Read Balantak Lukas 3 Bible Online

Lukas 3 - Balantak bible

Lukas 3

¹Na kosompulo'na lima' taun batomundo'an ni Kaisar Tiberius, Pontius Pilatus nosidamo gubernuur na libutan Yudea, ka' i Herodes montomundo'i libutan Galilea. Filipus men utus ni Herodes montomundo'i libutan Iturea ka' libutan Trakhonitis, ka' i Lisanias montomundo'i libutan Abilene.

²Na taun iya'a, Hanas tii Kayafas nosida Imam Moola'. Tempo iya'a Alaata'ala norobumo na tano' maleas na ko'ona i Yohanes men anak ni Zakharia.

³Mbaka' nomae'mo i Yohanes na longkop tano' Yordan ka' nuntundunkon lelena Tumpu taena, “Sosoli ka' kadarai a gau'muu men ba'idek, ka' i kuu tio saranion kada' Alaata'ala mangampuni dosamuu.”

⁴Pisiso' ni Yohanes iya'a sintutu' koi men nitulis na kitap ni Nabii Yesaya men koi kani'imari: “Bo isian sa'angu' mian na tano' maleas mengeleelo'kon ka' mambantilkon taena, ‘Toropoti a salan bona Tumpu; loosikon a salan bo Ko'ona.

⁵Sanda' leokna bo tabunion ka' sanda' buu'na bo lemaption. Salan men mangkailekut bo loosion, ka' salan men mangkailebok bo tabunion.

⁶Giigii' mian na longkop tano' balaki' bo mimiile' pansalamatkonna Alata'ala mian.’ ”

⁷Biai' a mian men notaka ni Yohanes mikisarani. Taena i Yohanes, “Wee i kuu men koi lee'na ule ba'idek! Ime a men namban tilkon na ko'omuu se' i kuu sian kana'onna ukumanna Alaata'ala na ilio komburi'?

⁸Pipiile'kon a wawaumuu se'i kuu daa nonsosolimo ka' nangkadaraimo gau'muu men ba'idek! Alia mongooskon na noamuu se' i kuu bo tonsapu na ukuman montookon i Abraham daa pulimuu. Bantilkononku na ko'omuu se' watupo karaani'i sida wawauonna Alaata'ala bo lee' ni Abraham!

⁹Usong noko toropotmo bo pantara' kau pataka na wakatna. Sanda' kau men sian miwoo'kon woo' men pore sabole bo tara'ion ka' tibarkonon na apu.”

¹⁰Mian biai' nimikirawarmo ni Yohanes taena i raaya'a, “Ka' kalu koiya'a, upa a men tiodaa wawauonmai?”

¹¹Ia simbati i Yohanes taena, “Ime a men isian bokukum rurua', ia tiodaa mongobosii mian men sian bokukumna, ka' i ime a men daa kakaanan, ia uga' tiodaa poo'obos.”

¹²Isian uga' toropii pagawena pajak men notaka mikisarani. Raaya'a nimikirawar ni Yohanes taena, “Guru, upa a men tiodaa wawauonmai?”

¹³Taena i Yohanes, “Alia mama'ase' labian koi men nibantilkonmo na ko'omuu.”

¹⁴Ka' isian uga' toropii surudadu men nimikirawar na ko'ona taena i raaya'a, “Ka' i kai, upa a men tiodaa wawauonmai?” Ia simbati i Yohanes taena, “Alia aribiru ka' alia mangakali mian kada' taraionna upa-upa, kasee ala tongko' koi tambomuu.”

¹⁵Tempo iya'a, noana mian biai' mansarui i Yohanes, too iamo a Tomundo' Pansalamatkon men peperaionna i raaya'a.

¹⁶Mbaka' i Yohanes norobumo na ko'ona i raaya'a taena, “Yaku' mansarani i kuu tia weer, kasee i Ia men balaki'na kuasa tii yaku' bo taka, ka' mangalakaipo kookootna sapato-Na, yaku' koo'. Ia bo mansarani i kuu tia Alus Molinas ka' tia apu.

