Read Balantak Wahyu 7 Bible Online

Wahyu 7 - Balantak bible

Wahyu 7

¹Sarataa noporus koiya'a, yaku' nimiile'mo malaa'ikat papaat nokumekerer na papaat timbang puusna tano' balaki'. Raaya'a mantaankon papaat salanna mombuul kada' sianta men mumbusai na katano'an, kabai se' na tobui ka' na kau.

²Kasi yaku' nimiile' sa'angu' malaa'ikat men sambanaan no'umuar na paraas bete'anna ilio. Ia nangawawa o'oosi men ia tombonoi Alaata'ala men tumuo', ka' i ia nengeleelo'kon tia wurung men boolak na malaa'ikat papaat men niposuu' bo pambaraba'i katano'an tio tobui

³taena, “Amo'po baraba'ion a katano'an kabai tobui kabai kau, kalu i kai sianpo nongoosi mianna Alaata'ala na ngere'na i raaya'a koi oosna Alaata'alanta.”

⁴Kasi nibantilkon na ingku' se' isian sa'atu patompulo' ka' papaat loloon mian, na sanda' bense' na lipu' Israel men ni'oosi tia oosna Alaata'ala na ngere'na i raaya'a.

⁵Na bense' ni Yehuda sompulo' rua' loloan, Na bense' ni Ruben sompulo' rua' loloon, Na bense' ni Gad sompulo' rua' loloon,

⁶Na bense' ni Asyer sompulo' rua' loloon, Na bense' ni Naftali sompulo' rua' loloon, Na bense' ni Manasye sompulo' rua' loloon,

⁷Na bense' ni Simeon sompulo' rua' loloon, Na bense' ni Lewi sompulo' rua' loloon, Na bense' ni Isakhar sompulo' rua' loloon,

⁸Na bense' ni Zebulon sompulo' rua' loloon, Na bense' ni Yusuf sompulo' rua' loloon, Na bense' ni Benyamin sompulo' rua' loloon,

⁹Noko daa koiya'a, yaku' nimiile'mo soosoodo mian na sanda' lipu', sanda' bense', sanda' lee' ka' sanda' wurung, men biai' tuu' tamban sian pokoon saa'on. Raaya'a nokumekerer na aropna oruangan kobalaki'an ka' na aropna Anak Domba. Raaya'a mimisok juba bubulak ka' minginton roonana kau.

¹⁰Kasi tia wurung men bukuan, raaya'a mengeleelo'kon taena, “Kita salamatkononna Alaata'ala men no'umoruang na oruangan kobalaki'an ka' Anak Domba!”

¹¹Ka' giigii' malaa'ikat poto kerer nintikumi oruangan kobalaki'an ka' uga' nintikumi tanaas tia siinsiing papaat iya'a. Malaa'ikat iya'a nobanintuurmo ka' notumutuku' rumbuk tano' na aropna oruangan kobalaki'na iya'a ka' nonsoosa' Alaata'ala,

¹²poopoololo' nangaan, taena, “Amin! Tunde' a Alaata'alanta men nipobalaki' ka' pinginti'ianan. Kita tio basukuur na Ko'ona ka' mangangga'i Ia. Ia kuasaan ka' moonggor pataka sidutu. Amin!”

¹³Kasi sa'angu' tanaas iya'a nimikirawar na ingku' taena, “Ime i raaya'a men nojuba bubulak ka' ringkat aana?”

¹⁴Yaku' simbati taengku', “Tongko' i Kuu a men daa ninginti'i.” Liuliu ia norobu na ingku' taena, “Raaya'amo kani'i a mian men daa ningiliumo repaan men dodoa tuu', ka' i raaya'a nantatapimo jubana na rara'na Anak Domba pataka nosida bubulak.

¹⁵Ya'a mbali' i raaya'a kumekerer na aropna oruangan kobalaki'an na Alaata'ala ka' monsoosa' i Ia ilio malom na Laigan-Na. Ka' i Ia men no'umoruang na oruangan kobalaki'an iya'a bo dumodongo ka' montondong i raaya'a.

¹⁶Raaya'a sianmo munsuri mololu tia moro'u, ka' uga' sianmo munsuri pengkar,

¹⁷gause Anak Domba men na tanga-tanga'na oruangan kobalaki'an iya'a, bo montondong ka' mantandan i raaya'a mae' na matana weer men mantarai tutuo' men pore. Ka' Alaata'ala bo mansapui lolu'na i raaya'a.”