Read Baltic Romani Bible 2019 – Библия - Пэ Балтитко Романи чиб (Романэс) 2019 Джиибэ́н 49 Bible Online

Джиибэ́н 49 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Джиибэ́н 49

¹И кхардя́ Яково пэ́скирэ чхавэ́н, и пхэндя́: “Скэдэ́нпэ и мэ роспхэнава тумэ́нгэ, со явэ́ла тумэ́нца пэ дывэса́; со явэ́на анги́л:

²скэдэ́нпэ и шунэ́н, Яково́скирэ чхавэ́, шунэ́н, Израилё, тумарэ́ дадэ́с.

³Рувимо, англатуно́ миро! Ту сан миро зоралыпэ́н и англатуно́ мирэ́ зорьякэ, най патывалэдыр пир мина и най зоралэды́р;

⁴нэ ту сан шумно, сыр пани́, ту на явэ́са тэ припхэнэс явирэ́нгэ, пал-дова́ со ту ги́ян пэ тырэ́-дадэ́скиро чхуибэ́н; ту магирдян миро чхуибэ́н.

⁵Пша́ла Симеоно и Левиё, лэ́нгирэ курталы на тангинэна;

⁶дрэ лэ́нгирэ мысли мэк тэ на дыкхэ́л миро ди, и кэ лэ́нгиро скэдыибэ́н мэк тэ на явэ́л мири́ сла́ва, пал-дова́ со ёнэ дрэ пэ́скири холы́ замардэ́ манушэ́с, и пир пэ́скиро ило́ пиричхиндлэ гурувэскэ жылы;

⁷мэк тэ хасёл лэ́нгири холы́, пал-дова́ со ла́тэ нанэ тангипэ́н, и лэ́нгири бари холы́, пал-дова́ со ёй исын на манушаны; мэ роскэрава пэ паша́ лэн тэ дживэ́н пир Яковостэ, и росчхувава лэн пир Израилё.

⁸Юда! Явэ́на тэ шарэ́н тут тырэ́ пша́ла. Тыро́ васт явэ́ла пэ тырэ́-вэргэнгиро думо; ту́кэ кэрэ́на шэрэ́са кэ пхув тырэ́-дадэ́скирэ чхавэ́.

⁹Тэрно́ шчэр (ле́во) Юда, дорэсыбнастыр, сыр ёв захала, миро чхаво́, ґаздэ́лапэ ёв. Пасия́ ёв, сыр шчэр (ле́во) и сыр шчэриха (львица): кон ґаздэ́ла лэс?

¹⁰На отджала Юдастыр скипетро и законоскиро дыибнари лэ́скирэ трушулэндыр, кэ дава́ часо, пака явэ́ла Раманёскиро (Примирителё), и лэс явэ́на тэ кандэ́н мануша́.

¹¹Ёв припхандэла кэ винаграды́тко (дракхи́тко) кашторо пэ́скирэ ослёнко́с (мегарицорэ́с), и кэ фэдыршо винаграды́тко (дракхи́тко) кашторо пэ́скирэ ослица́кирэ (мегарица́кирэ) чхавэ́с; морэла дрэ мол (вино) пэ́скири и́дя и дрэ грозде́нгиро рат пэ́скиро урибэ́н;

¹²хачона лэ́скирэ якха́ моля́тыр (виностыр), и парнэ́ лэ́скирэ данда́ тхудэстыр.

¹³Завулоно явэ́ла тэ дживэ́л пашы́л морёскиро (дэрьявэ́скиро) брэ́го, кай исын тэрдэ́ па́рмы[15] (корабли), и ко́нцо (яго́ро) лэ́скиро кэ Сидоно.

¹⁴Исахаро исын зорало́ о́сло (мега́ри), саво́ исын пашто́ машкира́л пане́скиро тхадыпэн;

¹⁵и дыкхця́ ёв, со откхиныбэн сыс лачхо́, и со пхув сыс шука́р: и бандякирдя пэ́скирэ псикэ́ ваш пхарипэ́н и лыя́ тэ кэрэ́л буты́ дро плэскирибэн.

¹⁶Дано явэ́ла тэ сэндинэл пэ́скирэ манушэ́н, сыр екх Израилёскирэ родыцэндыр (чангэндыр);

¹⁷Дано явэ́ла сапэса пэ дром, саплыняса пэ дром, сави́ дукхавэла грэскэ ґэро́й адя́кэ, со ману́ш, саво́ бэшто́ уклисто, пэрэ́ла палэ.

