Read Balantak Wahyu 18 Bible Online

Wahyu 18 - Balantak bible

Wahyu 18

¹Noko daa iya'a, yaku' piile' isian malaa'ikat men sambanaan nda'amari surugaa. Ia kuasaan balaki' ka' wakana leap tarang munguruari tano' balaki'.

²Ia mangkakaro' taena, “Kabus nokobaraba'ian a Babel, kota men balaki' iya'a, ka' nosidamo dodongoanna giigii' meena ka' nosidamo pinsapitanna giigii' alus ba'idek, ka' pinsapitanna giigii' sapu' men kobiit ka' men komaso'na mian.

³Giigii' lipu' ninginummo anggurna men minsidakon i raaya'a mongoloingikon pisuuna. Giigii' tomundo' na tano' balaki' mogora' tii ia, ka' giigii' pobaluk na tano' balaki' sida nokupangon tia wawauna Babel men nongoloingikon pisuuna iya'a.”

⁴Kasi yaku' nongorongor wurung men sambanaan nda'amari surugaa taena, “Uar i kuu mian-Ku! Parerei a kota kanono' kada' i kuu sianta tabalut na wawau ba'idek na mian men isian na kota, dako' i kuu tonsoop men kana'onna balaa' men bo takakonon na kota kanono'!

⁵Gause dosana nolalambunanmo taka langit, ka' Alaata'ala ninginau'mo wawauna men ba'idek iya'a.

⁶Walos i ia koi men ia wawaumo, tarai i ia pinduan paku' koi men ia limangmo. Isii a sasangkirna tia men bo inumon pinduan paku' a kokaraasna tia men ia toropotikonmo bo inuman.

⁷Talalais i ia ka' poposiongo' men koi kobiai'na nompobalaki'na wakana, ka' pintidaa-daawanna men ia limangmo, gause i ia sinampang morobu na noana taena, ‘Yaku' kani'i koi tomundo' wiwine men mamarenta, yaku' taasi' balu ka' i yaku' sian munsuri masiongo'.’

⁸Mbali' iya'a, na lalomna sangilio, ia bo takaionna balaa' koi nggeo, kasiongo'an ka' pololuan. Ka' i ia bo pobabungon tia apu, gause Tumpu Alaata'ala kuasaan bo mungukum i ia.”

⁹Giigii' tomundo' na tano' balaki' men mogora' ka' nongoloingikon pisuuna tia wiwine iya'a, bo mingiwirii ka' mantando'i kota iya'a, kalu i raaya'a mimiile' tibuk matabo' na apu men muntunu kota iya'a.

¹⁰Raaya'a bo kumekerer olo-oloa gause layaonkon kana'onna repaan ka' i raaya'a bo mangaan: “Silaka'! Silaka'mo tuu' i koo, kota Babel, kota men balaki' ka' moonggor. Ukumanmuu baasi sa'angu' jaam kasee narepamo tuu'!”

¹¹Giigii' pobaluk men isian na tano' balaki' uga' wiri ka' masiongo'kon kosilaka'anna wiwine iya'a, gause sianmo isian men bo pingili balukna i raaya'a.

¹²Balu-balukna: mosoni, salaka', watu men umangga', mutiara, toik lenang, toik kakamumu', sutaraa, toik memea' ka' biai' kaliangan kau men mawangi, ka' toropii kaliangan pakakas men wese'na ayop gaja a niwawau, ka' toropii kaliangan pakakas men kau umangga' a niwawau, ka' toropii kaliangan pakakas men tambaga, besi, ka' watu' marmer a niwawau,

¹³kuangna kau ma'asing, rampa, minamina' mawangi, muur ka' kamangian, anggur, likison, tarigu ka' gandum, sapi', domba, kuda tia roda, ata' ka' uga' mian.

¹⁴Raaya'a men mobalu-baluk norobumo na wiwine iya'a taena. “Giigii' upa pore men kikira'am sianmo isian, ka' giigii' men ma'amat nopenta'mo, ka' sianmo rumpakioon soosoodo!”

¹⁵Raaya'a men mobalu-baluk nosidamo mian men kupangon gause daa isian wiwine iya'a. Raaya'a nokumekerer olo-oloa gause layaonkon kana'ionna repaanna. Raaya'a bo wiri ka' tumando',

¹⁶kasi norobu taena, “Silaka'! Silaka'mo tuu' a kota men tolele kani'i! Mansanda' i ia mopake lenang molusa', ka' toik kakamumu' ka' toik memea', ka' mopake mosoni, watu men umangga', ka' mutiara. Kasee tongko' sa'angu' jaam, nopenta'mo a giigii' kupangna iya'a.”

¹⁷Giigii' kapiteen na kapal ka' papalimangna, ka' giigii' mian men lumakit na kapal, ka' giigii' mian men basarakanna na tobui, nokumekerer olo-oloa,

¹⁸ka' nangkakaro' tempo i raaya'a nimiile' tibukna apu men nuntunu kota iya'a taena, “Sianpo no'isian kota sambana men koikoimo tia kota balaki' kani'i!”

¹⁹Mbaka' i raaya'a nunguwuwurkonmo awu na takala'na i raaya'a gause nasiongo' ka' nangkakaro' taena, “Silaka! Silaka'mo tuu' a kota men balaki' kani'i! Kupangna men biai' ninsidakonmo giigii' mian men montombonoi kapal na tobui, nokapangonmo tia kupang men ngga'an, kasee tongko' sa'angu' jaam, giigii' iya'a kabus nopenta'.”

²⁰Bi kamelesan a giigii' isiina surugaa, kai kuu mianna Alaata'ala, poposuu', ka' nabii, gause kota iya'a daa nokobaraba'ianmo! Alaata'ala bo rungukum i ia gause giigii' upa men ia limangmo na ko'omuu.

²¹Noko daa iya'a sa'angu' malaa'ikat men moonggor nengeleengketmo sa'angu' watu men kobalaki'na koi watuna gilingan men balaki', ka' nintibarkon na tobui, kasi norobu taena, “Koi kani'i a bo pintibarkon kota Babel men tolele iya'a. Ia bo tibarkonon bukuan pataka sianmo rumpakion soosoodo.

²²Sianmo pomorongoran laungna kecapi ka' mian manani, ka' mian men munduup poloit tia torompeet. Sianmo sa'angu'po a mian men pande' mangawawau upa-upa rumpakion na ko'oom. Laungna watu pinggilingan uga' sianmo kamporongoran.

²³Ka' baangna boloak sianmo tarang na ko'oom, ka' wurungna wiwine tia moro'one men mosuo' sianmo rongoron na ko'oom. Miaan men mobalu-baluk iya'a tongaan tuu' na tano' balaki', ka' tia duuduuwup i koo mangakali giigii' lipu' na tano' balaki'.”

²⁴Babel ni'ukum gause na kota iya'a nokandapotanmo isian rara'na nabii, ka' na mianna Alaata'ala, ka' rara'na giigii' mian men nipapatei na tano' balaki'.