'.”

⁴¹Tongkibit a noa ni Yesus nolingu'. Ia doekon a lima-Na nongkoyong mian iya'a, ka' norobu tae-Na, “Daa, Yaku' maloos. Bi poloe'mo i koo!”

⁴²Tempo iya'a uga', na'anumo a kustana mian iya'a. Ia liuliu nalesi'.

⁴³Liuliu i Yesus nomosuu' mian iya'a mae' na imamna Yahudi, ka' nomotoo, tae-Na,

⁴⁴“Imamatoon pore-pore! Alia i koo mambantilkon ni imepo, kasee rae' na imam ka' pipiile'kon na ko'ona se' kustaam daa na'anumo, Moko daa iya'a kasi rookon a kurbaan koi men ia posuu'kon i Musa na ukum Torat kada' manasa na mian se' kustaam tuutuu' na'anumo.”

⁴⁵Kasee mian iya'a nomae' nuntundunkon ka' nontolele'kon na mian biai' upa men nosida na wakana. Noko daa koiya'a, ai Yesus sianmo ningkakateda minsoop na kota. Ia somo na liwana kota, na tampat men sianta mianna. Mau koiya'a, mian na sanda' lembo' dauga' satakataka na Ko'ona.