Read Baltic Romani Bible 2019 – Библия - Пэ Балтитко Романи чиб (Романэс) 2019 1 Паралипоменоно 12 Bible Online

1 Паралипоменоно 12 - Baltic Romani Bible 2019 – Библия - Пэ Балтитко Романи чиб (Романэс) 2019 bible

1 Паралипоменоно 12

¹И адалэ́ мануша́ адя́кэ-паць явнэ́ кэ Дави́до дро Секелаго, ке́ли ёв ишчо (инкэ́) гарадёлас (чхакирэласпэ) кригал Саулостыр, чхавэстыр Кисоскирэстыр, и сыс муршканэндыр, савэ́ подынэ васт (помогиндлэ) дро марибэ́н,

²лэ́ндэ сыс луки, ёнэ и чхурдэнас зэрвонэ (левонэ) и чачэ́ (правонэ) вастэ́са бара́ и, ёнэ дэ́нас карье лукэндыр. Ёнэ сыс пшалэ́ндыр Саулоскирэндыр, Вениаминостыр:

³шэрало́ сыс Ахиезе́ро, пал лэ́стэ сыс Иоа́со, пал лэ́стэ сыс чхавэ́ Шемаяскирэ Гиватыр; Езие́ло и Феле́то; чхавэ́ Азмавефоскирэ; Бераха и Иегу Анафофостыр;

⁴Ишмаия Гаваонитянино, муршари трияндэндыр и барыдыро́ пэ трияндэндэ; Ереме́ё, Яхазиило, Иозавадо Гедератыр.

⁵Елузаё, Еримофо, Веалия, Шемария, Сафатия Харифиянино;

⁶Елкана, Ишыяху, Азариило, Иоезе́ро и Иошавамо, Кореяни;

⁷и Иоела и Зевадия, чхавэ́ Ерохамоскирэ Гедоростыр.

⁸И вари-савэ́ мануша́ Гадитянэндыр пиригинэ́ кэ Дави́до дрэ фо́рья зоралэ́ тынэ́нца, пэ чхучи́ пхув, мануша́ муршканэ́, марибны́тка, савэ́ндэ сыс шчы́ты и чхурдыбнытка бустя́ (коп΄и); лэ́ндэ сыс муя́ сыр шчэрэндэ (левэндэ) — муя́ лэ́нгирэ, и ёнэ сыс сыгна сыр серны пэ бэ́рги.

⁹Шэрало́ Езеро, яви́р Овадия, три́то Елиаво,

¹⁰шта́рто Мишмана, па́нджто Ереме́ё,

¹¹шо́вто Афаё, эфта́то (битринэ́нгиро дэ́што) Елиэло,

¹²охто́то (бидуе́нгиро дэ́што) Иоханано, еня́то Елзавадо,

¹³дэ́што Ереме́ё, дэшупе́рво Махбанаё.

¹⁴Ёнэ сыс шэралэ́ чхавэ́ндыр Гадоскирэндыр пэ халадэ́ндэ: тыкнэды́р пэ шэла́, и барыдыро́ пэ тысёнцы.

¹⁵Ёнэ пиригинэ́ Иорда́но дро пэ́рво чхон, ке́ли ёв выджа́ла пэ́скирэ бэргэндыр, и рострадынэ сарэ́н манушэ́н, савэ́ дживдэ́ пэ до́ло, кэ васто́ко и кэ западо (кэ пал-паня).

¹⁶И явнэ́ адя́кэ-паць вари-савэ́ мануша́ чхавэ́ндыр Вениаминоскирэндыр и Юдаскирэндыр дрэ фо́рья зоралэ́ тынэ́нца кэ Дави́до.

¹⁷Дави́до гия ангил пэ стре́ч лэ́нгэ и пхэндя́ лэ́нгэ: “Ко́ли раманёса (миро́са) явнэ́ тумэ́ кэ мэ, соб (кай) тэ помогинэн ма́нгэ, тэды мэк тэ явэ́л ма́ндэ тумэ́нца екх ило́; а ко́ли ваш дова́, соб (кай) хохавэс тэ отдэ́н ман вэргэ́нгэ мирэнгэ, то дыкхи́, со нанэ дош пэ мирэ́ васта́, тэды мэк тэ дыкхэ́л Дэвэ́л амарэ́ дадэ́нгиро и тэ розсэндякирэл.”

¹⁸Тэ́ньци згия ду́хо (фа́но) пэ Амасаёстэ, кон сыс шэрало́ пэ трия́нда, и пхэндя́ ёв: “Рама́нё (миро) ту́кэ, Дави́дэ, и тэ явэ́л ту́са, чхаво́ Есеёскиро; рама́нё ту́кэ, и рама́нё помогибнаскирэнгэ тырэнгэ; пал-дова́ со помогинэла ту́кэ Дэвэ́л тыро́.” Тэды прилыя́ лэн Дави́до и чхудя́ лэн шэралэнца пэ халадэ́ндэ.

¹⁹И вари-савэ́ мануша́ Манасия́скирэ родо́стыр пиригинэ́ кэ Дави́до, ке́ли ёв гия́ Филистимлянэнца пэ марибэ́н пэ Саулостэ, нэ на помогиндя лэ́нгэ, пал-дова́ со шэралэ́ Филистимска, порадины, отбичхадэ лэс, ракири́: “Пэ амаро́ шэро́ ёв пириджала кэ хула́й лэ́скиро, Са́уло.”

