Read Balantak Lukas 1 Bible Online

Lukas 1 - Balantak bible

Lukas 1

¹Teofilus men angga'ion! Biai'mo a mian nampari-pari nunsusun ka' nuntulis lelena upa giigii' men nosida na ko'onta,

²koi men ia tundunkon mian men daa nimiile' tumbe-tumbenapo upa men nosida, ka' komburi'na nengelelekon lele iya'a.

³Noko daa yaku' sarak pore-pore a upa men tuutuu'na nosida na tumbenapo, yaku' munsurikon pore kalu muntulis ka' mangawawau kitap men susunon pore-pore boni Tuan,

⁴kada' inti'ion ni Tuan se' upa men nipisiso'kon na ko'omuu, nono' tuutuu' kana'mo.

⁵Tempo batomundo'an ni Herodes na Yudea, isian imam men ngaanna i Zakharia. Ia tonsoop tompukanna imam Abia. Ngaanna boroki'na i Elisabet men lee' ni Imam Harun.

⁶Rua-rua' irana tutuo'na sintutu' tia po'uusna Alaata'ala, malolo' na potoo-Na ka' titiu'po sianta idekna i raaya'a.

⁷Kasee i raaya'a sian no'anakon, gause i Elisabet kamba' ka' uga' rua-rua' irana umurmo.

⁸Na sa'angu' tempo, tompukanna imam Abia a men bo balimang na Laiganna Alaata'ala, ka' i Zakharia bo pingilimang palimangonna Tumpu.

⁹Gause nokana' undi koi men doodoopo bo pinginti'ian too imam ime a men bo pingilimang, mbaka'ia uga' ninsoopmo na Laiganna Alaata'ala ka' nuntunu kamangian.

¹⁰Pintanga' i Zakharia muntunu kamangian na lalomna Laiganna Alaata'ala, giigii' mian nobarimpungmo na liwana ka' nosambayang.

¹¹Na tempo iya'a, malaa'ikatna Tumpu nintipiile'mo ni Zakharia kere-kerer paraas uanan na mesba puntunuan kamangian.

¹²Nimiile' men koiya'a, tongkodi' i Zakharia, mbaka' i ia nolayaonmo.

¹³Malaa'ikat iya'a norobumo taena, “Zakharia, alia layaon! Pa'ase'em na sambayaang daa ia loloikonmo Tumpu. Boroki'im bo mangamea'kon sa'angu' anak moro'one boko'oom, ka' i ia tiodaa ngaanion i Yohanes.

¹⁴Koo bo beles tuu', ka' uga' biai' a mian bo mongkobeleskon kongamea'anna.

¹⁵Ia bo sida mian moola' koi pimiile'na Alaata'ala. Ia sian sida minginum anggur kabai se' minginum upa kolio', ka' uga' na kompongpo i ia bo bariosonna Alus Molinas.

¹⁶Ia bo mimisiso' mian biai' na Israel kada' mule'kon malolo' na Alaata'ala, Tumpuna i raaya'a.

¹⁷Ia taka mongolukoni Tumpu ka' noana tia kuasana koi noa tia kuasa ni Elia. Ia bo mompooka'amatikon tama tia anakna ka' mombolii gau'na mian men ba'idek kada' sida mian ma'amat. Ia bo mingilimang koiya'a kada' daa mian batoropot bona Tumpu.”

¹⁸Zakharia norobumo na malaa'ikat iya'a taena, “Koi upa kada' yaku' sida mamarasaya men koiya'a? Yaku' langkai'mo ka' boroki'ku uga boroki'mo.”

¹⁹Ia simbati malaa'ikat iya'a taena, “Yaku' i Gabriel men balimang na Tumpu. Yaku' ia posuu' Tumpu morobu ka' mengelelekon lele pore kani'i na ko'oom.

²⁰Upa men yaku' porobukonmo bo sida kalu temponamo. Kasee ka' i koo sian mamarasaya, mbaka' i koo bo sida umu' pataka sida a men koi taengku'.”

²¹Tempo iya'a, biai' a mian inde'e na liwana mempeperai i Zakharia. Raaya'a samba' gause i Zakharia nanau' tuu' na lalomna Laiganna Alaata'ala.

²²Tempo i Zakharia no'umuar, ia sianmo ninsida norobu na ko'ona i raaya'a, mbaka' ia inti'imo i raaya'a se' i Zakharia nimiile'mo simpalaalung na lalomna Laiganna Alaata'ala. Ia somo mosaasiso' gause no'umu'mo.

²³Noko daa i Zakharia ningilimang palimangonna na Laiganna Alaata'ala, ia nomule'konmo na laiganna.

