Read Balantak 2 Korintus 6 Bible Online

2 Korintus 6 - Balantak bible

2 Korintus 6

¹Koi moto lulusan men sa'angu' palimangon, kai mungururanii kuu kada' i kuu alia mandalia kaporeanna Alaata'ala men kuu labotmo mongo' tongko' bo penta' na ngaya-ngaya.

²Gause Alaata'ala nangaan tae-Na, “Na tempo men Yaku' mingkira', Yaku' nongorongormo i kuu; ka' na ilio pansalamatkonan-Ku Yaku' nangkaba'mo i kuu.” Men tuutuu'na, koini'i mase tempo men daa Alaata'ala dauga' mingkira' muntulung i kuu. Koini'imo mba'a a ilio pansalamatkonan.

³Kai mimpari-pari dako' men kai limang kokoo'na mian, kada' palimangonmai sian poposala'on.

⁴Kasee men tuutuu'na, na biai' kaliangan upa-upa kai mimpipiile'kon se' kai mase papalimangna Alaata'ala men mokotaan. Maupo i kai mongololongi repaan ka' sempor, kai poko salanimo tia noa men sian sungkol.

⁵Kai nipapolosi, nitarungku, toraponna mian. Kai balimang kookooan, tempo-tempo sian motokol, ka' tempo-tempo uga' molulu.

⁶Kai montombonoi noa men maloos, poo'inti'i, sian sungkol, ka' uga' montombonoi noa men pore na mian. Kai mongololoikon koi taena Alus Molinas, ka' isian polingu' men sian alu-alum.

⁷Kai mengelelekon lele men kana' ka' tumuo' bariosonna Alaata'ala. Kai mingilimang men kana' bookoi ebanganmai bo pintimbangi kabai se' bo pansalangi wakamai.

⁸Kai angga'ion, kasee uga' irokon. Tunde'on ka' uga' potaekonon. Mau mune' i kai mian maloos, kasee ngaanionna mian se' mimborek.

⁹Kai bookoi sian tongaan, kasee uga' inti'ionna mian. Kai baagia lapus, kasee uga' dauga' tumuo'. Mau mune' i kai ukumon ka' pari-parion papateion, kasee i kai sian nipapatei.

¹⁰Mau mune' noamai poposiongo'on, kasee i kai uga' sinampang beles. Kai kampiile'an talalais, kasee i kai ninsidakonmo mian biai' kupangon. Kai kampiile'an sianta upaon, kasee men tuutuu'na i kai montombonoi giigii' upa.

¹¹Utu-utus samba Korintus! Kai sian morobu wuni-wuni na ko'omuu. Kai nombongkatimo noamai na ko'omuu.

¹²Kai sian montotokurung i kuu, tongko' i kuu a men daa nontotokurungmo i kai.

¹³Koini'i patalai i yaku' koi se' morobu na anakku. Pa'ase'onmai kada' i kuu uga' mombongkati noamuu na ko'omai.

¹⁴Alia poopaari tia mian men sian parasaya ni Yesus. Men koiya'a sianta kana'na. Sida mbali' a wawau men kana' koti'angu' tia wawau men ba'idek? Sida mbali' a ruar koti'angu' tia pintung?

¹⁵Sida mbali' i Kristus pooka'amat tia Belial? Upa mbali' a pookokoianna mian parasaya tia mian men sian parasaya?

¹⁶Upa mbali' a pookokoianna laiganna Alaata'ala tia pimbolianan? Kita mase laiganna Alaata'ala, Alaata'ala men tumuo'. Ia nangaan tae-Na, “Yaku' bo dumodongo tii raaya'a, ka' tumuo' ruru-ruru' tii raaya'a. Yaku' bo sida Alaata'alana i raaya'a, ka' raaya'a bo sida mian-Ku.”

¹⁷“Mbaka' parerei a mian men sian parasaya iya'a, ka' alia poololo' tii raaya'a. Alia montopongi munsuduk upa men koo' sida sudukon, kada' daa i kuu labotion-Ku.”

¹⁸“Yaku' bo sida Tamamuu, ka' i kuu bo sida anak-Ku moro'one, ka' anak-Ku wiwine.” Koiya'a taena Tumpu men kuasaan tuu'