Read Balantak Ibrani 2 Bible Online

Ibrani 2 - Balantak bible

Ibrani 2

¹Mbaka' kita tio tuutuu' mingimamat pisiso' men kita poko rongormo, dako' i kita mansaukon kaparasaya'anta.

²Potuun men ia takakon malaa'ikat na pulinta tuutuu', mbaka' mian men sian ningimamat ka' sian nomorongori nandapot ukuman men sintutu' bo ko'ona.

³Upa mune' kalu kita sian, mingimamat lele men pore tuu', men mansalamatkon i kita? Kita sabole kana'onna ukuman. Tumbena lele iya'a ia poko bantilkonmo Tumpu ka' ia potuutuu' mian men nomorongormo i Ia.

⁴Alaata'ala uga' nompotuutuu' i raaya'a tia nangawawau biai' kaliangan oosan men kosamba', upa men sian dele, ka' kuasaan, ka' tia nongoboskon barakaat men ia rookon Alus Molinas koi men kikira'-Na.

⁵Taasi'po malaa'ikat a men ia sidakon Alaata'ala bo pinginti'i dunia ni'imarian men kita tundun kani'i.

⁶Na Alkitaap isian mian nangaan koi kani'imari: “Upa mbali' a mian mbali' inau'on-Muu? Upa mbali' a mian mbali' imamaton-Muu?

⁷Kuu ninsidakon i raaya'a koo' tia koi malaa'ikat. Kuu nangangga'i i raaya'a ka' nongorookon oruangan men tongaan ka' umangga'.

⁸Kuu ninsidakonmo giigii' upa sian momoko ba'upa na ko'ona.” Gause kalu ningaan se' Alaata'ala ninsidakon giigii' upa malolo' na ko'ona, aratina sianta sa'angu'po men sian malolo' na mian. Mau mune' koiya'a, koini'i kita sianpo nimiile' giigii' upa malolo' na mian.

⁹Kasee i kita nimiile'mo i Yesus mantanaasi! Sarataa Alaata'ala ninsidakon i Ia kodi-kodi' koo' tia koi malaa'ikat, koini'i kita piile'mo se' Alaata'ala ninsidakonmo i Ia tongaan ka' angga'ion gause nongololongimo repaan pataka nolapus. Gause kaporeanna Alaata'ala mbaka' i Ia a men nongololongi kolapusan bona giigii' mian.

¹⁰Kana'mo a Alaata'ala ninsidakon i Yesus kalepu gause nongololongi repaan. Alaata'ala ninsidakon giigii' upa bo Ko'ona. Ia ninsidakon mian biai' sida parasaya ni Yesus ka' munsuri kobalaki'an-Na. Yesus a men nantatas salan bona mian biai' kada' salamatkonon.

¹¹Yesus ninsidakon tutuo'na mian sianmo bariosonna dosa. Ka' mian men sianmo bariosonna dosa iya'a tii Yesus men ninsidakon koiya'a koikoimo montombonoi sa'angu Tama. Mbali' i Yesus sian makamaa' mompotuutuu' i raaya'a bo utus-Na.

¹²Yesus norobu na Alaata'ala tae-Na, “Yaku' bo minsidakon ngaan-Muu tolele na utus-Ku. Yaku' no muntunde' i Kuu na lalomna jama'at.”

¹³Tae-Na soosoodo, “Yaku' tongko' mongooskon Alaata'ala.” Ka' i Ia uga' nangaan tae-Na, “Ni'imo i Yaku' tia anak men ia rookonmo Alaata'ala na ingku'.”

¹⁴Gause mian men ningaan anak iya'a mase isian waka men bo lapus, mbaka' i Yesus uga' sida koikoimo tii raaya'a ka' tumuo' koi mian. Ia nangawawau koiya'a kada' tia kolapusan-Na Ia sida minsilaka'i Ibiliis men mantakakon kolapusan.

¹⁵Wawau ni Yesus minsidakon mian men na giigii' tutuo'na munsuri nipo'ata' gause layaonkon kolapusan sida sianmo layaon.

¹⁶Taasi' malaa'ikat a men ia lawei i Yesus, kasee lee' ni Abraham.

¹⁷Koiya'a mbali' na giigii' upa i Ia tio sida koikoimo tia utus-Na kada' i Ia sida Imam Moola' men mingilino-linoi mian ka' Ia malolo' na Alaata'ala. Ia ninsidakon mian men dosaon pooka'amat tia Alaata'ala.

¹⁸Gause i Ia nongololongimo repaan tempo nitopongi, mbaka' i Ia sida mangalawei mian men pintanga' topongion.