¹⁸Пэ тыро́ подрикирибэ́н (помошч) мэ розгинава, Раё Дэ́вла!

¹⁹Гадос, мануша́ сыр халадэ́ явэ́на тэ притасавэн, нэ ёв лэн отчхурдэла пир пе́нты (кхурья́).

²⁰Ваш Асироскэ лэ́скиро маро́ исын древа́н тхуло, и ёв явэ́ла тэ дорэсэл крали́скирэ присма́ки (фришма́ки).

²¹Нефалимо исын сыр шука́р олениха, саво́ пир ило́ ракирэ́ла.

²²Ёза (Иосифо) исын отбарипэн лачхэ́ вэшэскиро, отбарипэн пашы́л джиибна́скири ґаны́нг; лэ́скирэ рандя́ розбарьёнапэ пэ ва́нта;

²³холякирэнас лэс, и дэ́нас карье лукостыр дрэ лэ́стэ и на могиндлэ́ тэ дыкхэ́н пэ лэ́стэ мануша́, савэ́ дынэ́ карье лукостыр;

²⁴нэ яця́пэ зорало́ лэ́скиро лу́ко, и зоралэ́ исын лэ́скирэ-вастэнгирэ маса́, зоралэ́ Яково́скирэ-Дэвлэ́скирэ вастэ́ндыр. Одотхы́р исын Чхупна́ри и Израилёскири тва́рдыма,

²⁵тырэ́-дадэ́скирэ Дэвлэ́стыр, Саво́ помогинэла ту́кэ, и Сарэзорьякирэстыр, Саво́ и бахтякирэ́ла тут вучипна́стыр болыбна́скирэ бахтякирибнаса, хорипнаскирэ бахтякирибнаса, саво́ исын пашто́ дро до́ло, бахтякирибнаса цюцендыр (сосцэндыр) и лочовя́тыр (утробатыр),

²⁶тырэ́-дадэ́скирэ бахтякирибнэнца, савэ́ исын вучэды́р бахтякирибнастыр пхуранэ́ бэргэндыр и лачхипнастыр вечнонэ бэргицэнгиро. Мэк тэ явэ́н ёнэ пэ Ёзаскиро шэро́ и пэ темё (гутуп), саво́ сыс выкэдыно машки́р пэ́скирэ пшалэ́ндэ.

²⁷Вениамино исын рискирибна́скиро рув (януро)[16], пэ зло́ко (ранкоса) явэ́ла тэ хал дова́, со ёв ухтылэ́ла и бэльвэляса явэ́ла тэ роскэрэ́л (тэ делинэл) дова́, со дорэсэ́ла.”

²⁸Ѓа́да, исын сарэ́ Израилёскирэ дэшуду́й ро́дыцы: и ґа́да, со лэ́нгэ пхэндя́ лэ́нгиро дад; и бахтякирдя́ лэн, и дыя́ бахтякирибэ́н лэ́нгэ, кажнонэ́скэ пэ́скиро.

²⁹И припхэндя́ ёв лэ́нгэ, и пхэндя́ лэ́нгэ: “Мэ причхувавапэ кэ пэ́скирэ мануша́; гаравэ́н ман мирэ́ дадэ́нца дрэ ґеба́р (пешчэра), сави́ исын пэ Ефроноскирэ-Хетеяниноскири фэ́лда,

³⁰дрэ ґеба́р (пешчэра), сави́ исын пэ Махпеласкири фэ́лда, со исын анги́л Мамре, пэ Ханаано́скири пхув, сави́ киндя Авраа́мо фэлдаса Ефроностыр Хетеяниностыр ваш пэ́скэ ваш гараибэн;

³¹одо́й гарадэ́ Авраамос и Са́рра, лэскирья ромня́; одо́й гарадэ́ Исаакос и Ревека, лэскирья ромня́; и одо́й гарадэ́ Лия;

³²дая́ фэ́лда и ґеба́р (пешчэра), сави́ сыс пэ ла́тэ, сыс киндлы Хетее́нгирэ чхавэ́ндыр.”

³³И пирияця́ Яково тэ ракирэ́л пэ́скирэ чхавэ́нгэ, и чхудя́ кхэтанэ́ пэ́скирэ ґэра́ пэ чхуибэ́н, и мыя́, и причхудяпэ кэ пэ́скирэ мануша́.