²⁴Sian paraa nanau', Elisabet nampaiwawamo. Koi lima' bitu'on ia sian nintipiile' na mian biai'.

²⁵Taena i Elisabet, “Tumpu nuntulungmo i yaku', gause i Ia nanganuikonmo maa'ku na mian biai'.”

²⁶Konoomna bitu'on a nampaiwawaan ni Elisabet, Alaata'ala nomosuu'mo malaa'ikat Gabriel mae' na Nazaret, sa'angu' kota na tano' Galilea,

²⁷mae' na sa'angu' laandue' men sianpo nontoo poobeel tia moro'one. Ngaanna laandue' iya'a i Maria. Ia ndoloi ni Yusuf men lee' ni Daud.

²⁸Malaa'ikat iya'a notakamo ni Maria ka' norobu taena, “Tabea' na ko'oom, wiwine men nibarakaati! Tumpu mandagai i koo.”

²⁹Nongorongor wurung koiya'a, tongkodi' i Maria. Ia nompoo'inurutikonmo se' upa a aratina tabea' iya'a.

³⁰Taena malaa'ikat, “Maria, alia layaon, gause i koo kolingu'na Alaata'ala.

³¹Koo bo mampaiwawa ka' mangamea'kon sa'angu' anak moro'one men tiodaa ngaanioon i Yesus.

³²Ia bo balaki' a kuasa-Na ka' bo ngaanon Anakna Alaata'ala men na ko'alayoan. Tumpu Alaata'ala bo mongorookon na Ko'ona Batomundo'an ni Daud men puli-Na.

³³Ia bo pontomundo'i lee' ni Yakub pataka sidutu ka' batomundo'an-Na sian kokabu-kabusanna.”

³⁴Taena i Maria na malaa'ikat iya'a, “Koi upa bo kosidana men koiya'a, gause i yaku' sianpo langakai'an?”

³⁵Ia simbati malaa'ikat iya'a taena, “Alus Molinas bo malau taka na ko'oom, ka' kuasana Alaata'ala men na ko'alayo'an bo mandagai i koo. Mbali' iya'a, Anak men bo ngamea'konoon tio ngaanon Molinas, Anakna Alaata'ala.

³⁶Imamat ini'imari! Ai Elisabet, poto'utusaan men ngaanonna mian se' kamba', mase nampaiwawamo ka' bo mangamea'kon sa'angu' anak moro'one. Koini'i kompongna noommo bitu'on.

³⁷Gause sianta upa men sian pokoonna Alaata'ala wawauon.”

³⁸Taena i Maria, “Yaku' kani'i mase tongko' ata'na Tumpu. Bi sida na wakangku koi wurungmuu kanooro'o.” Kasi malaa'ikat iya'a namarerei i Maria.

³⁹Sian paraa nanau', ai Maria liuliu nomae'mo na sa'angu' kota men na buu'na Yehuda.

⁴⁰Taka na laigan nari Zakharia, ia ninsoopmo ka' nantabe'i i Elisabet.

⁴¹Sarataa i Elisabet nomorongor tabea' ni Maria, anak men na kompongna nogumiokmo, ka' i Elisabet uga' ia bariosmo Alus Molinas.

⁴²Ia norobumo boolak taena, “Tumpu nambarakaati i koo labi wiwine sambana, ka' nambarakaati Anak na kompoong kanono'.

⁴³Ime i yaku' kani'i mbali' daa leleongionna sinana Tumpungku?

⁴⁴Sarataa yaku' nomorongor tabea'am, anak men na kompongku kani'i lako-lako nogumiok gause nobeles.

⁴⁵Barakaatan i koo, gause i koo parasaya se' upa men ia porobukon Tumpu na ko'oom bo sidakonon-Na.”

⁴⁶Taena i Maria, “Yaku' muntunde' Tumpu,

⁴⁷ka' noangku basukuur gause Alaata'ala, Pansalamat kon i yaku'.

⁴⁸Ia ningimamatmo i yaku', ata'-Na men talalais. Supu koini'i-waara'ana giigii' mian bo mangaan se' i yaku' nibarakaati,

⁴⁹gause Alaata'ala men Pungkuasai nangawawaumo upa men angga'an tuu' bona ingku'. Alaata'ala iya'a molinas.

⁵⁰Ka' lingu'-Na bo rookonon-Na sunsun ka' sunsun na mian men malolo' na Ko'ona.

⁵¹Na wawau-Na men kosamba', Ia mimpipiile'kon kuasa-Na mantabunsalang giigii' mian men mintidaa-daa.

⁵²Ia mamalaukon tomun-do' men pintanga' batomundo', ka' manganakat mian men sian angga'ion.