²⁰Ке́ли ёв рисия́ дро Секелаго, тэды пиригинэ́ кэ ёв Манасиянэндыр: Аднахо, Иозавадо, Иедиаэло, Михаило, Иозавадо, Елигу и Цыльфаё, тысёнцэнгирэ барыдыра́ Манасиянэндэ.

²¹И ёнэ помогиндлэ Давидо́скэ проти барэ́ кэ дар халадыбэна, пал-дова́ со сарэ́ адалэ́ мануша́ сыс муршарья и сыс барыдыра́ пэ халадэ́ндэ.

²²Адя́кэ кажнонэ́ дывэсэса явэ́нас кэ Дави́до тэ подэн васт кэ дова́, со лэ́скиро халадыбэ́н яця́ баро́, сыр баро́ халадыбэ́н Дэвлэ́скиро.

²³Ѓа́да, ци бут сыс шэралэ́ пэ халадэ́ндэ, савэ́ явнэ́ кэ Дави́до дро Хевро́но, соб (кай) тэ пиридэ́н лэ́скэ кралипэ́н Саулоскиро, пир Ра́скирэ-Дэвлэ́скиро лав:

²⁴чхавэ́н Юдаскирэндыр, савэ́ лыджинэ́ шчы́то и чхурдыпнытко буст (коп΄ё), сыс шов тысёнцы охтошэла скэдымэ пэ марибэ́н;

²⁵чхавэ́ндыр Симеоноскирэндыр, манушэ́н муршканэн, дрэ халадыбэ́н сыс охто́ тысёнцы и шэл;

²⁶чхавэ́ндыр Левиёскирэндыр сыс штар тысёнцы шовшэла́,

²⁷и Иодаё, тхага́ри кхэритконэ́ родо́стыр Аароноскирэстыр, и лэ́са сыс трин тысёнцы эфташэла́;

²⁸и Садоко, муршкано́ тэрно́ ману́ш, и ро́до лэ́скиро сыс биш тэ дуй барыдыра́;

²⁹чхавэ́ндыр Вениаминоскирэндыр, пшалэ́н Саулоскирэн, сыс трин тысёнцы, — нэ ишчо (инкэ́) бут лэ́ндыр рикирдэпэ кэ кхэр Саулоскиро;

³⁰чхавэ́ндыр Ефремоскирэндыр сыс биш тысёнцы охтошэла манушэ́н муршканэн, манушэ́н славутнонэн пир пэ́скирэ ро́ды;

³¹пашэ́-родыцо́стыр Манасияскирэстыр сыс дэшуохто тысёнцы, савэ́ сыс пир лав выкхардэ, соб (кай) тэ джа́н тэ чхувэ́н Давидо́с крали́са;

³²чхавэ́ндыр Исахароскирэндыр явнэ́ мануша́ годьварэ́, савэ́ джиндлэ́, со, ке́ли трэиндя́ тэ кэрэ́н Израилёскэ, — лэн сыс дуйшэла́ шэралэн, и сарэ́ пша́ла лэ́нгирэ рикирдэпэ лэ́нгирэ лавэ́скэ;

³³родыцо́стыр Завулоноскирэстыр скэдынэ́ пэ марибэ́н, савэ́ рикирдэ кажно халадытко марды́тко, сыс пандждэша́ тысёнцы, дрэ строё екхэ-дие́нгиро;

³⁴родыцо́стыр Нефалимоскирэстыр сыс тысёнцо шэралэ́; лэ́нца сыс трия́нда эфта́ тысёнцы шчытэнца и чхурдыбнытконэ бусте́нца;

³⁵родыцо́стыр (чангатыр) Даноскирэстыр, савэ́ сыс скэдынэ́ пэ марибэ́н, сыс биш тэ охто́ тысёнцы шовшэла́;

³⁶Асиростыр халадэ́н, скэдынэ́ пэ марибэ́н, сыс штардэша́ тысёнцы;

³⁷пал Иорданостыр, родыцо́стыр Рувимоскирэстыр, Гадоскирэстыр и пашы́л-родыцо́стыр Манасияскирэстыр, сыс шэл биш тысёнцы, кажно халадытконэ мардытконэнца.

³⁸Сарэ́ адалэ́ халадэ́, дро строё, сарэ́ илэ́стыр явнэ́ дро Хевро́но тэ чхувэ́н крали́са Давидо́с пэ саро́ Израилё. Адя́кэ и сарэ́ яви́р Израильтя́ни сыс дро екх ду́хо (фа́но), соб (кай) тэ чхувэ́с крали́са Давидо́с.

³⁹И сыс ёнэ одо́й кэ Дави́до трин дывэса́, ханэ́ и пинэ́; пал-дова́ со лэ́нгирэ пша́ла саро́ кэрдэ́ ваш лэ́нгэ;

⁴⁰адя́кэ-паць и пашатунэ́ кэ ёнэ, аж кэ ро́дыцо Исахароскиро, Завулоноскиро и Нефалимоскиро, янэ́нас саро́ хабэ́н пэ ослэндэ, и верблюдэндэ, и гурувэндэ: яржо́, инжыро, и зюмо, и мол (вино), и еле́ё, и бут барэ́ и тыкнэ́ кхэри́тка мурдала́; адя́кэ, сыр ра́дыма сыс ваш Израилё.