¹⁷Ia noko into-intonmo ikiran bo pantaapi giigii' gandum-Na pataka moloe'. Gandum bo soopkonon-Na na alang-Na, kasee ota'na bo tunuon-Na na apu men sian pokoon papateion.”

¹⁸Biai' kaliangan a nambantili ni Yohanes mian biai' na tempo ia nengelelekon Lele Pore.

¹⁹Kasee ka' i Yohanes nambantili i Herodes, men tomundo' na libutan Galilea, gause i Herodes nosuo' tii Herodias boroki'na utusna, ka' uga' gause giigii' idek men ia wawaumo,

²⁰mbaka' i Tomundo' Herodes tongko' nunturangi idekna soosoodo, gause i ia nonsoopkon i Yohanes na tarungkuan.

²¹Sarataa giigii' mian iya'a sarani Yohanes, Yesus uga' nisarani. Noko daa i Yesus nisarani pintanga' i Ia basambayang, ngit nokobongkatianmo.

²²Alus Molinas nalaumo na Ko'ona marampatii. Kasi nokamporongoran a wurungna Alaata'ala nda'amari langit tae-Na, “Koomo a Anak-Ku men kolingu'-Ku, ka' i Koo a men daa kokana'-Ku.”

²³Na tempo i Yesus nuntumbei palimangon-Na, umur-Na toro tolumpulo'mo taun. Koi pinginti'ina mian, Ia anak ni Yusuf, Yusuf anak ni Eli,

²⁴Eli anak ni Matat, Matat anak ni Lewi, Lewi anak ni Malkhi, Malkhi anak ni Yanai, Yanai anak ni Yusuf,

²⁵Yusuf anak ni Matica, Matica anak ni Amos, Amos anak ni Nahum, Nahum anak ni Hesli, Hesli anak ni Nagai,

²⁶Nagai anak ni Maat, Maat anak ni Matica, Matica anak ni Simei, Simei anak ni Yosekh, Yosekh anak ni Yoda,

²⁷Yoda anak ni Yohanan, Yohanan anak ni Resa, Resa anak ni Zerubabel, Zerubabel anak ni Sealtiel, Sealtiel anak ni Neri,

²⁸Neri anak ni Malkhi, Malkhi anak ni Adi, Adi anak ni Kosam, Kosam anak ni Elmadam, Elmadam ana ni Er,

²⁹Er anak ni Yesua, Yesua anak ni Eliezer, Eliezer iya'a anak ni Yorim, Yorim anak ni Matat, Matat anak ni Lewi,

³⁰Lewi anak ni Simeon, Simeon anak ni Yehuda, Yehuda anak ni Yusuf, Yusuf anak ni Yonam, Yonam anak ni Elyakim,

³¹Elyakim anak ni Melea, Melea anak ni Mina, Mina anak ni Matata, Matata anak ni Natan, Natan anak ni Daud,

³²Daud anak Isai, Isai anak ni Obed, Obed anak ni Boas, Boas anak ni Salmon, Salmon anak ni Nahason,

³³Nahason anak ni Aminadab, Aminadab anak ni Admin, Admin anak ni Arni, Arni anak ni Hezron, Hezron anak ni Peres, Peres anak ni Yehuda,

³⁴Yehuda anak ni Yakub, Yakub anak ni Ishak, Ishak anak ni Abraham, Abraham anak ni Terah, Terah anak ni Nahor,

³⁵Nahor anak ni Serug, Serug anak ni Rehu, Rehu anak ni Peleg, Peleg anak ni Eber, Eber anak ni Salmon,

³⁶Salmon anak ni Kenan, Kenan anak ni Arpakhsad, Arpakhsad anak ni Sem, Sem anak ni Nuh, Nuh anak ni Lamekh,

³⁷Lamekh anak ni Metusalah, Metusalah anak ni Henokh, Henokh anak ni Yared, Yared anak ni Mahalaleel, Mahalaleel anak ni Kenan,

³⁸Kenan anak ni Enos, Enos anak ni Set, Set anak ni Adam, Adam anakna Alaata'ala.