Read Balantak Ibrani 10 Bible Online

Ibrani 10 - Balantak bible

Ibrani 10

¹Ukum Torat tongko' simpaatukanna barakaat men bo taka iya'a, taasi'po men tuutuu'na. Mbali' tia kurbaan men koikoimo men sinampang kurbaankonon sanda' taun, Ukum Torat sian sida mompopokalepu i raaya'a men taka bakitumpu.

²Kalu se' mian men bakitumpu iya'a tuutuu' noloe'mo a dosana, raaya'a sianmo munsurikon dosaon, ka' munsurikon sianmo mosoo momokela kurbaan.

³Kasee men tuutuu'na kurbaan men nikurbaankon sanda' taun iya'a tongko' mompopo'inau'kon mian na dosana i raaya'a,

⁴gause rara'na sapi' moro'one tia rara'na bembe' moro'one sian momoko manganui dosa.

⁵Mbali' na tempo i Kristus taka na tano' balaki', Ia norobu na Alaata'ala, tae-Na: “Kuu sian mingkira'kon kurbaan ka' soor, kasee i Kuu ninsidakonmo i Yaku' montombonoi waka.

⁶Kuu sian mingkira'kon kurbaan men tunuon kabai kurbaan men bo pontololoki dosa.

⁷Kasi Yaku' norobu taeng-Ku', ‘Alaata'ala, ni'imo i Yaku'! Yaku' taka bo mingilimang men kikira'-Muu, koi men nitulismo na lulunanna kitap men nuntundunkon wakang-Ku.’ ”

⁸Tumbena i Kristus norobu tae-Na, “Kuu sian mingkira'kon kurbaan ka' soor. Kuu sian mingkira'kon kurbaan ayop men tunuon tia kurbaan bo pontololoki dosa.” Kristus norobu koiya'a, maupo uga' giigii' kurbaan iya'a niwawaumo sintutu' koi na ukum Torat.

⁹Noko daa iya'a Kristus norobu tae-Na: “Alaata'ala! Ni'imo i Yaku'. Yaku' taka bo mingilimang men kikira'-Muu.” Mbaka' Alaata'ala nansapui toon men olukon iya'a, ka' nombolosi tia toon men korua'na.

¹⁰Yesus Kristus daamo ningilimang upa men kikira'na Alaata'ala ka' nongorookonmo waka-Na bookoi kurbaan see tongko' pensan pataka sidutu. Gause kurbaan iya'a, mbaka' dosanta giigii' noloe'mo.

¹¹Sanda' miam kumekerer mansalankon limangna sanda' ilio ka' sinampang momokela kurbaanna men koikoimo. Kasee kurbaan iya'a sian sida manganui dosa.

¹²Kasee i Kristus nomokela tongko' sa'angu' kurbaan bo pontololoki dosa. Noko daa nomokela kurbaan iya'a, Kristus no'umoruangmo pataka manau' na paraas uananna Alaata'ala.

¹³Ka' koini'i Kristus tongko' mempeperai tempona Alaata'ala mompoporungku' giigii' mian men mangka'idek i Kristus sida malolo' ni Ko'ona.

¹⁴Kristus tongko' pensan nongorookon waka-Na bookoi kurbaan ka' i Ia nompopokana' pataka manau' mian men popokalepuion.

¹⁵Men koiya'a Alus Molinas uga' nompotuutuu' na ko'onta'.

¹⁶Ia norobu tae-Na, “Koi kani'imari a toon men bo toonkonon-Ku na ko'ona i raaya'a ni'imarian: Yaku' bo monsoopkon ukum-Ku na noana i raaya'a, ka' muntulis na noana i raaya'a!” Koiya'a wurungna Tumpu.

¹⁷Alaata'ala uga' norobu tae-Na, “Yaku' sianmo minginau' dosana ka' idekna i raaya'a”.

¹⁸Kalu se' giigii' iya'a ampunionmo, mbaka' mosoomo momokela kurbaan bo pontololoki dosa.

¹⁹Utu-utus! Gause kolapusan ni Yesus iya'a mbaka' i kita koini'i momoko miminsoopi Lokis Molinas Tuu'.

