Read Balantak Ibrani 8 Bible Online

Ibrani 8 - Balantak bible

Ibrani 8

¹Tukona giigii' tundunan men nitundunkon kani'i mase muntundunkon se' i kita isian Imam Moola' men koiya'a, men umoruang paraas uananna Alaata'ala Men Kuasaan Tuu' men isian na surugaa.

²Ia balimang bookoi Imam Moola' na Lokis Molinas men isian na lalomna Kema men tuutuu'na, men ia pokerer Tumpu, taasi'po ia pokerer mian.

³Sanda' imam moola' ninakat bo pongorookon kurbaan ka' soor bona Alaata'ala. Koiya'a uga' a Imam Moola' kani'i. Ia tio isian upa bo rookonon-Na.

⁴Kalu se' i Yesus isian na tano' balaki' kani'i, Ia sabole sian sida bo imam, gause isianmo imam men bo pongorookon kurbaan koi men tio wawauon na ukum Torat.

⁵Palimangon men ia limang i raaya'a bookoi imam mase tongko' simpaatukanna kabai se' loolung na upa men isian na surugaa. Koiya'a mbali' ia poko bantilkonmo Alaata'ala mbaripian ni Musa, na tempo i Musa boomo momokerer Kemana Tumpu. Taena Alaata'ala, “Imamat pore-pore! Giigii' iya'a tio wawauoon koi men nipoko pisiso'konmo na ko'oom na wawona buu'na.”

⁶Kasee koini'i i Yesus nandapotmo palimangon men umangga'na tia imam na tano' balaki' kani'i, gause i Ia nosidamo topobisarana toon men porena tia toon men olukon. Toon iya'a a porena tia toon men olukon gause Alaata'ala nontoonkonmo men porena bo ko'onta.

⁷Kalu se' toon men olukon sianta men sala'na, mbaka' mosoomo isian toon men korua'na.

⁸Kasee Alaata'ala nansasala' mian-Na, tae-Na, “Sabole bo taka a tempona, Yaku' bo mantakakon toon men u'uru bona lipu' Israel, ka' lipu' Yehuda.

⁹Taasi' koi men Yaku' toonkonmo pulina i raaya'a na tempo i Yaku' nimbibit ka' nantandan pulina umuar na tano' Mesir. Pulina sian malolo' na toon men Yaku' toonkon i raaya'a, mbali' i Yaku' sian ningimamat i raaya'a.

¹⁰Kasee koi kani'imari a toon men bo wawauon-Ku na lipu' Israel na ilio men bo taka: Yaku' bo minsidakon i raaya'a minginti'i manganaa' ukum-Ku na noana i raaya'a, ka' muntulis na noana i raaya'a. Yaku' bo sida Alaata'alana i raaya'a, ka' i raaya'a bo sida mian-Ku.

¹¹Raaya'a mosoo mimisiso' simbaya'na i raaya'a, ka' mambantilkon na utusna, ‘Alaka' inau' a Tumpu.’ Gause i raaya'a giigii', morio' tia moola', bo minginti'i i Yaku'.

¹²Yaku' bo mingilino-linoi sala'na i raaya'a, ka' sianmo minginau' dosana i raaya'a.”

¹³Tempo Alaata'ala nuntundunkon toon men u'uru, Ia nambantilkon toon men olukon iya'a nosidamo manau', ka' men nosidamo manau' iya'a, uga' boomo penta'.