⁵³Men kololuan taraion-Na giigii' men pore bi kalabian, ka' Ia momosuu' mian kupangon mae' tia lima sompulo'.

⁵⁴Ia nuntulung Israel, ata'-Na, gause koiya'a a toon-Na men Ia toonkonmo na pulinta.

⁵⁵Tumpu sian mongkolimbo'i toon-Na. Ia molingu'kon i Abraham tia lee'na pataka sidutu.”

⁵⁶Maria nodumodongo ni Elisabet koi tolu' bitu'on a nau'na, kasi nomule'kon na dodongoanna.

⁵⁷Sarataa temponamo bitu'on ni Elisabet mindompu', mbaka'i ia nangamea'konmo sa'angu' anak moro'one.

⁵⁸Tempo pootolodoianna ka' poto'utusanna nongorongor se' Tumpu nongkolingu'kon i Elisabet, raaya'a uga' nobelesmo koi i Elisabet.

⁵⁹Sarataa walu'mo ilio a nongamea'anna anak iya'a, pootolodoianna ka' poto'utusanna notakammo munsunat anak iya'a. Raaya'a mingkira' mangaani anak iya'a i Zakharia koikoimo tia ngaanna tamana.

⁶⁰Kasee taena sinana anak iya'a, “Alia! Ia tiodaa ngaanion i Yohanes.”

⁶¹Taena i raaya'a ni Elisabet, “Poto'utusanmuu sian isian ngaan men koi nooro'o.”

⁶²Kasi i raaya'a mosaasiso' mimikirawar ni Zakharia too ime a bo pangaanina anakna.

⁶³Zakharia nama'ase'mo watu bo puntulisan ka' nuntulis koi kani'imari: “Ngaanna i Yohanes.” Raaya'a giigii' nosamba'mo.

⁶⁴Na tempopo iya'a i ia lako-lako ninsida norobu soosoodo ka' nuntunde' Alaata'ala.

⁶⁵Mbaka' natakutmo a giigii' mian men pootolodoi tii raaya'a. Kasi upa men nosida iya'a notolele na longkop libutan na buu'na Yudea.

⁶⁶Giigii' i raaya'a men nomorongor lele iya'a ningintomkonmo ka' norobu taena, “Se' bo sida upa a anak kani'i na ilio komburi'?” Gause Tumpu mandagai i ia.

⁶⁷Zakharia, tama ni Yohanes, ia bariosmo Alus Molinas. Ia nuntundunkon upa men bo sida na ilio komburi', taena,

⁶⁸“Tontunde' a Tumpu, Alaa-ta'alana lipu' Israel, gause i Ia muntulung mian-Na kada' salamat.

⁶⁹Ia mongorookon na ko'onta' Pansalamatkon men tingkai, men ringkat na lee' ni Daud men ata'na Tumpu,

⁷⁰koi men mbaripian ia tundunkon nabii men molinas.

⁷¹Kita bo tulungonna Pansalamatkon iya'a kada' sianmo kuasaionna giigii' mian men maso'kon i kita.

⁷²Alaata'ala mimpipiile'kon lingu'-Na na pulinta, ka' toon-Na men molinas iya'a loloikonon-Na.

⁷³Ya'amo a sumpa' men Ia toonkonmo ni Abraham pulinta se' i Ia bo mongkolingu'kon i kita,

⁷⁴kada' kita tonsapu na mian men maso'kon i kita ka' sianmo pata-patakut monsoosa' i Ia,

⁷⁵kasee i kita sidamo monsoosa' i Ia tia noa men maloos ka' molinas tempo i kita dauga' tumuo' na tano' balaki'.

⁷⁶Ka' i koo, anakku, bo ngaanonna mian nabiina Alaata'ala men na ko'alayo'an, gause i koo bo sumalan mongolukoni Tumpu ka' mantatas salan bo Ko'ona.

⁷⁷Koo bo mimisiso'kon na mian-Na sasalanna Alaata'ala mansalamatkon i raaya'a tia mangampuni dosana i raaya'a.

⁷⁸Barakaat tia lingu'na Alaata'ala bo taka na ko'onta' mansalamatkon i kita. Koi ruarna ilio ma'uloulop men ringkat na ko'alayo'an,

⁷⁹koiya'a uga' i Ia bo mintingkari giigii' mian men tumuo' na kapintungan ka' layaonkon lapus, kasi momosalan i kita na salan men ma'amat.”

⁸⁰Anak ni Zakharia iya'a no'uminsurmo ka' imaanna kaekae' moonggor. Ia dumodongo na tano' maleas pataka tempona i ia umuar mintipiile' na lipu' Israel.