²⁰Yesus noko pantasmo sa'angu' salan men u'uru bo ko'onta'. Salan iya'a lumiu na toik pongola' ka' mangawawa i kita na tutuo' men pore. Salan iya'a ia tatas i Yesus tia waka-Na.

²¹Kita koini'i montombonoi sa'angu' Imam Moola' Tuu' bo pantanaasi Laiganna Alaata'ala.

²²Mbaka' maimo kita taka na Alaata'ala tia noa men maloos ka' imaan men moonggor, ka' noa men tuutuu' parasaya gause niloe'imo na upa men ba'idek, ka' wakanta nitogisimo tia weer molino.

²³Kita tio sinampang mompotuutuu' men kita ooskonmo, gause Ia men nontoonkon mase malolo'.

²⁴Ka' mai kita poo'imamat kada' molingu'kon simbaya'ta ka' mingilimang men pore.

²⁵Alia i kita kobude'an poorimpungi bakitumpu koi men malia' wawauonna toropii mian. Kasee mai kita poo'ururanii tontuko tuu' na tempo koini'i, gause kuu inti'imo se' ilio kotakaanna Tumpu kaekae' karani'.

²⁶Gause kalu i kita sawauwau dosa, kasee i kita noko pinginti'imo pisiso' men kana', mbaka' sianmo isian kurbaan men bo pontololoki dosanta.

²⁷Men daa isian na ko'onta' somo mempeperai pungukumian men koriri' ka' apu men lumeleaambang muntunu giigii' mian men mangka'idek Alaata'ala.

²⁸Kalu rua' kabai tolu' mian mompotuutuu' se' isian mian men mongkosiankon ukum men ia tadulkon i Musa, mbaka' mian iya'a tio ukumon pate men sianta lino-linoan.

²⁹Upa mune' kalu rawatna ukuman men rookonon na mian men sian mangangga'i Anakna Alaata'ala, men munsurikon sianta angga'na a rara'na toonna Alaata'ala men nongoloe'i dosana! Ia sian mangangga'i Alus Molinas men pu'una kaporean.

³⁰Kita minginti'i i Ia men norobu taena, “Yaku' a pangawalos! Yaku' bo mangawalos sala'na mian!” Ka' men norobu taena, “Tumpu bo mungukumi mian-Na.”

³¹Koriri' tuu' kalu Alaata'ala men tumuo' mansangkumi ka' mungukum i kita.

³²Inau' a tutuo'muu men mbaripian. Na tempo iya'a, sarataa ruarna Alaata'ala nunguruari i kuu, kuu nongololongi solon-solong men balaki', kasee i kuu nomoko bakitaan.

³³Mbaripian i kuu ni'iroki ka' niwawaukon men sian pore na aropna mian biai'. Isian uga' i kuu men tonsoop nangkaba' i raaya'a men niwawaukon koiya'a.

³⁴Ka' i kuu tonsoop nunsurikon repaanna mian men nitarungku. Na tempo kupangmuu ni'omuru, kuu nangalabot iya'a tia noa pore, gause i kuu ninginti'i se' kuu i dauga' montombonoi upa-upa men pore tuu' ka' men mantaan pataka manau'.

³⁵Mbaka' alia babata. Kalu i kuu sinampang parasaya, mbaka' isian dale' men balaki' bo ko'omuu!

³⁶Kuu tio moko pera kada' moko daa i kuu mingilimang pingkira'na Alaata'ala, kuu mandapot upa men Ia toonkon iya'a.

³⁷Gause na Alkitaap isian nitulis, “Sianmo paraa manau', Ia men bo taka iya'a, daa takamo Ia sian monsompo' kotakaan-Na.

³⁸Mian men tumuo' mase mian men popokana'on-Ku gause parasaya na Ingku'. Kasee kalu i ia mongkokundai i Yaku', mbaka' i ia sianmo kokana'-Ku.”

³⁹Kasee i kita taasi'po mian men mongkokundai i Ia ka' silaka'. Kita mase mian men parasaya na Alaata'ala ka' mantausi tutuo' men pore.